أَڢِسَاوَا 4 - أَتَّوْرَتْ دَ أَنَّبَاوَا

ذَمَنْ طَيَنْتَكَ

¹ سَبُواْدَ حَكَ، نِے دَ نَكٜىٰ ثِكِنْ كُرْكُكُ سَبُواْدَ بِنْ عُبَنْ‌غِجِ، إِنَ ضُواْڧُوانْكُ كُيِ ذَمَنْدَ يَدَاثٜىٰ دَ دَرَجَرْ كِرَنْ دَ عَكَيِ مُكُ؞

² كُلُّمْ كُكَسَنْثٜىٰ دَ تَوَلِعُ دَ سَوْڧِنْ كَيْ دَ حَڧُرِ، كُكُمَ يَرْدَ دَ جُونَ ثِكِنْ ڧَوْنَ؞

³ كُيِ ڨُوذُواْ سُواْسَيْ كُكِيَايٜىٰ طَيَنْتَكَرْ نَنْ دَ رُوحُ يَبَاكُ، تَوُرِنْ سَلَمَرْ دَ تَطَوْرٜىٰكُ تَرٜىٰ؞

⁴ جِكِے طَيَ نٜىٰ، رُوحُ مَيْ ڟَرْكِے كُمَ طَيَ نٜىٰ؞ حَكَكُمَ أَݣَويْ سَا ذُوثِيَارْ نَنْ طَيَ وَنْدَ عَكَ كِرَاكُ دُواْمِنْسَ؞

⁵ عُبَنْ‌غِجِ طَيَ، بَنْ‌غَسْكِيَ طَيَ، كُمَ بَڢْتِسْمَ طَيَ،

⁶ اللَّهْ طَيَ، وَنْدَ شِے عُبَنْ دُكَنْ مُتَنٜىٰ، وَنْدَ يَكٜىٰ عَبِسَ دُكَ، تَوُرِنْ دُكَ، عَثِكِنْ دُكَ كُمَ؞

⁷ عَمَّا أَنْبَا كُواْوَنّٜىٰنْمُ بَيْوَرْسَ ڠُورْڠُودُوانْ يَوَنْ أَلْحٜىٰرِنْ أَلْمَسِيحُ؞

⁸ كَمَرْ يَدَّ كَلْمَرْ اللَّهْ تَثٜىٰ، ‏«‏سَعَدَّ يَهَوْ سَمَ يَطَوْكِ وَطَنْدَ يَكَامَ تَرٜىٰ دَشِ، يَكُمَيِ وَیَنْ أَدَمْ بَيْوَ إِرِ إِرِ؞»‏

⁹ مٜىٰ عَكٜىٰ نُڢِ دَ ‏«‏يَهَوْ»‏؟ أَنَ نُونَ ثٜىٰوَ دَ ڢَرْكُواْ يَسَوْكَ حَرْ ذُوَا ثَنْ ڧَرْڧَشِنْ ڧَسَا!‏

¹⁰ شِ وَنْدَ يَسَوْكَ طِنْ، شِينٜىٰ كُمَ يَهَوْ بِسَ دُكَنْ سَمَّيْ، دُواْمِنْ يَثِكَ سَمَ دَ ڧَسَا دُكَ؞

¹¹ شِينٜىٰ كُمَ يَيِ وَیَنْ أَدَمْ بَيْوَ؞ غَ وَطَنْسُ يَبَاسُ ذَمَنْ مَنْذَنِّے، وَطَنْسُ ذَمَنْ أَنَّبَاوَا، وَطَنْسُ ذَمَنْ مَاسُ شٜىٰلَرْ لَابَرِ مَيْ دَاطِے، وَطَنْسُ ذَمَنْ مَكِيَايَ دَ مَاسُ كُواْيَرْوَا؞

¹² يَيِ وَنَّنْ دُواْمِنْ يَشِرْيَ ڟَرْكَكَا سُيِ مَسَ عَيْكِنْ حِدِمَ دُواْمِنْ أَغِنَ جِكِنْ أَلْمَسِيحُ؞

¹³ ذَاعَ ثِيغَبَ حَكَ حَرْ دُكَنْمُ ذَامُكَيْ غَ ذَمَنْ طَيَنْتَكَ تَبَنْ‌غَسْكِيَ، غَ ذَمَنْ طَيَنْتَكَ كُمَ ثِكِنْ سَنِنْ طَنْ اللَّهْ؞ ذَامُ ذَمَ ثِكَكُّنْ مُتَنٜىٰ، مُكُمَ كَيْ مَڟَيِ نَدُكَنْ ثِكَرْ أَلْمَسِيحُ؞

¹⁴ أَنْيِ وَنَّنْ كُوَ دُواْمِنْ كَدَ مُكُواْمَ حَلِنْ يَارَا، كُواْ مُذَمَ كَمَرْ وَطَنْدَ عَكٜىٰ يَٰوُاْ دَ حَنْكَلِنْسُ، إِسْكَرْ كُواْوَثٜىٰ كُواْيَرْوَا تَنَ تُورَسُ تَنَ طَوْكَرْ حَنْكَلِنْسُ، مُتَنٜىٰ مَاسُ وَيُواْ كُمَ سُنَ رُوطِنْسُ سُنَ ثُوتَرْسُ؞

¹⁵ مَيْمَكُوانْ حَكَ سَيْ مُڢَطِ غَسْكِيَ ثِكِنْ ڧَوْنَ، مُيِ غِرْمَ ثِكِنْ أَلْعَمُرَنْمُ دُكَ حَرْ مُكَيْ غَ حَلِنْ أَلْمَسِيحُ وَنْدَ شِينٜىٰ كَيْ نَجِكِنْسَ، جَمَعَرْ مَاسُبِے؞

¹⁶ دُواْمِنْ شِينٜىٰ يَكٜىٰ مُلْكٍ دُكَنْ غَٻُواْٻِنْ جِكِے؞ سُنْ حَطُ سُنَ رِڧٜىٰ دَ جُونَ تَوُرِنْ عَيْكِنْ كُواْوَثٜىٰ جِجِيَ، حَرْ تَوُرِنْ عَيْكِنْ كُواْوَثٜىٰ غَٻَ دَيْدَيْ جِكِنْ يَكٜىٰ ڧَارَ غِرْمَ، يَنَ غِنُوَ دَ حَلِنْ ڧَوْنَ؞

سَابُوانْ رَيْ ثِكِنْ أَلْمَسِيحُ

¹⁷ تُواْ، إِنَ دَيْ ڢَطَا مُكُ، أَيْ، غَرْغَطِے نٜىٰ نَكٜىٰيِ مُكُ ثِكِنْ سُونَنْ عُبَنْ‌غِجِ ثٜىٰوَ كَدَ كُيِ رَايُوَا كَمَرْ مَرَسَ سَنِنْ اللَّهْ، مَاسُ تُنَانِنْ بَنْظَ؞

¹⁸ ذُوثِيَارْسُ ثِكٜىٰ دَ دُهُ تَكٜىٰ؞ أَنْ كُمَ رَبَسُ دَ رَيْ وَنْدَ اللَّهْ يَكٜىٰ بَايَرْوَ، سَبُواْدَ جَاهِلْثِنْ دَيَكٜىٰ ثِكِنْسُ تَدَلِيلِنْ تَوْرِنْ كَنْسُ؞

¹⁹ غَا كُوَ رَشِنْ كُنْيَا غَرٜىٰسُ؞ سُنْ بَادَ كَنْسُ غَ يِنْ لَلَتَ، سُنَ شَعَوَرْ يِنْ كُواْوَثٜىٰ إِرِنْ ڧَظَنْتَا؞

²⁰ وَنَّنْ بَا شِينٜىٰ أَبِنْدَ كُكَ كُواْيَ غَمٜىٰدَ أَلْمَسِيحُ بَ!‏

²¹ نَا تَبَّتَا أَنْبَاكُ لَابَرِنْسَ؞ دَيَكٜىٰ كُو مُتَنٜىٰنْسَ نٜىٰ، أَنْكُواْيَ مُكُ غَسْكِيَرْ دَتَكٜىٰ ثِكِنْ عِيسَىٰ؞

²² أَيْ، أَبِنْدَ عَكَ كُواْيَ مُكُ، شِينٜىٰ كُيَرْ دَ حَلِنْ مُتُنْتَكَ وَنْدَ كُكٜىٰ ثِكِ أَدَا، حَلِنْ دَيَكٜىٰ لَلَثٜىٰوَ سَبُواْدَ سُوانْ أَبُبُوَ مَاسُ رُوطُ؞

²³ يَا كَمَاتَ أَ سَابُنْتَا تُنَانِنْكُ دَ حَنْكَلِنْكُ؞

²⁴ كُطَوْكِ سَابُوانْ حَلِنَّنْ دَ اللَّهْ يَحَلِتَّ بِسَغَ كَمَنِّنْ كَنْسَ؞ حَلِنَّنْ كُوَ، يَا بَيَّنَ ثِكِنْ أَدَلْثِے دَ ذَمَنْ ڟَرْكِے؞

²⁵ سَبُواْدَ حَكَ سَيْ كُرَبُ دَ ڧَضْيَا!‏ كُواْوَ يَدِنْ‌غَ ڢَطَا وَمَڨُوبْثِنْسَ غَسْكِيَ، غَمَا دُكَنْمُ غَٻُواْٻِنْ جُونَ نٜىٰ؞

²⁶ إِنْ كُنْيِ ڢُشِے، كَدَ يَكَيْكُ غَ ذُنُوبِ؞ كَدَ مَا ڢُشِنْكُ يَدَطٜىٰ يَكَيْ حَرْ رَانَ تَڢَاطِ؞

²⁷ كَدَ كُمَ كُبَا شَيْطَنْ وَتَ دَامَ؞

²⁸ كَدَ مَيْسَاتَا يَڧَارَ يِنْ سَاتَا؞ أَ مَيْمَكُوانْ حَكَ سَيْ يَيِ عَيْكِنْ غَسْكِيَ دَ حَنُّنْسَ، حَرْ دَ ذَيْسَامِ وَنِ أَبِنْدَ ذَيْ عِيَ تَيْمَكُوانْ وَطَنْدَ بَاسُ دَشِ؞

²⁹ كَدَ وَنِ ڧَظَامِنْ ذَنْثٜىٰ يَڢِتَ دَغَ بَاكِنْكُ، سَيْدَيْ إِرِنْ مَغَنَرْ دَ تَكٜىٰدَ أَمْڢَانِ دُواْمِنْ ڧَرْڢَڢَاوَرْ جُونَ بِسَغَ بُڧَاتَرْكُ؞ تَهَكَ مَغَنَرْكُ ذَاتَ ذَمَ دَ أَمْڢَانِ غَ مَاسُ جِنْتَ؞

³⁰ كُكُمَ كُلَ ڢَا، كَدَ كُٻَاتَوَ رُوحُ مَيْ ڟَرْكِے نَ اللَّهْ رَيْ، غَمَا شِے عَلَمَرْ شَيْدَ نٜىٰ نَ اللَّهْ عَكَنْكُ دَ ذَيْ نُونَ أَ رَانَرْ ڢَنْسَ ثٜىٰوَ كُو نَاسَنٜىٰ؞

³¹ كُرَبُ دَ كُواْوَنٜىٰ إِرِنْ طَاثِنْ رَيْ دَ هَوْشِ دَ ڢُشِے دَ ڢَطَ دَ ٻَاتَ سُونَ دَ كُواْوَثٜىٰ إِرِنْ ڧِيَيَّرْ ذُوثِيَا؞

³² كُيِ وَجُونَ كِرْكِ، كُجِ تَوْسَيِنْ جُونَ، كُيَاڢٜىٰ وَجُونَ كَمَرْ يَدَّ اللَّهْ يَيَاڢٜىٰ مُكُ تَوُرِنْ أَلْمَسِيحُ؞