أَيُّكَنْ مَنْذَنِّے 2 - أَتَّوْرَتْ دَ أَنَّبَاوَا

ذُوَانْ رُوحُ مَيْ ڟَرْكِے

¹ دَ رَانَرْ بِكٍ ڢٜىٰنْتِكُواسْ تَيِ، دُكْ مَاسُبِے سُنَ تَرٜىٰ أَوُرِے طَيَ؞

² بَا لَابَرِ سَيْ عَكَجِ وَتَ ڧَارَ دَغَ سَمَ كَمَرْ تَبَبَّرْ إِسْكَ، تَثِكَ دُكَنْ غِدَنْ دَسُكٜىٰ ظَوْنٜىٰ عَثِكِ؞

³ سَيْغَا وَطَنْسُ أَبُبُوَ كَمَرْ هَرْسُنَنْ وُتَا، سُكَ بَيَّنَ أَغَرٜىٰسُ، سُنَ رَرَّبُوَ، سُنَ سَسَّوْكَ عَكَنْ كُواْوَنٜىٰ طَيَنْسُ؞

⁴ سَيْ دُكْ عَكَ ثِكَسُ دَ رُوحُ مَيْ ڟَرْكِے، سُكَ كُمَ ڢَارَ مَغَنَ دَ وَطَنْسُ يَرٜىٰ دَبَمْ دَبَمْ، يَدَّ رُوحٌ يَيِ مُسُ بَيْوَرْ يِنْ مَغَنَ؞

⁵ تُواْ، أَݣَويْ وَطَنْسُ یَنْ أَدِّينِنْ يَهُودَاوَا وَطَنْدَ سُكٜىٰ ذَمَ أَ عُرُوشَلِيمَ سُنْ كُوَ ذُواْ نٜىٰ دَغَ كُواْوَثٜىٰ أَلْعُمَّ عَڧَرْڧَشِنْ سَمَ؞

⁶ دَ سُكَجِ ڧَارَرْ إِسْكَرْ طِنَّنْ، سَيْ تَارُوانْ مُتَنٜىٰ يَهَطُ؞ دُكَنْسُ سُكَيِ مَامَاكِ، دُوانْ كُواْوَنّٜىٰنْسُ يَجِ تَارُوانْ سُنَ مَغَنَ دَ يَرٜىٰنْ غَرِنْسُ؞

⁷ سُكَيِ مَامَاكِ سُواْسَيْ، سُنَ ثٜىٰوَ ‏«‏أَشٜىٰ، دُكْ مَاسُ مَغَنَرْ نَنْ بَ غَلِيلَاوَا بَنٜىٰ؟

⁸ يَيَ كُمَ كُواْوَنّٜىٰنْمُ يَنَ جِ سُنَ مَغَنَ دَ يَرٜىٰنْسَ؟»‏

⁹ غَا مُو كُوَ، ڢَرْتِيَاوَا دَ مٜىٰدِيَاوَا دَ عٜىٰلَمَاوَا دَ مُتَنٜىٰنْ مٜىٰسُواْڢُواْتَمِيَ دَ نَيَنْكِنْ يَهُودِيَ دَ نَ كَڢَدُواْكِيَ دَ نَ ڢَنْتُسْ دَ نَ أَسِيَ،

¹⁰ دَ نَ ڢِرِجِيَ دَ نَ ڢَمْڢِيلِيَ دَ نَ مَصَرْ دَ كُمَ نَكٜىٰوَيٜىٰنْ سَيِرِنْ تَڧَسَرْ لِبِيَ، حَرْ مَا دَ بَاڧِ دَغَ رُواْمَ؞ غَا مُو وَطَنْدَ عَكَ حَيْڢٜىٰمُ عَثِكِنْ أَدِّينِنْ يَهُودَاوَا دَ وَطَنْدَ سُكَ تُوبَ سُكَ شِغَ أَدِّينِنْمُ؞

¹¹ غَا مُو كُمَ كِرِتَاوَا دَ لَرَبَاوَا، دُكْ مُنَجِ سُنَ مَغَنَ دَ يَرٜىٰنْمُ عَكَنْ مَنْيَنْ أَبُبُوَنْ دَ اللَّهْ يَيِ؞

¹² دُكَ كُوَ سُكَيِ مَامَاكِ، سُكَ رُوطٜىٰ، سُنَثٜىٰ وَجُونَ ‏«‏مٜىٰنٜىٰنٜىٰ وَنَّنْ يَكٜىٰ نُڢِ؟»‏

¹³ عَمَّا وَطَنْسُ سُكَيِ مُسُ بَعَ سُكَثٜىٰ ‏«‏ضُوً إِنَبِے سُكَشَا سُكَ بُغُ؞»‏

جَوَابِنْدَ بِتْرُسْ يَيِ أَ رَانَرْ ڢٜىٰنْتِكُواسْ

¹⁴ سَيْ بِتْرُسْ يَتَاشِ ڟَيٜىٰ تَرٜىٰدَ شَا طَيَنَّنْ، يَطَغَ مُرْيَ يَيِ مُسُ جَوَابِے، يَثٜىٰ، كُو یَنْعُوَنَ يَهُودَاوَا دَ دُكَنْ مَاسُ ذَمَ أَ عُرُوشَلِيمَ، كُجِ، كُكُمَ كُلَ دَ أَبِنْدَ ذَنْ ڢَطَا مُكُ؞

¹⁵ مُتَنٜىٰنَّنْ بَسُ بُغُبَ كَمَرْ يَدَّ كُكٜىٰ ڟَمَّنِ، تُنْدَيَكٜىٰ يَنْذُ ڧَرْڢٜىٰ تَرَنٜىٰ كَوَيْ نَسَڢٜىٰ؞

¹⁶ وَنَّنْ، أَيْ، شِينٜىٰ أَبِنْدَ أَنَّبِے يُواْوٜىٰلْ يَڢَطَا ثٜىٰوَ

¹⁷ ‏«‏ ‏‹‏اللَّهْ يَثٜىٰ، ‏«‏عَݣُونَكِنْ ڧَرْشٜىٰ ذَنْ ظُبُواْوَ دُكَنْ یَنْ أَدَمْ رُوحُنَ؞ یَیَنْكُ مَظَا دَ مَاتَا ذَاسُيِ أَنَّبْثِ؞ سَمَارِنْكُ ذَاسُغَ رُعُيُواْيِ، ڟُواْڢَڢِّنْكُ كُمَ ذَاسُيِ مَڢَرْكَيْ؞

¹⁸ حَڧِيڧَ، حَرْ مَا عَݣُونَكِنْنَنْ ذَنْ ظُبُواْ رُوحُنَ عَكَنْ بَايِنَ مَظَا دَ مَاتَا، ذَاسُ كُمَيِ أَنَّبْثِ؞

¹⁹ ذَنْ نُونَ أَبُبُوَنْ بَنْ مَامَاكِ أَسَرَرِنْ سَمَ، دَ عَلَمُنْ بَنْ مَامَاكِ أَنَنْ ڧَسَا، وَتُواْ جِنِ دَ وُتَادَ كُمَ بَڧِنْ هَيَاڧِے؞

²⁰ ذَاعَ مَيْدَ رَانَ دُهُ، وَتَ كُمَ ذَيْ ذَمَ جَا كَمَرْ جِنِ، كَاڢِنْ رَانَرْ عُبَنْ‌غِجِ تَذُواْ، بَبَّرْ رَانَرْ نَنْ مَيْ طَوْكَكَ؞

²¹ أَ لُواْكَثِنَّنْ نٜىٰ دُكْ وَنْدَ يَكِرَا غَ سُونَنْ عُبَنْ‌غِجِ ذَيْسَامِ ثٜىٰتُواْ؞»‏ ›‏ »‏

²² يَا كُو یَنْعُوَنَ إِسْرَٰٓءِيلَاوَا، كُجِ وَنَّنْ مَغَنَ؞ عِيسَىٰ بَنَظَرٜىٰتْ مُتُمْ نٜىٰ دَ اللَّهْ يَتَبَّتَرْ مُكُ ثٜىٰوَ يَيَرْدَ دَشِ؞ اللَّهْ يَنُونَ وَنَّنْ تَوُرِنْ أَيُّكَنْ بَنْ مَامَاكِ دَ أَبُبُوَنْ بَنْ مَامَاكِ دَ عَلَمُ وَطَنْدَ يَيِ تَوُرِنْ عِيسَىٰ عَثِكِنْكُ، كَمَرْ يَدَّ كُو مَا كُكَ سَنِ دَ كَنْكُ دُوانْ دُكْ سُنْ ڢَرُ أَعِدُوانْكُ؞

²³ شِ مُتُمِنَّنْ، أَنْبَادَشِ غَرٜىٰكُ بِسَغَ يَدَّ اللَّهْ يَڧَدَّرَ كُمَ دَ يَدَّ يَرِغَا يَسَنِ، كُكَ كُوَ غِثِّيٜىٰشِ، كُكَ كَشٜىٰشِ تَهَنُّنْ مَاسُ ذُنُوبِ؞

²⁴ عَمَّا اللَّهْ يَڢَنْشٜىٰشِ دَغَ إِيكُوانْ مُتُوَ، يَتَاشٜىٰشِ دَغَ مَتَتُّو دَيَكٜىٰ بَايَ يِوُوَ مُتُوَ تَرِڧٜىٰشِ؞

²⁵ غَمَا دَاوُدَ يَيِ مَغَنَ غَمٜىٰدَشِ يَثٜىٰ، ‏«‏ ‏‹‏كُلُّمْ إِنَ غَنِنْ عُبَنْ‌غِجِ، يَنَ أَ حَنُّنْ دَامَنَ، دُواْمِنْ كَدَ إِنْجِجِّغُ؞

²⁶ سَبُواْدَ حَكَ ذُوثِيَاتَ تَنَ مُرْنَ، هَرْشٜىٰنَ يَنَ رٜىٰرَ وَاڧَرْ ڢَضٍ ثِكِ، جِكِينَ ذَيْ ذَوْنَ دَ سَا رَيْ؞

²⁷ غَمَا بَذَيْ بَرْ رَيْنَ عَكَبَرِبَ، كُواْ يَبَرْ مَيْ ڟَرْكِنْسَ يَضُٻَبَ؞

²⁸ كَنَ كُواْيَ مِنِ حَنْيَرْ دَ ذَاتَ كَيْ غَ رَيْ؞ ذَاكَ ثِكَ نِے دَ ڢَضٍ ثِكِ تَوُرِنْ كَسَنْثٜىٰوَرْكَ تَرٜىٰدَنِ؞›‏ »‏

²⁹ یَنْعُوَنَ إِسْرَٰٓءِيلَاوَا، ذَنْعِيَيِ مُكُ مَغَنَ بَابُ شَكَّ غَمٜىٰدَ كَكَنْمُ دَاوُدَ؞ دَاوُدَ يَمُتُ، أَنْبِنّٜىٰشِ، كَبَرِنْسَ كُمَ يأَنَانً تَرٜىٰدَمُو هَرْوَيَوْ؞

³⁰ شِ أَنَّبِے نٜىٰ، كُمَ يَسَنْ اللَّهْ يَيِ مَسَ أَلْڧَوَرِ تَرٜىٰدَ ضَنْڟُوَا، ثٜىٰوَ ذَيْ نَطَ وَنِ دَغَ ثِكِنْ ذُرِيَرْسَ سَرْكِے، كَمَرْ يَدَّ يَنَطَ شِ دَاوُدَ؞

³¹ تُنْدَيَكٜىٰ دَاوُدَ يَهَنْ‌غُواْ حَكَ، يَكُمَيِ مَغَنَ عَكَنْ تَاشِنْ أَلْمَسِيحُ دَغَ مَتَتُّو ثٜىٰوَ بَذَاعَبَرْ شِ عَكَبَرِبَ، جِكِنْسَ كُمَ بَذَيْ ضُٻَبَ؞

³² اللَّهْ يَتَادَ عِيسَىٰ نَّنْ دَغَ مَتَتُّو، مُو كُوَ دُكْ شَيْدُنٜىٰ غَ وَنَّنْ؞

³³ دَيَكٜىٰ أَنْطَوْكَكَاشِ غَ حَنُّنْ دَامَ نَ اللَّهْ، يَكُمَ كَرْٻِ رُوحُ مَيْ ڟَرْكِے دَغَ وُرِنْ عُبَا، يَدَّ عَكَيِ أَلْڧَوَرِ، سَيْ يَظُبُواْ رُوحٌ عَكَنْمُ؞ شِينٜىٰ يَكَٰوُاْ أَبِنْدَ كُكٜىٰ غَنِ، كُكٜىٰ كُمَجِ؞

³⁴ أَيْ، بَ دَاوُدَ نٜىٰ يَهَوْ سَمَبَ، عَمَّا شِ دَكَنْسَ يَثٜىٰ، ‏«‏ ‏‹‏عُبَنْ‌غِجِ يَثٜىٰ وَ عُبَنْ‌غِجِنَ، ذَوْنَ أَ حَنُّنْ دَامَنَ،

³⁵ سَيْ نَسَا أَبُواْكَنْ غَابَنْكَ عَڧَرْڧَشِنْ ڧَڢَاڢُنْكَ؞›‏ »‏

³⁶ ‏«‏سَبُواْدَ حَكَ، سَيْ دُكْ جَمَعَرْ إِسْرَٰٓءِيلَ ڢَا سُسَنِ ثٜىٰوَ عِيسَىٰ نَّنْ دَ كُكَ غِثِّيٜىٰ، اللَّهْ يَمَيْدَشِ عُبَنْ‌غِجِ دَ كُمَ أَلْمَسِيحُ؞»‏

³⁷ تُواْ دَ سُكَجِ حَكَ، كَلْمَرْ تَا سُواْكِ ذُوثِيَارْسُ، سُكَثٜىٰ وَ بِتْرُسْ دَ سَوْرَنْ مَنْذَنِّےنْ ‏«‏یَنْعُوَ، مٜىٰنٜىٰنٜىٰ ذَامُيِ؟»‏

³⁸ سَيْ بِتْرُسْ يَثٜىٰ مُسُ ‏«‏سَيْ كُتُوبَ، عَيِ وَكُواْوَنّٜىٰنْكُ بَڢْتِسْمَ ثِكِنْ سُونَنْ عِيسَىٰ أَلْمَسِيحُ دُوانْ أَغَاڢَرْتَا مُكُ ذُنُبَنْكُ؞ ذَاكُ كُوَ سَامِ ݣَوْتَرْ رُوحُ مَيْ ڟَرْكِے؞

³⁹ غَمَا وَنَّنْ أَلْڧَوَرِنْ اللَّهْ دُواْمِنْكُ نٜىٰ تَرٜىٰدَ یَیَنْكُ دَ كُمَ دُكَنْ وَطَنْدَ سُكٜىٰ نٜىٰسَ، وَتُواْ دُكَنْ وَطَنْدَ عُبَنْ‌غِجِ اللَّهْ نْمُ يَكِرَا ذُوَا وُرِنْسَ؞»‏

⁴⁰ سَيْ يَيِ تَتَبَّتَرْ مُسُ دَ مَغَنْ‌غَنُ مَاسُيَوَ، يَنَ تَيِ مُسُ غَرْغَطِے يَنَ ثٜىٰوَ ‏«‏كُثٜىٰثٜىٰ كَنْكُ دَغَ مُوغُوَرْ ڟَارَرْ نَنْ مَاسُ رَايُوَرْ ݣُونَ ݣُونَ؞»‏

⁴¹ وَطَنْدَ سُكَ يَرْدَ دَ مَغَنَرْ بِتْرُسْ كُوَ عَكَيِ مُسُ بَڢْتِسْمَ؞ أَ رَانَرْ نَنْ كُمَ سُكَ ڧَارُ دَ وَجٜىٰنْ مُتُمْ دُبُو عُكُ؞

⁴² سَيْ سُكَ مِيڧَ كَنْسُ دُكَ غَ كُواْيَرْوَرْ دَ مَنْذَنِّے سُكٜىٰيِ، سُنَ زُمُنْثِ، سُنَ ثِنْ عَبِنْثِ تَرٜىٰ، سُكٜىٰ كُمَيِنْ أَدُّعَ؞

يَدَّ ذَمَنْ مَاسُبِے يَكَسَنْثٜىٰ

⁴³ سَيْ ڟُواْرُواْ يَكَامَ كُواْوَ، دُوانْ اللَّهْ يَنَ يِنْ أَيُّكَنْ بَنْ مَامَاكِ دَ عَلَمُ دَيَوَ تَوُرِنْ مَنْذَنِّےنْ؞

⁴⁴ دُكَنْ وَطَنْدَ سُكَ بَادَ غَسْكِيَ سُنْ كَسَنْثٜىٰ تَرٜىٰ ثِكِنْ زُمُنْثِ، سُنَ أَمْڢَانِ دَكُواْمٜىٰ نَاسُ تَرٜىٰ غَبَاطَيَ؞

⁴⁵ سُكَ سَيَرْ دَ أَبِنْدَ سُكٜىٰ دَشِ، سُكَ رَرَّبَ وَ كُواْوَ كُطِنْ بِسَغَ بُڧَاتَرْسَ؞

⁴⁶ كُواْوَثٜىٰ رَانَ كُمَ سُنَ ذُوَا هَيْكَلِ دَ نُڢِ طَيَ؞ سُنَ ثِنْ عَبِنْثِ تَرٜىٰ أَغِدَاجٜىٰنْسُ، سُنَثِ سُنَشَا دَ ڢَضٍ ثِكِ دَ يَرْدَرْ رَيْ،

⁴⁷ تَرٜىٰدَ يَبُوانْ اللَّهْ؞ سُنَ كُمَ دَ ڢَضٍ جِنِ أَوُرِنْ مُتَنٜىٰ دُكَ؞ كُواْوَثٜىٰ رَانَ كُمَ عُبَنْ‌غِجِ يَنَ ڧَارَ مُسُ وَطَنْدَ عَكٜىٰ ثٜىٰتُوانْسُ؞