مَيْمَيْتَاوَرْ شَرِيعَ 3 - أَتَّوْرَتْ دَ أَنَّبَاوَاإِسْرَٰٓءِيلَاوَا سُنْثِ عُواغْ نَ بَشَنْ دَ يَاڧِ ﴿ لِـ ڧِدْ 21.31-35 ﴾ 1 «سَعَدَّ مُكَ جُويَا مُكَ هَوْرَ ذُوَا بَشَنْ، سَيْ سَرْكِے عُواغْ نَ بَشَنْ تَرٜىٰدَ دُكَنْ مُتَنٜىٰنْسَ سُكَ كَٰوُاْ مَنَ يَاڧِ أَ عٜىٰدِرَيْ؞ 2 عَمَّا يَهْوٜىٰهْ يَثٜىٰ مِنِ، ‹كَدَ كُجِڟُواْرُوانْسُ، غَمَا نَارِغَا نَا بَادَشِ دَ جَمَعَرْسَ دَ ڧَسَرْسَ أَ حَنُّنْكُ؞ كُيِ مَسَ أَبِنْدَ كُكَيِ وَ سَرْكِے سِهُوانْ نَ أَمُواْرِيَاوَا وَنْدَ يَيِ مُلْكِ أَ هٜىٰشْبُوانْ؞› 3 «تَهَكَ يَهْوٜىٰهْ اللَّهْ نْمُ يَبَادَ سَرْكِے عُواغْ دَ دُكَنْ مُتَنٜىٰنْسَ أَ حَنُّنْمُ، مُو كُوَ مُكَ كَكَّشٜىٰسُ حَرْ بَابُوَنْدَ يَضَغٜىٰ دَ رَيْ؞ 4 مُكَثِ دُكَنْ غَرُرُوَنْسَ أَ لُواْكَثِنْ؞ بَابُ كُواْ وُرِے طَيَ مَيْ كَتَنْغَ عَثِكِنْ غَرِ وَنْدَ بَمُكَرْٻَ دَغَ غَرٜىٰشِيبَ؞ دُكَنْ غَرُضُوً دَ مُكَثِ دَ يَاڧِ سُنْ كَيْ سِتِّنْ، وَتُواْ دُكَنْ يَنْكِنْ أَرْغُوابْ دَ دُكَنْ يَنْكِنْ مُلْكٍ عُواغْ نَ بَشَنْ؞ 5 دُكَنْ وَطَنَّنْ غَرُرُوَ مَاسُ كَتَنْغَ مَاسُ ڟَيِ نٜىٰ، مَاسُ مَنْيَنْ ڧُواْڢُواْڢِ، مَاسُ سَنْدُنَنْ ڧَرْڢٜىٰ؞ بَنْ دَ وَطَنَّنْ غَرُرُوَ، أَݣَويْ ڧَوْيُكَ دَيَوَ وَطَنْدَ سُكٜىٰ كٜىٰوَيٜىٰ دَ غَرُضُوً؞ 6 مُكَ هَلَكَاسُ كَكَڢْ، كَمَرْ يَدَّ مُكَيِ وَ سَرْكِے سِهُوانْ نَ هٜىٰشْبُوانْ؞ مُكَ هَلَّكَ كُواْوَنٜىٰ غَرِ دَ دُكَنْ مَظَا دَ مَاتَادَ يَارَا؞ 7 عَمَّا مُكَ رِڧٜىٰ دُكَنْ دَبُّواْبِے دَ دُكَنْ كَايَنْ دَ مُكَ ڨُوثٜىٰ دَغَ غَرُضُوً دُواْمِنْ كَنْمُ؞ 8 «أَ لُواْكَثِنْ نٜىٰ مُكَ ڨُوثٜىٰ دُكَنْ ڧَسَا دَغَ حَنُّنْ سَرَاكُنَنَّنْ بِيُ نَ أَمُواْرِيَاوَا، وَتُواْ ڧَسَرْدَ تَكٜىٰ غَبَشِنْ كُواْغِنْ يُواْدَنْ دَغَ كُواْغِنْ أَرْنُوانْ ذُوَا بَبَّنْ تُدُنْ هَرْمُوانْ؞» 9 سِدُواْنِيَاوَا كُوَ سُكَ كِرَا هَرْمُوانْ دَ سُونَ سِرِيُوانْ، أَمُواْرِيَاوَا كُمَ سُنَ كِرَنْسَ سٜىٰنِرْ؞ 10 «مُنْثِ دُكَنْ غَرُضُوً يَنْكِنْ تُدَّيْ دَ يَاڧِ دَ دُكَنْ يَنْكِنْ غِلٜىٰيَدْ دَ دُكَنْ يَنْكِنْ بَشَنْ، حَرْ ذُوَا غَرُضُوً سَلٜىٰكَ دَ عٜىٰدِرَيْ، وَطَنْدَ سُكٜىٰ عَيَنْكِنْ مُلْكٍ سَرْكِے عُواغْ نَ بَشَنْ؞» 11 سَرْكِے عُواغْ نَ بَشَنْ نٜىٰ كَطَيْ يَضَغٜىٰ دَغَ ذُرِيَرْ ڧَتِّنْ مُتَنٜىٰنْ رٜىٰڢَيَاوَا؞ غَدُوانْسَ نَڧَرْڢٜىٰ نٜىٰ، ڟَوُانْسَ يَڢِ ڧَڢَا غُواْمَشَا عُكُ، ڢَاطِنْسَ كُمَ يَكَيْ ڧَڢَا شِدَ؞ يَنَنً عَثِكِنْ بِرْنِنْ رَبَّهْ تَ أَمُّواْنَاوَا هَرْوَيَوْ؞ ذُرِيَرْ دَ سُكَ ذَوْنَ غَبَسْ دَ كُواْغِنْ يُواْدَنْ ﴿ لِـ ڧِدْ 32.1-42 ﴾ 12 «أَ لُواْكَثِنْ دَ مُكَ ڨُوثٜىٰ وَنَّنْ ڧَسَرْ، نَبَا ذُرِيَرْ رَعُبَيْنُ دَ تَ غَدْ أَبِنْدَ يَطَوْكَ دَغَ يَنْكِنْ أَرُواْوٜىٰرْ وَنْدَ يَكٜىٰ عَبَاكِنْ ݣُورِنْ كُواْغِنْ أَرْنُوانْ، تَرٜىٰدَ رَبِنْ يَنْكِنْ تُدَّيْ نَ غِلٜىٰيَدْ دَ غَرُرُوَنْتَ؞ 13 رَبِنْ ذُرِيَرْ مَنَسّٜىٰ، نَبَاسُ دُكَنْ سَوْرَنْ يَنْكِنْ غِلٜىٰيَدْ دَ دُكَنْ يَنْكِنْ بَشَنْ وَنْدَ سَرْكِے عُواغْ يَيِ مُلْكِ؞» دَا كُوَ دُكَنْ يَنْكِنْ أَرْغُوابْ عَبَشَنْ، أَنَ كِرَنْسَ يَنْكِنْ رٜىٰڢَيَاوَا؞ 14 يَايِرْ دَغَ ذُرِيَرْ مَنَسّٜىٰ يَكَرْٻِ دُكَنْ يَنْكِنْ أَرْغُوابْ، وَتُواْ ڧَسَرْ بَشَنْ، حَرْ ذُوَا إِيَاكَرْ ڧَسَرْ مُتَنٜىٰنْ غٜىٰشُرْ دَ تَمُتَنٜىٰنْ مَعَكَ؞ يَثَنْجَ سُونَيٜىٰنْ ڧَوْيُكَنْ ذُوَا سُونَنْسَ، وَتُواْ ڧَوْيُكَنْ يَايِرْ، كَمَرْ يَدَّ يَكٜىٰ هَرْوَيَوْ؞ 15 «مَكِرْ دَ دَنْغِنْسَ، نَبَاسُ يَنْكِنْ غِلٜىٰيَدْ؞ 16 ذُرِيَرْ رَعُبَيْنُ دَ تَ غَدْ، نَبَاسُ يَنْكِنْدَ يَتَاشِ دَغَ غِلٜىٰيَدْ حَرْ ذُوَا كُواْغِنْ أَرْنُوانْ، ڟَكِيَرْ كُواْغِنْ ثٜىٰ إِيَاكَرْسُ، حَرْ ذُوَا كُواْغِنْ يَبُّواكْ وَنْدَ يَيِ إِيَاكَ دَ ڧَسَرْ أَمُّواْنَاوَا؞ 17 نَكُمَ بَاسُ أَرَبَ دَ ݣُورِنْ كُواْغِنْ يُواْدَنْ، كُواْغِنْ نٜىٰ إِيَاكَرْسُ دَغَ تٜىٰكُنْ غَلِيلِ ذُوَا تٜىٰكُنْ غِشِرِ، حَرْ ذُوَا غِنْدِنْ بَبَّنْ تُدُنْ ڢِسْغَ وَجٜىٰنْ غَبَسْ؞» 18 مُوسَٰى يَثِيغَبَدَ مَغَنَ دَ ذُرِيَرْ رَعُبَيْنُ دَ تَ غَدْ دَ رَبِنْ ذُرِيَرْ مَنَسّٜىٰ يَثٜىٰ «أَ لُواْكَثِنْ نَبَاكُ عُمَرْنِ ثٜىٰوَ ‹يَهْوٜىٰهْ اللَّهْ نْكُ يَبَاكُ وَنَّنْ ڧَسَا كُثِ غَادُوانْتَ؞ دُكَنْ مُتَنٜىٰنْكُ دَ سُكَ إِسَ يَاڧِ ذَاسُيِ شِرِنْ يَاڧِ سُڧٜىٰتَرٜىٰ كُواْغِنْ يُواْدَنْ؞ ذَاسُ شَا غَبَنْ یَنْعُوَنْكُ إِسْرَٰٓءِيلَاوَا، سُتَيْمَكٜىٰسُ؞ 19 سَيْ دَيْ مَاتَنْكُ دَ یَیَنْكُ دَ دَبُّواْبِنْكُ، دُواْمِنْ نَسَنِ كُنَدَ دَبُّواْبِے دَيَوَ سُواْسَيْ، ذَاكُبَرْسُ عَثِكِنْ غَرُضُوً دَ نَارِغَا نَا بَاكُ؞ 20 سَيْ لُواْكَثِنْ دَ يَهْوٜىٰهْ يَبَا یَنْعُوَنْكُ إِسْرَٰٓءِيلَاوَا هُوتُ، كَمَرْ يَدَّ يَبَاكُ، كُمَ سَعَدَّ سُكَثِ غَادُوانْ ڧَسَرْدَ يَهْوٜىٰهْ اللَّهْ نْكُ يَكٜىٰ بَسُ عَڧٜىٰتَرٜىٰنْ كُواْغِنْ يُواْدَنْ، ذَاكُ دَاوُاْ ثِكِنْ ڧَسَرْدَ نَبَاكُ؞› 21 «أَ لُواْكَثِنْ نَعُمَرْثِ يُواْشُوَ ثٜىٰوَ ‹أَيْ دَ عِدُوانْكَ كَغَ دُكَنْ أَبِنْدَ يَهْوٜىٰهْ اللَّهْ نْكُ يَيِ وَ وَطَنَّنْ سَرَاكُنَ بِيُ؞ حَكَ كُوَ يَهْوٜىٰهْ ذَيْ يِدَ دُكَنْ مُلْكُواْكِنْ دَ ذَاكُ ڧٜىٰتَرٜىٰ ذُوَا وُرِنْسُ؞ 22 كَدَ كُجِڟُواْرُوانْسُ، غَمَا يَهْوٜىٰهْ اللَّهْ نْكُ نٜىٰ ذَيْ يِيَاڧِ دُواْمِنْكُ؞› » بَعَيَرْدَوَ مُوسَٰى يَشِغَ ڧَسَرْ كَنْعَنَ بَ ﴿ لِـ ڧِدْ 32.1-42 ﴾ 23 «كُتُنَ أَ لُواْكَثِنَّنْ نَضُواْڧِ يَهْوٜىٰهْ نَثٜىٰ، 24 ‹يَا عُبَنْغِجِ يَهْوٜىٰهْ، غَاشِ، وَنَّنْ نٜىٰ ڢَرْكُوانْ نُونَاوَ بَاوَنْكَ غِرْمَنْكَ دَ حَنُّنْكَ مَيْ إِيكُواْ؞ أَݣَويْ وَنِ اللَّهْ عَثِكِنْ سَمَ كُواْ أَنَنْ دُونِيَا وَنْدَ ذَيْ عِيَ عَيْكَتَ وَطَنَّنْ مَنْيَنْ أَيُّكَنْ كَمَرْكَ؟ 25 إِنَ ضُواْڧُوانْكَ، كَيَرْدَ مِنِ إِنْ ڧٜىٰتَرٜىٰ مَنَ دُواْمِنْ إِنْغَا ڧَسَا مَيْݣَوْ طِنَّنْ عَڧٜىٰتَرٜىٰنْ كُواْغِنْ يُواْدَنْ، ڧَسَا مَيْݣَوْ نَنْ تَتُدَّيْ دَ كُمَ مَنْيَنْ تُدَّنْ لٜىٰبَنُوانْ؞› 26 «عَمَّا يَهْوٜىٰهْ يَيِ ڢُشِے دَنِے سَبُواْدَكُو، دُواْمِنْ حَكَ بَيْجِ كُوكَنَبَ؞ سَيْ يَثٜىٰ مِنِ، ‹يَ إِسَ؞ كَدَ كَڧَارَ يِنْ ضُواْڧُواْ عَكَنْ وَنَّنْ ذَنْثٜىٰ؞ 27 كَهَوْرَ كَنْ سَمَنْ بَبَّنْ تُدُنْ ڢِسْغَ كَدُوبِے ڧَسَرْدَ عِدُوانْكَ دَغَ كُواْوَنٜىٰ غٜىٰڢٜىٰ، تَغَبَسْ دَ يَمَّ دَ أَرٜىٰوَ دَ كُدُ؞ كَدُوبِے ڧَسَرْدَ ݣَوْ، غَمَا بَذَاكَ ڧٜىٰتَرٜىٰ كُواْغِنْ يُواْدَنْ بَ، بَلّٜىٰ كَشِغَ ثِكِنْ ڧَسَرْ؞ 28 عَمَّا كَاعُمَرْثِ يُواْشُوَ، كَكُمَ ڧَرْڢَڢَشِ، غَمَا شِينٜىٰ ذَيْبِدَ جَمَعَ سُڧٜىٰتَرٜىٰ يُواْدَنْ سُثِ ڧَسَرْ؞ شِينٜىٰ كُمَ ذَيْ رَرَّبَ مُسُ غَادُوانْ ڧَسَرْدَ كَكٜىٰ غَنِ؞› 29 سَبُواْدَ حَكَ مُكَ ذَوْنَ عَثِكِنْ ݣُورِنْ مُنَ ڢُسْكَنْتَرْ بٜىٰتْ ڢٜىٰيُوارْ؞» |
Hausa Common Language Ajami Bible © The Bible Society of Nigeria, 2020
Bible Society of Nigeria