2 تِمُواْتِ 1 - أَتَّوْرَتْ دَ أَنَّبَاوَا

غَيْسُوَا

¹ دَغَ بُلُسْ وَنْدَ يَذَمَ مَنْذُوانْ أَلْمَسِيحُ عِيسَىٰ بِسَغَ نُڢِنْ اللَّهْ، دُواْمِنْ إِنْ سَنَرْدَ أَلْڧَوَرِنْ رَيْ وَنْدَ يَكٜىٰ ثِكِنْ أَلْمَسِيحُ عِيسَىٰ؞

² ذُوَاغَ تِمُواْتِ طَانَ وَنْدَ نَكٜىٰ ڧَوْنَ؞ أَلْحٜىٰرِ دَ جِنْڧَيْ دَ سَلَمَ دَغَ وُرِنْ اللَّهْ عُبَادَ أَلْمَسِيحُ عِيسَىٰ عُبَنْ‌غِجِنْمُ سُكَسَنْثٜىٰ تَرٜىٰ دَكَيْ؞

غُواْدِيَ دَ ڧَرْڢَڢَاوَا

³ إِنَغُواْدٜىٰ وَ اللَّهْ وَنْدَ نَكٜىٰ بَوْتَا مَسَ دَ تُنَانِنْ دَيَكٜىٰ تَبَّتَرْ مِنِ بَا نِے دَ لَيْڢِے كَمَرْ يَدَّ كَاكَنِّنَ سُكَيِ، سَعَدَّ نَكٜىٰ تُنَاوَا دَكَيْ كُلُّمْ دَرٜىٰ دَ رَانَ ثِكِنْ أَدُّعُواْعِنَ؞

⁴ سَعَدَّ نَتُنَ دَ هَوَيٜىٰنْكَ، سَيْ إِنْجِ مَرْمَرِنْ غَنِنْكَ، دُواْمِنْ إِنْثِكَ دَ ڢَضٍ ثِكِ؞

⁵ نَاتُنَ دَ بَنْ‌غَسْكِيَرْنَنْ تَاكَ تَغَسْكٜىٰ، وَدَّ تَكَسَنْثٜىٰ عَثِكِنْ كَكَرْكَ لُواْيِسْ دَ كُمَ مَامَرْكَ أَڢِنِكِ، وَدَّ كُمَ نَتَبَّتَا كَكٜىٰ دَ عِتَ؞

⁶ شِيَسَا إِنَتُنَ مَكَ كَظُغَ بَيْوَرْ نَنْ وَدَّ تَكٜىٰ ثِكِنْكَ، وَدَّ اللَّهْ يَبَاكَ سَعَدَّ نَسَا مَكَ حَنُّنْ أَلْبَرْكَ؞

⁷ غَمَا رُوحٌ دَ اللَّهْ يَبَامُ بَيْ مَيْدَمُو مَاسُ ڟُواْرُواْبَ، أَمَيْمَكُوانْ حَكَ، يَمَيْدَمُو مَاسُ إِيكُواْ دَ مَاسُ ڧَوْنَ دَ كُمَ مَاسُ كَامُنْ كَيْ؞

⁸ دُواْمِنْ حَكَ، كَدَ كَجِ كُنْيَرْ شَيْدَرْ عُبَنْ‌غِجِنْمُ، كُواْ كَجِ كُنْيَتَ، نِے وَنْدَ نَكٜىٰ أَطَوْرٜىٰ دُواْمِنْسَ؞ عَمَّا كَهَطَكَيْ دَنِے وَجٜىٰنْ جِمْرٜىٰوَ ثِكِنْ شَنْ وَهَلَ سَبُواْدَ لَابَرِ مَيْ دَاطِنَّنْ، كَنَ دُواْغَضَ عَكَنْ إِيكُوانْ اللَّهْ؞

⁹ شِينٜىٰ كُمَ يَثٜىٰثٜىٰمُ، يَكِرَامُ مُذَمَ مَاسُ ڟَرْكِے؞ وَنَّنْ كِرَا بَبِسَغَ أَيُّكَ نَسَامُنْ لَادَ بَنٜىٰ، عَمَّا بِسَغَ نُڢِنْسَ دَ أَلْحٜىٰرِنْسَ؞ وَنَّنْ أَلْحٜىٰرِ أَنْبَامُ نٜىٰ تَوُرِنْ أَلْمَسِيحُ عِيسَىٰ كَاڢِنْ كَڢَاوَرْ دُونِيَا،

¹⁰ عَمَّا يَنْذُ أَنْبَيَّنَا مَنَشِ تَوُرِنْ ذُوَانْ مَيْ ثٜىٰتُوانْمُ أَلْمَسِيحُ عِيسَىٰ؞ شِے يَكَوَرْدَ مُتُوَ يَكُمَ بَيَّنَ مَنَ حَصْكٜىٰنْ رَيْ دَ رَايُوَرْ نَنْ مَرَرْ ڧَارٜىٰوَ تَوُرِنْ لَابَرِنَّنْ مَيْ دَاطِے؞

¹¹ سَبُواْدَ وَنَّنْ لَابَرِ مَيْ دَاطِے نٜىٰ، عَكَ نَطَنِ مَيْ وَعَظِ دَ مَنْذُواْ دَ كُمَ مَيْكُواْيَرْوَا؞

¹² دُواْمِنْ وَنَّنْ نٜىٰ إِنَ شَنْ وَهَلَ كَمَرْ يَدَّ نَكٜىٰشَا كُواْ عَيَنْظُ مَا؞ عَمَّا دُكْدَهَكَ بَانَجِنْ كُنْيَا دُواْمِنْ نَسَنْ غَ وَنٜىٰنٜىٰ نَبَادَ غَسْكِيَ، كُمَ نَتَبَّتَا يَا عِيَ لُورَ دَ دُكَنْ أَبِنْدَ يَبَانِ أَمَانَرْسَ، حَرْ ذُوَا رَانَرْ نَنْ؞

¹³ كَرِڧٜىٰ كُواْيَرْوَرْ نَنْ تَغَسْكِيَ سُواْسَيْ، وَدَّ كَجِ دَغَ وُرِينَ؞ كَكُمَيِ كُواْيِ دَ عِتَ، وَتُواْ كُواْيَرْوَرْ نَنْ دَتَڢِتُواْ دَغَ ثِكِنْ بَنْ‌غَسْكِيَ دَ ڧَوْنَرْ دَتَكٜىٰ ثِكِنْ أَلْمَسِيحُ عِيسَىٰ؞

¹⁴ تَوُرِنْ تَيْمَكُوانْ رُوحُ مَيْ ڟَرْكِنْ دَيَكٜىٰ ظَوْنٜىٰ عَثِكِنْمُ، كَكُلَ دَ وَنَّنْ كُواْيَرْوَا تَغَسْكِيَرْ دَ عَكَ بَاكَ أَمَانَرْتَ؞

¹⁵ كَسَنْ ثٜىٰوَ كُواْوَ أَعَسِيَ يَجُويَ مِنِ بَايَ، حَرْ دَ ڢَيْجٜىٰلُسْ دَ هَمُواْجٜىٰنِسْ؞

¹⁶ بَرِ عُبَنْ‌غِجِ يَنُونَ جِنْڧَيْ غَ عِيَلِنْ غِدَنْ عُواْنٜىٰسِڢُواْرُسْ، غَمَا كُلُّمْ يَكَنْ ڧَرْڢَڢَانِ، كُمَ بَيْجِ كُنْيَا وَيْ نِے طَنْ كُرْكُكُ نٜىٰبَ؞

¹⁷ أَ مَيْمَكُوانْ حَكَ دَ يَ إِسُواْ رُواْمَ، يَنٜىٰمٜىٰنِ دَ نَاثِيَ، سَيْ دَ يَسَامٜىٰنِ؞

¹⁸ بَرِ عُبَنْ‌غِجِ يَسَا عُواْنٜىٰسِڢُواْرُسْ يَسَامِ جِنْڧَيْ دَغَ وُرِنْسَ أَ رَانَرْ نَنْ!‏ أَيْ، كَيْ مَا كَسَنِ سَرَيْ إِرِنْ حِدِمَرْ دَ يَيِمِنِ أَعَڢِسَ؞