مَيْمَيْتَاوَرْ شَرِيعَ 5 - أَتَّوْرَتْ دَ أَنَّبَاوَادُواْكُواْكِ غُواْمَ ﴿ ڢِتْ 20.1-17 ﴾ 1 مُوسَٰى يَكِرَا دُكَنْ جَمَعَرْ إِسْرَٰٓءِيلَ يَثٜىٰ مُسُ، «يَا كُو جَمَعَرْ إِسْرَٰٓءِيلَ، كُجِ ڧَٰعِدُواْدِ دَ عُمَرْنَيْ وَطَنْدَ نَكٜىٰيِ مُكُ شٜىٰلَرْسُ عَيَوْ؞ سَيْ كُكُواْيَ، كُكِيَايٜىٰسُ كُكُمَ عَيْكَتَاسُ؞ 2 يَهْوٜىٰهْ اللَّهْ نْمُ يَيِ يَرْجٜىٰجٜىٰنِيَ دَمُو عَبَبَّنْ تُدُنْ هُواْرٜىٰبْ؞ 3 يَهْوٜىٰهْ بَيْيِ وَنَّنْ يَرْجٜىٰجٜىٰنِيَرْ دَ كَاكَنِّنْمُبَ، عَمَّا يَيِ دَ دُكَنْمُ وَطَنْدَ مُكٜىٰ أَنَنْ دَ رَيْ يَوْ؞ 4 يَهْوٜىٰهْ يَيِ مَغَنَ دَكُو ڢُسْكَ دَ ڢُسْكَ دَغَ ثِكِنْ ڟَكِيَرْ وُتَا عَكَنْ تُدُ؞ 5 أَ لُواْكَثِنْ كُوَ نَڟَيَ ڟَكَانِنْ يَهْوٜىٰهْ دَكُو، دُواْمِنْ إِنْڢَطَا مُكُ مَغَنَرْ دَ يَهْوٜىٰهْ يَڢَطَا، غَمَا كُنْ ثِكَ دَ ڟُواْرُواْ سَبُواْدَ وُتَرْ، بَكُ عِيَ هَوَنْ تُدُنْ بَ؞ غَا أَبِنْدَ يَهْوٜىٰهْ يَڢَطَا؞ 6 «نِنٜىٰ يَهْوٜىٰهْ اللَّهْ نْكُ، وَنْدَ يَڢِتَرْ دَكُو دَغَ ڧَسَرْ مَصَرْ دَغَ غِدَنْ بَوْتَا؞ 7 «بَذَاكَيِ سُجَّدَ غَ وَطَنْسُ أَلُّواْلِ بَ، سَيْنِے كَطَيْ؞ 8 «بَذَاكَ سَسَّڧَ وَكَنْكَ وَنِ غُنْكِ، كُواْ مَيْ كَمَ دَ وَتَ حَلِتَّرْ وَنِ أَبُ عَثَنْ سَمَ كُواْ أَنَنْ دُونِيَا، كُواْ كُمَ أَبِنْدَ يَكٜىٰ عَثِكِنْ ضُوَ عَڧَرْڧَشِنْ دُونِيَابَ؞ 9 بَذَاكَ رُسُنَ مُسُبَ، كُواْ كَيِ مُسُ سُجَّدَبَ، غَمَا نِے يَهْوٜىٰهْ اللَّهْ نْكَ، اللَّهْ نٜىٰ مَيْ بُڧَاتَرْ ثِكَكِّيَرْ ڧَوْنَرْكَ، مَيْ حُكُنْتَ یَیَ سَبُواْدَ ذُنُبَنْ إِيَايٜىٰنْسُ حَرْ ذُوَا ڟَارَا تَ عُكُ دَ تَهُطُ تَوَطَنْدَ سُكَڧِينِ؞ 10 عَمَّا نِے مَيْ نُونَ ڧَوْنَ مَرَرْ ثَنْجَاوَا نٜىٰ غَ یَیَ حَرْ ذُوَا ڟَارَا تَدُبُو تَوَطَنْدَ سُكٜىٰ ڧَوْنَتَ، سُنَ كُمَ كِيَايٜىٰ دُواْكُواْكِنَ؞ 11 «بَذَاكَيِ أَمْڢَانِ دَ سُونَنْ يَهْوٜىٰهْ اللَّهْ نْكُ عَبَنْظَبَ، غَمَا نِے يَهْوٜىٰهْ بَذَنْ كَاسَ حُكُنْتَ وَنْدَ يَيِ أَمْڢَانِ دَ سُونَنَ عَبَنْظَبَ؞ 12 «كَكِيَايٜىٰ رَانَرْ هُوتُ تَمَكُواْ، أَ رِڧٜىٰتَ دَ ڟَرْكِے كَمَرْ يَدَّ يَهْوٜىٰهْ اللَّهْ نْكَ يَعُمَرْثٜىٰكَ؞ 13 ݣُونَكِے شِدَ ذَاكَيِ دُكَنْ عَيْكِنْ حَنُّوَنْكَ؞ 14 عَمَّا رَانَ تَبَݣَويْ رَانَرْ هُوتُثٜىٰ دَ عَكَ كٜىٰٻٜىٰ غَ يَهْوٜىٰهْ اللَّهْ نْكَ، بَذَاكَيِ وَنِ عَيْكِبَ، كُواْ كَيْ، كُواْ طَنْكَ، كُواْ یَرْكَ، كُواْ بَاوَنْكَ كُواْ بَيْوَرْكَ، كُواْ بِجِمِنْكَ كُواْ جَاكِنْكَ، كُواْ وَنِ عَثِكِنْ دَبُّواْبِنْ غِدَنْكَ، كُواْ مَا بَڧُوانْ دَيَكٜىٰ ذَمَ عَثِكِنْ غَرِنْكَ، دُواْمِنْ بَايِنْكَ مَظَا دَ مَاتَا سُهُوتَ كَمَرْ يَدَّ كَيْ كَكٜىٰ هُوتَوَا؞ 15 كَتُنَ ڢَا دَا كُو بَايِنٜىٰ عَثِكِنْ ڧَسَرْ مَصَرْ، كُمَ يَهْوٜىٰهْ اللَّهْ نْكُ يَڢِتَرْ دَكُو دَ حَنُّنْسَ مَيْ إِيكُواْ دَ أَيُّكَنْ بَنْ مَامَاكِ؞ سَبُواْدَ حَكَ يَهْوٜىٰهْ اللَّهْ نْكُ يَعُمَرْثٜىٰكُ كُكِيَايٜىٰ رَانَرْ هُوتُ تَمَكُواْ؞ 16 «كَغِرْمَمَ بَابَنْكَ دَ مَامَرْكَ كَمَرْ يَدَّ يَهْوٜىٰهْ اللَّهْ نْكُ يَعُمَرْثٜىٰكَ دُواْمِنْ كَيِ ڟَوُانْ رَيْ، كَكُمَ سَامِ ذَمَنْ لَاڢِيَ ثِكِنْ ڧَسَرْدَ يَهْوٜىٰهْ اللَّهْ نْكَ يَكٜىٰ بَاكَ؞ 17 «بَذَاكَيِ كِسَنْ كَيْ بَ؞ 18 «بَذَاكَيِ ظِنَبَ؞ 19 «بَذَاكَيِ سَاتَابَ؞ 20 «بَذَاكَيِ شَيْدَرْ ڧَضْيَا عَكَنْ مَڨُوبْثِنْكَبَ؞ 21 «بَذَاكَيِ ݣُوطَيِنْ مَاتَرْ مَڨُوبْثِنْكَبَ، بَذَاكَيِ ݣُوطَيِنْ غِدَنْسَ، كُواْ غُواْنَرْسَ، كُواْ بَاوَنْسَ كُواْ بَيْوَرْسَ، كُواْ كُوَ بِجِمِنْسَ، كُواْ جَاكِنْسَ، كُواْ دُكْ أَبِنْدَ يَكٜىٰ نَمَڨُوبْثِنْكَبَ؞ 22 «وَطَنَّنْ كَلْمُواْمِ يَهْوٜىٰهْ يَڢَطَا دَ بَبَّرْ مُرْيَ غَ دُكَنْ تَارُوانْ جَمَعَرْكُ عَكَنْ بَبَّنْ تُدُنْ دَغَ ثِكِنْ ڟَكِيَرْ وُتَادَ غِرْغِجٜىٰ دَ كُمَ بَڧِنْ دُهُ؞ بَا أَبِنْدَ يَڧَارَ عَكَيْ؞ يَرُبُوتَسُ عَكَنْ أَلُّنَنْ دُوڟٜىٰ بِيُ، يَكُمَ بَانِ؞» مُتَنٜىٰ سُكَجِ ڟُواْرُواْ ﴿ ڢِتْ 20.18-21 ﴾ 23 مُوسَٰى يَثِيغَبَدَ مَغَنَ ثٜىٰوَ «كُتُنَ سَعَدَّ كُكَجِ مُرْيَرْسَ دَغَ ثِكِنْ دُهُنَّنْ، يَايِنْ دَ بَبَّنْ تُدُنْ يَكٜىٰ ثِنْ وُتَا، سَيْ دُكَنْ شُوغَبَنِّنْ ذُرِيَرْكُ دَ دَتَّاوَنْكُ سُكَذُواْ وُرِينَ؞ 24 سَيْ سُكَثٜىٰ، ‹غَاشِ، يَهْوٜىٰهْ اللَّهْ نْمُ يَنُونَ مَنَ طَوْكَكَرْسَ دَ غِرْمَنْسَ، مُنْ كُمَجِ مُرْيَرْسَ دَغَ ڟَكِيَرْ وُتَرْ؞ يَوْ مُنْ غَا يَنَ يِوُوَ اللَّهْ يَيِ مَغَنَ دَ مُتُمْ، دُكْدَهَكَ مُتُمِنْ يَرَايُ؞ 25 سَبُواْدَ حَكَ دُوانْمٜىٰ ذَامُ مُتُ يَنْذُ؟ غَمَا وَنَّنْ بَبَّرْ وُتَا ذَاتَ ثِنْيٜىٰمُ؞ عِدَنْ ڢَا مُنْ ڧَارَ جِنْ مُرْيَرْ يَهْوٜىٰهْ اللَّهْ نْمُ، ذَامُ مُتُ؞ 26 غَمَا أَݣَويْ طَنْ أَدَمْ وَنْدَ يَتَٻَ جِنْ مُرْيَرْ اللَّهْ مَيْ رَيْ تَنَ مَغَنَ دَغَ ثِكِنْ ڟَكِيَرْ وُتَا كَمَرْ يَدَّ مُو مُكَجِ، حَرْ يَرَايُ؟ 27 كَيْ، كَجٜىٰ كُسَ كَجِ دُكْ أَبِنْدَ يَهْوٜىٰهْ اللَّهْ نْمُ ذَيْ ڢَطَا؞ سَعَنً كَذُواْ كَڢَطَا مَنَ دُكْ أَبِنْدَ يَهْوٜىٰهْ اللَّهْ نْمُ يَڢَطَا مَكَ؞ مُو ذَامُجِے، مُكُمَ عَيْكَتَ؞› 28 «يَهْوٜىٰهْ كُوَ يَجِ ضُواْڧُوانْكُ وَنْدَ كُكَيِ مِنِ، سَيْ يَهْوٜىٰهْ يَثٜىٰ مِنِ، ‹نَاجِ ضُواْڧُوانْ جَمَعَرْ نَنْ وَنْدَ سُكَيِ مَكَ، أَبِنْدَ سُكَ ڢَطَا مَكَ كُوَ دَيْدَيْنٜىٰ؞ 29 دَا عَثٜىٰ سُنَدَ إِرِنْ وَنَّنْ ذُوثِيَا، كُلُّمْ سُنَ ڟُواْرُواْنَ، سُنَ كِيَايٜىٰ دُكَنْ عُمَرْنَيْنَ، أَيْ، ذَاسُ سَامِ ذَمَنْ لَاڢِيَ، سُو دَ یَیَنْسُ حَرْ أَبَدَا! 30 تَڢِے، كَڢَطَا مُسُ «كُواْوَ يَكُواْمَ ثِكِنْ تٜىٰنْتِنْسَ؞» 31 عَمَّا كَيْ كَڟَيَ أَنَنْ تَرٜىٰدَنِ، نِے كُوَ ذَنْ ڢَطَا مَكَ دُكَنْ دُواْكُواْكِ دَ ڧَٰعِدُواْدِ دَ عُمَرْنَنْ دَ ذَاكَ كُواْيَ مُسُ، دُواْمِنْ سُأَيْكَتَسُ عَثِكِنْ ڧَسَرْدَ نَكٜىٰ بَاسُ سُثِ غَادُوانْتَ؞› 32 «سَبُواْدَ حَكَ، كُلُورَ ڢَا، كُعَيْكَتَ دَيْدَيْ كَمَرْ يَدَّ يَهْوٜىٰهْ اللَّهْ نْكُ يَعُمَرْثٜىٰكُ؞ بَذَاكُ كَوْثٜىٰ دَامَ كُواْ هَغُبَ؞ 33 سَيْ كُبِے دَيْدَيْ حَنْيَرْ دَ يَهْوٜىٰهْ اللَّهْ نْكُ يَعُمَرْثٜىٰكُ، دُواْمِنْ كُرَايُ، كُسَامِ ذَمَنْ لَاڢِيَ، كُكُمَيِ ڟَوُانْ رَيْ عَثِكِنْ ڧَسَرْدَ ذَاكُثِ غَادُوانْتَ؞» |
Hausa Common Language Ajami Bible © The Bible Society of Nigeria, 2020
Bible Society of Nigeria