مَيْ وَعَظِ 4 - أَتَّوْرَتْ دَ أَنَّبَاوَا

دَنِّيَ دَ ڢَامَرْ عَيْكِ

¹ نَا كُمَ دُوبَ نَا غَا دُكَنْ دَنِّيَرْ دَ عَكٜىٰيِ أَ رَايُوَرْ دُونِيَرْ نَنْ؞ نَا غَا هَوَيٜىٰنْ وَطَنْدَ عَكٜىٰيِ مُسُ دَنِّيَ، بَابُ مَيْيِ مُسُ تَعَظِيَّ؞ مَاسُيِنْ دَنِّيَرْ سُونٜىٰ سُكٜىٰ دَ إِيكُواْ؞ وَطَنْدَ عَكٜىٰ دَنّٜىٰسُ، بَابُ مَيْيِ مُسُ تَعَظِيَّ؞

² نَثٜىٰ ڠُومَّ وَطَنْدَ سُكَ مُتُ؞ سُنْڢِے وَطَنْدَ سُكٜىٰ دَ رَيْ يَنْذُ جِنْ دَاطِے؞

³ عَمَّا وَنْدَ يَڢِسُ جِنْ دَاطِے دُكَ، شِينٜىٰ وَنْدَ بَعَ حَيْڢٜىٰشِيبَ، وَنْدَ بَيْ غَ مُوغَيٜىٰنْ أَيُّكَنْ دَ عَكٜىٰيِ أَ رَايُوَرْ دُونِيَرْ نَنْبَ؞

⁴ نَغَانٜىٰ دَلِيلِنْدَ يَسَا مُتَنٜىٰ سُكَ ڠُونِنْتَ ثِكِنْ دُكَنْ عَيْكِ؞ دَلِيلِ شِينٜىٰ كُواْوَ يَنَ سُواْ يَڢِ مَڨُوبْثِنْسَ سَامُ؞ وَنَّنْ مَا بَنْظَنٜىٰ، كُمَ ڧُواْڧَرِنْ كَامُنْ إِسْكَنٜىٰ؞

⁵ وَاوَا يَكَنْ نَطَ حَنُّوَنْسَ يَذَوْنَ حَرْ يُنْوَ تَثِنْيٜىٰشِ؞

⁶ ڠُومَّ كَطَنْ أَ حَنُّ طَيَ ثِكٜىٰ دَ ݣُونْثِيَرْ رَيْ، دَ مَيْ يَوَ أَ حَنُّ بِيُ ثِكٜىٰ دَ ڢَامَرْ عَيْكِ، وَنَّنْ مَا ڧُواْڧَرِنْ كَامُنْ إِسْكَنٜىٰ؞

أَمْڢَانِنْ ذَمَنْ تَرٜىٰ

⁷ نَكُمَ غَ وَنِ أَبِنْ بَنْظَ أَ رَايُوَرْ دُونِيَرْ نَنْ،

⁸ سَيْغَا وَنِ شِ كَطَيْ، بَابُ طَا، بَابُ طَنْعُوَ، دُكْدَهَكَ يَنَ تَڢَامَرْ عَيْكِ كُلُّمْ؞ بَيْ تَٻَ ڧُواْشِ دَ دُوكِيَرْسَبَ، سَيْ يَتَمْبَيٜىٰ كَنْسَ يَثٜىٰ، ‏«‏غَ وَنٜىٰنٜىٰ نَكٜىٰ ڢَامَرْ عَيْكِ، حَرْ نَحَنَ وَكَيْنَ جِنْ دَاطِے؟»‏ وَنَّنْ مَا بَنْظَنٜىٰ، ذَمَنْ بَڧِنْ ثِكِنٜىٰ!‏

⁹ ڠُومَّ مُتُمْ بِيُ دَ مُتُمْ طَيَ، غَمَا أَمْڢَانِنْ عَيْكِنْ مُتَنٜىٰ بِيُ يَڢِ نَمُتُمْ طَيَ؞

¹⁰ غَمَا عِدَنْ طَيَ يَڢَاطِ، طَيَ ذَيْ تَيْمَكَ يَطَغَ طَيَنْ؞ عَمَّا كَيْتُوانْ وَنْدَ يأَنَانً شِے كَطَيْ، إِنْ يَاڢَاطِ بَاوَنْدَ ذَيْتَيْمَكَ يَطَغَشِ؞

¹¹ عِدَنْ كُمَ مُتُمْ بِيُ سُنَ ݣُونْثِيَ تَرٜىٰ، سُكَنْجِ طُمِ، عَمَّا يَيَ مُتُمْ طَيَ ذَيْجِے طُمِ شِے كَطَيْ؟

¹² مُتُمْ طَيَ ذَيْ عِيَثِنْ نَصَرَا عَكَنْ وَنِ، عَمَّا لَلَّيْ مُتُمْ بِيُ ذَاسُثِ نَصَرَا عَكَنْ طَيَ؞ إِغِيَ طَيَ وَنْدَ أَنْسَاڧَ دَ إِغِيُواْيِ عُكُ تَنَدَ وُيَ عَڟِنْكٜىٰتَ دَ سَوْرِ؞

سَامُنْ إِيكُوانْ مُلْكِ مَا بَنْظَنٜىٰ

¹³ ڠُومَّ سَوْرَيِ مَيْ حِكِمَ وَنْدَ شِے تَلَكَ نٜىٰ دَ ڟُواْهُوانْ سَرْكِے مَيْ وَوَنْثِ وَنْدَ بَايَ كَرْٻَرْ شَوَرَا؞

¹⁴ مَيْ يِوُوَ سَوْرَيِنْ ذَيْ عِيَ ڢِتُواْوَ نٜىٰ دَغَ كُرْكُكُ يَهَوْ كُجٜىٰرَرْ مُلْكِ، كُواْ كُوَ أَنْحَيْڢٜىٰشِ ثِكِنْ تَلَوْثِ؞ ڠُومَّ تَلَكَنْ سَوْرَيِنَّنْ يَيِ مُلْكِ دَ ڟُواْهُوانْ سَرْكِے مَيْ وَوَنْثِ؞

¹⁵ نَيِ تُنَانِ عَكَنْ دُكَنْ مُتَنٜىٰنْ دَسُكٜىٰ رَايٜىٰ عَثِكِنْ دُونِيَرْ نَنْ، سَيْ نَغَانٜىٰ عَثِكِنْسُ أَݣَويْ سَوْرَيِنْ دَ ذَيْ عِيَ غَاجِ كُجٜىٰرَرْ سَرْكِے؞

¹⁶ كُواْدَيَكٜىٰ مُتَنٜىٰنْ دَ سَرْكِے يَكٜىٰ مُلْكِ عَكَنْسُ سُكَيِيَوَ بَابُ إِيَاكَ، عَمَّا بَايَنْدَ بَايَ نَنْ، بَاوَنْدَ ذَيْ نُونَ غُواْدِيَ عَكَنْ أَبِنْدَ يَيِ؞ حَڧِيڧَ وَنَّنْ مَا بَنْظَنٜىٰ، كُمَ ڧُواْڧَرِنْ كَامُنْ إِسْكَنٜىٰ؞