أَيُّكَنْ مَنْذَنِّے 10 - أَتَّوْرَتْ دَ أَنَّبَاوَابِتْرُسْ يَظِيَرْثِ بَبَّنْ سُواْجَنْ رُواْمَ 1 أَݣَويْ وَنِ مُتُمْ أَ كَيْسَرِيَ مَيْ سُونَ كُواْنٜىٰلِيُسْ، وَنِ بَبَّنْ سُواْجَنْ رُواْمَ نٜىٰ نَڧُنْغِيَرْ سُواْجَنْ دَ عَكٜىٰثٜىٰدَ عِتَ ڧُنْغِيَرْ إِتَالِيَ؞ 2 شِے كُوَ مَيْ بَوْتَرْ اللَّهْ، مَيْ ڟُواْرُوانْسَ كُمَ، شِے دَ عِيَلِنْسَ دُكَ؞ يَنَ ڧُواْڧَرِ سُواْسَيْ وَجٜىٰنْ بَ دَا سَدَكَ حَنُّ سَكٜىٰ غَ مُتَنٜىٰ، يَنَ كُمَيِنْ أَدُّعَ غَ اللَّهْ كُلُّمْ؞ 3 وَتَرَانَ، وَجٜىٰنْ ڧَرْڢٜىٰ عُكُ نَيَمَّ، يَغَ وَنِ مَلاَىِٕكَنْ اللَّهْ أَ ڢِيلِ عَثِكِنْ رُعُيَ، يَذُواْ وُرِنْسَ، يَثٜىٰ «كُواْنٜىٰلِيُسْ!» 4 شِے كُوَ يَظُبَ مَسَ عِدُواْ ثِكِنْ ڟُواْرُواْ يَثٜىٰ «عُبَنْغِجِ، مٜىٰنٜىٰنٜىٰ؟» مَلاَىِٕكَنْ كُمَ يَثٜىٰ مَسَ «أَدُّعَرْكَ دَ سَدَكَرْدَ كَكٜىٰيِ سُنْ كَيْ حَرْ غَبَنْ اللَّهْ، أَبُبُوَنْ تُنَاوَا نٜىٰ كُمَ أَغَرٜىٰشِ؞ 5 يَنْذُ سَيْ كَاعَيْكِ مُتَنٜىٰ ذُوَا يُواْڢَّ سُكِرَوُاْ سِيمَنْ، وَنْدَ عَكٜىٰثٜىٰ دَشِ بِتْرُسْ؞ 6 يَسَوْكَ أَوُرِنْ سِيمَنْ مَيْ عَيْكِنْ ڢَتَ، وَنْدَ غِدَنْسَ يَكٜىٰ عَبَاكِنْ تٜىٰكُ؞» 7 دَ مَلاَىِٕكَنْ دَ يَيِ مَسَ مَغَنَ يَتَڢِے، سَيْ كُواْنٜىٰلِيُسْ يَكِرَا بَايِنْسَ بِيُ دَ كُمَ وَنِ سُواْجَ مَيْبِنْ اللَّهْ دَغَ ثِكِنْ وَطَنْدَ سُكٜىٰيِ مَسَ عَيْكِ كُلُّمْ؞ 8 بَايَنْدَ يَڢَطَا مُسُ كُواْمٜىٰ دُكَ، سَيْ يَعَيْكٜىٰسُ ذُوَا يُواْڢَّ؞ 9 وَشٜىٰغَرِ، كُسَنْ ڟَكَرْ رَانَ، بَايِنْ كُواْنٜىٰلِيُسْ سُنَ ثِكِنْ تَڢِيَ، سُنْ ذُواْ كُسَدَ غَرِنْ كٜىٰنَنْ، سَيْ بِتْرُسْ يَهَوْ كَنْ طَاكِنْ سَمَ دُواْمِنْ يَيِ أَدُّعَ؞ 10 يُنْوَ تَكَامَشِ، حَرْ يَسُواْ يَثِ وَنِ أَبُ؞ عَمَّا دَيَكٜىٰ أَنَ ثِكِنْ شِرْيَ عَبِنْثِنْ، سَيْ يَغَ رُعُيَ؞ 11 يَغَ سَمَ تَبُوطٜىٰ، وَنِ أَبُ كُمَ يَنَ سَوْكُواْوَ كَمَرْ بَبَّنْ مَيَاڢِ، أَنَ سَوْكُواْ دَشِ ڧَسَا تَݣُونَرْسَ حُطُ؞ 12 عَثِكِنْسَ أَݣَويْ كُواْوَثٜىٰ إِرِنْ دَبَّ؞ أَݣَويْ مَاسُ ڧَڢَا حُطُ دَ دَنْغِنْ مَثِيظَيْ دَ ڧَدَنْغَرُ دَ ڟُنْڟَيٜىٰ؞ 13 سَيْ يَجِ وَتَ مُرْيَ تَثٜىٰمَسَ «بِتْرُسْ، تَاشِ كَيَنْكَ كَثِ؞» 14 عَمَّا بِتْرُسْ يَثٜىٰ «سَمْ! عُبَنْغِجِ، بَنْ تَٻَثِنْ وَنِ أَبِنْ ڧَظَنْتَا كُواْ مَرَرْ ڟَبْتَ بِسَغَ دُواْكَا بَ؞» 15 سَيْ يَسَاكٜىٰ جِنْ مُرْيَ، سَوْ نَبِيُ، تَثٜىٰ «أَبِنْ دَ اللَّهْ يَڟَبْتَثٜىٰ، كَدَ كَثٜىٰ دَشِ مَيْ ڧَظَنْتَا؞» 16 وَنَّنْ يَڢَرُ سَوْ عُكُ، سَيْ نَنْ دَنَنْ عَكَ طَوْكِ أَبِنْ ذُوَا سَمَ؞ 17 بِتْرُسْ يَنَ ثِكِنْ دَامُوَ ڨُورَيْ عَكَنْ كُواْ مٜىٰثٜىٰثٜىٰ مَعَنَرْ رُعُيَرْ دَ عَكَ نُونَ مَسَ، سَيْغَا مُتَنٜىٰنْ دَ كُواْنٜىٰلِيُسْ يَعَيْكُواْ، سُنَ ڟَيٜىٰ عَڧُواْڢَ، سُنْ رِغَا سُنْ تَمْبَيِ غِدَنْ سِيمَنْ؞ 18 سُنَ سَلَّمَ، سُنَ تَمْبَيَ كُواْ سِيمَنْ دَ عَكٜىٰثٜىٰ دَشِ بِتْرُسْ يَسَوْكَ أَوُرِنْ؞ 19 تُنْ بِتْرُسْ يَنَ تُنَانِ عَكَنْ رُعُيَرْ نَنْ، رُوحُ يَثٜىٰ مَسَ «غَا مُتُمْ عُكُ نَنْ سُنَ نٜىٰمَنْكَ؞ 20 تَاشِ، كَسَوْكَ، كَبِيسُ؞ كَدَ كَيِ شَكَّ، دُوانْ نِنٜىٰ نَا عَيْكُواْسُ؞» 21 سَيْ بِتْرُسْ يَسَوْكَ ذُوَا وُرِنْ مُتَنٜىٰنْ، يَثٜىٰ مُسُ «نِنٜىٰ كُكٜىٰ نٜىٰمَ؟ وَنٜىٰ دَلِيلِ نٜىٰ يَكَٰوُاْكُ؟» 22 سَيْ سُكَثٜىٰ «وَنِ بَبَّنْ سُواْجَنْ رُواْمَ نٜىٰ، مَيْ سُونَ كُواْنٜىٰلِيُسْ، يَعَيْكٜىٰمُ؞ شِ مُتُمْ مَيْ أَدَلْثِے نٜىٰ، مَيْ ڟُواْرُوانْ اللَّهْ، وَنْدَ دُكْ جَمَعَرْ يَهُودَاوَا سُكٜىٰ ڢَطِنْ أَبِنْ كِرْكِ عَكَنْسَ؞ شِينٜىٰ وَنِ مَلاَىِٕكَ مَيْ ڟَرْكِے يَعُمَرْثٜىٰشِ يَعَيْكُواْ كَجٜىٰ غِدَنْسَ، يَجِ أَبِنْدَ ذَاكَثٜىٰ؞» 23 سَيْ بِتْرُسْ يَشِغُواْ دَسُو، يَبَاسُ وُرِنْ ݣُونَ؞ وَشٜىٰغَرِ يَتَاشِ، سُكَ تَڢِے تَرٜىٰ، وَطَنْسُ مَاسُبِے دَغَ بِرْنِنْ يُواْڢَّ كُمَ سُكَ رَكَ شِ؞ 24 وَشٜىٰغَرِ كُمَ سُكَ شِغَ كَيْسَرِيَ؞ دَا مَا كُواْنٜىٰلِيُسْ يَنَسَا رَيْ ذَاسُذُواْ، حَرْ يَكِرَوُاْ یَنْعُوَنْسَ دُكَ دَ أَبُواْكَنْسَ؞ 25 بِتْرُسْ يَنَ شِغَ غِدَنْ كٜىٰنَنْ، سَيْ كُواْنٜىٰلِيُسْ يَتَرْيٜىٰشِ، يَڢَاطِ أَغَبَنْسَ، يَيِ مَسَ سُجَّدَ؞ 26 عَمَّا بِتْرُسْ يَسَا يَتَاشِ، يَثٜىٰ «تَاشِ، أَيْ، نِے مَا مُتُمْنٜىٰ؞» 27 بِتْرُسْ يَنَ مَغَنَ دَشِ، سَيْ يَشِغَ يَسَامِ مُتَنٜىٰ دَيَوَ سُنْ تَارُ؞ 28 سَيْ يَثٜىٰمُسُ «كُو دَ كَنْكُ كُنْ سَنِ ثٜىٰوَ بَيْ كَمَاتَ بَيَهُودٜىٰ يَهَطَكَيْ كُواْ يَظِيَرْثِ وَنِ نَوَتَ ڧَبِيلَ دَبَمْ بَ؞ عَمَّا اللَّهْ يَنُونَ مِنِ كَدَ إِنْثٜىٰ دَ كُواْوَ مَرَرْ ڟَبْتَ، كُواْ مَيْ ڧَظَنْتَا؞ 29 سَبُواْدَ حَكَ دَ عَكَ عَيْكَ إِنْ ذُواْ، بَنْثٜىٰ أَعَبَ؞ تُواْ، يَنْذُ إِنَ سُواْ إِنْسَنْ أَبِنْدَ يَسَا كُكَ كِرَنِ؞» 30 سَيْ كُواْنٜىٰلِيُسْ يَثٜىٰ «وَجٜىٰنْ ݣُونَ حُطُنْ دَ سُكَ وُثٜىٰ، كَمَرْ وَنَّنْ لُواْكَثِ، وَجٜىٰنْ ڧَرْڢٜىٰ عُكُ نَيَمَّ، إِنَ أَدُّعَ أَغِدَانَ، سَيْغَا وَنِ مُتُمْ يَڟَيَ أَغَبَنَ؞ كَايَنْدَ يَسَا كُوَ مَاسُ حَصْكٜىٰ نٜىٰ سُواْسَيْ؞ 31 مُتُمِنْ يَثٜىٰ، ‹كُواْنٜىٰلِيُسْ، أَنَمْسَ أَدُّعَرْكَ دَ سَدَكَرْدَ كَكٜىٰيِ كُمَ يَذَمَ أَبِنْ تُنَاوَا غَ اللَّهْ؞ 32 سَبُواْدَ حَكَ سَيْ كَعَيْكَ ذُوَا يُواْڢَّ عَكِرَوُاْ سِيمَنْ، وَنْدَ عَكٜىٰثٜىٰ دَشِ بِتْرُسْ، يَسَوْكَ أَغِدَنْ سِيمَنْ مَيْ عَيْكِنْ ڢَتَ، وَنْدَ غِدَنْسَ يَكٜىٰ عَبَاكِنْ تٜىٰكُ؞› 33 شِيَسَا نَعَيْكَ عَكِرَاكَ، كَكُمَ ݣَوْتَادَكَذُواْ؞ تُواْ، غَا مُو دُكْ مُنْتَارُ أَغَبَنْ اللَّهْ، دُوانْ مُسَوْرَرِ دُكْ أَبِنْدَ عُبَنْغِجِ يَعُمَرْثٜىٰكَ؞» بِتْرُسْ يَيِ جَوَابِے أَغِدَنْ كُواْنٜىٰلِيُسْ 34 سَيْ بِتْرُسْ يَڢَارَ يِمُسُ مَغَنَ يَثٜىٰ «لَلَّيْ، نَا غَانٜىٰ اللَّهْ بَايَ نُونَ بَمْبَنْثِ، 35 عَمَّا يَنَ كَرْٻَرْ دُكْ مَيْ ڟُواْرُوانْسَ دَ كُمَ مَيْ عَيْكَتَ أَدَلْثِے عَكُواْوَثٜىٰ أَلْعُمَّ؞ 36 كُنْ سَنْ سَڧُوانْدَ يَعَيْكُواْوَ جَمَعَرْ إِسْرَٰٓءِيلَ، أَنَبَاسُ لَابَرِ مَيْ دَاطِے نَسَلَمَ تَوُرِنْ عِيسَىٰ أَلْمَسِيحُ، شِينٜىٰ كُوَ عُبَنْغِجِنْ كُواْوَ؞ 37 كُنْ سَنْ يَدَّ لَابَرِنَّنْ يَبَظُو أَدُكَنْ يَنْكِنْ يَهُودِيَ، أَبِنْدَ يَڢَارَ تُنْدَغَ ثِكِنْ غَلِيلِ، بَايَنْ بَڢْتِسْمَرْ دَ يَحْيَى يَيِ وَعَظِنْسَ؞ 38 كُنْ سَنْ لَابَرِنْ عِيسَىٰ بَنَظَرٜىٰتْ، يَدَّ اللَّهْ يَشَاڢٜىٰشِ دَ رُوحُ مَيْ ڟَرْكِے دَ كُمَ إِيكُواْ؞ دُواْمِنْ اللَّهْ يَنَ تَرٜىٰ دَشِ، يَدِنْغَ ذَاغَاوَ يَنَ يِنْ عَيْكِنْ أَلْحٜىٰرِ، يَنَ وَرْكَرْدَ دُكْ وَطَنْدَ شَيْطَنْ يَمَاڟَ مُسُ؞ 39 مُو كُوَ شَيْدُنٜىٰ غَ دُكْ أَبِنْدَ عِيسَىٰ يَيِ عَيَنْكِنْ يَهُودِيَ دَ كُمَ ثِكِنْ عُرُوشَلِيمَ؞ شِينٜىٰ كُمَ سُكَ كَشٜىٰشِ تَوُرِنْ غِثِّيٜىٰشِ عَكَنْ غُنْغُمٜىٰنْ إِتَاثٜىٰ؞ 40 عَمَّا اللَّهْ يَتَادَشِ أَ رَانَ تَ عُكُ، يَكُمَسَا يَبَيَّنَ غَ مُتَنٜىٰ؞ 41 بَيْ بَيَّنَ غَ دُكَنْ جَمَعَبَ، سَيْدَيْ غَرٜىٰمُ، وَتُواْ مُو دَ اللَّهْ يَذَاٻَا تُنْدَا دُوانْ مُذَمَ شَيْدُ؞ مُو نٜىٰ مُكَثِ، مُكَشَا تَرٜىٰدَشِ، بَايَنْدَ يَتَاشِ دَغَ مَتَتُّو؞ 42 يَكُمَ عُمَرْثٜىٰمُ مُيِ وَمُتَنٜىٰ وَعَظِ، مُكُمَيِ شَيْدَ ثٜىٰوَ شِينٜىٰ وَنْدَ اللَّهْ يَسَا يَذَمَ مَيْيِ وَمَاسُ رَيْ دَ مَتَتُّو شَرِيعَ؞ 43 دُكْ أَنَّبَاوَا سُنْيِ شَيْدَ عَكَنْسَ ثٜىٰوَ تَوُرِنْ سُونَنْسَ دُكْ وَنْدَ يَبَادَ غَسْكِيَ غَرٜىٰشِ ذَيْسَامِ غَاڢَرَرْ ذُنُبَيْ؞» أَنْبَا وَطَنْدَ بَا يَهُودَاوَا بَ رُوحُ مَيْ ڟَرْكِے 44 بِتْرُسْ يَنَ ثِكِنْ مَغَنَ كٜىٰنَنْ، سَيْ رُوحُ مَيْ ڟَرْكِے يَسَوْكُواْ عَكَنْ دُكَنْ وَطَنْدَ سُكٜىٰ جِنْ مَغَنَرْسَ؞ 45 يَهُودَاوَا مَاسُبِے، وَطَنْدَ سُكَذُواْ تَرٜىٰدَ بِتْرُسْ، سُكَيِ مَامَاكِنْ غَنِنْ يَدَّ وَطَنْدَ بَا يَهُودَاوَا بَ سُو مَا سُنْ سَامِ بَيْوَرْ رُوحُ مَيْ ڟَرْكِے؞ 46 غَمَا سُنْجِ سُنَ مَغَنَ دَ يَرٜىٰ دَبَمْ دَبَمْ، سُنَ طَوْكَكَ اللَّهْ؞ سَعَنً بِتْرُسْ يَثٜىٰ، 47 «أَݣَويْ مَيْ عِيَحَنَ عَيِ وَمُتَنٜىٰنَّنْ بَڢْتِسْمَ دَ ضُوَ؟ أَيْ، سُو مَا سُنْ سَامِ رُوحُ مَيْ ڟَرْكِے كَمَرْ يَدَّ مُو مَا مُكَ سَامُ؞» 48 سَيْ بِتْرُسْ يَبَادَ عُمَرْنِ عَيِمُسُ بَڢْتِسْمَ ثِكِنْ سُونَنْ عِيسَىٰ أَلْمَسِيحُ؞ سَعَنً سُكَ ضُواْڧٜىٰشِ يَذَوْنَ دَسُو نَیَنْ ݣُونَكِے؞ |
Hausa Common Language Ajami Bible © The Bible Society of Nigeria, 2020
Bible Society of Nigeria