مَيْمَيْتَاوَرْ شَرِيعَ 18 - أَتَّوْرَتْ دَ أَنَّبَاوَا

رَبُوانْ دَ ڢِرِسْتُواْثِے ذَاسُ كَرْٻَ

¹ مُوسَٰى يَثِيغَبَدَ مَغَنَ يَثٜىٰ ‏«‏لَوِيَاوَا دَ ڢِرِسْتُواْثِے، وَتُواْ دُكَنْ ذُرِيَرْ لَوِ، بَذَاسُ كَرْٻِ رَبُواْ كُواْ غَادُواْ نَڧَسَا تَرٜىٰدَ سَوْرَنْ إِسْرَٰٓءِيلَاوَا بَ؞ سَشٜىٰنْ هَدَايُ نَڧُواْنَاوَا غَ يَهْوٜىٰهْ دَ نَدُكَنْ سَوْرَنْ أَبِنْدَ عَكٜىٰ كَٰوُاْ مَسَ، وَطَنَّنْ نٜىٰ ذَاسُ ذَمَ عَبِنْثِنْسُ؞

² بَذَاسُ سَامِ غَادُواْ نَڧَسَا تَرٜىٰدَ سَوْرَنْ یَنْعُوَنْسُبَ، يَهْوٜىٰهْ نٜىٰ غَادُوانْسُ كَمَرْ يَدَّ يَيِ مُسُ أَلْڧَوَرِ؞»‏

³ ‏«‏غَا أَبِنْدَ ذَيْ ذَمَ رَبُوانْ ڢِرِسْتُواْثِے دَغَ هَدَايُنْ دَ مُتَنٜىٰ سُكَ مِيڧَ، كُواْ نَسَانِيَ كُواْ نَتُنْكِيَ ثٜىٰ، وَتُواْ كَڢَطَرْ دَ كُمَتُنْ دَ ثِكِنْ؞

⁴ ذَاعَكُمَ بَاسُ نُونً ڢَارِ نَهَڟِنْكُ دَ نَضُوً إِنَبِنْكُ دَ نَمَنْكُ، حَرْ مَا دَ نَغَاشِنْ تُمَكِنْكُ نَڢَرْكُواْ وَنْدَ عَكَ أَسْكٜىٰ؞

⁵ غَمَا يَهْوٜىٰهْ اللَّهْ نْكُ يَذَاٻِ ذُرِيَرْ لَوِ دَ یَیَنْسَ دَغَ ثِكِنْ دُكَنْ ذُرِيَرْكُ دُواْمِنْ سُيِ حِدِمَ دَ سُونَنْ يَهْوٜىٰهْ حَرْ أَبَدَا؞

⁶ ‏«‏عِدَنْ وَنِ مُتُمِنْ لَوِ يَنَ سُواْ يَثَنْجَ غَرِنْ ذَمَنْسَ أَدُكْ لُواْكَثِنْدَ يَسُواْ، ذَيْ عِيَ تَاشِ دَغَ عِنْدَ يَكٜىٰدَ ذَمَ عَ إِسْرَٰٓءِيلَ، يَتَڢِے وُرِنْ دَ يَهْوٜىٰهْ ذَيْ ذَاٻَا دُواْمِنْ عَيِ سُجَّدَ دَ سُونَنْسَ؞

⁷ أَوُرِنْ، ذَيْ عِيَيِنْ حِدِمَ دَ سُونَنْ يَهْوٜىٰهْ اللَّهْ نْسَ، كَمَرْ يَدَّ سَوْرَنْ یَنْعُوَنْسَ سُكٜىٰ وَ يَهْوٜىٰهْ حِدِمَ أَغَبَنْسَ؞

⁸ ذَيْسَامِ رَبُوانْ عَبِنْثِنْسَ دَيْدَيْ دَ سَوْرَنْ ڢِرِسْتُواْثِنْ، بَنْدَ أَبِنْدَ يَكَرْٻُواْ دَغَ سَيَرْ دَ غَادُوانْ كَاكَنِّنْسَ؞»‏

غَرْغَطِ عَكَنْ أَيُّكَنْ مَرَسَ سَنِنْ اللَّهْ

⁹ ‏«‏سَعَدَّ كُكَ شِغَ ثِكِنْ ڧَسَرْدَ يَهْوٜىٰهْ اللَّهْ نْكُ يَكٜىٰ بَاكُ، بَذَاكُ كُواْيَ بِنْ أَيُّكَنْ بَنْ ڨَمَ نَ أَلْعُمَّنَّنْبَ؞

¹⁰ بَذَاعَ سَامِ وَنِنْكُ دَ ذَيْ مِيڧَ طَنْسَ كُواْ یَرْسَ هَدَايَ تَڧُواْنَاوَا بَ، كُواْ كُوَ يَذَمَ مَيْ دُوبَا، كُواْ مَيْ مَيْتَ، كُواْ مَيْ دَبُواْ، كُواْ مَيْ سِحِرِ،

¹¹ كُواْ بُواْكَ، كُواْ مَيْ شَعَنِ دَ رُوحُواْحِ، كُواْ مَيْ حَطَكَيْ دَ رُوحُواْحِنْ مَتَتُّو بَ؞

¹² غَمَا دُكْ وَنْدَ يَعَيْكَتَ وَطَنَّنْ أَبُبُوَ يَذَمَ أَبِنْ ڨَمَ نٜىٰ غَ يَهْوٜىٰهْ؞ سَبُواْدَ وَطَنَّنْ أَبُبُوَنْ بَنْ ڨَمَ نٜىٰ يَهْوٜىٰهْ اللَّهْ نْكُ يَكٜىٰ كُواْرَرْ وَطَنَّنْ أَلْعُمَّيْ أَغَبَنْكُ؞

¹³ دُواْلٜىٰنٜىٰ كُذَمَ ثِكَكُّ، مَاسُ أَمِنْثِ أَغَبَنْ يَهْوٜىٰهْ اللَّهْ نْكُ؞»‏

أَلْڧَوَرِنْ عَيْكَرْ دَ وَنِ أَنَّبِے كَمَرْ مُوسَٰى

¹⁴ مُوسَٰى يَثِيغَبَدَ مَغَنَ يَثٜىٰ ‏«‏كُواْدَيَكٜىٰ وَطَنَّنْ أَلْعُمَّنْ دَ ذَاكُ كُواْرَ سُنْ كَسَ كُنّٜىٰ غَ مَاسُ دُوبَادَ مَاسُ سِحِرِ، عَمَّا كُو، يَهْوٜىٰهْ اللَّهْ نْكُ بَيْ يَرْدَ مُكُ كُيِ حَكَبَ؞

¹⁵ يَهْوٜىٰهْ اللَّهْ نْكُ ذَيْ عَيْكَ مُكُ دَ وَنِ أَنَّبِے كَمَرْنِ دَغَ ثِكِنْ مُتَنٜىٰنْكُ؞ سَيْ كُكَسَ كُنّٜىٰ غَ وَنَّنْ أَنَّبِے؞

¹⁶ ‏«‏وَنَّنْ شِينٜىٰ أَبِنْدَ كُكَ ضُواْڧَا دَغَ وُرِنْ يَهْوٜىٰهْ اللَّهْ نْكُ عَبَبَّنْ تُدُنْ هُواْرٜىٰبْ أَ رَانَرْ تَارُوانْ جَمَعَ، سَعَدَّ كُكَثٜىٰ، ‏‹‏عِدَنْ مُنْ ڧَارَ جِنْ مُرْيَرْ يَهْوٜىٰهْ اللَّهْ نْمُ كُمَ، كُواْ إِنْ مُنْ ڧَارَ غَنِنْ وَنَّنْ بَبَّرْ وُتَا، ذَامُ مُتُ؞›‏

¹⁷ يَهْوٜىٰهْ كُوَ يَثٜىٰ مِنِ، ‏‹‏أَبِنْ دَ سُنْ ڢَطَا دَيْدَيْنٜىٰ؞

¹⁸ ذَنْ عَيْكَ مُسُ دَ وَنِ أَنَّبِے كَمَرْكَ دَغَ ثِكِنْ یَنْعُوَنْسُ؞ ذَنْسَا مَغَنَاتَ عَبْكِنْسَ، ذَيْ كُوَ ڢَطَا مُسُ دُكَنْ أَبِنْدَ نَعُمَرْثٜىٰشِ؞

¹⁹ دُكْ وَنْدَ بَيْ كَسَ كُنّٜىٰ غَ كَلْمُواْمِنْ دَ أَنَّبِنَّنْ ذَيْ ڢَطَا عَثِكِنْ سُونَنَ بَ، نِے دَكَيْنَ ذَنْ نٜىٰمِ أَلْحَكِنْ كَلْمُواْمِنْ دَغَ وَنَّنْ مُتُمِنْ؞

²⁰ عَمَّا دُكْ وَنِ أَنَّبِنْدَ يَيِ مَغَنَ عَثِكِنْ سُونَنْ وَطَنْسُ أَلُّواْلِ، كُواْ وَنْدَ يَيِ ڟَمَّنِ يَنَ مَغَنَ عَثِكِنْ سُونَنَ، مَغَنَرْ دَ بَنْ عُمَرْثٜىٰشِ يَڢَطَابَ، وَنَّنْ أَنَّبِنْ ذَيْ مُتُ؞›‏

²¹ ‏«‏يَيِوُ كُثٜىٰ أَ ذُوثِيَارْكُ، ‏‹‏يَيَ ذَامُ غَانٜىٰ ثٜىٰوَ مَغَنَرْ نَنْ بَ يَهْوٜىٰهْ نٜىٰ يَڢَطَابَ؟›‏

²² عِدَنْ أَنَّبِے يَيِ مَغَنَ عَثِكِنْ سُونَنْ يَهْوٜىٰهْ، سَعَنً أَبِنْ بَيْ ڢَرُ بَ كُواْ بَيْ ذَمَ غَسْكِيَابَ، تُواْ، وَنَّنْ مَغَنَ بَ يَهْوٜىٰهْ نٜىٰ يَڢَطَابَ؞ أَنَّبِنْ دَيْ يَيِ مَغَنَرْ دَ غِرْمَنْ كَيْ كَوَيْ، كَدَ كُجِڟُواْرُوانْ مَغَنَرْ؞»‏