مَيْمَيْتَاوَرْ شَرِيعَ 9 - أَتَّوْرَتْ دَ أَنَّبَاوَا

أَلْحٜىٰرِنْ يَهْوٜىٰهْ غَ إِسْرَٰٓءِيلَ

¹ مُوسَٰى يَثِيغَبَدَ مَغَنَ ثٜىٰوَ ‏«‏كُجِ، يَا جَمَعَرْ إِسْرَٰٓءِيلَ!‏ يَوْ ذَاكُ ڧٜىٰتَرٜىٰ كُواْغِنْ يُواْدَنْ دُواْمِنْ كُشِغَ كُڨُوثٜىٰ ڧَسَرْ أَلْعُمَّنْ دَ سُكَڢِيكُ يَوَ، سُكَ كُمَ ڢِيكُ ڧَرْڢِے؞ سُنَدَ مَنْيَنْ بِرَنٜىٰ وَطَنْدَ كَتَنْ‌غَرْسُ سُنْ كَيْ حَرْ سَمَ؞

² مُتَنٜىٰنْ ڧَسَرْ مَاسُ ڟَيِ نٜىٰ غَ ڧَرْڢِے كُمَ، ذُرِيَرْ یَیَنْ أَنَكْ، وَطَنْدَ كُكَ سَنِ، كُكَ كُمَجِ لَابَرِنْسُ؞ أَيْ، كُنْجِ عَكَنْثٜىٰ، ‏‹‏وَنٜىٰنٜىٰ ذَيْ عِيَ ڟَيَاوَا يَڢُسْكَنْثِ یَیَنْ أَنَكْ؟›‏

³ يَوْ، سَيْ كُسَنِ ثٜىٰوَ يَهْوٜىٰهْ اللَّهْ نْكُ نٜىٰ يَكٜىٰ ڧٜىٰتَرٜىٰ يَنَ شَنْ غَبَنْكُ كَمَرْ هَرْشٜىٰنْ وُتَا مَيْ ثِنْيٜىٰوَ؞ أَغَبَنْكُ ذَيْشَا ڧَرْڢِنْسُ يَهَلَكَاسُ، دُواْمِنْ كُكُواْرٜىٰسُ، كُكُمَ هَلَكَاسُ دَ سَوْرِ، كَمَرْ يَدَّ يَهْوٜىٰهْ يَيِ مُكُ أَلْڧَوَرِ؞

⁴ ‏«‏سَعَدَّ يَهْوٜىٰهْ اللَّهْ نْكُ يَكُواْرٜىٰسُ دَغَ غَبَنْكُ كَدَ كُثٜىٰ أَ ذُوثِيَارْكُ، ‏‹‏أَيْ، سَبُواْدَ أَدَلْثِنْمُ نٜىٰ يَهْوٜىٰهْ يَكَٰوُاْ مُو مُثِ غَادُوانْ وَنَّنْ ڧَسَا؞›‏ أَيْ، بَهَكَ بَنٜىٰ، عَمَّا سَبُواْدَ مُغُنْتَارْ وَطَنَّنْ أَلْعُمَّيْ نٜىٰ يَهْوٜىٰهْ يَكٜىٰ كُواْرٜىٰسُ دَغَ غَبَنْكُ؞

⁵ بَا سَبُواْدَ أَدَلْثِنْكُ كُواْ غَسْكِيَ أَ ذُوثِيَارْكُ نٜىٰ يَسَا كُكٜىٰ شِغَ ثِكِنْ وَنَّنْ ڧَسَا دُواْمِنْ كُثِ غَادُوانْتَبَ؞ عَمَّا سَبُواْدَ مُغُنْتَارْ وَطَنَّنْ أَلْعُمَّيْ نٜىٰ يَهْوٜىٰهْ اللَّهْ نْكُ يَكٜىٰ كُواْرَرْ دَسُو أَغَبَنْكُ، دُواْمِنْ يَثِكَ أَلْڧَوَرِنْدَ يَرَنْڟٜىٰوَ كَاكَنِّنْكُ، وَتُواْ إِبْرَٰهِيمْ دَ إِسْحَٰڧَ دَ كُمَ يَعْڧُوبَ؞

⁶ سَيْ كُسَنِ ڢَا، بَ سَبُواْدَ أَدَلْثِنْكُ نٜىٰ يَهْوٜىٰهْ يَكٜىٰ بَاكُ وَنَّنْ ڧَسَا مَيْݣَوْ دُواْمِنْ كُغَاجٜىٰتَبَ، غَمَا كُو جَمَعَثٜىٰ مَيْ تَوْرِنْ كَيْ؞»‏

تُنَ دَ غُنْكِنْ طَنْ بِجِمِ

⁷ ‏«‏كُتُنَ ڢَا، كَدَ كُمَنْتَادَ يَدَّ كُكَسَا يَهْوٜىٰهْ اللَّهْ نْكُ يَيِ ڢُشِے أَدَاجِ؞ تُنْدَغَ رَانَرْ دَ كُكَ ڢِتَ دَغَ ڧَسَرْ مَصَرْ حَرْ كُكَ إِسُواْ وُرِنَّنْ دَ كُكٜىٰ، كُنْيِتَيِ وَ يَهْوٜىٰهْ تَاوَيٜىٰ؞

⁸ كُواْ عَبَبَّنْ تُدُنْ هُواْرٜىٰبْ مَا كُنْ سَا يَهْوٜىٰهْ يَيِ ڢُشِے سُواْسَيْ، حَرْ يَيِ نِيَّ يَهَلَكَاكُ؞

⁹ سَعَدَّ نَهَوْ كَنْ بَبَّنْ تُدُنْ دُواْمِنْ إِنْ كَرْٻِ أَلُّنَنْ دُوڟٜىٰنْ، وَتُواْ أَلُّنَنْ يَرْجٜىٰجٜىٰنِيَرْ دَ يَهْوٜىٰهْ يَيِ دَكُو، نَيِ دَرٜىٰ أَرْبَعِنْ دَ يِنِ أَرْبَعِنْ عَكَنْ تُدُ، بَنْثِبَ، بَنْشَابَ؞

¹⁰ يَهْوٜىٰهْ اللَّهْ نْكُ كُوَ يَبَا نِے أَلُّنَنْ دُوڟٜىٰنَّنْ بِيُ وَطَنْدَ يَرُبُوتَ دَ يَڟَرْسَ؞ عَكَنْ وَطَنَّنْ أَلُّنَنْ أَݣَويْ دُكَنْ كَلْمُواْمِنْ دَ يَهْوٜىٰهْ يَڢَطَا مُكُ دَغَ كَنْ تُدُنْ دَغَ ڟَكِيَرْ وُتَا أَ رَانَرْ تَارُوانْ جَمَعَ؞

¹¹ بَايَنْ دَرٜىٰ أَرْبَعِنْ دَ يِنِ أَرْبَعِنْ، سَيْ يَهْوٜىٰهْ يَبَا نِے أَلُّنَنْ دُوڟٜىٰنَّنْ بِيُ، وَتُواْ أَلُّنَنْ يَرْجٜىٰجٜىٰنِيَرْ؞

¹² ‏«‏سَعَنً يَهْوٜىٰهْ يَثٜىٰ مِنِ، ‏‹‏تَاشِ، كَغَنْ‌غَرُواْ دَ سَوْرِ دَغَ نَنْ، غَمَا مُتَنٜىٰنْكَ وَطَنْدَ كَڢِتَرْ دَسُو دَغَ مَصَرْ سُنْ عَيْكَتَ أَبِنْ ڧَظَنْتَا؞ سُنْيِ سَوْرِنْ كَوْثٜىٰوَ دَغَ حَنْيَرْدَ نَعُمَرْثٜىٰسُ سُبِے؞ سُنْيِ وَكَنْسُ ظُبِنْ غُنْكِنْ ڧَرْڢٜىٰ؞›‏

¹³ يَهْوٜىٰهْ يَڧَارَ ثٜىٰ مِنِ، ‏‹‏نَغَ مُتَنٜىٰنَّنْ، مُتَنٜىٰنٜىٰ مَاسُ تَوْرِنْ كَيْ أَيْنُنْ؞

¹⁴ بَرْنِ إِنْهَلَكَاسُ، إِنْكُمَ كَوَرْدَ سُونَيٜىٰنْسُ دَغَ ڧَرْڧَشِنْ سَمَ؞ سَعَنً إِنْسَاكَ كَذَمَ بَبَّرْ أَلْعُمَّرْ دَ ذَاتَڢِسُ إِيكُواْ دَ كُمَ يَوَ؞›‏

¹⁵ ‏«‏سَيْ نَجُويَا، نَغَنْ‌غَرُواْ دَغَ كَنْ بَبَّنْ تُدُنْ، تُدُنْ كُوَ يَنَ كَنْ ثِنْ وُتَا، أَلُّنَنْ دُوڟٜىٰنَّنْ بِيُ نَيَرْجٜىٰجٜىٰنِيَ سُنَ أَ حَنُّوَنَ؞

¹⁶ سَيْ نَدُوبَ، غَاشِ كُنْيِ وَ يَهْوٜىٰهْ اللَّهْ نْكُ ذُنُوبِ، كُنْيِ وَكَنْكُ ظُبِنْ غُنْكِنْ طَنْ بِجِمِ؞ كُنْيِ سَوْرِنْ كَوْثٜىٰوَ دَغَ حَنْيَرْ دَ يَهْوٜىٰهْ يَعُمَرْثٜىٰكُ كُبِے؞

¹⁷ سَيْ نَطَوْكِ أَلُّنَنْ دُوڟٜىٰنَّنْ بِيُ نَجٜىٰڢَرْ دَسُو دَغَ حَنُّوَنَ، نَڢَرْڢَشٜىٰسُ أَعِدُوانْكُ؞

¹⁸ سَيْ نَڢَاطِ ڧَسَا نَݣُونْتَ أَغَبَنْ يَهْوٜىٰهْ دَرٜىٰ أَرْبَعِنْ دَ يِنِ أَرْبَعِنْ، بَنْثِبَ، بَنْشَابَ، كَمَرْ يَدَّ دَا نَيِ، لُواْكَثِنْدَ نَكَرْٻِ يَرْجٜىٰجٜىٰنِيَرْ؞ نَيِ حَكَ سَبُواْدَ دُكَنْ ذُنُوبِنْ دَ كُكَيِ، كُنْ سَا يَهْوٜىٰهْ يَيِ ڢُشِے دُواْمِنْ كُنْ عَيْكَتَ أَبِنْدَ يَكٜىٰ مُوغُ أَغَبَنْسَ؞

¹⁹ غَمَا نَاجِڟُواْرُوانْ ذَاڢِنْ ڢُشِے دَ رَشِنْ جِنْ دَاطِنْ دَ يَهْوٜىٰهْ يَيِ عَكَنْكُ، حَرْ يَيِ نِيَّرْ هَلَكَاكُ؞ عَمَّا نَيِ ضُواْڧُواْ، يَهْوٜىٰهْ كُمَ يَجِنِ أَ لُواْكَثِنْ؞

²⁰ يَهْوٜىٰهْ يَيِ ڢُشِے دَ هَٰرُونَ سُواْسَيْ، حَرْ مَا يَيِ نِيَّرْ هَلَكَاشِ، عَمَّا أَ لُواْكَثِنْ، نَسَاكٜىٰيِنْ ضُواْڧُواْ سَبُواْدَ هَٰرُونَ؞

²¹ سَعَنً نَطَوْكِ أَبِنْ ذُنُوبِنْ دَ كُكَيِ، وَتُواْ غُنْكِنْ طَنْ بِجِمِنْ، نَڧُواْنٜىٰشِ دَ وُتَا، نَڢَرْڢَشٜىٰشِ، نَنِڧٜىٰشِ، حَرْ يَيِ لَوْشِ كَمَرْ ڧُورَا؞ سَيْ نَظُبَرْدَ ڧُورَرْ عَثِكِنْ ضُوً رَاڢِنْ دَيَكٜىٰ غَنْ‌غَرُواْوَ دَغَ بَبَّنْ تُدُنْ؞

²² ‏«‏كُكَ كُمَسَا يَهْوٜىٰهْ يَيِ ڢُشِے أَ تَبٜىٰرَ دَ أَ مَسَّ دَ كُمَ أَ كِبِرُواتْ هَتَّعَوَا؞

²³ سَعَدَّ يَهْوٜىٰهْ يَعَيْكٜىٰكُ دَغَ كَدٜىٰشْ بَرْنٜىٰيَ يَنَ ثٜىٰوَ ‏‹‏كُهَوْرَ كُڨُوثٜىٰ ڧَسَرْدَ نَبَاكُ، كُثِ غَادُوانْتَ،›‏ سَيْ كُكَ تَيَرْ وَ عُمَرْنِنْ يَهْوٜىٰهْ اللَّهْ نْكُ، بَكُ غَسْكَتَ شِيبَ، بَكُ كُمَيِ بِيَيَّ غَ مَغَنَرْسَبَ؞

²⁴ تُنْ لُواْكَثِنْدَ نَسَنْكُ، كُو مَاسُ تَيَرْوَ يَهْوٜىٰهْ نٜىٰ؞

²⁵ ‏«‏سَيْ نَڢَاطِ عَڧَسَا نَݣُونْتَ أَغَبَنْ يَهْوٜىٰهْ دَرٜىٰ أَرْبَعِنْ دَ يِنِ أَرْبَعِنْ، غَمَا يَهْوٜىٰهْ يَثٜىٰ ذَيْ هَلَكَاكُ؞

²⁶ نَيِ أَدُّعَ غَ يَهْوٜىٰهْ نَثٜىٰ، ‏‹‏يَا عُبَنْ‌غِجِ يَهْوٜىٰهْ، كَدَ كَهَلَّكَرْ دَ جَمَعَرْكَ، أَبِنْ غَادُوانْكَ وَطَنْدَ كَيْ دَ كَنْكَ كَڢَنْشٜىٰسُ ثِكِنْ غِرْمَنْكَ، وَطَنْدَ كُمَ كَڢِتَرْ دَسُو دَغَ مَصَرْ دَ حَنُّنْكَ مَيْ إِيكُواْ؞

²⁷ كَتُنَ دَ بَايِنْكَ إِبْرَٰهِيمْ دَ إِسْحَٰڧَ دَ يَعْڧُوبَ؞ كَدَ كَكُلَ دَ تَوْرِنْ كَنْ مُتَنٜىٰ نَنْ، كُواْ مُغُنْتَارْسُ، كُواْ ذُنُبَنْسُ؞

²⁸ دُواْمِنْ كَدَ مُتَنٜىٰنْ ڧَسَرْدَ كَڢِتَرْ دَمُو دَغَ ثِكِنْسُ سُثٜىٰ ‏«‏أَيْ، سَبُواْدَ يَهْوٜىٰهْ بَيْ عِيَ كَيْسُ ثِكِنْ ڧَسَرْدَ يَيِ مُسُ أَلْڧَوَرِبَ، كُمَ سَبُواْدَ يَڧِ سُونٜىٰ، شِے يَسَا يَڢِتَرْ دَسُو دُواْمِنْ يَكَكَّشٜىٰسُ عَثِكِنْ دَاجِ؞»‏

²⁹ غَمَا سُو جَمَعَرْكَ نٜىٰ، أَبِنْ غَادُوانْكَ وَطَنْدَ كَڢِتَرْ دَسُو تَوُرِنْ إِيكُوانْكَ مَيْغِرْمَ دَ كُمَ مَنْيَنْ أَيُّكَنْكَ نَبَنْ مَامَاكِ؞›‏ »‏