مَيْمَيْتَاوَرْ شَرِيعَ 21 - أَتَّوْرَتْ دَ أَنَّبَاوَا

دُواْكَا غَمٜىٰدَ كِسَنْ كَيْ وَنْدَ بَعَسَنْ وَنْدَ يَيِ بَ

¹ مُوسَٰى يَثِيغَبَدَ مَغَنَ يَثٜىٰ ‏«‏مَيْ يِوُوَ ذَاعَ تَرَرْ دَ غَاوَرْ وَنِنْ دَ عَكَ كَشٜىٰ تَنَ ݣُونْثٜىٰ أَ ڢِيلِنْ دَ بَابُ كُواْوَ، عَثِكِنْ ڧَسَرْدَ يَهْوٜىٰهْ اللَّهْ نْكُ يَكٜىٰ بَاكُ، كُمَ بَعَسَنْ وَنْدَ يَكَشٜىٰشِيبَ؞

² عِدَنْ يَا ڢَرُ حَكَ، سَيْ دَتَّاوَنْكُ دَ مَاسُ شَرِيعَرْكُ سُڢِتُواْ سُعَوْنَ نِيسَنْ غَرُضُوً دَسُكٜىٰ كُسَدَ عِنْدَ غَاوَرْ تَكٜىٰ ݣُونْثٜىٰ؞

³ دَتَّاوَنْ غَرِنْدَ يَڢِ كُسَدَ غَاوَرْ ذَاسُ طَوْكِ سَانِيَرْ دَ بَعَتَٻَيِنْ عَيْكِ دَ عِتَ بَ، بَعَكُمَ تَٻَ سَا مَتَ غُنْ‌غُمٜىٰنْ وُيَنْ شَانُنْ نُواْمَبَ؞

⁴ دَتَّاوَنْ غَرِنْ ذَاسُ كَٰوُاْ سَانِيَرْ ذُوَا ݣُورِ عِنْدَ ضُوَ يَكٜىٰ غُدُ، وُرِنْ دَ بَعَتَٻَيِنْ نُواْمَ كُواْ شُوكَ بَ، سَيْ عَكَرْيَ وُيَنْ سَانِيَرْ عَثِكِنْ ݣُورِنْ؞

⁵ سَعَنً ڢِرِسْتُواْثِے، وَتُواْ ذُرِيَرْ لَوِ، ذَاسُ ڢِتُواْ غَبَ، غَمَا يَهْوٜىٰهْ اللَّهْ نْكُ يَذَاٻٜىٰسُ سُيِ مَسَ حِدِمَ، سُكُمَ سَا أَلْبَرْكَ دَ سُونَنْسَ؞ يَذَاٻٜىٰسُ كُمَ دُواْمِنْ سُدَيْدَيْتَ كُواْوَثٜىٰ ضِكِثِ دَ ثِنْ مُتُنْثِ؞

⁶ دُكَنْ دَتَّاوَنْ دَسُكٜىٰ ذَمَ كُسَدَ غَرِنْ دَ غَاوَرْ تَكٜىٰ، ذَاسُوَنْكٜىٰ حَنُّوَنْسُ عَبِسَ سَانِيَرْ دَ عَكَ كَرْيَ وُيَنْتَ عَثِكِنْ ݣُورِنْ،

⁷ سُنَ ثٜىٰوَ ‏‹‏حَنُّوَنْمُ بَسُ ظُبْدَ جِنِنَّنْ بَ، عِدَنُونْمُ كُمَ بَسُ غَ وَنْدَ يَعَيْكَتَ لَيْڢِنْ ظُبْدَ جِنِنَّنْ بَ؞

⁸ يَا يَهْوٜىٰهْ، كَغَاڢَرْتَا وَمُتَنٜىٰنْكَ إِسْرَٰٓءِيلَ وَطَنْدَ كَڢَنْسَ، كُمَ كَدَ كَبَرْ أَلْحَكِنْ جِنِنْ مَرَرْ لَيْڢِے يَذَوْنَ عَثِكِنْ مُتَنٜىٰنْكَ إِسْرَٰٓءِيلَ؞›‏ ذَاعَكُوَ غَاڢَرْتَا مُسُ أَلْحَكِنْ وَنَّنْ جِنِ؞

⁹ تَهَكَ ذَاكُ كَوَرْدَ أَلْحَكِنْ جِنِنْ مَرَرْ لَيْڢِے دَغَ ثِكِنْكُ، سَعَدَّ كُكَيِ أَبِنْدَ يَكٜىٰ دَيْدَيْ أَغَبَنْ يَهْوٜىٰهْ؞»‏

دُواْكَا غَمٜىٰدَ مَاتَنْدَ عَكَ كَامَ وُرِنْ يَاڧِ

¹⁰ ‏«‏سَعَدَّ كُكَ ڢِتَ دُواْمِنْ يِنْ يَاڧِ دَ أَبُواْكَنْ غَابَنْكُ، كُمَ يَهْوٜىٰهْ اللَّهْ نْكُ يَبَادَسُو أَ حَنُّوَنْكُ، كُو كُوَ كُكَ كَامَسُ سُذَمَ بَايِ،

¹¹ مَيْيِوُوَ عَثِكِنْسُ ذَاكَ غَ ݣَكْݣَوَرْ مَثٜىٰ كُمَ كَنَ سُوانْتَ، حَرْ كَنَ سُواْ كَطَوْكٜىٰتَ تَذَمَ مَاتَرْكَ؞

¹² إِنْ يَڢَرُ حَكَ، سَيْ كَكَٰوُاْتَ ثِكِنْ غِدَنْكَ، كَسَا تَأَسْكٜىٰ كَنْتَ تَيَنْكٜىٰ ڧُمْبَرْتَ؞

¹³ ذَاتَ تُوٻٜىٰ رِيغُنَ نَبَيْوَ، تَذَوْنَ عَثِكِنْ غِدَنْكَ حَرْ وَتَا طَيَ، تَنَ مَكُواْكِنْ بَابَنْتَ دَ مَامَرْتَ؞ بَايَنْ حَكَ سَيْ كَشِغَ وُرِنْتَ، كَذَمَ مِجِنْتَ، عِتَ كُوَ تَذَمَ مَاتَرْكَ؞

¹⁴ عَمَّا عِدَنْ بَكَجِ دَاطِنْتَبَ، سَيْ كَسَكٜىٰتَ تَتَڢِے دُكْ عِنْدَ تَكٜىٰسُواْ، عَمَّا بَذَاكَ سَيَرْ دَ عِتَ كَمَرْ بَيْوَبَ، تُنْدَ كَارِغَا كَا ڧَسْڧَنْتَرْ دَ عِتَ؞»‏

دُواْكَا غَمٜىٰدَ غَادُوانْ طَنْ ڢَارِ

¹⁵ ‏«‏عِدَنْ مُتُمْ يَنَدَ مَتَ بِيُ، سَيْ يَڢِ ڧَوْنَثِ طَيَ ڢِيٜىٰدَ طَيَرْ؞ مَيْ يِوُوَ دُكَنْسُ بِيُ، وَدَّ عَكَڢِے ڧَوْنَ دَ وَدَّ بَعَڧَوْنَرْتَ، سُنْ حَيْڢَ مَسَ یَیَ مَظَا، عَمَّا طَنْ ڢَضٍ يَذَمَ نَمَاتَرْ دَ بَايَ ڧَوْنَرْتَ؞

¹⁶ عِدَنْ حَكَ يَڢَرُ، تُواْ، رَانَرْ دَ ذَيْ رَبَ غَادُوانْسَ غَ یَیَنْسَ مَظَا، بَذَيْ مَيْدَ طَنْ مَاتَرْدَ يَڢِ ڧَوْنَرْتَ يَذَمَ كَمَرْ طَنْ ڢَارِ أَمَيْمَكُوانْ طَنْ طَيَرْ مَاتَرْ دَ بَايَ ڧَوْنَرْتَبَ، وَنْدَ شِينٜىٰ طَنْ ڢَضٍ؞

¹⁷ دُواْلٜىٰنٜىٰ يَيَرْدَ دَ مَڟَيِنْ طَنْ ڢَارِ نَمَاتَرْ دَ بَايَ ڧَوْنَرْتَ، تَوُرِنْ بَاشِ رَبُواْ بِيُ نَدُكَنْ أَبِنْدَ يَكٜىٰدَشِ؞ غَمَا طَنْ ڢَارِ نَمَظَنْتَكَرْسَ نٜىٰ، حَكِّنْ طَنْ ڢَارِ نَاسَنٜىٰ؞»‏

دُواْكَا غَمٜىٰدَ طَا مَرَرْ بِيَيَّ

¹⁸ ‏«‏عِدَنْ وَنِ يَنَدَ طَا مَيْ تَوْرِنْ كَيْ مَيْ تَاوَيٜىٰ كُمَ وَنْدَ بَايَ بِيَيَّ غَ بَابَنْسَ دَ مَامَرْسَ، كُواْ سُنْ هُواْرٜىٰ شِ مَا، بَايَجِ سَمْ سَمْ؞

¹⁹ عِدَنْ حَكَ يَڢَرُ، تُواْ، بَابَنْسَ دَ مَامَرْسَ ذَاسُ كَامَ شِ، سُكَٰوُاْشِ وُرِنْ دَتَّاوَنْ غَرِنْسَ عَڧُواْڢَرْ غَرِ؞

²⁰ ذَاسُ ثٜىٰ وَدَتَّاوَنْ غَرِنْسَ، ‏‹‏وَنَّنْ طَنْمُ يَنَدَ تَوْرِنْ كَيْ دَ تَاوَيٜىٰ؞ بَايَيِ مَنَ بِيَيَّ؞ شِ طَنْ بَنْظَنٜىٰ، مَيْ بُغُوَنٜىٰ كُمَ!‏›‏

²¹ سَيْ دُكَنْ مَذَنْ غَرِنْ سُجٜىٰجّٜىٰڢٜىٰشِ دَ دُوَڟُو حَرْ يَمُتُ؞ حَكَ نَنْ ذَاكُ كَوَرْدَ مُغُنْتَادَغَ ثِكِنْكُ، كُمَ دُكَنْ إِسْرَٰٓءِيلَاوَا ذَاسُجِ، سُجِڟُواْرُواْ؞»‏

وَطَنْسُ دُواْكُواْكِ

²² ‏«‏عِدَنْ وَنِ يَيِ ذُنُوبِنْدَ يَ إِسَ حُكُنْثِنْ مُتُوَ حَرْ عَكَ كَشٜىٰشِ عَكَ كُمَ رَاتَيٜىٰ جِكِنْسَ عَكَنْ غُنْ‌غُمٜىٰنْ إِتَاثٜىٰ،

²³ بَذَاعَبَرْ غَاوَرْ جِكِنْسَ تَݣُونَ عَكَنْ إِتَاثٜىٰنْبَ؞ ذَاعَبِنّٜىٰشِ أَ رَانَرْ، غَمَا دُكْ وَنْدَ عَكَ رَاتَيٜىٰشِ لَعَنَنّٜىٰ نٜىٰ غَ اللَّهْ؞ كُبِنّٜىٰشِ دُواْمِنْ كَدَ كُڧَظَنْتَرْدَ ڧَسَرْدَ يَهْوٜىٰهْ اللَّهْ نْكُ يَكٜىٰ بَاكُ غَادُواْ؞»‏