2 سَمَٰعِيلَ 8 - أَتَّوْرَتْ دَ أَنَّبَاوَا

نَصَرُواْرِنْ سَرْكِے دَاوُدَ أَ يَاڧٜىٰ يَاڧٜىٰنْسَ

¹ أَنَانً سَيْ دَاوُدَ يَثِ ڢِلِسْتِيَاوَا دَ يَاڧِ، يَمَيْدَسُو بَايِنْسَ؞ دَاوُدَ كُمَ يَڨُوثٜىٰ بِرْنِنْ مٜىٰتٜىٰغْ أَمَّهْ دَغَ حَنُّنْسُ؞

² دَاوُدَ يَكُمَ ثِ مُتَنٜىٰنْ مُواْوَبْ دَ يَاڧِ؞ يَسَا مُتَنٜىٰنْ سُكَ ݣُونْتَ لَيِ لَيِ عَڧَسَا، سَيْ يَطَوْكِ یَرْ إِغِيَ يَ عَوْنَسُ؞ كُواْوَنٜىٰ أَوُاْ بِيُ يَسَا عَكَشٜىٰسُ، أَوُاْ نَعُكُ كُوَ سَيْ يَبَرْسُ دَ رَيْ؞ مُتَنٜىٰنْ مُواْوَبْ سُكَ ذَمَ بَايِنْ دَاوُدَ، سُنَ كَٰوُاْ مَسَ هَرَاجِ؞

³ دَاوُدَ كُمَ يَثِ سُواْجُواْجِنْ هَدَدٜىٰظٜىٰرْ طَنْ رٜىٰهُوابْ، سَرْكِنْ ذُوابَ عَڧَسَرْ سُورِيَ دَ يَاڧِ؞ وَنَّنْ يَڢَرُ أَ لُواْكَثِنْ دَ هَدَدٜىٰظٜىٰرْ يَكٜىٰ كَنْ تَڢِيَرْسَ ذُوَا كُواْغِنْ يُڢِرٜىٰتِسْ دُواْمِنْ يَسَاكٜىٰ مَيْدَ إِيكُوانْسَ أَوُرِنْ؞

⁴ دَاوُدَ يَكَامَ مَاسُ هَوَنْ كٜىٰكُنَنْ دُواْكِنْ يَاڧِ نَسَرْكِنْ ذُوابَ دُبُو طَيَ دَ طَرِے بَݣَويْ دَ سُواْجُواْجِنْ ڧَڢَا دُبُو عَشِرِنْ؞ دَاوُدَ يَغُرْغُنْتَ دُكَنْ دَوَكِنْ، سَيْدَيْ يَبَرْ دَوَكِ مَاسُ جَنْ كٜىٰكُنَ غُدَا طَرِے؞

⁵ سَعَدَّ مُتَنٜىٰنْ سُورِيَ نَ دِمَشْڧُ سُكَذُواْ دُواْمِنْ سُتَيْمَكِ هَدَدٜىٰظٜىٰرْ سَرْكِنْ ذُوابَ، دَاوُدَ يَكَشٜىٰ سُواْجُواْجِنْسُ غُدَا دُبُو عَشِرِنْ دَ بِيُ؞

⁶ سَيْ يَكَڢَ بَرِكُواْكِنْ سُواْجُواْجِنْسَ أَ دِمَشْڧُ تَ سُورِيَ؞ مُتَنٜىٰنْ سُورِيَ كُوَ سُكَ ذَمَ بَايِنْ دَاوُدَ سُنَ كَٰوُاْ مَسَ هَرَاجِ؞ يَهْوٜىٰهْ يَكَنْبَا دَاوُدَ نَصَرَا دُكْ وُرِنْدَ يَتَڢِے؞

⁷ دَاوُدَ يَݣُوشِ غَرْكُوُاْيِ نَظِينَارِيَ نَمَنْيَنْ سُواْجُواْجِنْ هَدَدٜىٰظٜىٰرْ يَكَٰوُاْ عُرُوشَلِيمَ؞

⁸ يَكُمَ ݣُوشِ تَغُلَّ دَيَوَ دَغَ بِرَنٜىٰنْ بٜىٰتَ دَ بٜىٰرُواْتَيِ نَمُلْكٍ هَدَدٜىٰظٜىٰرْ؞

⁹ سَعَدَّ سَرْكِے تُواْيِ نَ هَمَتْ يَجِ لَابَرِ ثٜىٰوَ دَاوُدَ يَثِ دُكَنْ سُواْجُواْجِنْ هَدَدٜىٰظٜىٰرْ دَ يَاڧِ،

¹⁰ سَيْ يَعَيْكِ طَنْسَ مَيْ سُونَ يُواْرَمْ وُرِنْ سَرْكِے دَاوُدَ، دُواْمِنْ يَغَيْشٜىٰشِ، يَكُمَ يَبٜىٰشِ سَبُواْدَ دَاوُدَ يَيِ يَاڧِ دَ هَدَدٜىٰظٜىٰرْ يَثِ نَصَرَا؞ تُواْيِ كُوَ يَيِ حَكَ غَمَا كُلُّمْ هَدَدٜىٰظٜىٰرْ يَنَ يَاڧِ دَشِ؞ يُواْرَمْ يَكَيْ وَ دَاوُدَ كَايَنْ أَظُرْڢَا دَ نَظِنَرِيَ دَ نَتَغُلَّ؞

¹¹ سَرْكِے دَاوُدَ يَكٜىٰٻٜىٰ وَ يَهْوٜىٰهْ دُكَنْ كَايَنَّنْ كَمَرْ يَدَّ يَكٜىٰٻٜىٰ أَظُرْڢَا دَ ظِينَارِيَرْدَ يَݣُوشٜىٰ دَغَ حَنُّنْ دُكَنْ أَلْعُمَّنْدَ يَثِ عَيَاڧِ؞

¹² أَلْعُمَّنْ كُوَ سُونٜىٰ عٜىٰدُوامْ دَ مُواْوَبْ دَ أَمُّوانْ دَ ڢِلِسْتِيَاوَا دَ كُمَ أَمَلٜىٰكَاوَا؞ يَكُمَ كٜىٰٻٜىٰ دُكَنْ أَبُبُوَنْدَ يَڨُوثٜىٰ عَيَاڧِ دَغَ حَنُّنْ هَدَدٜىٰظٜىٰرْ طَنْ رٜىٰهُوابْ سَرْكِنْ ذُوابَ؞

¹³ سَعَدَّ دَاوُدَ يَدَاوُاْ دَغَ ڧَسَرْ سُورِيَ، يَڧَارَ يِنْ سُونَ تَوُرِنْ كَشٜىٰ عٜىٰدُواْمَاوَا دُبُو غُواْمَشَا تَݣُوسْ أَ ݣُورِنْ غِشِرِ؞

¹⁴ دَاوُدَ يَكُمَ كَڢَ بَرِكُواْكِنْ سُواْجُواْجِنْسَ كُواْعِنَ عَڧَسَرْ عٜىٰدُوامْ؞ مُتَنٜىٰنْ عٜىٰدُوامْ سُكَ ذَمَ بَايِنْسَ؞ يَهْوٜىٰهْ كُوَ يَبَا دَاوُدَ نَصَرَا دُكْ وُرِنْدَ يَتَڢِے؞

¹⁵ دَاوُدَ يَيِ مُلْكِ عَكَنْ دُكَنْ إِسْرَٰٓءِيلَ، يَكُمَيِ شَرِيعَ مَيْ غَسْكِيَ دَ أَدَلْثِے غَ دُكَنْ جَمَعَ؞

¹⁶ يُواْوَبْ، وَنْدَ عَكٜىٰ ثٜىٰ دَ مَامَرْسَ ظٜىٰرُوِيَ، شِينٜىٰ شُوغَبَنْ سُواْجُواْجِ؞ يٜىٰهُواْشَڢَتْ طَنْ أَهِلُدْ شِينٜىٰ مَرُبُوثِنْ تَارِيحِ؞

¹⁷ ظَدُواكْ طَنْ أَهِتُبْ دَ أَهِمٜىٰلٜىٰكْ طَنْ أَبِيَتَرْ سُونٜىٰ ڢِرِسْتُواْثِے؞ سٜىٰرَيَ شِينٜىٰ مَرُبُوثِنْ؞

¹⁸ بٜىٰنَيَ طَنْ يٜىٰهُواْيِدَ شِينٜىٰ شُوغَبَنْ كٜىٰرٜىٰتِيَاوَا دَ ڢٜىٰلٜىٰتِيَاوَا، وَتُواْ سُواْجُواْجِ مَاسُ غَادِنْ دَاوُدَ؞ یَیَ مَظَا نَ دَاوُدَ كُمَ سُكَ كَسَنْثٜىٰ ڢِرِسْتُواْثِے؞