مَيْمَيْتَاوَرْ شَرِيعَ 31 - أَتَّوْرَتْ دَ أَنَّبَاوَا

يُواْشُوَ يَا كَرْٻِ عَيْكِنْ أَ حَنُّنْ مُوسَٰى

¹ سَيْ مُوسَٰى يَثِيغَبَدَ ڢَطِنْ وَطَنَّنْ كَلْمُواْمِ غَ دُكَنْ جَمَعَرْ إِسْرَٰٓءِيلَ؞

² يَثٜىٰ مُسُ ‏«‏يَنْذُ شٜىٰكَرُنَ طَرِے نٜىٰ دَ عَشِرِنْ؞ بَانَ عِيَ كَيْوَ دَ دَاوُاْوَ؞ يَهْوٜىٰهْ كُوَ يَا رِغَا يَا ثٜىٰ مِنِ، ‏‹‏بَذَاكَ ڧٜىٰتَرٜىٰ وَنَّنْ كُواْغِنْ يُواْدَنْ بَ؞›‏

³ يَهْوٜىٰهْ اللَّهْ نْكُ شِ دَ كَنْسَ ذَيْ شَا غَبَنْكُ يَڧٜىٰتَرٜىٰ كُواْغِنْ؞ ذَيْ هَلَّكَ وَطَنَّنْ أَلْعُمَّيْ أَغَبَنْكُ، دُواْمِنْ كُكُواْرٜىٰسُ؞ يُواْشُوَ كُوَ ذَيْ ذَمَ شُوغَبَنْكُ، ذَيْشَا غَبَنْكُ يَڧٜىٰتَرٜىٰ كُواْغِنْ كَمَرْ يَدَّ يَهْوٜىٰهْ يَڢَطَا؞

⁴ يَهْوٜىٰهْ ذَيْ يِمُسُ كَمَرْ يَدَّ يَيِ وَ سِهُوانْ دَ عُواغْ، سَرَاكُنَنْ أَمُواْرِيَاوَا دَ ڧَسَرْسُ، لُواْكَثِنْدَ يَهَلَكَاسُ؞

⁵ يَهْوٜىٰهْ كُوَ ذَيْبَادَسُو أَ حَنُّنْكُ؞ كُو كُمَ سَيْ كُيِ مُسُ بِسَغَ عُمَرْنَنْدَ نَعُمَرْثٜىٰكُ؞

⁶ كُڧَرْڢَڢَ، كُيِ ڧَرْڢِنْ حَلِ، كَدَ كُجِڟُواْرُواْ كُواْ كُڢِرْغِتَ سَبُواْدَسُو، غَمَا يَهْوٜىٰهْ اللَّهْ نْكُ نٜىٰ يَكٜىٰ تَڢِيَ تَرٜىٰدَكُو؞ بَذَيْ كُنْيَتَرْ دَكُو بَ، بَ كُوَ ذَيْ يَاشٜىٰكُبَ؞»‏

⁷ سَيْ مُوسَٰى يَكِرَا يُواْشُوَ كُمَ أَعِدُوانْ دُكَنْ إِسْرَٰٓءِيلَ يَثٜىٰ مُسُ ‏«‏كَڧَرْڢَڢَ كَكُمَيِ ڧَرْڢِنْ حَلِ، غَمَا كَيْنٜىٰ ذَاكَ بِيدَ وَنَّنْ جَمَعَ سُشِغَ ثِكِنْ ڧَسَرْدَ يَهْوٜىٰهْ يَرَنْڟٜىٰوَ كَاكَنِّنْكُ ذَيْبَاسُ؞ كَيْ كُمَ ذَاكَسَاسُ سُثِ غَادُوانْتَ؞

⁸ يَهْوٜىٰهْ نٜىٰ ذَيْ شَا غَبَنْكَ يَبِے دَكَيْ؞ بَذَيْ كُنْيَتَرْ دَكَيْبَ، بَ كُوَ ذَيْ يَاشٜىٰكَبَ؞ كَدَ كَجِڟُواْرُواْ، كَدَ كَڢِرْغِتَ؞»‏

ذَاعَكَرَنْتَ كُواْيَرْوَرْ عَكُواْوَثٜىٰ شٜىٰكَرَا تَبَݣَويْ

⁹ سَيْ مُوسَٰى يَرُبُوتَ وَنَّنْ كُواْيَرْوَا، يَبَا ڢِرِسْتُواْثِے، وَتُواْ ذُرِيَرْ لَوِ وَطَنْدَ سُونٜىٰ مَاسُ طَوْكَرْ عَݣُوتِنْ يَرْجٜىٰجٜىٰنِيَ نَ يَهْوٜىٰهْ، يَكُمَ بَا دُكَنْ دَتَّاوَنْ إِسْرَٰٓءِيلَ؞

¹⁰ مُوسَٰى يَعُمَرْثٜىٰسُ يَثٜىٰ ‏«‏عَڧَرْشٜىٰنْ كُواْوَثٜىٰ شٜىٰكَرَا تَبَݣَويْ، أَدَيْدَيْ شٜىٰكَرَرْ يَاڢٜىٰوَا وَدَّ عَكَ ڟَارَا، سَيْ كُكَرَنْتَ وَنَّنْ كُواْيَرْوَا أَ لُواْكَثِنْ بِكٍ بُكُّواْكِ؞

¹¹ أَ لُواْكَثِنْ دَ دُكَنْ إِسْرَٰٓءِيلَاوَا سُكَ تَارُ أَغَبَنْ يَهْوٜىٰهْ اللَّهْ نْكُ أَوُرِنْ دَ ذَيْ ذَاٻَا دُواْمِنْ عَيِ مَسَ سُجَّدَ، سَيْ عَكَرَنْتَ وَنَّنْ كُواْيَرْوَا أَغَبَنْ دُكَنْ إِسْرَٰٓءِيلَ دُواْمِنْ سُجِ دَ كُنُّوَنْسُ؞

¹² كُتَتَّارَ جَمَعَرْ، وَتُواْ مَظَا دَ مَاتَادَ يَارَا، حَرْ مَا دَ بَڧِنْ دَسُكٜىٰ ذَمَ عَثِكِنْ غَرُرُوَنْكُ، دُواْمِنْ سُجِيسُ كُواْيَ يَدَّ ذَاسُيِ تَڢِيَ ثِكِنْ ڟُواْرُوانْ يَهْوٜىٰهْ اللَّهْ نْكُ، سُكُمَ لُورَ سُأَيْكَتَ دُكَنْ كَلْمُواْمِنْ وَنَّنْ كُواْيَرْوَا؞

¹³ كُيِ حَكَ دُواْمِنْ یَیَنْسُ وَطَنْدَ بَسُ سَنِبَ، سُجِيسُ كُمَ كُواْيَ يَدَّ ذَاسُيِ تَڢِيَ ثِكِنْ ڟُواْرُوانْ يَهْوٜىٰهْ اللَّهْ نْكُ، مُدِّنْ كُنَ ظَوْنٜىٰ عَثِكِنْ ڧَسَرْدَ ذَاكُ ڧٜىٰتَرٜىٰ كُواْغِنْ يُواْدَنْ كُثِ غَادُوانْتَ؞»‏

عُمَرْنِنْ ڧَرْشٜىٰ دَ يَهْوٜىٰهْ يَيِ وَ مُوسَٰى

¹⁴ يَهْوٜىٰهْ يَثٜىٰ وَ مُوسَٰى ‏«‏رَانَرْ مُتُوَرْكَ تَايِ كُسَ؞ كَكِرَا يُواْشُوَ تَرٜىٰدَكَيْ كُشِغُواْ ثِكِنْ تٜىٰنْتِنْ سَدُوَ، دُواْمِنْ إِنْ بَاشِ حَكِّنْ شُوغَبَنْثِ؞»‏ سَيْ مُوسَٰى دَ يُواْشُوَ سُكَ تَڢِے سُكَ شِغَ ثِكِنْ تٜىٰنْتِنْ سَدُوَ،

¹⁵ يَهْوٜىٰهْ كُمَ يَبَيَّنَ عَتٜىٰنْتِنْ عَثِكِنْ ڧُنْشِنْ غِرْغِجٜىٰ؞ ڧُنْشِنْ غِرْغِجٜىٰنْ كُوَ يَڟَيَ عَڧُواْڢَرْ تٜىٰنْتِنْ؞

¹⁶ سَيْ يَهْوٜىٰهْ يَثٜىٰ وَ مُوسَٰى ‏«‏غَاشِ، بَدَ دَطٜىٰوَبَ ذَاكَيِ بَرْثِ تَرٜىٰدَ كَاكَنِّنْكَ؞ سَعَنً جَمَعَرْ نَنْ ذَاسُ تَاشِ سُيِ كَارُوَنْثِ تَوُرِنْ سُجَّدَ غَ غُمَكَنْ أَلُّواْلِنْ ڧَبِيلُ، أَلُّواْلِنْ ڧَسَرْدَ ذَاسُ شِغَ؞ ذَاسُ يَاشٜىٰنِ، سُكَرْيَ يَرْجٜىٰجٜىٰنِيَتَ وَدَّ نَيِ دَسُو؞

¹⁷ أَوَنَّنْ رَانَ ڢُشِنَ ذَيْ يِڧُونَ عَكَنْسُ سُواْسَيْ؞ ذَنْ يَاشٜىٰسُ إِنْكُمَ ٻُواْيٜىٰ ڢُسْكَتَ دَغَ غَرٜىٰسُ، ذَاعَ ثِنْيٜىٰسُ دَ يَاڧِ، كُمَ وَهَلُواْلِ دَ مَسِيڢَ مَاسُيَوَ ذَاسُ ڢَاطُواْ مُسُ؞ أَ رَانَرْ نَنْ ذَاسُثٜىٰ، ‏‹‏وَهَلُواْلِنَّنْ سُنْ سَامٜىٰمُ سَبُواْدَ اللَّهْ نْمُ بَايَ تَرٜىٰدَمُو؞›‏

¹⁸ أَ رَانَرْ نَنْ، حَڧِيڧَ ذَنْ ٻُواْيٜىٰ ڢُسْكَتَ سَبُواْدَ دُكَنْ مُغُنْتَارْ دَسُكَيِ تَوُرِنْ جُويَاوَا غَ وَطَنْسُ أَلُّواْلِ؞

¹⁹ يَنْذُ ڢَا، سَيْ كَرُبُوتَ وَنَّنْ وَاڧَا، كَكُواْيَ وَجَمَعَرْ إِسْرَٰٓءِيلَ؞ كَسَاتَ عَثِكِنْ بَاكِنْسُ دُواْمِنْ وَنَّنْ وَاڧَا تَذَمَ شَيْدَ أَغَرٜىٰنِ عَكَنْ جَمَعَرْ إِسْرَٰٓءِيلَ؞

²⁰ ذَنْ كَٰوُاْسُ ثِكِنْ ڧَسَا مَيْ أَمْڢَانِ وَدَّ نَيِ أَلْڧَوَرِ تَرٜىٰدَ ضَنْڟُوَا ذَنْبَا كَاكَنِّنْسُ؞ سَعَدَّ سُكَثِ سُكَ ڧُواْشِ سُكَيِ ڧِبَ أَوُرِنْ، ذَاسُ جُويَا غَ وَطَنْسُ أَلُّواْلِ سُبَوْتَا مُسُ، سُرٜىٰنَ نِے سُكُمَ كَرْيَ يَرْجٜىٰجٜىٰنِيَتَ؞

²¹ سَعَدَّ وَهَلُواْلِ دَ مَسِيڢَ مَاسُيَوَ سُكَ ڢَاطُواْ مُسُ، وَنَّنْ وَاڧَا ذَاتَ ذَمَ شَيْدَ عَكَنْسُ، دُواْمِنْ بَذَاتَ ٻَثٜىٰ دَغَ بَاكِنْ ذُرِيَرْسُبَ؞ غَمَا نَاسَنْ تُنَانِنْسُ عَكَنْ أَبِنْدَ سُكٜىٰ عِيَيِ تُنْ كَاڢِنْ إِنْكَٰوُاْسُ ثِكِنْ ڧَسَرْدَ نَيِ مُسُ أَلْڧَوَرِ دَ ضَنْڟُوَا؞»‏

²² أَوَنَّنْ رَانَ مُوسَٰى يَرُبُوتَ وَنَّنْ وَاڧَا يَكُواْيَاوَ جَمَعَرْ إِسْرَٰٓءِيلَ؞

²³ سَيْ يَهْوٜىٰهْ يَعُمَرْثِ يُواْشُوَ طَنْ نُنْ يَثٜىٰ ‏«‏كَڧَرْڢَڢَ، كَكُمَيِ ڧَرْڢِنْ حَلِ، غَمَا كَيْنٜىٰ ذَاكَ بِيدَ جَمَعَرْ إِسْرَٰٓءِيلَ ثِكِنْ ڧَسَرْدَ نَرَنْڟٜىٰ ذَنْبَاسُ؞ نِے كُوَ ذَنْ كَسَنْثٜىٰ تَرٜىٰدَكَيْ؞»‏

²⁴ سَيْ مُوسَٰى يَرُبُوتَ دُكَنْ كَلْمُواْمِنْ وَنَّنْ كُواْيَرْوَا عَثِكِنْ لِتَّڢِ؞ سَعَدَّ يَغَمَ

²⁵ سَيْ يَعُمَرْثِ لَوِيَاوَا مَاسُ طَوْكَرْ عَݣُوتِنْ يَرْجٜىٰجٜىٰنِيَرْ يَهْوٜىٰهْ يَثٜىٰ،

²⁶ ‏«‏كُطَوْكِ وَنَّنْ لِتَّڢِنْ كُواْيَرْوَا كُ أَجِيٜىٰشِ عَثِكِنْ عَݣُوتِنْ يَرْجٜىٰجٜىٰنِيَرْ يَهْوٜىٰهْ اللَّهْ نْكُ، دُواْمِنْ يَكَسَنْثٜىٰ أَبِنْ شَيْدَ عَكَنْكُ؞

²⁷ غَمَا نَا سَنْ تَيَرْوَرْكُ دَ تَوْرِنْ كَنْكُ؞ عِدَنْ ڢَا كُنَ تَاوَيٜىٰ غَ يَهْوٜىٰهْ تُنْ إِنَانَنْ دَ رَيْ عَثِكِنْكُ، يَيَ أَبِنْ ذَيْ كَسَنْثٜىٰ بَايَنْ مُتُوَتَ؟

²⁸ كُتَتَّارُواْ مِنِ دُكَنْ دَتَّاوَنْ ذُرِيَرْكُ دَ شُوغَبَنِّنْكُ، دُواْمِنْ إِنْ مَيْمَيْتَ وَطَنَّنْ كَلْمُواْمِ عَكُنُّوَنْسُ، إِنْكُمَ كِرَا سَمَ دَ دُونِيَا سُذَمَ شَيْدُ عَكَنْسُ؞

²⁹ غَمَا نَا سَنِ بَايَنْ مُتُوَتَ، لَلَّيْ ذَاكُ ڧَظَنْتَرْدَ كَنْكُ، ذَاكُ جُويَا دَغَ حَنْيَرْدَ نَعُمَرْثٜىٰكُ؞ عَكْوَانَكِے مَاسُ ذُوَا وَهَلَ ذَاتَ ڢَاطُواْ مُكُ، غَمَا ذَاكُ عَيْكَتَ أَبِنْدَ يَكٜىٰ مُوغُ أَعِدُوانْ يَهْوٜىٰهْ، ذَاكُسَا يَيِ ڢُشِے تَوُرِنْ أَيُّكَنْ حَنُّوَنْكُ؞»‏

وَاڧَرْ مُوسَٰى

³⁰ سَعَنً مُوسَٰى يَڢَطِ كَلْمُواْمِنْ وَنَّنْ وَاڧَا حَرْ ڧَرْشٜىٰ عَكُنّٜىٰنْ تَارُوانْ دُكَنْ جَمَعَرْ إِسْرَٰٓءِيلَ؞