أَڢِسَاوَا 1 - أَتَّوْرَتْ دَ أَنَّبَاوَا

غَيْسُوَا

¹ دَغَ بُلُسْ، مَنْذُوانْ أَلْمَسِيحُ عِيسَىٰ بِسَغَ نُڢِنْ اللَّهْ، ذُوَاغَ ڟَرْكَكَا وَطَنْدَ سُكٜىٰ أَعَڢِسَ، وَطَنْدَ سُكٜىٰ دَ أَمِنْثِ ثِكِنْ بِنْ أَلْمَسِيحُ عِيسَىٰ؞

² أَلْحٜىٰرِ دَ سَلَمَ دَغَ اللَّهْ عُبَنْمُ دَ عُبَنْ‌غِجِ عِيسَىٰ أَلْمَسِيحُ سُكَسَنْثٜىٰ تَرٜىٰدَكُو؞

أَلْبَرْكُنْ رُوحَنِيَ ثِكِنْ أَلْمَسِيحُ

³ أَلْبَرْكَ تَا تَبَّتَا غَ اللَّهْ، عُبَنْ عُبَنْ‌غِجِنْمُ عِيسَىٰ أَلْمَسِيحُ!‏ شِينٜىٰ اللَّهْ وَنْدَ تَوُرِنْ أَلْمَسِيحُ يَ أَلْبَرْكَثٜىٰمُ دَ كُواْوَثٜىٰ أَلْبَرْكَ تَرُوحَنِيَ ثِكِنْ مُلْكِنْسَ أَ سَمَّيْ؞

⁴ يَذَاٻٜىٰمُ تَوُرِنْ ذَمَنْمُ طَيَ دَ أَلْمَسِيحُ تُنْ بَعَحَلِثِّ دُونِيَابَ، دُواْمِنْ مُذَمَ مَاسُ ڟَرْكِے، مَرَسَ لَيْڢِے أَغَبَنْسَ؞ سَبُواْدَ ڧَوْنَرْسَ،

⁵ اللَّهْ يَارِغَا يَڧَدَّرَمُ مُذَمَ یَیَنْسَ تَوُرِنْ عِيسَىٰ أَلْمَسِيحُ، بِسَغَ نُڢِنْسَ نَأَلْحٜىٰرِ؞

⁶ يَيِ حَكَ دُواْمِنْ مُيَبِے دَرَجَرْ أَلْحٜىٰرِنْسَ دَ يَبَامُ ݣَوْتَا عَيَلْوَثٜىٰ تَوُرِنْ طَنْسَ دَيَكٜىٰ ڧَوْنَ؞

⁷ ثِكِنْ أَلْمَسِيحُ نٜىٰ مُكَ سَامِ ڢَنْسَ تَوُرِنْ جِنِنْسَ، وَتُواْ يَاڢٜىٰوَرْ ذُنُبَنْمُ، بِسَغَ أَلْحٜىٰرِنْسَ عَيَلْوَثٜىٰ،

⁸ وَنْدَ يَبَامُ عَيَلْوَثٜىٰ تَرٜىٰ دَ حِكِمَ مَرَرْ إِيَاكَ دَ كُمَ بَسِيرَ؞

⁹ اللَّهْ يَسَا مُكَ سَنْ أَسِيرِنْ نُڢِنْسَ بِسَغَ أَبِنْدَ يَنُڢَ، وَنْدَ يَاكُمَ شِرْيَ يَثِكَ تَوُرِنْ أَلْمَسِيحُ؞

¹⁰ نُڢِنْسَ كٜىٰنَنْ، عِدَنْ لُواْكَثِ يَثِكَ، يَهَرْهَطَ دُكَنْ أَبُبُوَ عَڧَرْڧَشِنْ إِيكُوانْ أَلْمَسِيحُ، وَتُواْ دُكَنْ أَبُبُوَنْ دَسُكٜىٰ أَ سَمَ دَ أَبُبُوَنْ دَسُكٜىٰ عَڧَسَا غَبَاطَيَ؞

¹¹ عَثِكِنْ أَلْمَسِيحُ نٜىٰ، عَكَ مَيْشٜىٰمُ أَبِنْ غَادُواْ نَ اللَّهْ، أَنْكُوَ ڧَدَّرَمُ غَ حَكَ بِسَغَ شِرِنْسَ، شِے وَنْدَ يَكٜىٰ عَيْكَتَ كُواْمٜىٰ بِسَغَ نُڢِنْسَ؞

¹² يَا ذَاٻٜىٰمُ دَ نُڢِ ثٜىٰوَ مُو دَ مُكَ ڢَارَ سَا ذُوثِيَا غَ أَلْمَسِيحُ مُيِ ذَمَنْ يَبُوانْ طَوْكَكَرْسَ؞

¹³ تَوُرِنْ أَلْمَسِيحُ، كُو مَا كُكَجِ مَغَنَرْ غَسْكِيَ، وَتُواْ لَابَرِ مَيْ دَاطِے نَثٜىٰتُواْ؞ أَسَعَدَّ كُكَ بَادَ غَسْكِيَ غَ أَلْمَسِيحُ، اللَّهْ يَبَاكُ رُوحُ مَيْ ڟَرْكِے كَمَرْ يَدَّ عَكَيِ مُكُ أَلْڧَوَرِ ذَيْ يِ، يَذَمَ كَمَرْ هَاتِمِنْ شَيْدَ ثٜىٰوَ كُو نَاسَنٜىٰ؞

¹⁴ رُوحُ مَيْ ڟَرْكِے شِينٜىٰ تَبَّثِ ثٜىٰوَ اللَّهْ ذَيْبَامُ غَادُوانْ دَ يَيِ أَلْڧَوَرِ، وَنْدَ ذَيْ ذَمَ نَامُ لُواْكَثِنْ دَ اللَّهْ ذَيْثٜىٰثِ وَطَنْدَ سُكٜىٰ نَاسَ؞ وَنَّنْ كُمَ دُواْمِنْ يَبُوانْ طَوْكَكَرْسَنٜىٰ؞

أَدُّعَرْ بُلُسْ دُواْمِنْ مُتَنٜىٰنْ أَڢِسَ

¹⁵ سَبُواْدَ حَكَ دَيَكٜىٰ نَاجِ لَابَرِ يَدَّ كُكَ بَادَ غَسْكِيَ غَ عُبَنْ‌غِجِ عِيسَىٰ دَ كُمَ يَدَّ كُكٜىٰ ڧَوْنَرْ دُكَنْ ڟَرْكَكَا،

¹⁶ بَنْڢَسَ غُواْدٜىٰ وَ اللَّهْ سَبُواْدَكُوبَ؞ دُكْ سَعَدَّ نَكٜىٰيِنْ أَدُّعَ دُواْمِنْكُ، نَكَنْيِ حَكَ

¹⁷ دَ نُڢِ ثٜىٰوَ اللَّهْ نَعُبَنْ‌غِجِنْمُ عِيسَىٰ أَلْمَسِيحُ، عُبَا مَطَوْكَكِ، يَدِنْ‌غَ بَاكُ رُوحُنْسَ مَيْ بَادَ حِكِمَ دَ بَيَانِ دُواْمِنْ كُڧَارُ ثِكِنْ سَنِنْ اللَّهْ؞

¹⁸ إِنَ أَدُّعَ كُمَ اللَّهْ يَسَا حَصْكٜىٰنْسَ أَ ذُوثِيَارْكُ دُواْمِنْ كُسَنْ كُواْ مٜىٰنٜىٰنٜىٰ سَا ذُوثِيَارْ نَنْدَ يَكِرَاكُ عَكَنْتَ، كُكُمَ سَنْ كُواْ مٜىٰنٜىٰنٜىٰ يَلْوَرْ دَرَجَرْ أَلْبَرْكَرْ غَادُواْنَّنْ وَنْدَ يَكٜىٰ دُواْمِنْ ڟَرْكَكَا؞

¹⁹ إِنَ أَدُّعَ حَرْ يَنْذُ كُسَنْ كُواْ مٜىٰنٜىٰنٜىٰ غِرْمَنْ إِيكُوانْسَ وَنْدَ يَوُثٜىٰ غَبَنْ مِصَالِ، وَنْدَ يَكٜىٰ عَيْكِ عَثِكِنْمُ، مُو دَ مُكَ بَادَ غَسْكِيَ؞ إِيكُواْنَّنْ دَيَكٜىٰ عَيْكِ عَثِكِنْمُ، طَيَنٜىٰ دَ إِيكُواْنَّنْ

²⁰ وَنْدَ يَيِ عَيْكِ ثِكِنْ أَلْمَسِيحُ سَعَدَّ يَتَاشٜىٰشِ دَغَ مَتَتُّو، يَكُمَ بَاشِ وُرِنْ ذَمَ مَيْ دَرَجَ أَ حَنُّنْ دَامَنْسَ أَ سَمَ؞

²¹ عَثَنْ أَلْمَسِيحُ يَكٜىٰ مُلْكِ عَكَنْ دُكَنْ مَاسُ سَرَوْتَ دَ إِيكُواْ دَ ڧَرْڢِے دَ مُلْكِ؞ يَنَ دَ سُونَ وَنْدَ يَڢِ كُواْوَنٜىٰ سُونَنْدَ ذَاعَ بَايَرْ، بَا عَدُونِيَرْ نَنْ كَطَيْبَ، حَرْ مَا أَظَامَانِ مَيْ ذُوَا؞

²² اللَّهْ كُمَ يَاسَا كُواْمٜىٰ عَڧَرْڧَشِنْ ڧَڢَاڢُنْ أَلْمَسِيحُ، يَكُمَ سَاشِ يَذَمَ كَيْ مَيْ مُلْكٍ أَبُ دُكَ دُواْمِنْ أَمْڢَانِنْ جَمَعَرْ مَاسُبِے،

²³ وَدَّ تَكٜىٰ جِكِنْ أَلْمَسِيحُ؞ عَثِكِنْ جَمَعَرْ مَاسُبِنْسَ كُمَ أَلْمَسِيحُ ثِكَكّٜىٰنٜىٰ، كَمَرْ يَدَّ شِے كَنْسَ يَثِثِّكَ دُكَنْ كُواْمٜىٰ؞