أَيُّكَنْ مَنْذَنِّے 4 - أَتَّوْرَتْ دَ أَنَّبَاوَا

بِتْرُسْ دَ يَحْيَى أَغَبَنْ یَنْ مَجَلِسَ

¹ لُواْكَثِنْ دَ بِتْرُسْ دَ يَحْيَى سُكٜىٰ ثِكِنْ يِنْ مَغَنَ دَ جَمَعَ، سَيْ ڢِرِسْتُواْثِے دَ شُوغَبَنْ مَاسُ غَادِنْ هَيْكَلِنْ دَ سَدُوكِيَاوَا سُكَذُواْ وُرِنْسُ؞

² سُنْيِ ڢُشِے دُواْمِنْ أَلْمَجِرَنْ سُنَ كُواْيَ وَجَمَعَ ثٜىٰوَ مَتَتُّو ذَاسُ تَاشِ دَ رَيْ كَمَرْ يَدَّ عِيسَىٰ يَتَاشِ؞

³ سَيْ سُكَ كَامَسُ، سُكَ كُلّٜىٰسُ سَيْ وَشٜىٰغَرِ، دُوانْ يَمَّ تَيِ؞

⁴ عَمَّا دَيَوَ دَغَ ثِكِنْ مُتَنٜىٰنْ دَ سُكَجِ وَعَظِنْ سُكَ بَادَ غَسْكِيَ؞ سَيْ دُكْ يَوَنْ مَاسُبِے يَكَيْ وَجٜىٰنْ مُتُمْ دُبُو بِيَرْ؞

⁵ وَشٜىٰغَرِ شُوغَبَنِّنْسُ دَ دَتَّاوَنْسُ دَ مَلَمً كُواْيَرْوَرْ مُوسَٰى نَاسُ سُكَ تَارُ أَ عُرُوشَلِيمَ؞

⁶ هَنَّنَ، بَبَّنْ ڢِرِسْتِ، يأَنَانً تَرٜىٰدَ كَيَڢَ دَ يَحْيَى دَ إِسْكَنْدَرِ دَ كُمَ دُكْ وَطَنْدَ سُكٜىٰ دَنْ‌غِنْ بَبَّنْ ڢِرِسْتِ؞

⁷ سُكَسَا بِتْرُسْ دَ يَحْيَى سُكَ ڟَيَ أَڟَكِيَرْسُ، سَيْ سُكَ تَمْبَيٜىٰسُ سُكَثٜىٰ ‏«‏دَ وَنّٜىٰ إِيكُواْ نٜىٰ، كُواْ كُوَ دَ وَنٜىٰ سُونَنٜىٰ كُكَيِ وَنَّنْ؟»‏

⁸ تُواْ، بِتْرُسْ، ثِكٜىٰ دَ رُوحُ مَيْ ڟَرْكِے، يَتَمْبَيٜىٰسُ يَثٜىٰ ‏«‏كُو شُوغَبَنِّ دَ دَتَّاوَنْ جَمَعَ،

⁹ عَيَوْ، كُنَ تَمْبَيَرْمُ عَكَنْ أَلْحٜىٰرِنْ دَ عَكَيِ وَوَنَّنْ غُرْغُنْ نٜىٰ؟ كُنَ كُمَ سُواْ كُسَنِ وَنْدَ يَوَرْكَرْ دَشِينٜىٰ؟

¹⁰ تُواْ، مُنَسُواْ كُسَنِ، كُو دَ دُكَنْ مُتَنٜىٰنْ إِسْرَٰٓءِيلَ، ثٜىٰوَ عَثِكِنْ سُونَنْ عِيسَىٰ أَلْمَسِيحُ بَنَظَرٜىٰتْ نَنْ دَ كُكَ غِثِّيٜىٰ، وَنْدَ اللَّهْ يَتَادَ شِ دَغَ مَتَتُّو دَ سُونَنْسَ نٜىٰ وَنَّنْ مُتُمِنْ يَكٜىٰ ڟَيٜىٰ لَاڢِيَيّٜىٰ أَغَبَنْكُ؞

¹¹ وَنَّنْ عِيسَىٰ، شِينٜىٰ وَنْدَ عَكَ رُبُوتَ غَمٜىٰدَشِ عَثِكِنْ مَغَنَرْ اللَّهْ ثٜىٰوَ ‏«‏ ‏‹‏دُوڟٜىٰنَّنْ دَ كُو مَاسُ غِنِ كُكَڧِ، شِينٜىٰ كُوَ يَذَمَ مَڢِے أَمْڢَانِ أَغِنِ؞›‏

¹² ‏«‏بَا كُمَ سَامُنْ ثٜىٰتُواْ غَ وَنِ، غَمَا ثِكِنْ دُكَنْ سُونَيٜىٰنْ دَ عَكَبَا مُتَنٜىٰ عَڧَرْڧَشِنْ سَمَ، بَا وَنِ سُونَ دَبَمْ دَ عَكَ بَايَرْ وَنْدَ لَلَّيْ تَوُرِنْسَ نٜىٰ ذَامُ سَامِ ثٜىٰتُواْ؞»‏

¹³ تُواْ دَ شُوغَبَنِّنْ سُكَغَ ڧَرْڢِنْ حَلِنْ بِتْرُسْ دَ يَحْيَى، سُكَ كُمَ غَانٜىٰ سُمَرَسَ عِلِمِ نٜىٰ، تَلَكَاوَا كُمَ، سَيْ سُكَيِ مَامَاكِ، سُكَ كُوَ غَانٜىٰ ثٜىٰوَ دَا مَنْذَنِّےنْ سُنَ تَرٜىٰدَ عِيسَىٰ؞

¹⁴ عَمَّا تُنْدَ شُوغَبَنِّنْ سُكَغَ مُتُمِنَّنْ دَ عَكَ وَرْكَرْ طِنْ يَنَ ڟَيٜىٰ تَرٜىٰدَ مَنْذَنِّےنْ، سَيْ سُكَ رَسَ أَبِنْدَ ذَاسُثٜىٰ؞

¹⁵ سُكَ عُمَرْثِ مَنْذَنِّےنْ سُڢِتَ دَغَ مَجَلِسَ، سُكَيِ شَوَرَا دَ جُونَ

¹⁶ سُكَثٜىٰ ‏«‏مٜىٰ ذَامُيِ دَ مُتَنٜىٰنَّنْ؟ دُوانْ لَلَّيْ دُكَنْ مَذَوْنَنْ عُرُوشَلِيمَ سُنْ سَنْ ثٜىٰوَ أَنْيِ وَنِ بَبَّنْ عَيْكِنْ بَنْ مَامَاكِ تَوُرِنْ مُتَنٜىٰنَّنْ، بَ كُوَ يَدَّ ذَامُثٜىٰ، ‏‹‏بَ حَكَ بَنٜىٰ؞›‏

¹⁷ عَمَّا دُواْمِنْ كَدَ أَبِنْ يَبَظُو عَثِكِنْ مُتَنٜىٰ، سَيْ مُجَا مُسُ كُنّٜىٰ، كَدَ سُكُسْكُرَ سُڧَارَيِ وَكُواْوَ مَغَنَ ثِكِنْ وَنَّنْ سُونَنْ؞»‏

¹⁸ سَيْ سُكَ كِرَوُاْ مَنْذَنِّےنْ، سُكَجَا مُسُ كُنّٜىٰ، كَدَ سُكُسْكُرَ سُيِ وَكُواْوَ مَغَنَ، كُواْ سُڧَارَ كُواْيَرْوَا ثِكِنْ سُونَنْ عِيسَىٰ؞

¹⁹ عَمَّا بِتْرُسْ دَ يَحْيَى سُكَ أَمْسَ مُسُ سُكَثٜىٰ ‏«‏تُواْ، كُواْ دَيْدَيْنٜىٰ أَوُرِنْ اللَّهْ مُڢِ جِنْ مَغَنَرْكُ ڢِيٜىٰدَ مَغَنَرْ اللَّهْ؟ سَيْ كُدُوبَ كُغَنِ؞

²⁰ دُوانْ مُو كَمْ، بَذَامُ عِيَيِنْ شِضُ عَكَنْ أَبِنْدَ مُكَجِ، مُكَ كُمَ غَنِبَ؞»‏

²¹ دَ سُكَڧَارَ جَنْ مُسُ كُنّٜىٰ، سُكَ سَكٜىٰسُ؞ سُنْ كُوَ رَسَ يَدَّ ذَاسُيِ سُهُواْرٜىٰسُ، دُواْمِنْ مُتَنٜىٰ دُكَ سُنَ طَوْكَكَ اللَّهْ سَبُواْدَ أَبِنْدَ يَڢَرُ؞

²² مُتُمِنَّنْ كُوَ دَ يَسَامِ وَرْكٜىٰوَ نَبَنْ مَامَاكِ، يَڢِ شٜىٰكَرَا أَرْبَعِنْ دَ حَيْڢُوَ؞

مَاسُبِے سُنْيِ أَدُّعَ دُوانْ سُيِ مَغَنَ بَا ڟُواْرُواْ

²³ دَ عَكَ سَكِ بِتْرُسْ دَ يَحْيَى، سَيْ سُكَ تَڢِے وُرِنْ مُتَنٜىٰنْسُ، سُكَ بَاسُ لَابَرِنْ دُكَنْ أَبِنْدَ مَنْيَنْ ڢِرِسْتُواْثِے دَ شُوغَبَنِّ سُكَ ڢَطَا مُسُ؞

²⁴ سُو كُوَ دَ جِنْ حَكَ، سَيْ سُكَ طَغَ مُرْيَرْسُ غَ اللَّهْ دَ نُڢِ طَيَ سُكَثٜىٰ، ‏«‏عُبَنْ‌غِجِ مَيْ إِيكُواْ دُكَ، كَيْنٜىٰ كَا حَلِثِّ سَمَ دَ ڧَسَا دَ تٜىٰكُ دَ كُمَ دُكَنْ أَبُبُوَنْ دَسُكٜىٰ ثِكِنْسُ؞

²⁵ تَوُرِنْ رُوحُ مَيْ ڟَرْكِے كَيِ مَغَنَ تَوُرِنْ بَاوَنْكَ وَتُواْ، كَكَنْمُ دَاوُدَ، كَثٜىٰ، ‏‹‏دُوانْمٜىٰ وَطَنْدَ بَا يَهُودَاوَا بَ سُكَيِ ڢُشِے؟ ڧَبِيلُ كُمَ سُكَيِ تُنَانِنْ أَلْعَمُرَنْ وُاْڢِ؟

²⁶ سَرَاكُنَنْ دُونِيَا سُنْيِ شِرِنْ يَاڧِ، شُوغَبَنِّنْسُ كُمَ سُنْ حَطَكَيْ، سُنَ غَابَادَ عُبَنْ‌غِجِ، دَ كُمَ أَلْمَسِيحُنْسَ؞›‏ »‏

²⁷ ‏«‏غَمَا حَڧِيڧَ عَبِرْنِنَّنْ سَرْكِے هِرُدُسْ دَ بُنْتُسْ بِلَتُسْ سُنْ حَطَكَيْ تَرٜىٰدَ وَطَنْدَ بَا يَهُودَاوَا بَ دَ جَمَعَرْ إِسْرَٰٓءِيلَ، سُنَ غَابَادَ بَاوَنْكَ عِيسَىٰ مَيْ ڟَرْكِے، وَنْدَ كَمَيْدَشِ أَلْمَسِيحُ؞

²⁸ سُنْ تَارُ دُواْمِنْ سُأَيْكَتَ دُكْ أَبِنْدَ كَڧَدَّرَ ذَيْ ڢَرُ، بِسَغَ إِيكُوانْكَ دَ نُڢِنْكَ؞

²⁹ ‏«‏يَنْذُ كُمَ، يَا عُبَنْ‌غِجِ، كَدُوبِے يَدَّ سُكٜىٰ ڧُواْڧَرِنْ هَنَمُ عَيْكِ؞ كَبَا بَايِنْكَ ڧَرْڢِنْ حَلِنْ ڢَطِنْ كَلْمَرْكَ بَابُ ڟُواْرُواْ؞

³⁰ كَدِنْ‌غَ مِيڧَ حَنُّنْكَ نَوَرْكَرْوَ، كَكُمَيِ عَلَمُ دَ أَيُّكَنْ بَنْ مَامَاكِ تَوُرِنْ سُونَنْ بَاوَنْكَ، عِيسَىٰ مَيْ ڟَرْكِے؞»‏

³¹ دَ سُكَيِ أَدُّعَ، سَيْ وُرِنْ دَ سُكَ تَارُ يَغِرْغِظَ؞ سَيْ دُكْ عَكَ ثِكَسُ دَ رُوحُ مَيْ ڟَرْكِے، سُكَيِ تَڢَطِنْ كَلْمَرْ اللَّهْ بَابُ ڟُواْرُواْ؞

كُواْمٜىٰ نَمَاسُبِے طَيَنٜىٰ

³² تُواْ، دُكْ تَارُوانْ مَاسُبِے كُوَ نُڢِنْسُ طَيَنٜىٰ، رَعَيِنْسُ مَا طَيَ، بَ كُمَ وَنِنْسُ دَيَثٜىٰ أَبِنْدَ يَكٜىٰدَشِ نَاسَنٜىٰ، سَيْدَيْ نَاسُنٜىٰ تَرٜىٰ؞

³³ دَ إِيكُواْ مَيْغِرْمَ مَنْذَنِّےنْ كُمَ سُكَ بَادَ شَيْدَ عَكَنْ تَاشِنْ عُبَنْ‌غِجِ عِيسَىٰ دَغَ مَتَتُّو؞ أَلْحٜىٰرِ مَيْ يَوَ يَكَسَنْثٜىٰ عَكَنْ كُواْوَنٜىٰ طَيَنْسُ،

³⁴ حَرْ بَاوَنْدَ يَرَسَ وَنِ أَبُ عَثِكِنْسُ؞ دُواْمِنْ دُكْ مَاسُ غُواْنَكِ كُواْ غِدَاجٜىٰ سُكَ دِنْ‌غَ سَيَرْ دَسُو، سُنَ كَٰوُاْ كُطِنْ،

³⁵ سُنَ أَجِيٜىٰ أَغَبَنْ مَنْذَنِّےنْ، أَنَ كُوَ رَرَّبَوَ كُواْوَ بِسَغَ بُڧَاتَرْسَ؞

³⁶ حَكَ وَنِ مَيْ سُونَ يُوسُڢَ يَيِ؞ شِ مُتُمِنْ ذُرِيَرْ لَوِ نٜىٰ، أَصَلِنْسَ مُتُمِنْ سَيِڢُرُسْ نٜىٰ، وَنْدَ مَنْذَنِّےنْ سُكٜىٰثٜىٰ دَشِ بَرْنَبَ، وَتُواْ، مَيْ ڧَرْڢَڢَ ذُوثِيَا؞

³⁷ بَرْنَبَ كُوَ يَسَيَرْ دَ وَتَ غُواْنَرْسَ، يَكَٰوُاْ كُطِنْ يَ أَجِيٜىٰ أَغَبَنْ مَنْذَنِّےنْ؞