أَيُّكَنْ مَنْذَنِّے 25 - أَتَّوْرَتْ دَ أَنَّبَاوَا

بُلُسْ يَطَوْكَكَ ڧَارَ ذُوَا غَبَنْ كَيْسَرْ

¹ تُواْ، بَايَنْ ݣُونَ عُكُ دَ ڢٜىٰسْتُسْ يَ إِسُواْ دُواْمِنْ يَكَامَ عَيْكِنْ ڠُومْنَ، سَيْ يَتَاشِ دَغَ كَيْسَرِيَ يَتَڢِے عُرُوشَلِيمَ؞

² سَيْ مَنْيَنْ ڢِرِسْتُواْثِے دَ شُوغَبَنِّنْ يَهُودَاوَا سُكَ كَيْ ڧَارَرْ بُلُسْ أَوُرِنْسَ؞ سُكَ ضُواْڧٜىٰشِ،

³ يَسَا أَ مَيْدَ بُلُسْ عُرُوشَلِيمَ دُواْمِنْ سُنْ شِرْيَ وَطَنْسُ سُجِرَا سُكَشٜىٰشِ أَ حَنْيَ؞

⁴ ڢٜىٰسْتُسْ يَأَمْسَ يَثٜىٰ ‏«‏أَنَ غَادِنْ بُلُسْ أَ كَيْسَرِيَ، نِے دَكَيْنَ ذَنْجٜىٰ ثَنْ بَادَ جِمَاوَا بَ؞

⁵ سَبُواْدَ حَكَ سَيْ مَنْيَنْكُ سُذُواْ تَرٜىٰدَنِ، عِدَنْ كُوَ مُتُمِنَّنْ يَنَدَ وَنِ لَيْڢِے سَيْ سُكَٰوُاْ ڧَارَرْسَ؞»‏

⁶ بَيْڢِے ݣُونَ تَݣُوسْ كُواْ غُواْمَ أَوُرِنْسُ بَ، سَيْ يَكُواْمَ كَيْسَرِيَ؞ وَشٜىٰغَرِ كُمَ يَذَوْنَ عَكُجٜىٰرَرْ شَرِيعَ، يَسَا عَكَٰوُاْ بُلُسْ أَغَبَنْسَ؞

⁷ دَ بُلُسْ يَذُواْ، يَهُودَاوَنْ دَ سُكَذُواْ دَغَ عُرُوشَلِيمَ سُكَتَاشِ سُكَ كٜىٰوَيٜىٰشِ، سُنَ تَكَٰوُاْ ڧَارَ مَاسُيَوَ، مَاسُ ڟَنَنِ عَكَنْسَ، وَطَنْدَ مَا بَسُ عِيَ تَبَّتَرْوَبَ؞

⁸ عَمَّا بُلُسْ يَكَارٜىٰ كَنْسَ يَثٜىٰ ‏«‏نِے بَنْيِ وَكُواْيَرْوَرْ يَهُودَاوَا لَيْڢِے بَ، بَنْكُمَيِ وَهَيْكَلِ، كُواْ كَيْسَرْ لَيْڢِے بَ كُواْ كَطَنْ؞»‏

⁹ عَمَّا ڢٜىٰسْتُسْ يَنَ سُواْ يَڢَرَنْتَ وَ يَهُودَاوَا رَيْ، يَتَمْبَيِ بُلُسْ ‏«‏كُواْ كَيَرْدَ كَجٜىٰ عُرُوشَلِيمَ عَيِمَكَ شَرِيعَ أَغَبَنَ عَثَنْ غَمٜىٰدَ وَطَنَّنْ أَبُبُوَ؟»‏

¹⁰ عَمَّا بُلُسْ يَثٜىٰ ‏«‏إِنَ غَبَنْ كُواْتُنْ كَيْسَرْ، أَنَنْ نٜىٰ يَا كَمَاتَ عَيِمِنِ شَرِيعَ؞ بَنْيِ وَ يَهُودَاوَا وَنِ لَيْڢِے بَ، كَيْ مَا كَسَنْ دَ حَكَ سُواْسَيْ؞

¹¹ عِدَنْ نِے مَيْ لَيْڢِے نٜىٰ، حَرْ نَيِ لَيْڢِنْدَ يَ إِسَ عَكَشٜىٰنِ، أَيْ، بَذَنْڧِ عَكَشٜىٰنِبَ؞ عَمَّا عِدَنْ بَا وَتَ غَسْكِيَ عَثِكِنْ ڧَارَرْ دَسُكٜىٰيِ، تُواْ، بَا مَيْ عِيَ بَادَنِ غَرٜىٰسُ؞ نَا ضُواْڧَا أَطَوْكَكَ ڧَارَتَ ذُوَا غَبَنْ كَيْسَرْ؞»‏

¹² بَايَنْدَ ڢٜىٰسْتُسْ يَيِ شَوَرَا دَ مَجَلِسَرْسَ، سَيْيَأَمْسَ يَثٜىٰ ‏«‏تُواْ، كَا ضُواْڧَا أَطَوْكَكَ ڧَارَرْكَ ذُوَا غَبَنْ كَيْسَرْ، وُرِنْ كَيْسَرْ كُوَ ذَاكَتَڢِے؞»‏

بُلُسْ أَغَبَنْ أَغِرِڢَّ دَ بَنِسْ

¹³ بَايَنْ یَنْ ݣُونَكِے، سَرْكِے أَغِرِڢَّ دَ بَنِسْ سُكَذُواْ كَيْسَرِيَ دُواْمِنْ سُمَرَبْثِ ڢٜىٰسْتُسْ؞

¹⁴ تُنْدَ ذَاسُيِ ݣُونَكِے دَ دَامَ أَوُرِنْ، سَيْ ڢٜىٰسْتُسْ يَكَٰوُاْ مَغَنَرْ بُلُسْ غَ سَرْكِے؞ ڢٜىٰسْتُسْ يَثٜىٰ ‏«‏أَݣَويْ وَنِ مُتُمِنْ دَ ڢٜىٰلِسْ يَبَرْ مِنِ عَكُرْكُكُ؞

¹⁵ لُواْكَثِنْ دَ نَكٜىٰ عُرُوشَلِيمَ مَنْيَنْ ڢِرِسْتُواْثِے دَ شُوغَبَنِّنْ يَهُودَاوَا سُكَ كَٰوُاْ مِنِ ڧَارَرْ مُتُمِنَّنْ، سُكَ ضُواْڧٜىٰنِ إِنْيَنْكٜىٰ مَسَ حُكُنْثِ؞

¹⁶ عَمَّا نَا غَيَ مُسُ ثٜىٰوَ مُو رُواْمَاوَا بَمُسَابَايِ وَمَيْ لَيْڢِے شَرِيعَبَ، سَيْ أَنْكَٰوُاْ شِ أَغَبَنْ مَاسُ ڧَارَرْسَ ڢُسْكَ دَ ڢُسْكَ، سَيْ أَنْكُمَ بَاشِ ظَرَڢِ دُواْمِنْ يَكَارٜىٰ كَنْسَ غَمٜىٰدَ ڧَارَرْ دَ عَكَيِ؞

¹⁷ سَبُواْدَ حَكَ دَ سُكَذُواْ نَنْ تَرٜىٰدَنِ، بَنْ ٻَاتَ لُواْكَثِبَ، وَشٜىٰغَرِ كَوَيْ نَهَوْ كُجٜىٰرَرْ شَرِيعَ، نَكُمَ سَا عَكَٰوُاْ مُتُمِنْ؞

¹⁸ دَ مَاسُ ڧَارَرْ سُكَتَاشِ، بَسُ كَٰوُاْ ڧَارَرْسَ عَكَنْ وَنِ مُومُّنَنْ لَيْڢِنْدَ نَكٜىٰ ڟَمَّنِ يَيِبَ؞

¹⁹ سَيْ دَيْ سُنَدَ وَطَنْسُ مَغَنْ‌غَنُنْ دَ بَسُ يَرْدَ دَ بُلُسْ عَكَيْبَ، غَمٜىٰدَ أَدِّينِنْسُ دَ وَنِ عِيسَىٰ وَنْدَ يَمُتُ، وَنْدَ بُلُسْ يَنَاثٜىٰ ثٜىٰوَ يَنَدَ رَيْ؞

²⁰ نِے كُوَ دَ نَرَسَ يَدَّ ذَنْ بِنْثِكٜىٰ وَطَنَّنْ أَبُبُوَ، سَيْ نَتَمْبَيِ بُلُسْ كُواْ يَيَرْدَ يَجٜىٰ عُرُوشَلِيمَ عَيِمَسَ شَرِيعَ عَثَنْ غَمٜىٰدَ أَبُبُوَنَّنْ؞

²¹ عَمَّا دَ يَنٜىٰمَ أَڟَيَرْ دَ مَغَنَرْسَ دُواْمِنْ بَبَّنْ سَرْكِے كَيْسَرْ يَيَنْكٜىٰ مَسَ شَرِيعَ، سَيْ نَبَادَ عُمَرْنِ عَيِ غَادِنْسَ حَرْ ذُوَا لُواْكَثِنْ دَ ذَنْعَيْكَ دَشِ وُرِنْ كَيْسَرْ؞»‏

²² سَيْ سَرْكِے أَغِرِڢَّ يَثٜىٰ وَ ڢٜىٰسْتُسْ ‏«‏نِے مَا دَيْ ذَنْسُواْ إِنْسَوْرَرِ مُتُمِنَّنْ دَكَيْنَ؞»‏ ڢٜىٰسْتُسْ يَثٜىٰ ‏«‏ذَاكَ كُوَ جِيشِ غُواْبٜىٰ؞»‏

²³ تُواْ، وَشٜىٰغَرِ سَيْ أَغِرِڢَّ دَ بَنِسْ سُكَ شِغُواْ دَ دَرَجَ إِرِنْ تَسَرَاكُنَ، سُنْذُواْ تَرٜىٰدَ شُوغَبَنِّنْ يَاڧِ دَ كُمَ مَنْيَنْ غَرِنْ؞ سَيْ ڢٜىٰسْتُسْ يَبَادَ عُمَرْنِ أَ شِغُواْ دَ بُلُسْ؞

²⁴ سَيْ ڢٜىٰسْتُسْ يَثٜىٰ ‏«‏سَرْكِے أَغِرِڢَّ دَ دُكَنْ مُتَنٜىٰنْ دَسُكٜىٰ نَنْ تَرٜىٰدَمُو، غَا مُتُمِنْ دَ دُكْ جَمَعَرْ يَهُودَاوَا سُكَ كَٰوُاْ مِنِ ڧَارَرْسَ أَ عُرُوشَلِيمَ دَ كُمَ أَنَنْ، حَرْ سُنَ إِيهُ وَيْ بَيْكَمَتَ عَبَرْشِ دَ رَيْبَ؞

²⁵ عَمَّا نِے بَنْ غَا يَيِ وَنِ أَبِنْدَ يَ إِسَ عَكَشٜىٰشِيبَ؞ تُنْدَ كُمَ شِ دَكَنْسَ يَنٜىٰمَ عَكَيْ شَرِيعَرْسَ غَبَنْ مَيْغِرْمَ كَيْسَرْ، نَثٜىٰ تُواْ ذَنْعَيْكَ دَشِ وُرِنْسَ؞

²⁶ عَمَّا بَانِ دَ وَتَ تَبَّتَاثِّيَرْ مَغَنَرْ دَ ذَنْ رُبُوتَ وَمَيْغِرْمَ سَرْكِنْ رُواْمَ عَكَنْسَ؞ سَبُواْدَ حَكَ نَكَٰوُاْشِ غَبَنْكُ، مُسَمَّنْ غَبَنْكَ، سَرْكِے أَغِرِڢَّ، دُواْمِنْ بَايَنْدَ مُكَ بِنْثِكٜىٰشِ، كُواْ ذَنْسَامِ أَبِنْدَ ذَنْ رُبُوتَ؞

²⁷ دُوانْ نِے أَغَنِينَ، وَوَنْثِنٜىٰ أَعَيْكَ دَ طَنْ كُرْكُكُ، بَاتَرٜىٰدَ أَنُّونَ لَيْڢُواْڢِنْ دَ يَيِبَ؞»‏