مَيْمَيْتَاوَرْ شَرِيعَ 23 - أَتَّوْرَتْ دَ أَنَّبَاوَاوَطَنْدَ ذَاعَوَارٜىٰ دَغَ جَمَعَرْ يَهْوٜىٰهْ 1 مُوسَٰى يَثِيغَبَدَ مَغَنَ يَثٜىٰ «دُكْ وَنْدَ عَكَ دَنْدَڧٜىٰ كُواْ وَنْدَ عَكَ يَنْكٜىٰ غَبَنْسَ، بَذَيْ شِغَ ثِكِنْ تَارُوانْ جَمَعَرْ يَهْوٜىٰهْ بَ؞ 2 «دُكْ وَنْدَ عَكَ حَيْڢٜىٰشِ بَعَ ثِكِنْ عَوْرٜىٰبَ، وَنَّنْ شٜىٰغٜىٰ بَذَيْ شِغَ ثِكِنْ تَارُوانْ جَمَعَرْ يَهْوٜىٰهْ بَ؞ حَرْ ذُوَا ڟَارَا تَغُواْمَ، بَا وَنِ عَثِكِنْ ذُرِيَرْسَ دَ ذَيْ شِغَ ثِكِنْ تَارُوانْ جَمَعَرْ يَهْوٜىٰهْ؞ 3 «مُتُمِنْ أَمُّوانْ كُواْ مُتُمِنْ مُواْوَبْ بَذَيْ شِغَ ثِكِنْ تَارُوانْ جَمَعَرْ يَهْوٜىٰهْ بَ؞ حَرْ ذُوَا ڟَارَا تَغُواْمَ، بَا كُواْ طَيَ دَغَ ثِكِنْ ذُرِيَرْسُ دَ ذَاعَ كَرْٻٜىٰشِ عَثِكِنْ تَارُوانْ جَمَعَرْ يَهْوٜىٰهْ؞ 4 ذَيْ كَسَنْثٜىٰ حَكَ دُواْمِنْ بَسُ ذُواْ سُنْ تَرْيٜىٰكُ دَ عَبِنْثِ دَ ضُوَ أَ حَنْيَ لُواْكَثِنْ دَ كُكَ ڢِتُواْ دَغَ ڧَسَرْ مَصَرْ بَ؞ غَاشِ كُمَ، سُنْ طَوْكِ هَيَرْ بَلَعَمْ طَنْ بٜىٰيُوارْ دَغَ ڢٜىٰتُوارْ نَ مٜىٰسُواْڢُواْتَمِيَ دُواْمِنْ يَلَعَنْتَكُ؞ 5 دُكْدَهَكَ يَهْوٜىٰهْ اللَّهْ نْكُ بَيْ سَوْرَرِ بَلَعَمْ بَ، يَجُويَرْدَ لَعَنَرْسَ تَذَمَ أَلْبَرْكَ أَغَرٜىٰكُ، سَبُواْدَ يَهْوٜىٰهْ اللَّهْ نْكُ يَڧَوْنَثٜىٰكُ؞ 6 بَذَاكُ تَٻَ نٜىٰمَ كُتَيْمَكٜىٰسُ سُيِ ذَمَنْ لَاڢِيَ كُواْ سُيَلْوَتَبَ حَرْ إِيَاكَرْ رَنْكُ؞ 7 «بَذَاكُيِ ڨَمَرْ وَنِ دَغَ ثِكِنْ عٜىٰدُواْمَاوَا بَ، غَمَا ذُرِيَرْكُ نٜىٰ؞ بَذَاكُيِ ڨَمَرْ وَنِ مُتُمِنْ مَصَرْ بَ، غَمَا دَا كُنْيِ ذَمَنْ بَڧُنْثِ عَڧَسَرْسُ؞ 8 یَیَنْ دَ عَكَ حَيْڢَ مُسُ أَڟَارَ تَ عُكُ، ذَاكُ عِيَ كُكَرْٻٜىٰسُ عَثِكِنْ تَارُوانْ جَمَعَرْ يَهْوٜىٰهْ؞» كِيَايٜىٰ سَنْسَنِنْ يَاڧِ دَ ڟَبْتَ 9 «سَعَدَّ كُكَ كَڢَ سَنْسَنِنْ يَاڧِ دُواْمِنْ كُيِ يَاڧِ دَ أَبُواْكَنْ غَابَنْكُ، سَيْ كُكِيَايٜىٰ كَنْكُ دَغَ كُواْوَنٜىٰ أَبِنْ ڧَظَنْتَا؞ 10 عِدَنْ وَنِ عَثِكِنْكُ يَڧَظَنْتُ سَبُواْدَ مَنِيِّ يَڢِتَ مَسَ دَ دَرٜىٰ، تُواْ، سَيْ يَڢِتَ دَغَ سَنْسَنِنْ، كَدَ يَذَوْنَ عَثِكِنْ سَنْسَنِنْبَ؞ 11 سَعَدَّ يَمَّ تَيِ، سَيْ يَوَنْكٜىٰ كَنْسَ دَ ضُوَ، إِنْكُمَ رَانَ تَڢَاطِ، يَدَاوُاْ ثِكِنْ سَنْسَنِ؞ 12 «ذَاكُ كٜىٰٻٜىٰ وَنِ وُرِے عَبَايَنْ سَنْسَنِ عِنْدَ ذَاكُيِ تَتَڢِيَ يِنْ بَايَنْ غِدَا؞ 13 عَثِكِنْ كَايَنْكُ، سَيْ كُسَا أَبِنْ تُواْنَ ڧَسَا، دُواْمِنْ سَعَدَّ كُكَيِ بَايَنْ غِدَا أَوَجٜىٰ، سَيْ كُتُواْنَ رَامِ كُرُڢٜىٰ بَايَنْ غِدَنْ؞ 14 سَبُواْدَ يَهْوٜىٰهْ اللَّهْ نْكُ يَنَ يَٰوُاْ تَرٜىٰدَكُو عَثِكِنْ سَنْسَنِنْكُ، دُواْمِنْ يَثٜىٰثٜىٰكُ، يَكُمَ بَادَ أَبُواْكَنْ غَابَنْكُ أَ حَنُّنْكُ، دُواْلٜىٰ سَنْسَنِنْكُ يَكَسَنْثٜىٰ دَ ڟَرْكِے، دُواْمِنْ كَدَ يَغَ وَنِ أَبِنْ ڨَمَ عَثِكِنْكُ يَجُويَ مُكُ بَايَ؞» وَطَنْسُ دُواْكُواْكِ 15 «بَاوَنْدَ يَغُجٜىٰ وَمَيْغِدَنْسَ دَغَ وَتَ أَلْعُمَّ يَذُواْ ثِكِنْ جَمَعَرْ إِسْرَٰٓءِيلَ، بَذَاكُ مَيَرْ دَشِ غَ مَيْغِدَنْسَبَ؞ 16 ذَيْ ذَوْنَ تَرٜىٰدَكُو، أَدُكْ وُرِنْدَ يَذَاٻَا عَثِكِنْ غَرُرُوَنْكُ عِنْدَ يَڢِ سُواْ؞ كَدَ كُوُلَڧَنْتَ شِ؞ 17 «بَابُ طَيَ دَغَ ثِكِنْ یَیَ مَظَا دَ مَاتَا نَ إِسْرَٰٓءِيلَ دَ ذَيْ ذَمَ كَارُوَ أَوُرَارٜىٰنْ سُجَّدَبَ؞ 18 بَذَاكُ كَٰوُاْ أَ غِدَنْ يَهْوٜىٰهْ كُطِنْ كَارُوَنْثِ كُواْ نَنَمِجِ كُواْ نَمَثٜىٰ دُواْمِنْ كُثِكَ وَتَ ضَنْڟُوَابَ، غَمَا دُكَنْ وَطَنَّنْ أَبُبُوَ أَبِنْ ڨَمَ نٜىٰ غَ يَهْوٜىٰهْ اللَّهْ نْكُ؞ 19 «بَذَاكُ بَا طَنْعُوَنْكُ إِسْرَٰٓءِيلَ رَنْثٜىٰ كُكُمَ كَرْٻِ رِيبَ بَ، كُواْ رَنْثٜىٰنْ كُطِ، كُواْ نَعَّبِنْثِ، كُواْ نَوَنِ أَبِنْدَ عَكَنْ بَادَشِ رَنْثٜىٰ عَكَرْٻِ رِيبَبَ؞ 20 رَنْثٜىٰنْ دَ ذَاكُ بَا بَاڧِ، ذَاكُ عِيَ كَرْٻِ رِيبَ، عَمَّا رَنْثٜىٰنْ دَ ذَاعَ بَا مُتُمِنْ إِسْرَٰٓءِيلَ، بَذَاعَ كَرْٻِ رِيبَبَ، دُواْمِنْ يَهْوٜىٰهْ اللَّهْ نْكُ يَسَا مُكُ أَلْبَرْكَ عَثِكِنْ دُكَنْ أَيُّكَنْ حَنُّوَنْكُ، عَثِكِنْ ڧَسَرْدَ ذَاكُ شِغَ كُكُمَثِ غَادُوانْتَ؞ 21 «عِدَنْ ڢَا كُكَيِ وَ يَهْوٜىٰهْ اللَّهْ نْكُ ضَنْڟُوَا، كَدَ كُكَاسَ ثِكَاوَا، غَمَا يَهْوٜىٰهْ اللَّهْ نْكُ لَلَّيْ ذَيْ نٜىٰمٜىٰشِ دَغَ غَرٜىٰكُ؞ رَشِنْ ثِكَاوَا ذَيْ جَٰوُاْ مُكُ ذُنُوبِ؞ 22 عَمَّا عِدَنْ بَ كُيِ وَتَ ضَنْڟُوَابَ، بَذَيْ جَٰوُاْ مُكُ ذُنُوبِبَ؞ 23 دُكْ أَبِنْدَ يَڢِتَ دَغَ بَاكِنْكَ، سَيْ كَلُورَ كَثِكَ، غَمَا دَ يَرْدَرْ رَنْكَ نٜىٰ دَ بَاكِنْكَ كَيِ ضَنْڟُوَا غَ يَهْوٜىٰهْ اللَّهْ نْكُ؞ 24 «عِدَنْ كَا شِغَ غُواْنَرْ إِنَبِنْ مَڨُوبْثِنْكَ، ذَاكَ عِيَثِنْ یَیَنْ إِنَبِنْ يَدَّ كَكٜىٰسُواْ، عَمَّا بَذَاكَسَا كُواْ طَيَ عَثِكِنْ جَكَرْكَبَ؞ 25 عِدَنْ كَا شِغَ ثِكِنْ غُواْنَرْ حَڟِنْ دَيَكٜىٰ ڟَيٜىٰ نَمَڨُوبْثِنْكَ، ذَاكَ عِيَ كَثِرٜىٰ كَوُنَنْ حَڟِ دَ حَنُّنْكَ، عَمَّا بَذَاكَسَا لَوْجٜىٰ ثِكِنْ حَڟِنْ دَيَكٜىٰ ڟَيٜىٰ نَمَڨُوبْثِنْكَبَ؞» |
Hausa Common Language Ajami Bible © The Bible Society of Nigeria, 2020
Bible Society of Nigeria