مَيْمَيْتَاوَرْ شَرِيعَ 4 - أَتَّوْرَتْ دَ أَنَّبَاوَا

مُوسَٰى يَا ڧَرْڢَڢَ جَمَعَرْ إِسْرَٰٓءِيلَ سُيِ بِيَيَّ

¹ سَيْ مُوسَٰى يَثٜىٰ وَجَمَعَرْ إِسْرَٰٓءِيلَ ‏«‏كُكَسَ كُنّٜىٰ غَ ڧَٰعِدُواْدِ دَ عُمَرْنَنَّنْ دَ نَكٜىٰ عُمَرْثٜىٰكُ كُكِيَايٜىٰ دُواْمِنْ كُرَايُ كُكُمَ شِغَ كُثِ غَادُوانْ ڧَسَرْدَ يَهْوٜىٰهْ اللَّهْ نَكَاكَنِّنْكُ يَكٜىٰ بَاكُ؞

² كَدَ كُڧَارَ كُواْ كُضَغٜىٰ دَغَ ثِكِنْ أَبِنْدَ نَكٜىٰ عُمَرْثٜىٰكُ؞ عَمَّا كُكِيَايٜىٰ عُمَرْنَنْ يَهْوٜىٰهْ اللَّهْ نْكُ وَطَنْدَ نَكٜىٰ عُمَرْثٜىٰكُ؞

³ كُو دَ عِدَنُونْكُ كُنْ غَ أَبِنْدَ يَهْوٜىٰهْ يَيِ أَ بَعَلْ ڢٜىٰيُوارْ، يَدَّ يَهْوٜىٰهْ اللَّهْ نْكُ يَهَلَّكَ وَطَنْسُ عَثِكِنْكُ وَطَنْدَ سُكَيِ سُجَّدَ غَ بَعَلْ ڢٜىٰيُوارْ؞

⁴ عَمَّا سَوْرَنْكُ وَطَنْدَ كُكَيِ أَمِنْثِ غَ يَهْوٜىٰهْ اللَّهْ نْكُ، كُنَدَ رَيْ هَرْوَيَوْ؞

⁵ ‏«‏غَاشِ، نَكُواْيَ مُكُ ڧَٰعِدُواْدِ دَ عُمَرْنَيْ دَيْدَيْ يَدَّ يَهْوٜىٰهْ اللَّهْ نَا يَعُمَرْثٜىٰنِ إِنْيِ؞ كُكِيَايٜىٰسُ عَثِكِنْ ڧَسَرْدَ ذَاكُ شِغَ دُواْمِنْ كُثِ غَادُوانْتَ؞

⁶ كُكِيَايٜىٰ كُكُمَ عَيْكَتَاسُ، غَمَا يِنْ حَكَ ذَيْ نُونَ حِكِمَرْكُ دَ غَانٜىٰوَرْكُ غَ سَوْرَنْ ڧَبِيلُ، وَطَنْدَ إِنْ سُنْجِ غَمٜىٰدَ دُكَنْ وَطَنَّنْ ڧَٰعِدُواْدِ ذَاسُثٜىٰ، ‏‹‏لَلَّيْ، وَنَّنْ بَبَّرْ أَلْعُمَّرْ مُتَنٜىٰنٜىٰ مَاسُ حِكِمَ دَ غَانٜىٰوَ!‏›‏

⁷ ‏«‏غَمَا بَابُوَتَ بَبَّرْ أَلْعُمَّرْ دَ تَكٜىٰدَ اللَّهْ‌نْتَ كُسَدَ عِتَ كَمَرْ يَدَّ يَهْوٜىٰهْ يأَنَانً كُسَدَمُو دُكْ لُواْكَثِنْ دَ مُكَيِ كِرَا غَرٜىٰشِ؞

⁸ بَابُ كُمَ وَتَ بَبَّرْ أَلْعُمَّرْ دَ تَكٜىٰدَ ڧَٰعِدُواْدِ دَ عُمَرْنَيْ مَاسُ أَدَلْثِے كَمَرْ وَطَنَّنْ كُواْيَرْوَرْ دَ نَكٜىٰ شِمْڢِطَا أَغَبَنْكُ يَوْ؞

⁹ ‏«‏سَيْ كُلُورَ، كُيِ حَنْكَلِ، دُواْمِنْ كَدَ كُمَنْتَادَ أَبُبُوَنْ دَ عِدَنُونْكُ سُكَ غَنِ، كُواْ كُبَرِ سُڢِتَ دَغَ تُنَانِنْكُ ثِكِنْ دُكَنْ ݣُونَكِنْ رَنْكُ؞ كُكُواْيَرْ وَیَیَنْكُ حَرْ دَ جِيكُواْكِنْكُ؞

¹⁰ كُڢَطَا مُسُ مُسَمَّنْ يَدَّ كُنْ ڟَيَ أَغَبَنْ يَهْوٜىٰهْ اللَّهْ نْكُ أَ هُواْرٜىٰبْ، لُواْكَثِنْ دَ يَهْوٜىٰهْ يَثٜىٰ مِنِ، ‏‹‏كَتَتَّارَ مِنِ جَمَعَ، سُجِ مَغَنَاتَ، دُواْمِنْ سُكُواْيَ يَدَّ ذَاسُيِ تَڢِيَ ثِكِنْ ڟُواْرُواْنَ دُكَنْ ݣُونَكِنْسُ عَدُونِيَا، كُمَ سُكُواْيَ وَیَیَنْسُ؞›‏

¹¹ ‏«‏كُڢَطَا وَیَیَنْكُ يَدَّ كُكَ مَڟُواْ كُسَدَ غِنْدِنْ بَبَّنْ تُدُنْ، سَعَدَّ وُتَا عَكَنْ تُدُنْ تَكٜىٰثِ تَنَ تَاشِ حَرْ سَرَرِنْ سَمَ، غَ كُمَ غِرْغِجٜىٰ بَڧِ ڧِرِنْ يَرُڢٜىٰ تُدُنْ؞

¹² يَهْوٜىٰهْ كُوَ يَيِ مُكُ مَغَنَ دَغَ ثِكِنْ وُتَرْ؞ كُكَجِ مُرْيَ يَنَ مَغَنَ، عَمَّا بَكُغَ وَنِ كَمَنِّبَ، سَيْدَيْ مُرْيَ كَطَيْ كُكَجِ؞

¹³ يَكُوَ سَنَرْ مُكُ يَرْجٜىٰجٜىٰنِيَرْسَ، وَدَّ يَعُمَرْثٜىٰكُ كُكِيَايٜىٰ، وَتُواْ دُواْكُواْكِ غُواْمَ؞ يَرُبُوتَسُ عَكَنْ أَلُّنَنْ دُوڟٜىٰ غُدَا بِيُ؞

¹⁴ أَ لُواْكَثِنَّنْ نٜىٰ يَهْوٜىٰهْ يَعُمَرْثٜىٰنِ إِنْكُواْيَ مُكُ ڧَٰعِدُواْدِ دَ عُمَرْنَيْ دُواْمِنْ كُكِيَايٜىٰسُ عَثِكِنْ ڧَسَرْدَ ذَاكُ ڧٜىٰتَرٜىٰ ذُوَا دُواْمِنْ كُغَاجٜىٰتَ؞»‏

ڟَاوَتَرْوَ عَكَنْ غُمَكَ

¹⁵ ‏«‏تُنْدَ بَكُغَ وَنِ كَمَنِّبَ أَلُواْكَثِنْ دَ يَهْوٜىٰهْ اللَّهْ نْكُ يَيِ مُكُ مَغَنَ عَبَبَّنْ تُدُنْ هُواْرٜىٰبْ، سَيْ كُكُلَ دَ كَنْكُ سُواْسَيْ،

¹⁶ دُواْمِنْ كَدَ كُڧَظَنْتَرْ دَكَنْكُ تَوُرِنْ سَسَّڧَ وَنِ غُنْكِ مَيْ كَمَنِّنْ وَتَ حَلِتَّ، كُواْ كَمَنِّنْ نَمِجِ، كُواْ تَمَثٜىٰ،

¹⁷ كُواْ كَمَنِّنْ وَتَ دَبَّرْ دَتَكٜىٰ ثِكِنْ دُونِيَا، كُواْ كَمَنِّنْ ڟُنْڟُ مَيْ تَاشِ أَسَرَرِنْ سَمَ،

¹⁸ كُواْ كَمَنِّنْ وَنِ أَبِنْدَ يَكٜىٰ رَرَّڢٜىٰ عَڧَسَا، كُواْ كَمَنِّنْ وَنِ كِيڢِنْ دَيَكٜىٰ ثِكِنْ ضُوَ عَڧَرْڧَشِنْ ڧَسَا؞

¹⁹ سَعَدَّ كُكَ طَغَ عِدُواْ كُكَ كَلِّ سَمَ، كُكَغَ رَانَ دَ وَتَ دَ تَوْرَرِ دَ دُكَنْ حَلِتُّنْ سَمَ وَطَنْدَ اللَّهْ يَشِمْڢِطَا، كُكُلَ ڢَا، كَدَ كُبَرْسُ سُجَا حَنْكَلِنْكُ حَرْ كُيِ مُسُ سُجَّدَ، كُواْ كُبَوْتَا مُسُ؞ وَطَنَّنْ أَبُبُوَ يَهْوٜىٰهْ اللَّهْ نْكُ يَبَايَرْ وَدُكَنْ سَوْرَنْ ڧَبِيلُنْ دَسُكٜىٰ كُواْعِنَ عَڧَرْڧَشِنْ سَرَرِنْ سَمَ؞

²⁰ عَمَّا يَهْوٜىٰهْ يَڢِتَرْ دَكُو دَغَ ڧَسَرْ مَصَرْ دَغَ ثِكِنْ ذَاڢِنْ وُتَرْ مَڧٜىٰرَرْ نَنْ، دُواْمِنْ كُذَمَ جَمَعَرْسَ تَمُسَمَّنْ كَمَرْ يَدَّ كُكٜىٰ عَيَوْ؞

²¹ ‏«‏عَمَّا يَهْوٜىٰهْ يَيِ ڢُشِے دَنِے سَبُواْدَكُو؞ يَكُمَ ضَنْڟٜىٰ ثٜىٰوَ بَذَنْ ڧٜىٰتَرٜىٰ كُواْغِنْ يُواْدَنْ ذُوَا ثِكِنْ ڧَسَا مَيْݣَوْ وَدَّ يَهْوٜىٰهْ اللَّهْ نْكُ يَكٜىٰ بَاكُ تَذَمَ غَادُوانْكُ تَمُسَمَّنْ بَ؞

²² غَمَا ذَنْ مُتُ عَثِكِنْ وَنَّنْ ڧَسَا، بَذَنْ ڧٜىٰتَرٜىٰ كُواْغِنْ يُواْدَنْ بَ، عَمَّا كُو ذَاكُ ڧٜىٰتَرٜىٰ، كُثِ غَادُوانْ ڧَسَا مَيْݣَوْ طِنَّنْ؞

²³ سَبُواْدَ حَكَ، كُكُلَ ڢَا، كَدَ كُمَنْتَادَ يَرْجٜىٰجٜىٰنِيَرْ دَ يَهْوٜىٰهْ اللَّهْ نْكُ يَيِ دَكُو، دُواْمِنْ كَدَ كُيِ وَكَنْكُ وَنِ غُنْكِ مَيْ كَمَنِّنْ وَتَ حَلِتَّرْ دَ يَهْوٜىٰهْ اللَّهْ نْكُ يَحَنَ؞

²⁴ غَمَا يَهْوٜىٰهْ اللَّهْ نْكُ وُتَا نٜىٰ مَيْ ثِنْيٜىٰوَ، كُمَ اللَّهْ نٜىٰ مَيْ بُڧَاتَرْ ثِكَكِّيَرْ ڧَوْنَ؞

²⁵ ‏«‏نَنْ غَبَ، سَعَدَّ كُكَ حَيْڢِ یَیَ، كُكَ كُمَ سَامِ جِيكُواْكِ، كُكَ كُوَ دَطٜىٰ دَ ذَمَ عَثِكِنْ ڧَسَرْ، كَدَ كُڧَظَنْتَرْ دَكَنْكُ تَوُرِنْ يِنْ غُنْكِ مَيْ كَمَنِّنْ وَتَ حَلِتَّ، غَمَا يِنْ حَكَ مُوغُنْ أَبُ نٜىٰ أَغَبَنْ يَهْوٜىٰهْ اللَّهْ نْكُ؞ وَنَّنْ كُمَ ذَيْسَا يَيِ ڢُشِے؞

²⁶ يَوْ، نَكِرَا سَمَ دَ دُونِيَا سُيِ مِنِ شَيْدَ عَكَنْكُ ثٜىٰوَ عِدَنْ كُكَيِ رَشِنْ بِيَيَّ، لَلَّيْ ذَاكُ هَلَّكَ دَ سَوْرِ دَغَ ڧَسَرْدَ كُكٜىٰ ڧٜىٰتَرٜىٰ يُواْدَنْ دُواْمِنْ كُثِ غَادُوانْتَ؞ بَذَاكُ دَطٜىٰ عَثِكِنْتَ بَ، عَمَّا ذَاعَ كَوَرْ دَكُو كَكَڢْ؞

²⁷ غَمَا يَهْوٜىٰهْ ذَيْ وَرْوَاڟَرْ دَكُو ثِكِنْ أَلْعُمَّيْ، كَطَنْ دَغَ ثِكِنْكُ نٜىٰ ذَاسُ رَغُ عَثِكِنْ أَلْعُمَّنْ دَ ذَيْ وَرْوَاڟَرْ دَكُو عَثِكِ؞

²⁸ عَثَنْ ذَاكُ بَوْتَاوَ أَلُّواْلِنْ دَ مُتُمْ يَسَسَّڧَ دَ حَنُّنْسَ، أَلُّواْلِنْ إِتَاثٜىٰ دَ نَدُوڟٜىٰ، وَطَنْدَ بَاسَ غَنِ، بَاسَجِ، بَاسَثِ، كُواْ سَنْسَنَ؞

²⁹ عَمَّا دَغَ ثَنْ عِنْدَ كُكٜىٰ، إِنْ كُنْ نٜىٰمِ يَهْوٜىٰهْ اللَّهْ نْكُ، ذَاكُ سَامٜىٰشِ عِدَنْ كُكَ نٜىٰمٜىٰشِ دَ دُكَنْ ذُوثِيَارْكُ دَ دُكَنْ رَنْكُ؞

³⁰ سَعَدَّ كُكٜىٰ ثِكِنْ وَهَلَ، وَطَنَّنْ أَبُبُوَ كُمَ سُكَ سَامٜىٰكُ عَكْوَانَكِے مَاسُ ذُوَا، ذَاكُ جُويُواْ غَ يَهْوٜىٰهْ اللَّهْ نْكُ، كُيِ مَسَ بِيَيَّ؞

³¹ غَمَا يَهْوٜىٰهْ اللَّهْ نْكُ، اللَّهْ مَيْ جِنْڧَيْ نٜىٰ؞ بَذَيْ يَاشٜىٰكُبَ، بَذَيْ هَلَّكَكُبَ، كُواْ يَمَنْتَادَ يَرْجٜىٰجٜىٰنِيَرْدَ يَرَنْڟٜىٰوَ كَاكَنِّنْكُبَ؞

³² ‏«‏كُبِنْثِكَ دُكَنْ تَارِيحِ مَنَ، تُنْدَغَ لُواْكَثِنْ دَ اللَّهْ يَحَلِثِّ یَنْ أَدَمْ عَثِكِنْ دُونِيَا حَرْ ذُوَا يَنْذُ؞ كُسَاكٜىٰ تَمْبَيَ دَغَ وَنَّنْ إِيَاكَرْ سَمَ ذُوَا وَنْثَنْ، كُواْ وَنِ أَبُ مَيْغِرْمَ إِرِنْ وَنَّنْ يَتَٻَ ڢَرُوَ؟ كُواْ كُوَ أَنْتَٻَ جِنْ لَابَرِ إِرِنْسَ؟

³³ كُواْ أَݣَويْ وَتَ ڧَبِيلَرْ دَ تَتَٻَ جِنْ مُرْيَرْ وَنِ اللَّهْ تَنَ مَغَنَ دَغَ ثِكِنْ ڟَكِيَرْ وُتَا كَمَرْ يَدَّ كُو كُكَجِ، حَرْ سُكَ رَايُ؟

³⁴ كُواْ أَݣَويْ وَنِ اللَّهْ وَنْدَ يَتَٻَ ڧُواْڧَرِنْ طَوْكُواْ وَكَنْسَ وَتَ أَلْعُمَّ دَغَ ثِكِنْ ڟَكِيَرْ وَتَ أَلْعُمَّ كَمَرْ يَدَّ يَهْوٜىٰهْ اللَّهْ نْكُ يَيِ مُكُ عَڧَسَرْ مَصَرْ؟ أَغَبَنْ عِدَنُونْكُ تَوُرِنْ حَنُّنْسَ مَيْ إِيكُواْ دَ أَيُّكَنْ بَنْ مَامَاكِ يَكَٰوُاْ بَلَعِ دَ عَلَمُ دَ أَيُّكَنْ مَاسُ بَنْ ڟُواْرُواْ دَ يَڧُواْڧِ؞

³⁵ أَنْ نُونَ مُكُ وَطَنَّنْ أَبُبُوَ دُواْمِنْ كُسَنِ ثٜىٰوَ يَهْوٜىٰهْ شِينٜىٰ اللَّهْ، بَنْدَشِ، بَا وَنِ كُمَ؞

³⁶ دَغَ سَمَ يَسَا كُكَجِ مُرْيَرْسَ دُواْمِنْ يَهُواْرَرْ دَكُو؞ عَدُونِيَا يَسَا كُكَغَ بَبَّرْ وُتَرْسَ، كُكَ كُمَجِ مَغَنَرْسَ دَغَ ثِكِنْ وُتَرْ؞

³⁷ سَبُواْدَ يَڧَوْنَثِ كَاكَنِّنْكُ، شِے يَسَا يَذَاٻٜىٰكُ ذُرِيَرْسُ عَبَايَنْسُ؞ شِے دَ كَنْسَ يَڢِتَرْ دَكُو دَغَ ڧَسَرْ مَصَرْ تَوُرِنْ إِيكُوانْسَ مَيْغِرْمَ؞

³⁸ أَغَبَنْكُ يَكُواْرِ أَلْعُمَّنْ دَ سُكَڢِيكُ غِرْمَ دَ كُمَ ڧَرْڢِے، دُواْمِنْ يَكَٰوُاْكُ عَثِكِنْ ڧَسَرْسُ، يَكُمَ بَاكُ تَذَمَ مَلَّكَرْكُ تَغَادُواْ، كَمَرْ يَدَّ يَكٜىٰ عَيَوْ؞

³⁹ سَبُواْدَ حَكَ، يَوْ سَيْ كُسَنِ، كُكُمَ رِڧٜىٰ أَ ذُوثِيَارْكُ سُواْسَيْ ثٜىٰوَ يَهْوٜىٰهْ شِ كَطَيْ نٜىٰ اللَّهْ عَثَنْ سَمَ، كُواْ أَنَنْ دُونِيَا، بَنْدَشِ، بَا وَنِ؞

⁴⁰ كُكِيَايٜىٰ ڧَٰعِدُواْدِنْسَ دَ عُمَرْنَنْسَ، وَطَنْدَ نَكٜىٰ عُمَرْثٜىٰكُ يَوْ، دُواْمِنْ كُسَامِ ذَمَنْ لَاڢِيَ دَكُو دَ یَیَنْكُ وَطَنْدَ ذَاكُ حَيْڢَ، دُواْمِنْ كُدَطٜىٰ عَثِكِنْ ڧَسَرْدَ يَهْوٜىٰهْ اللَّهْ نْكُ يَكٜىٰ بَاكُ حَرْ أَبَدَا؞»‏

غَرُضُوً مَڢَكَا أَغَبَسْ دَ كُواْغِنْ يُواْدَنْ

⁴¹ سَيْ مُوسَٰى يَكٜىٰٻٜىٰ غَرُرُوَ عُكُ أَغَبَشِنْ كُواْغِنْ يُواْدَنْ،

⁴² دُواْمِنْ إِنْ وَنِ يَيِ كِسَنْ كَيْ بَ دَ غَنْ‌غَنْبَ ذَيْ عِيَ غُدُ ذُوَا ثَنْ، وَتُواْ دُكْ وَنْدَ يَكَشٜىٰ مُتُمْ بَاتَرٜىٰدَ أَݣَويْ ڧِيَيَّ ڟَكَانِنْسُبَ؞ عِدَنْ وَنْدَ يَيِ كِسَنْ كَيْ طِنْ يَغُدُ يَشِغَ ثِكِنْ طَيَ دَغَ غَرُرُوَنَّنْ، ذَيْ ڟِيرَرْ دَ رَنْسَ؞

⁴³ وَطَنَّنْ غَرُرُوَ سُونٜىٰ بٜىٰظٜىٰرْ، وَنْدَ يَكٜىٰ ثِكِنْ دَاجِ عَيَنْكِنْ تُدَّيْ وَنْدَ يَكٜىٰ نَظُرِيَرْ رَعُبَيْنُ دَ رَمُواتْ تَ غِلٜىٰيَدْ ثِكِنْ يَنْكِنْ ذُرِيَرْ غَدْ دَ غُواْلَنْ عَثِكِنْ يَنْكِنْ بَشَنْ نَظُرِيَرْ مَنَسّٜىٰ؞

غَبَاتَرْوَ غَمٜىٰدَ دُواْكُواْكِنْ اللَّهْ

⁴⁴ وَنَّنْ عِتَثٜىٰ كُواْيَرْوَرْ دَ مُوسَٰى يَشِمْڢِطَا وَ جَمَعَرْ إِسْرَٰٓءِيلَ؞

⁴⁵ وَطَنَّنْ سُونٜىٰ دُواْكُواْكِ دَ ڧَٰعِدُواْدِ دَ عُمَرْنَنْ دَ مُوسَٰى يَڢَطَا وَجَمَعَرْ إِسْرَٰٓءِيلَ لُواْكَثِنْ دَ سُكَ ڢِتُواْ دَغَ ڧَسَرْ مَصَرْ،

⁴⁶ سَعَدَّ سُكَيِ ذَنْ‌غُواْ أَغَبَسْ دَ كُواْغِنْ يُواْدَنْ عَثِكِنْ ݣُورِنْ دَيَكٜىٰ ڢُسْكَنْتَرْ بٜىٰتْ ڢٜىٰيُوارْ؞ دَا كُوَ وَنَّنْ يَنْكِنْ ڧَسَرْ نَ سَرْكِے سِهُوانْ نَ أَمُواْرِيَاوَا نٜىٰ، وَنْدَ يَكٜىٰ مُلْكِ أَ هٜىٰشْبُوانْ؞ مُوسَٰى دَ جَمَعَرْ إِسْرَٰٓءِيلَ سَعَدَّ سُكٜىٰ ڢِتُواْوَ دَغَ مَصَرْ، سُنْثِ أَمُواْرِيَاوَنَّنْ دَ يَاڧِ؞

⁴⁷ سُكَثِ غَادُوانْ ڧَسَرْ سَرْكِے سِهُوانْ دَ ڧَسَرْ سَرْكِے عُواغْ نَ بَشَنْ، سَرَاكُنَ بِيُ أَغَبَشِنْ كُواْغِنْ يُواْدَنْ؞

⁴⁸ ڧَسَرْ نَنْ تَمِيڧٜىٰ دَغَ أَرُواْوٜىٰرْ، وَنْدَ يَكٜىٰ عَبَاكِنْ ݣُورِنْ كُواْغِنْ أَرْنُوانْ، حَرْ ذُوَا بَبَّنْ تُدُنْ سِرِيُوانْ، وَتُواْ هَرْمُوانْ؞

⁴⁹ تَا كُمَ حَطَ دَ دُكَنْ يَنْكِنْ أَرَبَ أَغَبَشِنْ كُواْغِنْ يُواْدَنْ، حَرْ ذُوَا تٜىٰكُنْ أَرَبَ، ڧَسَا دَ غِنْدِنْ بَبَّنْ تُدُنْ ڢِسْغَ؞