مَيْمَيْتَاوَرْ شَرِيعَ 16 - أَتَّوْرَتْ دَ أَنَّبَاوَابِكٍ ڧٜىٰتَرٜىٰوَ ﴿ ڢِتْ 12.1-20 ﴾ 1 مُوسَٰى يَثِيغَبَدَ مَغَنَ يَثٜىٰ «كُكِيَايٜىٰ بِكٍ ڧٜىٰتَرٜىٰوَ غَ يَهْوٜىٰهْ اللَّهْ نْكُ عَثِكِنْ وَتَنْ أَبِبْ، غَمَا عَثِكِنْ وَتَنْ أَبِبْ نٜىٰ يَهْوٜىٰهْ اللَّهْ نْكُ يَڢِتَرْ دَكُو دَغَ مَصَرْ دَ دَرٜىٰ؞ 2 ذَاكُ مِيڧَ هَدَايَرْ بِكٍ ڧٜىٰتَرٜىٰوَ غَ يَهْوٜىٰهْ اللَّهْ نْكُ وَتَ دَبَّ دَغَ غَرْكٜىٰنْكُ نَتُمَكِ كُواْ نَأَوَكِ كُواْ نَشَانُو، أَوُرِنْ دَ يَهْوٜىٰهْ ذَيْ ذَاٻَا دُواْمِنْ عَيِ سُجَّدَ دَ سُونَنْسَ؞ 3 بَذَاكُثِ عَبِنْثِ مَيْيِسْتِ تَرٜىٰدَ نَامَنْ هَدَايَرْ بَ؞ ݣُونَكِے بَݣَويْ ذَاكُ دِنْغَ ثِنْ غُرَاسَرْ مَرَرْ يِسْتِ، وَتُواْ غُرَاسَ نَوَهَلَ، غَمَا دَ سَوْرِ كُكَ ڢِتَ دَغَ ڧَسَرْ مَصَرْ عِنْدَ كُكَ شَا وَهَلَ؞ عَيِ وَنَّنْ دُواْمِنْ تُنَاوَا دَ رَانَرْ دَ كُكَ ڢِتُواْ دَغَ مَصَرْ، عَثِكِنْ دُكَنْ ݣُونَكِنْكُ؞ 4 بَذَاعَ سَامِ يِسْتِ أَدُكَنْ يَنْكِنْكُ بَ حَرْ ݣُونَكِے بَݣَويْ؞ بَذَاكُ كُمَ بَرْ نَامَنْ هَدَايَرْدَ كُكَ يَنْكَ دَ يَمَّ أَ رَانَ تَڢَارِ يَݣُونَ حَرْ وَايٜىٰوَرْ غَرِبَ؞ 5 «بَذَاكُ مِيڧَ هَدَايَ تَبِكٍ ڧٜىٰتَرٜىٰوَ عَثِكِنْ كُواْوَنٜىٰ غَرِنْ دَ يَهْوٜىٰهْ اللَّهْ نْكُ يَكٜىٰ بَاكُبَ؞ 6 عَمَّا ذَاكُ مِيڧَتَ أَوُرِنْ دَ يَهْوٜىٰهْ اللَّهْ نْكُ ذَيْ ذَاٻَا دُواْمِنْ عَيِ سُجَّدَ دَ سُونَنْسَ؞ أَوُرِنْ نٜىٰ كَطَيْ ذَاكُ مِيڧَ هَدَايَ تَبِكٍ ڧٜىٰتَرٜىٰوَ دَ يَمَّ دَ ڢَاطُوَرْ رَانَ دَيْدَيْ دَ لُواْكَثِنْ دَ كُكَ ڢِتُواْ دَغَ مَصَرْ؞ 7 ذَاكُ دَڢَشِ كُثِ أَوُرِنْ دَ يَهْوٜىٰهْ اللَّهْ نْكُ ذَيْ ذَاٻَا؞ وَشٜىٰغَرِ دَ سَڢٜىٰ كُواْوَ يَكُواْمَ ثِكِنْ تٜىٰنْتِنْسَ؞ 8 ݣُونَكِے شِدَ ذَاكُ ثِيغَبَدَ ثِنْ غُرَاسَرْ مَرَرْ يِسْتِ؞ أَ رَانَ تَبَݣَويْ، سَيْ كُيِ مُهِمِّنْ تَارُواْ غَ يَهْوٜىٰهْ اللَّهْ نْكُ، عَثِكِنْ وَنَّنْ رَانَرْ بَذَاكُيِ عَيْكِبَ كُواْ كَطَنْ؞» بِكٍ مَكُواْمَكُواْ ﴿ ڢِتْ 34.22 ؛ لِـ ڢِرْ 23.15-21 ﴾ 9 «ذَاكُ ڧِرْغَ مَكُواْ بَݣَويْ، وَتُواْ ذَاكُ ڢَارَ ڧِرْغَ مَكُواْ بَݣَويْ طِنْ تُنْدَغَ لُواْكَثِنْ دَ كُكَ سَا لَوْجٜىٰ دُواْمِنْ كُيِ غِرْبِنْ حَڟِنْ دَيَكٜىٰ ڟَيٜىٰ أَغُواْنَ؞ 10 سَعَنً ذَاكُ كِيَايٜىٰ بِكٍ سُجَّدَ نَبِكٍ مَكُواْمَكُواْ غَ يَهْوٜىٰهْ اللَّهْ نْكُ، كُنَ بَادَ بَايَرْوَ تَيَرْدَرْ رَيْ ڠُورْڠُودُوانْ أَلْبَرْكَرْ دَ كُكَ سَامُ دَغَ وُرِنْ يَهْوٜىٰهْ اللَّهْ نْكُ؞ 11 سَيْ كُيِ مُرْنَ أَغَبَنْ يَهْوٜىٰهْ اللَّهْ نْكُ، أَوُرِنْدَ يَذَاٻَا دُواْمِنْ عَيِ سُجَّدَ دَ سُونَنْسَ، كُو دَ یَیَنْكُ مَظَا دَ مَاتَادَ بَايِنْكُ مَظَا دَ مَاتَادَ لَوِيَاوَنْ دَسُكٜىٰ ذَمَ أَغَرُرُوَنْكُ، حَرْ مَا دَ بَاڧِ دَ مَرَايُ دَ مَاتَانْدَ مَذَنْسُ سُكَ مُتُ وَطَنْدَ سُكٜىٰ ثِكِنْكُ؞ 12 كُتُنَ ڢَا، دَا كُو بَايِ نٜىٰ عَڧَسَرْ مَصَرْ؞ دُواْمِنْ حَكَ سَيْ كُكِيَايٜىٰ كُعَيْكَتَ وَطَنَّنْ ڧَٰعِدُواْدِ؞» بِكٍ بُكُّواْكِ ﴿ لِـ ڢِرْ 23.33-43 ﴾ 13 «سَعَدَّ كُكَ تَتَّارَ أَمْڢَانِنْ غُواْنَكِنْكُ دَغَ وُرِنْ بُغُنْ حَڟِ دَ كُمَ وُرِنْ مَڟٜىٰوَرْ ضُوً إِنَبِے، ذَاكُيِ بِكٍ سُجَّدَ نَبِكٍ بُكُّواْكِ حَرْ ݣُونَ بَݣَويْ؞ 14 كُيِ مُرْنَ عَثِكِنْ بِكِنْكُ، كُو دَ یَیَنْكُ مَظَا دَ مَاتَادَ بَايِنْكُ مَظَا دَ مَاتَا، حَرْ مَا دَ لَوِيَاوَا دَ بَاڧِ دَ مَرَايُ دَ مَاتَانْدَ مَذَنْسُ سُكَ مُتُ وَطَنْدَ سُكٜىٰ ذَمَ عَثِكِنْ غَرُرُوَنْكُ؞ 15 ݣُونَ بَݣَويْ ذَاكُيِ بِكٍ سُجَّدَ غَ يَهْوٜىٰهْ اللَّهْ نْكُ أَوُرِنْ دَ يَهْوٜىٰهْ يَذَاٻَا دُواْمِنْ عَيِ مَسَ سُجَّدَ، غَمَا يَهْوٜىٰهْ اللَّهْ نْكُ ذَيْ أَلْبَرْكَثٜىٰكُ ثِكِنْ دُكَنْ أَمْڢَانِنْ غُواْنَكِنْكُ دَ دُكَنْ أَيُّكَنْ حَنُّوَنْكُ، كُمَ لَلَّيْ ذَاكُيِ مُرْنَ؞ 16 «سَوْ عُكُ عَثِكِنْ شٜىٰكَرَا، دُكَنْ یَیَنْكُ مَظَا ذَاسُذُواْ غَبَنْ يَهْوٜىٰهْ اللَّهْ نْكُ أَوُرِنْدَ يَذَاٻَا، وَتُواْ عَبِكٍ غُرَاسَرْ مَرَرْ يِسْتِ، عَبِكٍ مَكُواْمَكُواْ دَ كُمَ عَبِكٍ بُكُّواْكِ؞ بَذَاسُذُواْ غَبَنْ يَهْوٜىٰهْ حَنُّ وُاْڢِبَ؞ 17 كُواْوَنّٜىٰنْسُ ذَيْ كَٰوُاْ أَبِنْدَ يَ عِيَ، ڠُورْڠُودُوانْ أَلْبَرْكَرْ دَسُكَ سَامُ دَغَ وُرِنْ يَهْوٜىٰهْ اللَّهْ نْكُ؞» يِنْ شَرِيعَرْ غَسْكِيَ 18 مُوسَٰى يَثِيغَبَدَ مَغَنَ يَثٜىٰ «سَيْ كُنَطَ مَاسُ شَرِيعَ دَ شُوغَبَنِّ بِسَغَ ذُرِيَرْكُ عَثِكِنْ دُكَنْ غَرُضُوً دَ يَهْوٜىٰهْ اللَّهْ نْكُ يَكٜىٰ بَاكُ؞ ذَاسُيِ وَجَمَعَ شَرِيعَرْ غَسْكِيَ؞ 19 بَذَاكُ جُجُّويٜىٰ غَسْكِيَ بَ، بَذَاكُ نُونَ بَمْبَنْثِ بَ، كُمَ بَذَاكُ كَرْٻِ ثِنْ حَنْثِ بَ، غَمَا ثِنْ حَنْثِ يَكَنْ مَكَنْتَرْ دَ إِدَانُنْ مَيْ حِكِمَ يَكُمَسَا أَدَنّٜىٰ مَيْ غَسْكِيَ؞ 20 أَدَلْثِے نٜىٰ كَطَيْ ذَاكُبِے، دُواْمِنْ كُرَايُ كُكُمَ غَاجِ ڧَسَرْدَ يَهْوٜىٰهْ اللَّهْ نْكُ يَكٜىٰ بَاكُ؞ 21 «بَذَاكُ تَادَ وَنِ إِتَاثٜىٰنْ دَ عَكَ كٜىٰٻٜىٰ نَغُمَكَ كُسَدَ بَغَدٜىٰنْ دَ ذَاكُيِ دُواْمِنْ يَهْوٜىٰهْ اللَّهْ نْكُ بَ؞ 22 بَ كُوَ ذَاكُ تَادَ دُوڟٜىٰنْ سُجَّدَ دُواْمِنْ غُمَكَ بَ، غَمَا أَبِنْدَ يَهْوٜىٰهْ اللَّهْ نْكُ يَڧِ كٜىٰنَنْ؞» |
Hausa Common Language Ajami Bible © The Bible Society of Nigeria, 2020
Bible Society of Nigeria