مَيْمَيْتَاوَرْ شَرِيعَ 8 - أَتَّوْرَتْ دَ أَنَّبَاوَا

ثِنْ غَادُوانْ ڧَسَا مَيْ ݣَوْ

¹ مُوسَٰى يَثِيغَبَدَ مَغَنَ ثٜىٰوَ ‏«‏سَيْ كُكِيَايٜىٰ، كُكُمَ عَيْكَتَ دُكَنْ عُمَرْنَنَّنْ دَ نَكٜىٰ عُمَرْثٜىٰكُ عَيَوْ، دُواْمِنْ كُرَايُ، كُڧَارَ يَوَ، كُشِغَ كُثِ غَادُوانْ ڧَسَرْدَ يَهْوٜىٰهْ يَيِ أَلْڧَوَرِ تَرٜىٰدَ ضَنْڟُوَا ذَيْبَا كَاكَنِّنْكُ؞

² كُتُنَ يَدَّ يَهْوٜىٰهْ اللَّهْ نْكُ يَبِدَكُو أَدُكَنْ حَنْيَرْكُ عَثِكِنْ دَاجِ شٜىٰكَرُ أَرْبَعِنَّنْ، دُواْمِنْ يَڧَسْڧَنْتَرْ دَكُو يَنَ ڠُودَكُ دُواْمِنْ يَسَنْ ذُوثِيَارْكُ، كُواْ ذَاكُ كِيَايٜىٰ عُمَرْنَنْسَ كُواْ بَابُ؞

³ يَڧَسْڧَنْتَرْ دَكُو تَوُرِنْ بَرِنْكُ ثِكِنْ يُنْوَ، سَعَنً يَثِيَرْ دَكُو دَ مَنَّ، وَدَّ كُو دَ كَاكَنِّنْكُ بَكُسَنِبَ؞ يَيِ وَنَّنْ دُواْمِنْ كُسَنِ ثٜىٰوَ بَ دَ عَبِنْثِ كَطَيْ مُتُمْ ذَيْ رَايُ بَ، عَمَّا تَكُواْوَثٜىٰ مَغَنَرْ دَتَكٜىٰ ڢِتُواْوَ دَغَ بَاكِنْ يَهْوٜىٰهْ؞

⁴ عَثِكِنْ شٜىٰكَرُنَّنْ أَرْبَعِنْ، رِيغُنَنْكُ بَسُ ڟُوڢَ بَ، حَكَمَا ڧَڢَاڢُنْكُ بَسُ كُمْبُرَبَ؞

⁵ سَيْ كُسَنِ أَ ذُوثِيَارْكُ ثٜىٰوَ كَمَرْ يَدَّ مُتُمْ يَكَنْ هُواْرِ طَنْسَ، حَكَمَا يَهْوٜىٰهْ اللَّهْ نْكُ يَكَنْ هُواْرَرْ دَكُو؞

⁶ سَبُواْدَ حَكَ، كُكِيَايٜىٰ عُمَرْنَنْ يَهْوٜىٰهْ اللَّهْ نْكُ، كُيِ تَڢِيَ ثِكِنْ هَنْيُواْيِنْسَ، كُكُمَ جِڟُواْرُوانْسَ؞

⁷ غَمَا يَهْوٜىٰهْ اللَّهْ نْكُ يَنَ كَٰوُاْكُ ثِكِنْ ڧَسَا مَيْݣَوْ، ڧَسَاثٜىٰ مَيْ رَاڢُڢُّكَنْ ضُوَ مَاسُ غُدُ دَ مَٻُٻُّغَرْ ضُوَ، إِدَانُنْ ضُوَ مَاسُ ٻُلُّواْوَ ثِكِنْ ݣُورِ دَ تُدُ؞

⁸ وَنَّنْ ڧَسَاثٜىٰ مَيْ أَلْكَمَ دَ حَڟِنْ بَلٜىٰ دَ عِتَتُوَنْ إِنَبِے دَ نَٻَوْرٜىٰ دَ نَرُمَّنْ، ڧَسَا مَيْ عِتَتُوَنْ ظَيْتُنْ دَ ظُمَ؞

⁹ ڧَسَاثٜىٰ عِنْدَ ذَاكُثِ عَبِنْثِ عَيَلْوَثٜىٰ دَ عِنْدَ بَذَاكُ رَسَ كُواْمٜىٰبَ؞ ڧَسَاثٜىٰ وَدَّ دُووَڟُنْتَ سُنَ ثِكٜىٰ دَ ڧَرْڢٜىٰ، كُمَ دَغَ كَنْ تُدَّنْتَ ذَاكُ عِيَ هَڧَنْ جَنْ ڧَرْڢٜىٰ؞

¹⁰ ذَاكُثِ كُڧُواْشِ، كُيَبِے يَهْوٜىٰهْ اللَّهْ نْكُ سَبُواْدَ ڧَسَا مَيْݣَوْ وَدَّ يَبَاكُ؞»‏

غَرْغَطِ عَكَنْ كَدَ أَ مَنْتَادَ يَهْوٜىٰهْ

¹¹ ‏«‏كُلُورَ ڢَا، كَدَ كُمَنْتَادَ يَهْوٜىٰهْ اللَّهْ نْكُ تَوُرِنْ رَشِنْ كِيَايٜىٰ دُواْكُواْكِنْسَ دَ عُمَرْنَنْسَ دَ ڧَٰعِدُواْدِنْسَ، وَطَنْدَ نَكٜىٰ عُمَرْثٜىٰكُ عَيَوْ؞

¹² سَعَدَّ كُكَثِ كُكَ ڧُواْشِ، كُكَ غِنَا غِدَاجٜىٰ مَاسُ ݣَوْ، كُكَ كُمَ ذَوْنَ عَثِكِنْسُ،

¹³ كُمَ سَعَدَّ غَرْكُنَنْكُ نَتُمَكِ دَ أَوَكِ دَ نَشَانُو سُكَڧَارَ يَوَ، كُمَ سَعَدَّ أَظُرْڢَرْكُ دَ ظِينَارِيَرْكُ سُكَڧَارَ يَوَ، سَعَدَّ دُكَنْ أَبِنْدَ كُكٜىٰ دَشِ يَڧَارُ دَيَوَ،

¹⁴ تُواْ، سَيْ كُلُورَ، كَدَ كُطَغَ كَنْكُ حَرْ كُمَنْتَادَ يَهْوٜىٰهْ اللَّهْ نْكُ، وَنْدَ يَڢِتَرْ دَكُو دَغَ ڧَسَرْ مَصَرْ دَغَ غِدَنْ بَوْتَا؞

¹⁵ كَدَ كُمَنْتَا يَدَّ يَهْوٜىٰهْ يَبِشٜىٰكُ ثِكِنْ بَبَّنْ دَاجِنَّنْ مَيْ بَنْ ڟُواْرُواْ، بُوسَشِّيَرْ ڧَسَا مَرَرْ ضُوَ، مَيْ مُوغَيٜىٰنْ مَثِيظَيْ دَ كُنَمَيْ؞ يَهْوٜىٰهْ كُوَ يَبَاكُ ضُوَ دَغَ دُوڟٜىٰ مَيْ ڧَرْڢِے؞

¹⁶ كَدَ كُمَنْتَا يَدَّ أَدَاجِ يَهْوٜىٰهْ يَثِيَرْ دَكُو دَ مَنَّ، وَدَّ كَاكَنِّنْكُ بَسُ سَنِبَ؞ يَهْوٜىٰهْ يَيِ حَكَنٜىٰ دُواْمِنْ يَڧَسْڧَنْتَرْ دَكُو، يَڠُودَكُو، دُواْمِنْ عَڧَرْشٜىٰ كُمَ يَيِمُكُ أَلْحٜىٰرِ؞

¹⁷ كَدَ كُثٜىٰ أَ ذُوثِيَارْكُ، ‏‹‏أَيْ، إِيكُواْنَ نٜىٰ دَ ڧَرْڢِنْ هَنُّونَ نٜىٰ سُنْ كَٰوُاْ مِنِ وَنَّنْ أَرْزِڧِنْ؞›‏

¹⁸ عَمَّا كُتُنَ دَ يَهْوٜىٰهْ اللَّهْ نْكُ، غَمَا شِينٜىٰ يَبَاكُ إِيكُوانْ سَامُنْ أَرْزِڧِ؞ تَهَكَ يَتَبَّتَرْ دَ يَرْجٜىٰجٜىٰنِيَرْسَ دَ يَرَنْڟٜىٰوَ كَاكَنِّنْكُ، كَمَرْ يَدَّ يَكٜىٰ عَيَوْ؞

¹⁹ عِدَنْ كُكَ مَنْتَادَ يَهْوٜىٰهْ اللَّهْ نْكُ، كُكَبِے غُمَكَ، كُكَ بَوْتَا مُسُ، كُكَيِ مُسُ سُجَّدَ، تُواْ، يَوْ إِنَ غَرْغَطٜىٰكُ ثٜىٰوَ لَلَّيْ ذَاكُ هَلَّكَ؞

²⁰ كَمَرْ أَلْعُمَّنْ دَ يَهْوٜىٰهْ يَهَلَّكَرْ أَغَبَنْكُ، حَكَ كُو مَا ذَاعَ هَلَكَاكُ عِدَنْ بَكُيِ بِيَيَّ دَ مَغَنَرْ يَهْوٜىٰهْ اللَّهْ نْكُبَ؞»‏