أَيُّكَنْ مَنْذَنِّے 17 - أَتَّوْرَتْ دَ أَنَّبَاوَا

أَنْ يِتَاشِنْ حَنْكَلِ أَ تَسَلُواْنِكَ

¹ تُواْ دَ بُلُسْ دَ سِيلَ سُكَبِے تَ أَمْڢِبُواْلِسْ دَ أَڢُواْلُّواْنِيَ، سُكَ كَيْ تَسَلُواْنِكَ، عِنْدَ أَݣَويْ مَجَمِعَرْ يَهُودَاوَا؞

² سَيْ بُلُسْ يَشِغَ وُرِنْسُ كَمَرْ يَدَّ يَسَابَا، رَانَرْ هُوتُ تَمَكُواْ غُدَا عُكُ أَ جٜىٰرٜىٰ يَنَ مُهَوَرَ دَسُو دَغَ ثِكِنْ رُبُوتَثِّيَرْ مَغَنَرْ اللَّهْ؞

³ يَنَيِ مُسُ بَيَانِ، يَنَ كُمَ تَبَّتَرْ مُسُ ثٜىٰوَ دُواْلٜىٰنٜىٰ أَلْمَسِيحُ يَشَا وَهَلَ، يَكُمَ تَاشِ دَغَ مَتَتُّو؞ بُلُسْ يَكُمَ ثٜىٰ ‏«‏عِيسَىٰ نَّنْ دَ نَكٜىٰ سَنَرْ مُكُ، شِينٜىٰ أَلْمَسِيحُ؞»‏

⁴ سَيْ وَطَنْسُ مُتَنٜىٰنْ يَهُودَاوَا دَ كُمَ هٜىٰلٜىٰنَاوَا مَاسُ بَوْتَرْ اللَّهْ حَطٜىٰ دَ مَنْيَنْ مَاتَا مَاسُيَوَ سُواْسَيْ، دُكْ سُكَ يَرْدَ دَ مَغَنَرْ بُلُسْ دَ سِيلَ، سُكَ كُمَ حَطَكَيْ دَسُو؞

⁵ عَمَّا يَهُودَاوَا سُكَيِ كِيشِ، سَيْ سُكَ تَارَ وَطَنْسُ یَنْ إِسْكَ عَكَاسُوَ؞ دَ دُكَنْسُ سُكَ تَارُ سَيْ سُكَتَادَ حَنْكَلِنْ مُتَنٜىٰنْ غَرِنْ؞ سُكَ رُوغَ ثِكِنْ غِدَنْ يَسُوانْ سُنَ نٜىٰمَنْ بُلُسْ دَ سِيلَ دُواْمِنْ سُكَٰوُاْسُ غَبَنْ جَمَعَ؞

⁶ دَبَسُ سَامٜىٰسُبَ، سَيْ سُكَ جَٰوُاْ يَسُوانْ دَ وَطَنْسُ مَاسُبِے، سُكَ كَيْسُ حَرْ غَبَنْ مَاسُ شَرِيعَ، سُنَ إِيهُ سُنَ ثٜىٰوَ ‏«‏مُتَنٜىٰنَّنْ دَسُكٜىٰ تَادَ حَنْكَلِ عَكُواْعِنَ عَدُونِيَا، غَاسُ سُنْذُواْ حَرْ نَنْ مَا؞

⁷ حَرْ مَا يَسُوانْ يَبَاسُ مَسَوْكِ؞ دُكَنْسُ كُوَ سُنَ كَرْيَ دُواْكُواْكِنْ كَيْسَرْ، سُنَ ثٜىٰوَ أَݣَويْ وَنِ سَرْكِے، وَيْ سُونَنْسَ عِيسَىٰ؞»‏

⁸ دَ مُتَنٜىٰنْ غَرِنْ دَ شُوغَبَنِّنْ غَرِ سُكَجِ وَنَّنْ، سَيْ حَنْكَلِنْسُ يَتَاشِ؞

⁹ بَسُسَكِ يَسُوانْ دَ سَوْرَنْسُبَ، سَيْ دَ سُكَ كَرْٻِ كُطِنْ بٜىٰلِ أَ حَنُّنْسُ؞

بُلُسْ دَ سِيلَ عَبِرِيَ

¹⁰ دَ دَرٜىٰ يَيِ، مَاسُبِے سُكَ سَلَّمِ بُلُسْ دَ سِيلَ سُتَڢِے بِرِيَ؞ دَ سُكَ كَيْ ثَنْ، سُكَ شِغَ مَجَمِعَرْ يَهُودَاوَا؞

¹¹ تُواْ، وَطَنَّنْ يَهُودَاوَا سُنْڢِے نَ تَسَلُواْنِكَ حَنْكَلِ، دُواْمِنْ سُنْ كَرْٻِ مَغَنَرْ حَنُّ بِيُ بِيُ؞ سُنَ تَبِنْثِكٜىٰنْ رُبُوتَثِّيَرْ مَغَنَرْ اللَّهْ كُلُّمْ، سُغَنِ كُواْ أَبِنْدَ بُلُسْ يَڢَطِ غَسْكِيَ نٜىٰ؞

¹² سَبُواْدَ حَكَ دَيَوَ دَغَ ثِكِنْ يَهُودَاوَا سُكَ بَادَ غَسْكِيَ، حَرْ دَ وَطَنْسُ مَاتَانْ هٜىٰلٜىٰنَاوَا مَاسُ مَڟَيِ دَ كُمَ مَظَا نَ هٜىٰلٜىٰنَاوَا دَيَوَ؞

¹³ عَمَّا دَ يَهُودَاوَنْ دَسُكٜىٰ أَ تَسَلُواْنِكَ سُكَجِ ثٜىٰوَ بُلُسْ يَنَ يِنْ شٜىٰلَرْ كَلْمَرْ اللَّهْ عَبِرِيَ مَا، سُكَجٜىٰ سُكَ ذُغَ جَمَعَ عَثَنْ سُنَ تَادَ حَنْكَلِنْسُ؞

¹⁴ نَنْ دَ نَنْ كُوَ مَاسُبِے سُكَسَا بُلُسْ يَتَڢِے بَاكِنْ تٜىٰكُ، عَمَّا سِيلَ دَ تِمُواْتِ سُكَ ڟَيَ تُكُنَ أَنَنْ؞

¹⁵ وَطَنْدَ سُكَيِ وَ بُلُسْ رَكِيَ كُوَ سُكَ كَيْ شِ حَرْ أَتِنَ؞ دَ ذَاسُ دَاوُاْ سَيْ بُلُسْ يَبَاسُ سَڧُواْ ذُوَا وُرِنْ سِيلَ دَ تِمُواْتِ ثٜىٰوَ سُذُواْ سُسَامٜىٰشِ دَسَوْرِ، سَيْ سُكَ تَڢِے؞

بُلُسْ أَعَتِنَ

¹⁶ تُواْ، سَعَدَّ بُلُسْ يَكٜىٰ جِضَانْ سِيلَ دَ تِمُواْتِ أَعَتِنَ، يَيِ بَڧِنْ ثِكِ ڨُورَيْ دَ يَغَ غَرِنْ يَثِكَ دَ غُمَكَ؞

¹⁷ دُواْمِنْ حَكَ يَكَنْيِ مُهَوَرَ عَثِكِنْ مَجَمِعَ دَ يَهُودَاوَا دَ وَطَنْسُ هٜىٰلٜىٰنَاوَا مَاسُيِ وَ اللَّهْ سُجَّدَ؞ كُواْوَثٜىٰ رَانَ كُوَ يَكَنْيِ مُهَوَرَ دَ وَطَنْدَ يَكٜىٰ سَامُوَ عَكَاسُوَ؞

¹⁸ حَكَكُمَ وَطَنْسُ أَبِكُرِيَوَ دَ سِتُواْكِيَاوَا مَاسُ عِلِمِ سُكَيِ مُهَوَرَ دَشِ؞ وَطَنْسُنْسُ سُكَثٜىٰ ‏«‏مٜىٰنٜىٰنٜىٰ وَنَّنْ مَيْ سُورُوتُ يَكٜىٰسُواْ يَثٜىٰ؟»‏ وَطَنْسُ سُكَثٜىٰ ‏«‏كَمَرْ مَيْيِنْ وَعَظِنْ وَطَنْسُ أَلُّواْلِ نٜىٰ دَبَ نَنَنْبَ؞»‏ سُنْ ڢَطِ حَكَ غَمَا بُلُسْ يَنَ يِنْ وَعَظِ عَكَنْ عِيسَىٰ دَ كُمَ تَاشِنْسَ دَغَ مَتَتُّو؞

¹⁹ سَبُواْدَ حَكَ سُكَ كَيْ شِ تُدُنْ أَرَسَ، عِنْدَ مَجَلِسَرْسُ تَكٜىٰ تَارُوَ، سُكَثٜىٰ مَسَ ‏«‏كُواْ ذَاكَ بَيَّنَ مَنَ وَنَّنْ سَابُوَرْ كُواْيَرْوَرْ دَ كَكٜىٰيِ؟

²⁰ دُوانْ بَمُ تَٻَجِنْ إِرِنْ وَطَنَّنْ مَغَنْ‌غَنُبَ؞ مُنَسُواْ مُسَنْ أَبِنْدَ سُكٜىٰ نُڢِ؞»‏

²¹ دُكْ أَتِنَاوَا دَ بَڧِنْ دَسُكٜىٰ ذَمَ أَعَتِنَ كُوَ سُنْڢِيسُواْ سُجِ سَابُوانْ أَبُ سُكُمَيِ مَغَنَ عَكَيْ، ڢِيٜىٰدَ كُواْمٜىٰ؞

²² سَيْ بُلُسْ يَتَاشِ ڟَيٜىٰ أَغَبَنْ مَجَلِسَرْ، يَثٜىٰ ‏«‏كُو مُتَنٜىٰنْ أَتِنَ، نَلُورَ ثٜىٰوَ كُو مَاسُسُوانْ بِنْ أَدِّينِ نٜىٰ سُواْسَيْ تَكُواْوَنٜىٰ غٜىٰڢٜىٰ؞

²³ لُواْكَثِنْ دَ نَكٜىٰ ذَاغَاوَ ثِكِنْ غَرِنْ، نَدُوبَ أَبُبُوَنْ دَ كُكٜىٰيِوَ سُجَّدَ، نَاكُوَ غَا وَنِ بَغَدٜىٰنْ هَدَايَ دَ رُبُوتُو عَكَنْسَ مَيْ ثٜىٰوَ ‏‹‏دُواْمِنْ اللَّهْ وَنْدَ بَعَسَنِبَ؞›‏ تُواْ، شِے وَنَّنْ دَ كُكٜىٰيِوَ سُجَّدَ دَبَكُ سَنْشِيبَ، شِينٜىٰ نَكٜىٰ سَنَرْ مُكُ؞

²⁴ اللَّهْ نَّنْ دَ يَحَلِثِّ دُونِيَا دَ دُكَنْ أَبِنْدَ يَكٜىٰ ثِكِنْتَ، شِينٜىٰ عُبَنْ‌غِجِنْ سَمَ دَ ڧَسَا، بَايَ كُمَ ذَمَ أَ هَيْكَلِنْ دَ مُتُمْ يَغِنَ؞

²⁵ حَكَكُمَ بَايَ نٜىٰمَنْ تَيْمَكُواْ دَغَ وُرِنْ مُتُمْ، بَايَ بُڧَاتَرْ وَنِ أَبُ، تُنْدَيَكٜىٰ شِينٜىٰ يَكٜىٰبَا دُكَنْ مُتَنٜىٰ رَيْ دَ نُمْڢَشِ دَ دُكَنْ أَبُبُوَنْ دَسُكٜىٰ بُڧَاتَ؞

²⁶ شِينٜىٰ كُمَ يَحَلِثِّ دُكَنْ أَلْعُمَّ دَغَ مُتُمْ غُدَا، دُواْمِنْ سُذَوْنَ أَدُكَنْ ڢُسْكَرْ دُونِيَا؞ يَشِرْيَ إِيَاكَرْ لُواْكَثِنْسُ دَ كُمَ وُرَارٜىٰنْ دَ كُواْوَثٜىٰ أَلْعُمَّ ذَاتَ كَسَنْثٜىٰ؞

²⁷ اللَّهْ يَيِ حَكَ دُواْمِنْ سُنٜىٰمٜىٰشِ، كُواْ وَتَڧِيلَ ذَاسُ لَلُبَ سُسَامٜىٰشِ، كُواْدَيَكٜىٰ بَيْيِنٜىٰسَ دَ كُواْوَنّٜىٰنْمُبَ؞

²⁸ أَيْ، ‏«‏ ‏‹‏تَغَرٜىٰشِينٜىٰ مُكٜىٰ رَايُوَا، مُكٜىٰ مُواْڟِ، مُكَ كُمَ كَسَنْثٜىٰ؞›‏ ‏«‏يَدَّ وَطَنْسُ مَوَاڧَنْكُ مَا سُكَ ڢَطَا ثٜىٰوَ ‏‹‏حَڧِيڧَ، مُو مَا ذُرِيَرْسَثٜىٰ؞›‏

²⁹ ‏«‏تُواْ دَيَكٜىٰ مُو ذُرِيَرْ اللَّهْ نٜىٰ، أَيْ، بَيْ كَمَاتَ مُيِ ڟَمَّنِ اللَّهْ يَنَ كَمَ دَ وَتَ صِڢَّرْ ظِينَارِيَ، كُواْ تَأَظُرْڢَا، كُواْ تَدُوڟٜىٰبَ، وَدَّ مُتُمْ يَڧٜىٰرَ دَ دَبَرَرْسَ؞

³⁰ أَ دَا كَمْ، اللَّهْ يَكَوَرْدَ ڢُسْكَ دَغَ أَيُّكَنْ جَاهِلْثِ؞ عَمَّا يَنْذُ يَعُمَرْثِ دُكَنْ مُتَنٜىٰ عَكُواْعِنَ سُتُوبَ،

³¹ غَمَا يَا شِرْيَ رَانَرْ دَ ذَيْذُواْ يَيِ وَدُونِيَا شَرِيعَ تَغَسْكِيَ تَوُرِنْ مُتُمِنْدَ يَذَاٻَا؞ اللَّهْ يَبَادَ تَبَّثِنْ وَنَّنْ غَ دُكَنْ مُتَنٜىٰ تَوُرِنْ تَادَ مُتُمِنَّنْ دَغَ مَتَتُّو؞»‏

³² دَسُكَجِ مَغَنَرْ تَاشِ دَغَ مَتَتُّو، سَيْ وَطَنْسُ سُكَيِ مَسَ بَعَ، عَمَّا وَطَنْسُ سُكَثٜىٰ ‏«‏مُنَسُواْ مُسَاكٜىٰجِنْ أَبِنْدَ ذَاكَڢَطَا غَمٜىٰدَ وَنَّنْ مَغَنَ؞»‏

³³ أَ نَنْ نٜىٰ بُلُسْ يَرَبُ دَسُو؞

³⁴ عَمَّا وَطَنْسُنْسُ سُكَ كُواْمَ وَجٜىٰنْ بُلُسْ، سُكَ بَادَ غَسْكِيَ؞ عَثِكِنْسُ أَݣَويْ دِيُواْنِسِيُسْ، طَنْ مَجَلِسَ دَ وَتَ مَثٜىٰ مَيْ سُونَ دَمَرِسْ دَ وَطَنْسُ كُمَ تَرٜىٰدَسُو؞