أَڢِسَاوَا 3 - أَتَّوْرَتْ دَ أَنَّبَاوَا

حِدِمَرْ دَ بُلُسْ يَيِ وَ وَطَنْدَ بَا يَهُودَاوَا بَ

¹ دُواْمِنْ حَكَ، نِے بُلُسْ، نَذَمَ طَنْ كُرْكُكُ سَبُواْدَ أَلْمَسِيحُ عِيسَىٰ دُواْمِنْ أَمْڢَانِنْ كُو وَطَنْدَ بَا يَهُودَاوَا بَ؞

² نَتَبَّتَا كُنْ جِلَابَرِ يَدَّ اللَّهْ، عَثِكِنْ أَلْحٜىٰرِنْسَ، يَبَانِ بَيْوَ تَيِنْ حِدِمَرْ نَنْ دُوانْ تَيْمَكُوانْكُ،

³ وَتُواْ، يَدَّ تَوُرِنْ رُعُيَ اللَّهْ يَسَنَرْ دَنِے أَسِيرِنْ نُڢِنْسَ كَمَرْ يَدَّ نَارِغَا نَا رُبُوتَ لَابَرِنْسَ عَتَڧَيْثٜىٰ؞

⁴ عِدَنْ كُوَ كُنْ كَرَنْتَ وَنَّنْ، ذَاكُ عِيَ غَانٜىٰ دَ أَبِنْدَ نَسَنِ غَمٜىٰدَ أَسِيرِنْ أَلْمَسِيحُ؞

⁵ أَ زَامَانِنْ دَا بَعَغَيَ وَ یَنْ أَدَمْ وَنَّنْ بَ، كَمَرْ يَدَّ يَنْذُ اللَّهْ يَبَيَّنَ وَ مَنْذَنِّےنْسَ مَاسُ ڟَرْكِے دَ أَنَّبَاوَا مَاسُ ڟَرْكِے تَوُرِنْ رُوحُ؞

⁶ أَسِيرِنْ شِينٜىٰ، تَوُرِنْ لَابَرِ مَيْ دَاطِے نَ أَلْمَسِيحُ عِيسَىٰ، سُو وَطَنْدَ بَا يَهُودَاوَا بَ سُنْ ذَمَ أَبُواْكَنْ غَادُواْ تَرٜىٰدَمُو يَهُودَاوَا؞ سُو دَ مُو مُنْ ذَمَ كَمَرْ غَٻُواْٻِنْ جِكِے طَيَ نٜىٰ؞ سُو مَا سُنَدَ رَبُوانْسُ ثِكِنْ أَلْڧَوَرِنْ دَ اللَّهْ يَيِ مَنَ تَوُرِنْ أَلْمَسِيحُ عِيسَىٰ؞

⁷ أَنْ كُوَ مَيْدَنِ مَيْ حِدِمَرْ وَنَّنْ لَابَرِ مَيْ دَاطِے بِسَغَ بَيْوَرْ دَ عَكَيِ مِنِ، وَتُواْ أَلْحٜىٰرِنْ دَ اللَّهْ يَبَانِ تَوُرِنْ إِيكُوانْسَ، إِيكُوانْ دَيَكٜىٰ عَيْكِ عَثِكِنَ؞

⁸ كُواْدَيَكٜىٰ نِنٜىٰ مَڢِے ڧَنْڧَنْتَ ثِكِنْ ڟَرْكَكَا، نِے عَكَبَا وَنَّنْ بَيْوَ مَيْ دَرَجَ، إِنْيِ وَ وَطَنْدَ بَا يَهُودَاوَا بَ وَعَظِنْ لَابَرِ مَيْ دَاطِنَّنْ عَيَلْوَثٜىٰ غَمٜىٰدَ أَلْمَسِيحُ، وَنْدَ بَعَ عِيَيِنْ لِسَّڢِنْسَ؞

⁹ دُواْمِنْ كُمَ إِنْ بَيَّنَ وَ دُكَنْ مُتَنٜىٰ يَدَّ اللَّهْ يَكٜىٰ عَيْكَتَ شِرِنَّنْ نَأَسِيرِ وَنْدَ شٜىٰكَرَا دَ شٜىٰكَرُ يَكٜىٰ عَٻُواْيٜىٰ أَوُرِنْ اللَّهْ، وَنْدَ يَحَلِثِّ دُكَنْ أَبُبُوَ؞

¹⁰ نُڢِنْسَ شِينٜىٰ يَنْذُ تَوُرِنْ جَمَعَرْ مَاسُبِے، أَ سَنَرْدَ حِكِمَرْ اللَّهْ إِرِ إِرِ غَ مَاسُ مُلْكِ دَ إِيكُواْكِ أَ سَمَّيْ؞

¹¹ وَنَّنْ كُوَ أَنْيِشِنٜىٰ بِسَغَ نُڢِنَّنْ دَ اللَّهْ يَنُڢَ تُنْدَغَ ڢَرْكُواْ، يَكُمَ عَيْكَتَ ثِكِنْ أَلْمَسِيحُ عِيسَىٰ عُبَنْ‌غِجِنْمُ؞

¹² ثِكِنْسَ نٜىٰ مُكٜىٰ دَ ڧَرْڢِنْ حَلِ ذُوَا وُرِنْ اللَّهْ بَابُ ڟُواْرُواْ دَ أَمِنْثٜىٰوَ تَوُرِنْ بَنْ‌غَسْكِيَرْمُ غَرٜىٰشِ؞

¹³ سَبُواْدَ حَكَ إِنَ ضُواْڧُوانْكُ، كَدَ كُڢِدَّ ذُوثِيَا دَ غَنِنْ دُكَنْ وَهَلَرْ دَ نَكٜىٰ شَا دُواْمِنْكُ؞ أَيْ، وَهَلَرْ نَنْ ذَاتَ ذَمَ مُكُ أَبِنْ تَاڧَمَ؞

أَدُّعَرْ بُلُسْ دُواْمِنْ مُتَنٜىٰنْ أَڢِسَ

¹⁴ سَبُواْدَ حَكَ إِنَ دُرْڧُسَاوَ أَغَبَنْ عُبَنْمُ نَسَمَ،

¹⁵ شِے وَنْدَ دَغَ وُرِنْسَ نٜىٰ كُواْوَنٜىٰ عِيَلِ أَ سَمَ دَ كُمَ أَنَنْ دُونِيَا يَسَامِ عَيْنِحِنْ سُونَنْسَ؞

¹⁶ إِنَ ضُواْڧُوانْسَ يَبَاكُ بَيْوَ دَغَ ثِكِنْ يَلْوَرْ طَوْكَكَرْسَ، يَڧَرْڢَڢَاكُ دَ إِيكُوانْسَ، دُواْمِنْ كُذَمَ دَ ڧَرْڢِے أَ ذُوثِيَارْكُ تَوُرِنْ رُوحُنْسَ،

¹⁷ حَرْ مَا أَلْمَسِيحُ يَذَوْنَ أَ ذُوثِيَارْكُ تَوُرِنْ بَنْ‌غَسْكِيَ؞ إِنَ أَدُّعَ ثٜىٰوَ كُكَڢُ سُواْسَيْ ثِكِنْ ڧَوْنَ؞ بَرِ ڧَوْنَ تَذَمَ تُوشٜىٰنْكُ،

¹⁸ دُواْمِنْ كُسَامِ إِيكُوانْ غَانٜىٰوَ، كُو دَ دُكَنْ سَوْرَنْ ڟَرْكَكَا، كُڢَهِمْثِ يَلْوَرْ ڧَوْنَرْ أَلْمَسِيحُ، وَتُواْ ڢَاطِنْتَ دَ ڟَوُانْتَ دَ غِرْمَنْتَ دَ ظُرْڢِنْتَ؞

¹⁹ كُكُمَ سَنْ ڧَوْنَرْ أَلْمَسِيحُ وَدَّ تَڢِے غَبَنْ سَنِ دُواْمِنْ كُثِكَ دَ دُكَنْ ثِكَرْ اللَّهْ؞

²⁰ طَوْكَكَ تَتَبَّتَا غَ اللَّهْ نْمُ وَنْدَ تَوُرِنْ إِيكُوانْسَ عَثِكِنْمُ يَنَ عَيْكِ حَرْ يَنَ عَيْكَتَ أَبُبُوَ ڢِيٜىٰدَ دُكَنْ أَبِنْدَ ذَامُ ضُواْڧَا، كُواْ أَبِنْدَ ذَامُيِ تُنَانِنْسَ؞

²¹ طَوْكَكَا تَا تَبَّتَا أَغَرٜىٰشِ ثِكِنْ جَمَعَرْ مَاسُبِے دَ كُمَ ثِكِنْ أَلْمَسِيحُ عِيسَىٰ، حَرْ ذُوَا دُكَنْ ذَامَانَيْ، حَرْ أَبَدَا أَبَدِنْ؞ أَمِينْ!‏