دَانِيٜىٰلْ 5 - أَتَّوْرَتْ دَ أَنَّبَاوَا

رُبُوتُو عَكَنْ بَنْ‌غُواْ أَ لُواْكَثِنْ بِكِ

¹ أَنَانً سَيْ سَرْكِے بٜىٰلْشَظَّرْ يَشِرْيَ بَبَّنْ بِكِ دُواْمِنْ مَنْيَنْ مُتَنٜىٰنْ مُلْكِنْسَ غُدَا دُبُو؞ أَغَبَنْ مُتَنٜىٰ دُبُنَّنْ، سَرْكِے يَنَ شَنْ ضُوً إِنَبِے تَرٜىٰدَسُو؞

² سَعَدَّ يَكٜىٰ شَنْ ضُوً إِنَبِے، سَيْ بٜىٰلْشَظَّرْ يَعُمَرْتَ عَكَٰوُاْ ݣُوڢُنَ نَظِينَارِيَ دَ نَأَظُرْڢَا دُواْمِنْ شِے دَ مَنْيَنْ مُتَنٜىٰنْسَ دَ مَاتَنْسَ دَ مَاتَانْدَ يَأَجِيٜىٰ، سُشَا دَغَ ثِكِنْسُ؞ وَطَنَّنْ ݣُوڢُنَ كُوَ سُنَ ثِكِنْ كَايَيَّكِنْ دَ بَابَنْسَ نٜىٰبُكَدْنٜىٰزَّرْ يَݣُوشٜىٰ دَغَ هَيْكَلِ أَ عُرُوشَلِيمَ نٜىٰ؞

³ سَيْ عَكَ كَٰوُاْ ݣُوڢُنَ نَظِينَارِيَ دَ نَأَظُرْڢَا وَطَنْدَ عَكَ ݣُوشٜىٰ دَغَ هَيْكَلِ، وَتُواْ غِدَنْ اللَّهْ أَ عُرُوشَلِيمَ؞ سَيْ سَرْكِے دَ مَنْيَنْ مُتَنٜىٰنْسَ دَ مَاتَنْسَ دَ مَتَنْ دَ يَأَجِيٜىٰ سُكَشَا دَغَ ثِكِنْ ݣُوڢُنَنْ؞

⁴ سُكَشَا ضُوً إِنَبِنْ، سُكَ يَبِے غُمَكَنْ أَلُّواْلِنْسُ نَظِينَارِيَ دَ نَأَظُرْڢَا دَ نَتَغُلَّ دَ نَبَڧِنْ ڧَرْڢٜىٰ دَ نَ إِتَاثٜىٰ دَ نَدُوڟٜىٰ؞

⁵ بَا لَابَرِ سَيْ يَڟُنْ حَنُّنْ مُتُمْ سُكَ بَيَّنَ، سُكَيِ رُبُوتُو عَكَنْ شَاڢٜىٰنْ بَنْ‌غُواْ نَغِدَنْ سَرْكِنْ، عِنْدَ حَصْكٜىٰنْ ڢِتِلَ يَڢِ حَصْكَكَاوَا؞ حَنُّنْ يَيِ تَرُبُوتُ، سَرْكِے كُوَ يَنَ غَنِ؞

⁶ سَيْ ڢُسْكَرْ سَرْكِے تَثَنْجَ؞ تُنَانِنْسَ يَبَا شِ ڟُواْرُواْ؞ غَٻُواْٻِنْ جِكِنْسَ سُكَ مُتُ، ڠُوِوُاْيِنْسَ سُكَ ڢَارَ ضَوَ سُنَ بُبُّغَ جُونَ؞

⁷ سَيْ سَرْكِے يَيِ كِرَا دَ بَبَّرْ مُرْيَ دُواْمِنْ عَكَٰوُاْ مَسَ مَاسُ دُوبَادَ ڠُونَيٜىٰنْ ڟَاڢِ دَ مَاسُ يِنْ دُوبَادَ تَوْرَرِ؞ سَيْ سَرْكِے يَيِ مَغَنَ غَمٜىٰدَ مَاسُ حِكِمَرْ نَنْ يَثٜىٰ ‏«‏دُكْ وَنْدَ يَ عِيَ كَرَنْتَ وَنَّنْ رُبُوتُو، يَكُوَ ڢَطَا مِنِ مَعَنَرْسَ، تُواْ، ذَاعَ سَا مَسَ رِغَرْ مُلْكِ تَجَرْ غَرُورَا، أَسَا مَسَ سَرْڧَرْ ظِينَارِيَ أَوُيَنْسَ، ذَاعَ كُمَ بَاشِ مَڟَيِ نَعُكُ عَثِكِنْ مَاسُ مُلْكٍ ڧَسَرْ؞»‏

⁸ سَيْ دُكَنْ مَاسُ حِكِمَرْ نَنْ نَسَرْكِے سُكَ شِغُواْ، عَمَّا بَاوَنْدَ يَ عِيَ كَرَنْتَ رُبُوتُنْ بَلّٜىٰ مَا يَسَنَرْ وَسَرْكِے مَعَنَرْسَ؞

⁹ سَيْ بَبَّنْ ڟُواْرُواْ يَكَامَ سَرْكِے بٜىٰلْشَظَّرْ، حَرْ ڢُسْكَرْسَ تَثَنْجَ؞ مَنْيَنْ مُتَنٜىٰنْسَ كُمَ سُكَ ضِكِثِے؞

¹⁰ سَعَدَّ سَرَوْنِيَ مَامَرْ سَرْكِے تَجِ مَغَنْ‌غَنُنْ دَ سَرْكِے دَ مَنْيَنْ مُتَنٜىٰنْسَ سُكٜىٰيِ، سَيْ تَشِغَ بَبَّنْ طَاكِنْ دَ عَكٜىٰبِكٍ؞ تَاثٜىٰ ‏«‏يَا سَرْكِے، رَنْكَيَدَطٜىٰ!‏ كَدَ كَبَرْ تُنَانِنْ ذُوثِيَارْكَ سُبَاكَ ڟُواْرُواْ، كَدَ كُمَ ڢُسْكَرْكَ تَثَنْجَ؞

¹¹ أَيْ، أَݣَويْ وَنِ مُتُمْ أَمُلْكِنْكَ وَنْدَ يَكٜىٰ ثِكٜىٰ دَ رُوحٌ أَلُّواْلِ مَاسُ ڟَرْكِے؞ أَ لُواْكَثِنْ دَ بَابَنْكَ يَكٜىٰ مُلْكِ، وَنَّنْ مُتُمْ يَكَسَنْثٜىٰ مَيْ بَسِيرَ دَ غَانٜىٰوَ دَ حِكِمَ كَمَرْ حِكِمَرْ أَلُّواْلِ؞ بَابَنْكَ سَرْكِے نٜىٰبُكَدْنٜىٰزَّرْ يَنَطَشِ شُوغَبَنْ مَاسُ دَبُواْ دَ مَاسُ دُوبَادَ ڠُونَيٜىٰنْ ڟَاڢِ دَ مَاسُ يِنْ دُوبَادَ تَوْرَرِ؞

¹² وَنَّنْ مُتُمْ شِينٜىٰ دَانِيٜىٰلْ وَنْدَ بَابَنْكَ يَثَنْجَ مَسَ سُونَ ذُوَا بٜىٰلْتٜىٰشَظَّرْ؞ شِ مُتُمْ نٜىٰ مَيْ ثِكٜىٰ دَ رُوحٌ بَنْ مَامَاكِ دَ سَنِ دَ بَسِيرَ؞ وَنَّنْ يَسَا يَ عِيَ بَيَّنَ مَعَنَرْ مَڢَرْكَيْ دَ تَكَثِثِ كَثِثِ، يَكُمَ عِيَ وَرْوَارٜىٰ أَلْعَمُرَ مَاسُ وُيَ؞ بَرِ إِنْ سَرْكِے يَيَرْدَ، يَعَيْكَ عَكِرَوُاْ دَانِيٜىٰلْ دُواْمِنْ يَبَادَ مَعَنَرْ وَنَّنْ أَبِنْدَ كَغَنِ؞»‏

دَانِيٜىٰلْ يَبَيَّنَ مَعَنَرْ رُبُوتُنْ

¹³ سَيْ عَكَ كَٰوُاْ دَانِيٜىٰلْ أَغَبَنْ سَرْكِے؞ سَرْكِے يَثٜىٰ وَ دَانِيٜىٰلْ ‏«‏كَيْ نٜىٰ دَانِيٜىٰلْ طِنَّنْ، طَيَ دَغَ ثِكِنْ وَطَنْدَ بَابَنَ يَكَٰوُاْ دَغَ يَهُودَ ذُوَا بَوْتَا؟

¹⁴ نَجِ لَابَرِ ثٜىٰوَ كَنَدَ رُوحٌ أَلُّواْلِ، كَنَ كُمَ دَ غَانٜىٰوَ دَ بَسِيرَ دَ ثِكَكِّيَرْ حِكِمَ؞

¹⁵ يَنْذُنَّنْ عَكَ كَٰوُاْ مِنِ مَاسُ حِكِمَ دَ مَاسُ دُوبَا دُواْمِنْ سُكَرَنْتَ وَنَّنْ رُبُوتُو، سُكُمَ بَيَّنَ مِنِ مَعَنَرْسَ، عَمَّا سُنْ كَاسَ ڢَطِنْ مَعَنَرْ رُبُوتُنْ؞

¹⁶ عَمَّا نَجِ كَا عِيَ ڢَطَرْ مَعَنَرْ أَسِرَيْ، كَكُمَ عِيَ وَرْوَارٜىٰ أَلْعَمُرَ مَاسُ وُيَ؞ عِدَنْ ڢَا كَا عِيَ كَرَنْتَ رُبُوتُنَّنْ، حَرْ كُمَ كَا عِيَ بَيَّنَ مِنِ مَعَنَرْسَ، تُواْ، ذَاعَ سَا مَكَ رِغَرْ مُلْكِ تَجَرْ غَرُورَا، ذَاعَ كُمَسَا سَرْڧَرْ ظِينَارِيَ أَوُيَنْكَ؞ ذَاعَبَاكَ مَڟَيِ نَعُكُ عَثِكِنْ مَاسُ مُلْكٍ ڧَسَرْ؞»‏

¹⁷ دَانِيٜىٰلْ كُوَ يَأَمْسَ يَثٜىٰ وَ سَرْكِے، ‏«‏رَنْكَيَدَطٜىٰ!‏ ذَاكَ عِيَ رِڧٜىٰ ݣَوْتَرْكَ، كُواْ كَبَا وَنِ؞ دُكْدَهَكَ ذَنْ كَرَنْتَ وَسَرْكِے رُبُوتُنْ، إِنْكُمَ بَيَّنَ مَسَ مَعَنَرْسَ؞

¹⁸ يَا سَرْكِے، اللَّهْ مَڢِے طَوْكَكَ يَا بَا بَابَنْكَ نٜىٰبُكَدْنٜىٰزَّرْ مُلْكِ دَ غِرْمَ دَ طَوْكَكَ دَ دَرَجَ؞

¹⁹ سَبُواْدَ غِرْمَنْ دَ اللَّهْ يَبَا شِ، شِے يَسَا دُكَنْ ڧَبِيلُ دَ أَلْعُمَّيْ دَ مَاسُ يَرٜىٰ دَبَمْ دَبَمْ سُكَجِڟُواْرُوانْسَ سُكَيِ ضَوَرْ جِكِے أَغَبَنْسَ؞ يَكَنْ كَشٜىٰ دُكْ وَنْدَ يَغَ دَامَ، يَبَرْ وَنْدَ يَغَ دَامَ دَ رَيْ؞ حَكَ مَا يَكَنْ طَوْكَكَ وَنْدَ يَغَ دَامَ، يَڧَسْڧَنْتَرْ دَ وَنْدَ يَغَ دَامَ؞

²⁰ عَمَّا سَعَدَّ يَتَوْرَرَ ذُوثِيَارْسَ دَ تُنَانِنْسَ، يَڢَارَ تَڢِيَ ثِكِنْ غِرْمَنْ كَيْ، سَيْ عَكَ كُواْرٜىٰشِ دَغَ كُجٜىٰرَرْ مُلْكِنْسَ دَرَجَرْسَ كُمَ تَرَبُ دَشِ؞

²¹ عَكَ كُواْرٜىٰشِ دَغَ ثِكِنْ مُتَنٜىٰ ذُوَا دَاجِ، عَكَ مَيْدَ حَنْكَلِنْسَ إِرِنْ نَدَبَّ؞ يَتَڢِے يَذَوْنَ تَرٜىٰدَ جَاكُنَنْ دَاجِ، يَنَ تَثِنْ ثِيَوَ كَمَرْ بِجِمِ؞ جِكِنْسَ يَجِڧٜىٰ دَ رَٻَ حَرْ ذُوَا لُواْكَثِنْدَ يَغَانٜىٰ ثٜىٰوَ اللَّهْ مَڢِے طَوْكَكَ نٜىٰ يَكٜىٰ مُلْكٍ یَنْ أَدَمْ، يَكَنْ كُمَ بَادَ مُلْكِ غَ وَنْدَ يَغَ دَامَ؞»‏

²² ‏«‏عَمَّا يَا كَيْ بٜىٰلْشَظَّرْ، كَيْ دَ كَكٜىٰ طَنْسَ، كُواْدَيَكٜىٰ كَسَنْ دُكَنْ وَطَنَّنْ، دُكْدَهَكَ بَكَ ڧَسْڧَنْتَرْ دَكَنْكَبَ؞

²³ أَ مَيْمَكُوانْ حَكَ، سَيْ كَنُونَوَ عُبَنْ‌غِجِنْ سَمَ غِرْمَنْ كَيْ، حَرْ كَسَا عَكَ كَٰوُاْ مَكَ ݣُوڢُنَنْ غِدَنْسَ؞ كَيْ دَ مَنْيَنْ مُتَنٜىٰنْكَ دَ مَاتَنْكَ دَ مَاتَانْدَ كَأَجِيٜىٰ دُكَنْكُ كُكَ شَا دَغَ ثِكِنْسُ؞ كُكَ يَبِے غُمَكَنْ ظِينَارِيَ دَ نَأَظُرْڢَا دَ نَتَغُلَّ دَ نَبَڧِنْ ڧَرْڢٜىٰ دَ نَ إِتَاثٜىٰ دَ نَدُوڟٜىٰ وَطَنْدَ بَاسَجِ، كُواْ سُغَنِ، بَلّٜىٰ عَثٜىٰ سُغَانٜىٰ كُواْمٜىٰ؞ عَمَّا اللَّهْ وَنْدَ رَنْكَ دَ دُكَنْ هَنْيُواْيِنْكَ سُنَ أَ حَنُّنْسَ، شِينٜىٰ كَاڧِ غِرْمَمَاوَا؞

²⁴ شِينٜىٰ دَلِيلِنْدَ يَسَا اللَّهْ يَعَيْكُواْ دَ حَنُّنَّنْ دَ يَيِ رُبُوتُنْ؞

²⁵ غَا رُبُوتُنْ دَ عَكَيِ؞ ‏«‏مٜىٰنٜىٰ، مٜىٰنٜىٰ، تٜىٰكٜىٰلْ، ڢَرْسِنْ؞

²⁶ ‏«‏غَا مَعَنَرْ كَلْمُواْمِنْ؞ ‏«‏مٜىٰنٜىٰ، وَتُواْ ‏‹‏ڧِرْغَ›‏، اللَّهْ يَاڧِرْغَ ݣُونَكِنْ مُلْكِنْكَ، كُمَ يَارِغَا يَكَٰوُاْسُ غَ ڧَرْشٜىٰ؞

²⁷ ‏«‏تٜىٰكٜىٰلْ، وَتُواْ ‏‹‏نَوْيِ›‏، أَنْعَوْنَ نَوْيِنْكَ أَ مَعَوْنِ، عَكَ كُمَ تَرَرْ بَاكَ دَ إِسَشّٜىٰنْ نَوْيِ؞

²⁸ ‏«‏ڢَرْسِنْ، وَتُواْ ‏‹‏رَبَ›‏، أَنْرَبَ مُلْكِنْكَ أَنْبَا مُتَنٜىٰنْ مٜىٰدِيَ دَ نَ ڢَٰشِيَ؞»‏

²⁹ نَنْ دَنَنْ سَيْ سَرْكِے بٜىٰلْشَظَّرْ يَعُمَرْتَ مَاسُ يِمَسَ حِدِمَ سُسَاوَ دَانِيٜىٰلْ رِغَرْ مُلْكِ تَجَرْ غَرُورَا، عَكُمَسَا مَسَ سَرْڧَرْ ظِينَارِيَ أَوُيَنْسَ؞ سَعَنً عَكَيِ شٜىٰلَ ثٜىٰوَ أَنْبَاشِ مَڟَيِ نَعُكُ عَثِكِنْ مَاسُ مُلْكٍ ڧَسَرْ؞

³⁰ أَ دَرٜىٰنَّنْ كُوَ عَكَ كَشٜىٰ سَرْكِے بٜىٰلْشَظَّرْ مُتُمِنْ كَلْدِيَ نَ بَابِيلَ؞

³¹ دَرِيُسْ مُتُمِنْ مٜىٰدِيَ كُوَ يَكَرْٻِ مُلْكِ، يَنَدَ شٜىٰكَرَا سِتِّنْ دَ بِيُ؞