أَڢِسَاوَا 6 - أَتَّوْرَتْ دَ أَنَّبَاوَا

ذَمَنْ یَیَ دَ إِيَايٜىٰنْسُ

¹ كُو یَیَ، سَبُواْدَ عُبَنْ‌غِجِ كُيِ وَ إِيَايٜىٰنْكُ بِيَيَّ، دُواْمِنْ وَنَّنْ شِينٜىٰ دَيْدَيْ؞

² دُواْكَا تَڢَارِ وَدَّ عَكَ حَطَ دَ أَلْڧَوَرِ عِتَثٜىٰ، ‏«‏غِرْمَمَ بَابَنْكَ دَ مَامَرْكَ،

³ دُواْمِنْ كَسَامِ ذَمَنْ لَاڢِيَ، كَكُمَيِ ڟَوُانْ رَيْ عَدُونِيَا؞»‏

⁴ كُو عُبَنِّ، كَدَكُسَا یَیَنْكُ سُيِ ڢُشِے، سَيْدَيْ كُغُواْيٜىٰسُ دَ حُواْرُواْ دَ غَرْغَطِے تَهَنْيَرْ عُبَنْ‌غِجِ؞

بَايِ دَ إِيَايٜىٰنْ‌غِجِنْسُ

⁵ كُو بَايِ، كُيِ بِيَيَّ غَ وَطَنْدَ سُكٜىٰ إِيَايٜىٰنْ‌غِجِنْكُ نَدُونِيَرْ نَنْ؞ كُنُونَ مُسُ حَلِنْ بَنْ غِرْمَ، كُنَيِ مُسُ أَمِنْثِ ثِكِنْ دُكَنْ كُواْمٜىٰ دَ ذُوثِيَا طَيَ كُمَ، كَمَرْ يَدَّ كُكٜىٰيِ وَ أَلْمَسِيحُ؞

⁶ كَدَ كُيِ بِيَيَّ تَغَنِنْ عِدُواْ، كَمَرْ وَطَنْدَ سُكٜىٰ نٜىٰمَنْ يَبُواْ دَغَ وُرِنْ مُتَنٜىٰ، عَمَّا دَيَكٜىٰ كُو بَايِنْ أَلْمَسِيحُ نٜىٰ، كُعَيْكَتَ أَبِنْدَ اللَّهْ يَكٜىٰسُواْ دَ ذُوثِيَا طَيَ؞

⁷ كُيِ عَيْكِنْكُ نَحِدِمَ دَ ݣَكْݣَوَنْ نُڢِ، كَمَرْ غَ عُبَنْ‌غِجِ كُكٜىٰيِ، بَمُتَنٜىٰبَ؞

⁸ كُنْ سَنِ ثٜىٰوَ كُواْوَنٜىٰ أَلْحٜىٰرِنْ دَ مُتُمْ يَيِ، كُواْ شِے بَاوَ نٜىٰ كُواْ طَنْ غِدَا نٜىٰ، عُبَنْ‌غِجِ ذَيْبَاشِ لَادَنْسَ؞

⁹ كُو إِيَايٜىٰنْ‌غِجِ، كُو مَا كُيِ وَبَايِنْكُ حَكَ؞ كُدَيْنَ بَاسُ ڟُواْرُواْ، تُنْدَيَكٜىٰ كُنْسَنِ كُو دَسُو دُكْ كُنَدَ عُبَنْ‌غِجِ أَ سَمَ، شِيكُوَ بَايَ نُونَ بَمْبَنْثِ؞

كَايَنْ كَارِيَ نَيَاڧِ

¹⁰ عَڧَرْشٜىٰ كُمَ كُڧَرْڢَڢَ كَنْكُ ثِكِنْ عُبَنْ‌غِجِ دَ كُمَ ثِكِنْ ڧَرْڢِنْ إِيكُوانْسَ؞

¹¹ كُطَوْرَ وَجِكِنْكُ دُكَنْ كَايَنْ كَارِيَ نَيَاڧِ وَنْدَ اللَّهْ يَبَايَرْ دُواْمِنْ كُإِيَ ڟَيَاوَا كُيِ غَابَادَ دَبَرُنْ شَيْطَنْ؞

¹² أَيْ، بَ دَ یَنْ أَدَمْ مَاسُ نَامَ دَ جِنِ مُكٜىٰ كُواْكَوَبَ، عَمَّا دَ مُوغَيٜىٰنْ رُوحُواْحِ نٜىٰ نَسَمَّيْ دَ مَاسُ مُلْكِ دَ إِيكُواْكِ دَ وَطَنْدَ مُلْكٍ زَامَانِنَّنْ مَيْ دُهُ يَكٜىٰ حَنُّنْسُ؞

¹³ سَبُواْدَ حَكَ سَيْ كُطَوْكِ دُكَنْ كَايَنْ كَارِيَ نَيَاڧِ وَنْدَ اللَّهْ يَبَايَرْ دُواْمِنْ كُڟَيَ أَ مُوغُوَرْ رَانَرْ نَنْ، حَرْ بَايَنْدَ كُكَ غَمَ كُواْمٜىٰ دَكُواْمٜىٰ، أَ سَامٜىٰكُ أَڟَيٜىٰ؞

¹⁴ سَبُواْدَ حَكَ ڢَا كُڟَيَ دَ ڧَرْڢِے، غَسْكِيَ تَذَمَ طَمَرَرْكُ، أَدَلْثِے يَذَمَ رِغَرْ ڧَرْڢٜىٰنْكُ تَيَاڧِ؞

¹⁵ شِرِنْ كَيْ لَابَرِ مَيْ دَاطِے نَسَلَمَ، يَذَمَ كَمَرْ تَاكَلْمَ عَڧَڢَاڢُنْكُ؞

¹⁶ بَنْدَ حَكَمَا، بَرِ بَنْ‌غَسْكِيَ تَذَمَ غَرْكُوَرْكُ وَدَّ ذَاكُ طَوْكَ كُكَشٜىٰ كِبِيُواْيِ نَوُتَرْ مُوغُنَّنْ دَ عِتَ؞

¹⁷ كُطَوْكِ هُولَرْ ݣُونُواْ، وَتُواْ ثٜىٰتُواْ دَ كُمَ تَكُواْبِنْ رُوحُ، وَتُواْ كَلْمَرْ اللَّهْ؞

¹⁸ كُنَ يِنْ أَدُّعَ كُلُّمْ تَوُرِنْ إِيكُوانْ رُوحُ، كُنَ يِنْ ضُواْڧُواْ إِرِ إِرِ؞ دَ نُڢِ حَكَ، كُيِ ڟَرُواْ دَ إِيَاكَرْ نَاثِيَ يَايِنْ دَ كُكٜىٰ أَدُّعَ سَبُواْدَ ڟَرْكَكَا؞

¹⁹ نِے مَا كُيِ مِنِ أَدُّعَ، إِنْ سَامِ بَيْوَرْ يِنْ مَغَنَ بَا ڟُواْرُواْ، إِنْ سَنَرْدَ أَسِيرِنْ لَابَرِ مَيْ دَاطِے غَ مُتَنٜىٰ؞

²⁰ تَدَلِيلِنْ وَنَّنْ لَابَرِ مَيْ دَاطِے نٜىٰ نَذَمَ وَكِيلِ، كُواْدَيَكٜىٰ إِنَ طَوْرٜىٰ!‏ كُيِ مِنِ أَدُّعَ دُواْمِنْ دُكْ لُواْكَثِنْ دَ نَكٜىٰيِنْ وَعَظِ إِنْيِشِ بَا ڟُواْرُواْ كَمَرْ يَدَّ يَكَمَاتَ إِنْيِ؞

مَغَنَرْ ڧَرْشٜىٰ

²¹ تِكِكُسْ، طَنْعُوَنْمُ وَنْدَ مُكٜىٰ ڧَوْنَ، مَيْ حِدِمَ ثِكِنْ أَمِنْثِ كُمَ غَ عُبَنْ‌غِجِ، ذَيْ سَنَرْ دَكُو كُواْمٜىٰ دُواْمِنْ كُو مَا كُسَنْ يَدَّ نَكٜىٰ دَ لَاڢِيَ دَ كُمَ حَلِنْ دَ نَكٜىٰ ثِكِ؞

²² نَا عَيْكٜىٰشِ غَرٜىٰكُ مُسَمَّنْ دُواْمِنْ كُسَنْ يَدَّ مُكٜىٰ، يَكُمَ ڧَرْڢَڢَ مُكُ ذُوثِيَا؞

²³ یَنْعُوَ، سَلَمَ دَغَ اللَّهْ عُبَادَ عُبَنْ‌غِجِ عِيسَىٰ أَلْمَسِيحُ تَكَسَنْثٜىٰ عَثِكِنْكُ، تَرٜىٰدَ ڧَوْنَ دَ بَنْ‌غَسْكِيَ؞

²⁴ أَلْحٜىٰرِ يَكَسَنْثٜىٰ تَرٜىٰدَ دُكَنْ مَاسُ ڧَوْنَرْ عُبَنْ‌غِجِنْمُ عِيسَىٰ أَلْمَسِيحُ دَ ڧَوْنَ مَرَرْ ڧَارٜىٰوَ؞ أَمِينْ؞