أَيُّكَنْ مَنْذَنِّے 11 - أَتَّوْرَتْ دَ أَنَّبَاوَا

بِتْرُسْ يَيِ وَجَمَعَرْ مَاسُبِے أَ عُرُوشَلِيمَ بَيَانِ

¹ مَنْذَنِّے دَ سَوْرَنْ یَنْعُوَنْ دَسُكٜىٰ عَكُواْعِنَ عَيَنْكِنْ يَهُودِيَ سُكَجِ ثٜىٰوَ وَطَنْدَ بَا يَهُودَاوَا بَ مَا سُنْكَرْٻِ كَلْمَرْ اللَّهْ؞

² دَ بِتْرُسْ يَجٜىٰ عُرُوشَلِيمَ، وَطَنْسُ مَنْيَنْ يَهُودَاوَا مَاسُبِے، وَطَنْدَ سُكَ ڟَيَ عَكَنْ أَلْعَادَرْسُ تَكَاثِيَ، سُكَيِ مَسَ ڢَطَ؞

³ سُكَثٜىٰ ‏«‏دُوانْمٜىٰ كَجٜىٰ وُرِنْ أَرْنَ مَرَسَ كَاثِيَ، حَرْ كَثِ عَبِنْثِ تَرٜىٰدَسُو؟»‏

⁴ سَيْ بِتْرُسْ يَڢَارَيِ مُسُ بَيَانِ دَلَّ دَلَّ ثٜىٰوَ،

⁵ ‏«‏إِنَ بِرْنِنْ يُواْڢَّ إِنَ أَدُّعَ، سَيْ نَغَ رُعُيَ، نَغَ وَنِ أَبُ يَنَ سَوْكُواْوَ كَمَرْ بَبَّنْ مَيَاڢِ، أَنْسَوْكُواْ دَشِ دَغَ سَمَ تَݣُونَرْسَ حُطُ، حَرْ يَ إِسُواْ كُسَدَنِے؞

⁶ دَ نَدُوبٜىٰشِ سُواْسَيْ، نَغَ دَبُّواْبِے مَاسُ ڧَڢَا حُطُ دَ نَمُواْمِنْ دَاجِ دَ دَنْ‌غِنْ مَثِيظَيْ دَ ڧَدَنْ‌غَرُ دَ كُمَ ڟُنْڟَيٜىٰ عَثِكِ؞

⁷ نَكُمَجِ وَتَ مُرْيَ تَثٜىٰمِنِ، ‏‹‏بِتْرُسْ، كَتَاشِ، كَيَنْكَ كَثِ؞›‏

⁸ عَمَّا نَثٜىٰ، ‏‹‏سَمْ!‏ عُبَنْ‌غِجِ، بَا وَنِ أَبِنْ ڧَظَنْتَا كُواْ مَرَرْ ڟَبْتَ وَنْدَ يَتَٻَ شِغَ بَاكِنَ؞›‏

⁹ سَيْ مُرْيَ تَأَمْسَ دَغَ سَمَ تَيِ مَغَنَ سَوْ نَبِيُ، تَثٜىٰ، ‏‹‏أَبِنْ دَ اللَّهْ يَڟَبْتَثٜىٰ، كَدَ كَثٜىٰ دَشِ مَيْ ڧَظَنْتَا؞›‏

¹⁰ أَنْيِ وَنَّنْ سَوْ عُكُ، سَعَنً عَكَ طَوْكٜىٰ أَبِنْ ذُوَا سَمَ؞

¹¹ أَ دَيْدَيْ وَنَّنْ لُواْكَثِ، سَيْغَا مُتُمْ عُكُ سُنْ ڟَيَ عَبَاكِنْ ڧُواْڢَرْ غِدَنْ دَ نَكٜىٰ، أَنْعَيْكُواْسُ وُرِينَ نٜىٰ دَغَ كَيْسَرِيَ؞

¹² سَيْ رُوحُ يَثٜىٰ مِنِ إِنْبِيسُ، كَدَ إِنُّونَ بَمْبَنْثِ ڟَكَانِنْسُ دَمُو؞ یَنْعُوَنَّنْ شِدَ كُمَ سُكَ رَكُواْ نِے، حَرْ مُكَ شِغَ غِدَنْ مُتُمِنَّنْ؞

¹³ سَيْ يَڢَطَا مَنَ يَدَّ يَغَ مَلاَىِٕكَ يَڟَيَ أَغِدَنْسَ، يَنَ ثٜىٰوَ ‏‹‏كَعَيْكَ ذُوَا يُواْڢَّ عَكِرَوُاْ سِيمَنْ، وَنْدَ عَكٜىٰثٜىٰ دَشِ بِتْرُسْ؞

¹⁴ شِے ذَيْ كَٰوُاْ مَكَ سَڧُوانْ دَ ذَاكَسَامِ ثٜىٰتُواْ تَوُرِنْسَ، كَيْ دَ مُتَنٜىٰنْ غِدَنْكَ دُكَ؞›‏

¹⁵ نَڢَارَ يِمُسُ مَغَنَ كٜىٰنَنْ، سَيْ رُوحُ مَيْ ڟَرْكِے يَسَوْكُواْ مُسُ دَيْدَيْ يَدَّ يَسَوْكُواْ مَنَ دَ ڢَرْكُواْ؞

¹⁶ سَيْ نَتُنَ دَ كَلْمَرْ عُبَنْ‌غِجِ، يَدَّ يَثٜىٰ، ‏‹‏يَحْيَى دَيْ يَيِ بَڢْتِسْمَ دَ ضُوَ، عَمَّا كُو دَ رُوحُ مَيْ ڟَرْكِے ذَاعَيِ مُكُ بَڢْتِسْمَ؞›‏

¹⁷ تُواْ دَيَكٜىٰ اللَّهْ يَيِ مُسُ بَيْوَ دَيْدَيْ دَ وَدَّ يَيِ مَنَ، سَعَدَّ مُكَ بَادَ غَسْكِيَ غَ عُبَنْ‌غِجِ عِيسَىٰ أَلْمَسِيحُ، وَنٜىٰنِے إِنْحَنَ اللَّهْ!‏»‏

¹⁸ دَ يَهُودَاوَا مَاسُبِے سُكَجِ حَكَ، سُكَ رَسَ أَبِنْدَ ذَاسُثٜىٰ، سَيْ سُكَ يَبِے اللَّهْ سُنَ ثٜىٰوَ ‏«‏أَشٜىٰ، حَرْ وَطَنْدَ بَا يَهُودَاوَا بَ مَا اللَّهْ يَيِ مُسُ حَنْيَرْ تُوبَ دَ سَامُنْ رَيْ؞»‏

جَمَعَرْ مَاسُبِے أَعَنْتَكِيَ تَ سُورِيَ

¹⁹ تُواْ، مَاسُبِے سُكَ وَرْوَڟٜىٰ سَبُواْدَ ڟَنَنِنَّنْ دَ يَتَاشِ سَبُواْدَ كَشٜىٰوَرْ إِسْتِڢَنُسْ؞ وَطَنْسُ سُكَ تَڢِے حَرْ ذُوَا ڧَسَرْ ڢِنِكِيَ دَ سَيِڢُرُسْ دَ بِرْنِنْ أَنْتَكِيَ؞ سُنَ وَعَظِنْ كَلْمَرْ اللَّهْ، عَمَّا غَ يَهُودَاوَا كَطَيْ؞

²⁰ عَمَّا أَݣَويْ وَطَنْسُ مَاسُبِے دَغَ سَيِڢُرُسْ دَ سَيِرِنْ، وَطَنْدَ سُكَ تَڢِے أَنْتَكِيَ سُكَيِ وَ هٜىٰلٜىٰنَاوَا مَغَنَ، سُنَبَاسُ لَابَرِ مَيْ دَاطِے نَ عُبَنْ‌غِجِ عِيسَىٰ؞

²¹ حَنُّنْ إِيكُوانْ عُبَنْ‌غِجِ كُوَ يَنَ تَرٜىٰدَسُو، حَرْ مُتَنٜىٰ دَيَوَ سُكَ تُوبَ، سُكَ جُويُواْ وُرِنْ عُبَنْ‌غِجِ؞

²² لَابَرِنْ أَبِنْدَ يَڢَرُ أَعَنْتَكِيَ كُوَ يَكَيْ كُنّٜىٰنْ جَمَعَرْ مَاسُبِنْ دَتَكٜىٰ أَ عُرُوشَلِيمَ؞ جَمَعَرْ مَاسُبِے كُمَ تَعَيْكَ بَرْنَبَ ذُوَا ثَنْ أَنْتَكِيَ؞

²³ دَ يَذُواْ، يَكُمَ غَ أَلْحٜىٰرِنْ دَ اللَّهْ يَيِ مُسُ، يَيِ ڢَضٍ ثِكِ، يَغَرْغَطٜىٰسُ دُكَ سُڟَيَ دَ بَنْ‌غَسْكِيَ ثِكِنْ عُبَنْ‌غِجِ دَ دُكَنْ ذُوثِيَارْسُ؞

²⁴ بَرْنَبَ كُوَ مُتُمِنْ كِرْكِ نٜىٰ، ثِكٜىٰ دَ رُوحُ مَيْ ڟَرْكِے دَ بَنْ‌غَسْكِيَ؞ سَيْ مُتَنٜىٰ مَاسُيَوَنْ غَسْكٜىٰ سُكَ جُويُواْ ذُوَا وُرِنْ عُبَنْ‌غِجِ؞

²⁵ دَغَ نَنْ سَيْ بَرْنَبَ يَتَڢِے تَرْسُسْ دُواْمِنْ يَنٜىٰمِ شَوُلُ؞

²⁶ دَ يَسَامٜىٰشِ كُوَ، سَيْ يَكَٰوُاْشِ أَنْتَكِيَ؞ شٜىٰكَرَا طَيَ ثِڢْ، سُنَ تَارُوَ دَ جَمَعَرْ مَاسُبِے، سُنَ كُواْيَوَ مُتَنٜىٰ مَاسُيَوَنْ غَسْكٜىٰ؞ أَعَنْتَكِيَ نٜىٰ عَكَ ڢَارَ كِرَنْ مَاسُبِنْ أَلْمَسِيحُ دَ سُونَ كِرِسْتَ؞

²⁷ تُواْ، أَوَنَّنْ لُواْكَثِ، وَطَنْسُ أَنَّبَاوَا سُكَذُواْ أَنْتَكِيَ دَغَ عُرُوشَلِيمَ؞

²⁸ طَيَ دَغَ ثِكِنْسُ، مَيْ سُونَ أَغَبُسْ، يَتَاشِ ڟَيٜىٰ، يَيِ مَغَنَ دَ إِيكُوانْ رُوحُ ثٜىٰوَ ذَاعَيِ وَتَ بَبَّرْ يُنْوَ عَدُونِيَا دُكَ؞ وَنَّنْ كُوَ يَڢَرُ أَ زَامَانِنْ كَلَوْدِيُسْ؞

²⁹ سَيْ أَلْمَجِرَنْ سُكَ يَنْكٜىٰ شَوَرَا ثٜىٰوَ سُعَيْكَ وَیَنْعُوَنْ دَسُكٜىٰ ثِكِنْ يَنْكِنْ يَهُودِيَ تَيْمَكُواْ، كُواْوَ دَيْدَيْ ڧَرْڢِنْسَ؞

³⁰ حَكَ كُوَ سُكَيِ، سُكَ عَيْكَا وَدَتَّاوَنْ جَمَعَرْ مَاسُبِے عَيَنْكِنْ يَهُودَ تَيْمَكُوانْ تَهَنُّنْ بَرْنَبَ دَ شَوُلُ؞