أَيُّكَنْ مَنْذَنِّے 5 - أَتَّوْرَتْ دَ أَنَّبَاوَا

هَنَنِيَ دَ سَڢِرَتُ

¹ عَمَّا وَنِ مُتُمْ مَيْ سُونَ هَنَنِيَ، تَرٜىٰدَ مَاتَرْسَ سَڢِرَتُ، يَسَيَرْ دَ وَنِ أَبِنْدَ يَكٜىٰدَشِ؞

² سَيْ يَٻُواْيٜىٰ وَنِ أَبُ دَغَ ثِكِنْ كُطِنْ دَ سَنِنْ مَاتَرْسَ، يَكَٰوُاْ سَاشٜىٰ كَوَيْ يَ أَجِيٜىٰ أَغَبَنْ مَنْذَنِّے؞

³ سَيْ بِتْرُسْ يَثٜىٰ ‏«‏كَيْ هَنَنِيَ، تَيَيَا كَبَرْ شَيْطَنْ يَثِكَ ذُوثِيَارْكَ، حَرْ كَيِ وَ رُوحُ مَيْ ڟَرْكِے ڧَضْيَا، كَكُمَ ٻُواْيٜىٰ وَنِ أَبُ دَغَ ثِكِنْ كُطِنْ غُواْنَرْ؟

⁴ كَاڢِنْ كَسَيَرْ بَتَكَبَثٜىٰ؟ بَايَنْدَ كَسَيَرْ مَا، بَعَسَاكَ دُواْلٜىٰ كَبَادَ كُطِنْبَ؞ تَيَيَا كَيِ وَنَّنْ تُنَانِ أَ ذُوثِيَارْكَ؟ أَيْ، بَمُتُمْ كَيِوَ ڧَضْيَابَ، اللَّهْ كَيِوَ؞»‏

⁵ دَجِنْ وَنَّنْ مَغَنَرْ كُوَ، هَنَنِيَ يَڢَاطِ يَمُتُ؞ مُتَنٜىٰنْ دَ سُكَجِ كُوَ، ڟُواْرُواْ يَكَامَسُ سُواْسَيْ؞

⁶ سَمَارِ سُكَتَاشِ سُكَ نَطٜىٰ جِكِنْسَ دَ يَدِ، سُكَ طَوْكٜىٰشِ ذُوَا وَجٜىٰ سُكَ بِنّٜىٰ؞

⁷ بَايَنْ كَمَرْ أَوَ عُكُ، مَاتَرْ هَنَنِيَ تَشِغُواْ، بَتَسَنْ أَبِنْدَ يَڢَرُبَ؞

⁸ سَيْ بِتْرُسْ يَثٜىٰ مَتَ ‏«‏غَيَ مِنِ، وَنَّنْ شِينٜىٰ إِيَاكَثِنْ كُطِنْدَ عَكَ بِيَكُ عَكَنْ غُواْنَرْ نَنْ؟»‏ سَيْتَثٜىٰ ‏«‏عِ، إِيَاكَثِنْ كُطِنْ كٜىٰنَنْ؞»‏

⁹ عَمَّا بِتْرُسْ يَثٜىٰ مَتَ ‏«‏يَيَ كُكَ حَطَ بَاكِ كُڠُودَ رُوحٌ عُبَنْ‌غِجِ؟ غَاشِ، كِجِ تَڢِيَرْ وَطَنْدَ سُكَ بِنّٜىٰ مِجِنْكِ، سُنَ بَاكِنْ ڧُواْڢَ، ذَاسُ كُوَ طَوْكٜىٰكِ سُڢِتَرْ دَكٜىٰ؞»‏

¹⁰ نَنْ تَكٜىٰ تَڢَاطِ أَغَبَنْسَ، تَمُتُ؞ دَ سَمَارِنْ سُكَ شِغُواْ سُكَ سَامٜىٰتَ تَمُتُ، سَيْ سُكَ طَوْكٜىٰتَ، سُكَ ڢِتَرْدَ عِتَ، سُكَ بِنّٜىٰتَ تَغٜىٰڢٜىٰنْ مِجِنْتَ؞

¹¹ سَيْ بَبَّنْ ڟُواْرُواْ يَكَامَ دُكَنْ جَمَعَرْ مَاسُبِے دَ دُكْ وَطَنْدَ سُكَجِ لَابَرِنْ وَطَنَّنْ أَبُبُوَ؞

مَنْذَنِّےنْ سُنْيِ أَبُبُوَنْ بَنْ مَامَاكِ دَ يَوَ

¹² تُواْ، أَنْيِ عَلَمُ دَ أَيُّكَنْ مَامَاكِ مَاسُيَوَ ثِكِنْ مُتَنٜىٰ تَوُرِنْ مَنْذَنِّے؞ دُكَنْ مَاسُبِے كُوَ سُكَنْ تَارُ أَ ذَوْرٜىٰنْ سُلَيْمَٰنُ أَ ڢِيلِنْ هَيْكَلِ؞

¹³ عَمَّا عَثِكِنْ سَوْرَنْ مُتَنٜىٰ، بَاوَنْدَ يَيِ ڧَرْڢِنْ حَلِنْ شِغَ ثِكِنْسُ، كُواْدَيَكٜىٰ جَمَعَ سُنَبَاسُ غِرْمَ؞

¹⁴ دُكْدَهَكَ مَاسُ بَادَ غَسْكِيَ غَ عُبَنْ‌غِجِ سُكَيِ تَڧَارُوَ دَ جَمَعَ مَاسُيَوَنْ غَسْكٜىٰ نٜىٰ، مَظَا دَ مَاتَا؞

¹⁵ حَرْ مَا يَكَيْ غَ مُتَنٜىٰ سُنَ ڢِتُواْ دَ مَرَسَ لَاڢِيَ تِيتِ تِيتِ، سُنَ شِمْڢِطَاسُ عَكَنْ غَدَجٜىٰ دَ تَبَرْمِ؞ سُنَ ڢَتَ ثٜىٰوَ عِدَنْ بِتْرُسْ يَذُواْ وُثٜىٰوَ كُواْ إِنُوَرْسَ مَا تَبِتَ كَنْ وَطَنْسُنْسُ؞

¹⁶ مُتَنٜىٰ دَيَوَ كُوَ سُكَيِ تَتَارُوَ دَغَ غَرُضُوً دَسُكٜىٰ كٜىٰوَيٜىٰنْ عُرُوشَلِيمَ، سُنَ تَكَٰوُاْ مَرَسَ لَاڢِيَ دَ وَطَنْدَ ڧَظَامَنْ رُوحُواْحِ سُكٜىٰبَاسُ وَهَلَ، دُكَنْسُ كُوَ عَكَ وَرْكَرْ دَسُو؞

مَنْذَنِّے سُنْ شَ وَهَلَ سَبُواْدَ بَنْ‌غَسْكِيَرْسُ

¹⁷ سَيْ بَبَّنْ ڢِرِسْتِ تَرٜىٰدَ دُكَنْ وَطَنْدَ سُكٜىٰ تَرٜىٰدَشِ، وَتُواْ یَنْ ڧُنْ‌غِيَرْ سَدُوكِيَاوَا، سُنْ جِكِيشِنْ مَنْذَنِّےنْ سُواْسَيْ؞

¹⁸ سَبُواْدَ حَكَ سُكَ تَاسُواْ سُكَ كَامَ مَنْذَنِّےنْ، سُكَسَاسُ عَكُرْكُكُ؞

¹⁹ عَمَّا دَ دَرٜىٰ سَيْ وَنِ مَلاَىِٕكَنْ عُبَنْ‌غِجِ يَبُوطٜىٰ ڧُواْڢُواْڢِنْ كُرْكُكُنْ، يَڢِتُواْ دَسُو، يَثٜىٰ،

²⁰ ‏«‏كُجٜىٰ كُڟَيَ ثِكِنْ هَيْكَلِ كُڢَطَا وَمُتَنٜىٰ دُكَنْ مَغَنَرْ وَنَّنْ سَابُوانْ رَيْ؞»‏

²¹ دَسُكَجِ حَكَ، سُكَ شِغَ هَيْكَلِنْ دَ سَسَّڢٜىٰ، سُنَ كُواْيَرْوَا؞ سَعَدَّ بَبَّنْ ڢِرِسْتِ دَ وَطَنْدَ سُكٜىٰ تَرٜىٰ دَشِ سُكَ تَارُ، سُكَ كِرَا مَجَلِسَ دَ دُكَنْ شُوغَبَنِّنْ إِسْرَٰٓءِيلَ، سُكَ عَيْكَ ذُوَا كُرْكُكُ عَكَٰوُاْ مَنْذَنِّےنْ؞

²² عَمَّا دَ مَاسُ غَادِنْ هَيْكَلِ سُكَجٜىٰ، بَسُ سَامٜىٰسُ عَكُرْكُكُنْ بَ، سُكَ دَاوُاْ سُكَ بَادَ لَابَرِ، سُكَثٜىٰ،

²³ ‏«‏مُنْ سَامِ كُرْكُكُنْ عَكُلّٜىٰ سُواْسَيْ، مَاسُ غَادِ كُمَ سُنَ غَادِنْ بَاكِنْ ڧُواْڢُواْڢِنْ، عَمَّا دَ مُكَ بُوطٜىٰ، سَيْ مُكَ سَامُ بَا كُواْوَ عَثِكِ؞»‏

²⁴ دَ شُوغَبَنْ مَاسُ غَادِنْ هَيْكَلِ دَ مَنْيَنْ ڢِرِسْتُواْثِے سُكَجِ حَكَ، سُكَ ضِكِثِے سُواْسَيْ، سُنَ تُنَانِنْ أَبِنْدَ وَنَّنْ ذَيْ كَٰوُاْ؞

²⁵ سَيْ وَنِ يَذُواْ يَثٜىٰمُسُ ‏«‏أَيْ، غَاشِ، مُتَنٜىٰنَّنْ دَ كُكَسَا عَكُرْكُكُ سُنَ ڟَيٜىٰ أَ هَيْكَلِ، سُنَ كُواْيَرْ دَ جَمَعَ؞»‏

²⁶ سَيْ مَاسُ غَادِنْ هَيْكَلِنْ تَرٜىٰدَ شُوغَبَنْسُ سُكَجٜىٰ سُكَ كَٰوُاْ مَنْذَنِّےنْ، عَمَّا ڢَا بَدَڧَرْڢِبَ، دُوانْ شُوغَبَنِّنْ سُنَ ڟُواْرُواْ كَدَ جَمَعَ سُجٜىٰجّٜىٰڢٜىٰسُ دَدُوَڟُو؞

²⁷ دَسُكَ كَٰوُاْ مَنْذَنِّےنْ، سُكَسَا سُكَ ڟَيَ أَغَبَنْ مَجَلِسَ؞ سَيْ بَبَّنْ ڢِرِسْتِ يَتَمْبَيٜىٰسُ،

²⁸ يَثٜىٰ ‏«‏مُنْجَا مُكُ كُنّٜىٰ سُواْسَيْ كَدَ كُڧَارَيِنْ كُواْيَرْوَا ثِكِنْ سُونَنَّنْ، عَمَّا غَاشِ كُنْ ثِكَ عُرُوشَلِيمَ دُكْ دَ كُواْيَرْوَرْكُ، حَرْ مَا كُنَ نٜىٰمَ كُتُورَ مَنَ أَلْحَكِنْ جِنِنْ مُتُمِنَّنْ؞»‏

²⁹ عَمَّا بِتْرُسْ دَ مَنْذَنِّےنْ سُكَ أَمْسَ سُكَثٜىٰ ‏«‏دُواْلٜىٰنٜىٰ مُيِ وَ اللَّهْ بِيَيَّ ڢِيٜىٰدَ مُيِ وَمُتُمْ؞

³⁰ اللَّهْ نَكَاكَنِّنْمُ يَتَادَ عِيسَىٰ، وَنْدَ كُكَ كَشٜىٰ تَوُرِنْ غِثِّيٜىٰشِ عَكَنْ غُنْ‌غُمٜىٰنْ إِتَاثٜىٰ؞

³¹ شِينٜىٰ اللَّهْ يَطَوْكَكَ غَ دَامَنْسَ يَذَمَ شُوغَبَادَ كُمَ مَيْ ثٜىٰتُواْ، دُواْمِنْ يَبُوطٜىٰوَ إِسْرَٰٓءِيلَ حَنْيَرْ تُوبَ، سُكُمَ سَامِ غَاڢَرَرْ ذُنُبَنْسُ؞

³² مُو كُوَ شَيْدُنٜىٰ غَ وَطَنَّنْ أَبُبُوَ، حَكَكُمَ رُوحُ مَيْ ڟَرْكِے، وَنْدَ اللَّهْ يَبَا مَاسُ يِمَسَ بِيَيَّ؞»‏

³³ دَ شُوغَبَنِّنْ سُكَجِ حَكَ، سَيْ سُكَجِ ڢُشِے سُواْسَيْ، حَرْ سُكَسُواْ سُكَشٜىٰ مَنْذَنِّےنْ؞

³⁴ عَمَّا وَنِ بَڢَرِسِيٜىٰ مَيْ سُونَ غَمَلِيٜىٰلْ، مَلَمِنْ كُواْيَرْوَرْ مُوسَٰى، وَنْدَ دُكَنْ جَمَعَ سُنَ بَاشِ غِرْمَ، يَتَاشِ ڟَيٜىٰ ثِكِنْ مَجَلِسَ، يَبَادَ عُمَرْنِ أَ ڢِتَرْدَ مُتَنٜىٰنَّنْ وَجٜىٰ تُكُنَ؞

³⁵ سَعَنً يَثٜىٰ وَیَنْ مَجَلِسَ ‏«‏كُو یَنْعُوَ إِسْرَٰٓءِيلَاوَا، كُكُلَ ڢَا دَ أَبِنْدَ كُكٜىٰسُواْ كُيِ وَمُتَنٜىٰنَّنْ؞

³⁶ شٜىٰكَرُنْ بَايَ وَنِ مُتُمْ يَٻُلُّواْ، مَيْ سُونَ تُدَسْ، يَطَوْكِ كَنْسَ كَمَرْ وَنِ أَبُ؞ وَجٜىٰنْ مُتُمْ طَرِے حُطُ سُكَبِيشِ، عَمَّا عَكَ كَشٜىٰشِ، عَكَ كُوَ وَاڟَرْدَ مَاسُبِنْسَ، وَنَّنْ كُوَ يَذَمَ ڧَرْشٜىٰنْسُ؞

³⁷ بَايَنْ وَنَّنْ كُمَ، وَنِ مَيْ سُونَ يَهُودَ، مُتُمِنْ غَلِيلِ يَٻُلُّواْ، لُواْكَثِنْ دَ عَكٜىٰ ڧِرْغَرْ مُتَنٜىٰ، يَسَا مُتَنٜىٰ سُكَبِيشِ؞ شِمَا يَهَلَّكَ، مَاسُبِنْسَ مَا دُكَ عَكَ وَاڟَرْ دَسُو؞

³⁸ تُواْ، يَنْذُ مَا، إِنَ غَيَ مُكُ، كُڢِتَ دَغَ حَنْيَرْ مُتَنٜىٰنَّنْ، كُبَرْسُ؞ عِدَنْ دَيْ نِيَّرْسُ، كُواْ عَيْكِنْسُ نَمُتُمْ نٜىٰ، أَيْ، ذَيْ رُشٜىٰ؞

³⁹ عَمَّا عِدَنْ عَيْكِنَّنْ نَ اللَّهْ نٜىٰ، بَذَاكُ عِيَ حَنَ مُتَنٜىٰنَّنْ بَ؞ كَدَ ڢَا أَ سَامٜىٰكُ كُنَ غَابَادَ اللَّهْ؞»‏ سَيْ سُكَ يَرْدَ دَ شَوَرَرْسَ،

⁴⁰ سُكَ كُمَ كِرَوُاْ مَنْذَنِّےنْ، سُكَيِ مُسُ بُلَلَ، سُكَجَا مُسُ كُنّٜىٰ كَدَ سُڧَارَ يِنْ مَغَنَ ثِكِنْ سُونَنْ عِيسَىٰ؞ سَعَنً سُكَ سَكٜىٰسُ؞

⁴¹ مَنْذَنِّےنْ سُكَتَاشِ دَغَ غَبَنْ مَجَلِسَرْ سُنَ ڢَضٍ ثِكِ عَكَنْ أَنْ‌غَ سُنْ إِسَ سُشَا وُلَڧَنْثِ سَبُواْدَ سُونَنْ عِيسَىٰ؞

⁴² كُواْوَثٜىٰ رَانَ كُوَ، كُواْ أَ هَيْكَلِ، كُواْ أَغِدَا، بَسُ دَيْنَ كُواْيَرْوَا دَ بَادَ لَابَرِ مَيْ دَاطِے نَثٜىٰوَ عِيسَىٰ شِينٜىٰ أَلْمَسِيحُ بَ؞