أَيُّكَنْ مَنْذَنِّے 18 - أَتَّوْرَتْ دَ أَنَّبَاوَا

بُلُسْ أَ كُواْرِنْتِ

¹ بَايَنْ حَكَ بُلُسْ يَبَرْ أَتِنَ يَتَڢِے كُواْرِنْتِ؞

² عَثَنْ يَتَرَرْ دَ وَنِ بَيَهُودٜىٰ مَيْ سُونَ عَكِيلَ، طَنْ غَرِنْ ڢُوانْتُسْ؞ عَكِيلَ دَ مَاتَرْسَ بِرِسْكِلَ بَسُ دَطٜىٰ دَ ذُوَا دَغَ ڧَسَرْ إِتَالِيَ بَ، دُوانْ كَلَوْدِيُسْ يَيِ دُواْكَا ثٜىٰوَ دُكَنْ يَهُودَاوَا سُبَرْ رُواْمَ؞ سَيْ بُلُسْ يَجٜىٰ وُرِنْسُ؞

³ دَيَكٜىٰ سَنَعَرْسُ إِرِ طَيَثٜىٰ دَ تَاسَ، وَتُواْ، تَطِنْكِنْ تٜىٰنْتِ، سَيْ يَيِ ذَمَ تَرٜىٰدَسُو؞ سُكَيِ تَ عَيْكِ تَرٜىٰ؞

⁴ كُواْوَثٜىٰ رَانَرْ هُوتُ تَمَكُواْ كُوَ بُلُسْ يَدِنْ‌غَ مُهَوَرَ أَ مَجَمِعَ، يَنَ ڧُواْڧَرِ يَرِنْجَيٜىٰ يَهُودَاوَا دَ وَطَنْدَ بَا يَهُودَاوَا بَ؞

⁵ سَعَدَّ سِيلَ دَ تِمُواْتِ سُكَذُواْ دَغَ مَكِدُواْنِيَ، بُلُسْ يَبَادَ دُكَنْ لُواْكَثِنْسَ عَكَنْ يِنْ وَعَظِ، يَنَ تَبَّتَرْ وَ يَهُودَاوَا ثٜىٰوَ عِيسَىٰ شِينٜىٰ أَلْمَسِيحُ؞

⁶ عَمَّا سُكَيِ مَسَ مُسُو، سُنَ ذَاغِنْسَ؞ دُواْمِنْ حَكَ سَيْ يَكَكَّٻٜىٰ تُڢَاڢِنْسَ يَثٜىٰ مُسُ ‏«‏أَلْحَكِنْ جِنِنْكُ أَوُيَنْكُ!‏ نِے دَيْ بَانِدَ لَيْڢِے؞ دَغَ يَوْ وُرِنْ وَطَنْدَ بَا يَهُودَاوَا بَ ذَانِ؞»‏

⁷ سَيْ يَتَاشِ دَغَ وُرِنْ يَتَڢِے غِدَنْ وَنِ مُتُمْ مَيْ سُونَ تِتِيُسْ يُسْتُسْ، مَيْ بَوْتَرْ اللَّهْ، غِدَنْسَ كُوَ يَنَ كُسَدَ مَجَمِعَ سُواْسَيْ؞

⁸ سَيْ كِرِسْبُسْ، شُوغَبَنْ مَجَمِعَ يَبَادَ غَسْكِيَ غَ عُبَنْ‌غِجِ، شِے دَ مُتَنٜىٰنْ غِدَنْسَ دُكَ؞ وَطَنْسُ كُواْرِنْتِيَاوَا كُمَ دَيَوَ دَ سُكَجِ مَغَنَرْ بُلُسْ، سُكَ بَادَ غَسْكِيَ، عَكَ كُوَ يِمُسُ بَڢْتِسْمَ؞

⁹ وَتَرَانَ دَ دَرٜىٰ، عُبَنْ‌غِجِ يَنُونَاوَ بُلُسْ رُعُيَ، يَثٜىٰمَسَ ‏«‏كَدَ كَجِڟُواْرُواْ؞ كَيِتَيِنْ وَعَظِ، كَدَ كَيِ شِضُ،

¹⁰ غَمَا إِنَ تَرٜىٰدَكَيْ؞ بَاوَنْدَ ذَيْسَا حَنُّ يَيِ مَكَ وَنِ أَبُ، دُوانْ إِنَدَ مُتَنٜىٰ دَيَوَ أَوَنَّنْ بِرْنِ؞»‏

¹¹ بُلُسْ يَذَوْنَ أَوُرِنْ حَرْ شٜىٰكَرَا طَيَ دَ وَتَا شِدَ، يَنَ تَكُواْيَرْ مُسُ كَلْمَرْ اللَّهْ؞

¹² عَمَّا لُواْكَثِنْ دَ غَلِيُواْ يَكٜىٰ مُلْكٍ ڧَسَرْ عَكَيَ، يَهُودَاوَا سُكَ حَطَكَيْ سُكَ تَاسَرْوَ بُلُسْ، سُكَ كَيْشِ غَبَنْ مَاسُ شَرِيعَ؞

¹³ سُكَثٜىٰ ‏«‏وَنَّنْ مُتُمْ يَنَ ڧُواْڧَرِ يَسَا مُتَنٜىٰ سُبَوْتَاوَ اللَّهْ تَهَنْيَرْ دَ كُواْيَرْوَا تَحَنَ؞»‏

¹⁴ بُلُسْ يَنَ شِرِنْ يَيِ مَغَنَ كٜىٰنَنْ، سَيْ غَلِيُواْ يَثٜىٰ وَ يَهُودَاوَا ‏«‏دَمَا وَنِ لَيْڢِے يَيِ، كُواْ مُوغُنْ لَيْڢِے دَ سَيْ إِنْجِيكُ؞

¹⁵ عَمَّا تُنْدَيَكٜىٰ غَرْدَمَ ثٜىٰ كَوَيْ عَكَنْ كَلْمُواْمِ دَ سُونَيٜىٰ دَ كُمَ كُواْيَرْوَرْكُ، أَيْ، سَيْ كُجِ دَشِ دَكَنْكُ؞ نِے كَمْ، بَنْيِ نِيَّرْ يِنْ شَرِيعَ كَنْ إِرِنْ وَطَنَّنْ أَبُبُوَبَ؞»‏

¹⁶ سَيْ يَكُواْرٜىٰسُ دَغَ طَاكِنْ شَرِيعَرْ؞

¹⁷ سَيْ دُكَنْسُ سُكَ كَامَ سَسْتَنِسْ شُوغَبَنْ مَجَمِعَرْ، سُكَيِمَسَ دُوكَ أَغَبَنْ طَاكِنْ شَرِيعَ؞ عَمَّا غَلِيُواْ بَيْ كُواْ كُلَبَ؞

بُلُسْ يَكُواْمَ أَنْتَكِيَ تَ سُورِيَ

¹⁸ بَايَنْ وَنَّنْ سَيْ بُلُسْ يَڧَارَ یَنْ ݣُونَكِے أَ كُواْرِنْتِ؞ سَعَنً يَيِ وَمَاسُبِے بَنْ ݣُونَ؞ يَشِغَ جِضْغٍ ضُوَ تَرٜىٰدَ بِرِسْكِلَ دَ عَكِيلَ سُكَ كَامَ حَنْيَ ذُوَا سُورِيَ؞ عَمَّا كَاڢِنْ سُتَاشِ بُلُسْ يَ أَسْكٜىٰ كَنْسَ أَ كَنْكِرِيَ غَمَا يَا طَوْكِ وَتَ ضَنْڟُوَا؞

¹⁹ دَ سُكَ كَيْ أَڢِسَ، عَثَنْ نٜىٰ بُلُسْ يَبَرْ بِرِسْكِلَ دَ عَكِيلَ، شِيكُوَ يَشِغَ مَجَمِعَ يَيِ مُهَوَرَ دَ يَهُودَاوَا؞

²⁰ سَيْ سُكَ ضُواْڧٜىٰشِ يَطَنْ ڧَارَ ذَمَ أَوُرِنْسُ، عَمَّا بَيْ يَرْدَبَ؞

²¹ عَمَّا دَ ذَيْبَرْسُ، يَثٜىٰ ‏«‏ذَنْ دَاوُاْ وُرِنْكُ عِدَنْ اللَّهْ يَيَرْدَ؞»‏ سَعَنً يَتَاشِ دَغَ أَڢِسَ أَجِضْغٍ ضُوَ؞

²² دَ يَسَوْكَ أَ كَيْسَرِيَ، سَيْ يَهَوْرَ يَغَيْ دَ جَمَعَرْ مَاسُبِے، سَعَنً يَتَڢِے أَنْتَكِيَ؞

²³ بَايَنْ يَطَنْ دَطٜىٰ كَطَنْ أَوُرِنْ، سَيْ يَتَاشِ يَظَظْذَاغَ ڧَسَرْ غَلَتِيَ دَ ڧَسَرْ ڢِرِجِيَ، يَنَ بِنْ غَرِ غَرِ، يَنَ ڧَرْڢَڢَ دُكَنْ مَاسُبِے؞

أَڢُواْلُّواسْ يَيِ وَعَظِ أَعَڢِسَ

²⁴ أَنَانً سَيْ وَنِ بَيَهُودٜىٰ مَيْ سُونَ أَڢُواْلُّواسْ يَذُواْ أَڢِسَ؞ شِے كُوَ طَنْ غَرِنْ إِسْكَنْدَارِيَا نٜىٰ، مَيْ عِيَ مَغَنَ، يَكُمَ سَنْ رُبُوتَثِّيَرْ مَغَنَرْ اللَّهْ سُواْسَيْ سُواْسَيْ؞

²⁵ أَنْكُواْيَرْ دَشِ ثِكِنْ حَنْيَرْ عُبَنْ‌غِجِ؞ يَكَنْ نُونَ ڨُوذُواْ سُواْسَيْ ثِكِنْ مَغَنَ، يَنَ كُمَ كُواْيَرْ دَ عَيْنِحِنْ غَسْكِيَ غَمٜىٰدَ عِيسَىٰ؞ عَمَّا ڢَا بَڢْتِسْمَرْ يَحْيَى كَطَيْ نٜىٰ يَسَنِ؞

²⁶ سَيْ يَڢَارَ وَعَظِ بَابُ ڟُواْرُواْ أَ مَجَمِعَ؞ دَ بِرِسْكِلَ دَ عَكِيلَ سُكَجِ مَغَنَرْسَ، سَيْ سُكَ طَوْكٜىٰشِ سُكَڧَارَ بَيَّنَ مَسَ حَنْيَرْ اللَّهْ سُواْسَيْ سُواْسَيْ؞

²⁷ دَ أَڢُواْلُّواسْ يَسُواْ يَڧٜىٰتَرٜىٰ ذُوَا ڧَسَرْ عَكَيَ، مَاسُبِے سُكَ تَيْمَكٜىٰشِ؞ سُكَ رُبُوتَ وَمَاسُبِے نَ عَكَيَ وَسِيڧَ دُواْمِنْ سُكَرْٻٜىٰشِ حَنُّ بِيُ بِيُ؞ دَ يَكَيْ ثَنْ كُوَ يَذَمَ دَ تَيْمَكُواْ سُواْسَيْ غَ وَطَنْدَ سُكَ بَادَ غَسْكِيَ تَوُرِنْ أَلْحٜىٰرِنْ اللَّهْ،

²⁸ غَمَا يَيِ نَصَرَا ثِكِنْ مَغَنَ دَ يَهُودَاوَا ڨُورَيْ أَغَبَنْ جَمَعَ، يَنَ تَبَّتَرْ مُسُ دَغَ ثِكِنْ رُبُوتَثِّيَرْ مَغَنَرْ اللَّهْ ثٜىٰوَ عِيسَىٰ شِينٜىٰ أَلْمَسِيحُ؞