2 سَمَٰعِيلَ 21 - أَتَّوْرَتْ دَ أَنَّبَاوَا

دَاوُدَ يَيِ رَامُوَا دُواْمِنْ مُتَنٜىٰنْ غِبٜىٰيُوانْ

¹ أَ زَامَانِنْ دَ دَاوُدَ يَكٜىٰ سَرْكِے كُوَ، أَنْيِ يُنْوَ سُواْسَيْ حَرْ شٜىٰكَرَا عُكُ؞ دُواْمِنْ حَكَ دَاوُدَ يَيِ أَدُّعَ غَ يَهْوٜىٰهْ غَمٜىٰدَ يُنْوَ تَڧَسَرْ؞ يَهْوٜىٰهْ يَأَمْسَ يَثٜىٰ ‏«‏أَݣَويْ أَلْحَكِنْ جِنِ عَكَنْ طَالُوتَ دَ غِدَنْسَ سَبُواْدَ يَكَشٜىٰ مُتَنٜىٰنْ غِبٜىٰيُوانْ؞»‏

² سَرْكِے دَاوُدَ يَكِرَا مُتَنٜىٰنْ غِبٜىٰيُوانْ يَيِ مَغَنَ دَسُو؞ سُو مُتَنٜىٰنْ غِبٜىٰيُوانْ كُوَ بَدَغَ مُتَنٜىٰنْ إِسْرَٰٓءِيلَ بَ، سُو مُتَنٜىٰنْ أَلْعُمَّنْ أَمُواْرِيَاوَا نٜىٰ دَسُكَ رَغُ؞ تُنْدَا إِسْرَٰٓءِيلَاوَا سُنْ ضَنْڟٜىٰ ثٜىٰوَ بَذَاسُ كَشٜىٰ مُتَنٜىٰنْ غِبٜىٰيُوانْ بَ؞ عَمَّا طَالُوتَ يَيِ ڧُواْڧَرِ يَكَشٜىٰسُ دُكَ سَبُواْدَ كِيشِنْ دَ يَكٜىٰدَشِ دُواْمِنْ مُتَنٜىٰنْ إِسْرَٰٓءِيلَ دَ نَ يَهُودَ؞

³ دَاوُدَ يَثٜىٰ وَمُتَنٜىٰنْ غِبٜىٰيُوانْ ‏«‏مٜىٰنٜىٰنٜىٰ ذَنْيِ مُكُ؟ تَيَيَا ذَنْ ڠَرَ وَنَّنْ مُغُنْتَارْ دَ عَكَيِ مُكُ دُواْمِنْ كُ أَلْبَرْكَثِ جَمَعَرْ يَهْوٜىٰهْ، وَتُواْ غَادُوانْسَ؟»‏

⁴ سَيْ مُتَنٜىٰنْ غِبٜىٰيُوانْ سُكَثٜىٰ وَ دَاوُدَ ‏«‏بَذَنْثٜىٰنْ أَظُرْڢَا كُواْ ظِينَارِيَ نٜىٰ ذَيْ عِيَ شِرْيَمُ دَ طَالُوتَ كُواْ غِدَنْسَبَ؞ بَكُمَ ذَنْثٜىٰ عَكَشٜىٰ وَنِ عَ إِسْرَٰٓءِيلَ دُواْمِنْمُبَ؞»‏ دَاوُدَ يَتَمْبَيٜىٰسُ يَثٜىٰ ‏«‏تُواْ، مٜىٰ كُكٜىٰسُواْ إِنْيِمُكُ؟»‏

⁵ سُكَ أَمْسَ سُكَثٜىٰمَسَ ‏«‏مُتُمِنْدَ يَكَكَّشٜىٰمُ، يَكُمَيِ نِيَّ يَهَلَكَامُ دُواْمِنْ كَدَ مُسَامِ وُرِے عَكُواْعِنَ عَڧَسَرْ إِسْرَٰٓءِيلَ،

⁶ سَيْ كُمِيڧَ مَنَ یَیَنْسَ مَظَا بَݣَويْ؞ ذَامُ كَكَّشٜىٰسُ، مُكَكَّڢَ غَوَوَّكِنْسُ عَكَنْ إِتَاثٜىٰ أَ غِبٜىٰيَ، غَرِنْ طَالُوتَ، سَرْكِنْ دَ يَهْوٜىٰهْ يَذَاٻَا؞»‏ سَيْ سَرْكِے يَثٜىٰمُسُ ‏«‏تُواْ، ذَنْ مِيڧَ مُكُسُ؞»‏

⁷ عَمَّا سَبُواْدَ ضَنْڟُوَارْ دَ دَاوُدَ يَيِ دَ يُواْنَتَنْ طَنْ طَالُوتَ أَغَبَنْ يَهْوٜىٰهْ، بَيْ يَرْدَ يَبَادَ مٜىٰڢِبُواْشٜىٰتْ طَنْ يُواْنَتَنْ جِيكَنْ طَالُوتَ بَ؞

⁸ سَيْ سَرْكِے يَطَوْكِ أَرْمُواْنِ دَ مٜىٰڢِبُواْشٜىٰتْ یَیَ مَظَا نَ طَالُوتَ وَطَنْدَ رِظْڢَ یَرْ أَيْيَ تَحَيْڢَ مَسَ؞ يَكُمَ طَوْكِ یَیَ مَظَا بِيَرْ نَ مٜىٰرَبْ یَرْ طَالُوتَ، وَطَنْدَ تَحَيْڢَ وَ أَدِرِيٜىٰلْ طَنْ بَرْظِلَّيْ مُتُمِنْ مٜىٰهُواْلَ؞

⁹ دَاوُدَ يَمِيڧَسُ غَ مُتَنٜىٰنْ غِبٜىٰيُوانْ؞ سُو كُوَ سُكَ كَكَّشٜىٰسُ سُكَ كَكَّڢَ غَوَوَّكِنْسُ عَكَنْ إِتَاثٜىٰ عَبَبَّنْ تُدُ أَغَبَنْ يَهْوٜىٰهْ؞ دُكَنْسُ بَݣَويْ طِنْ سُكَ مُتُ تَرٜىٰ؞ أَنْ كَكَّشٜىٰسُ أَ لُواْكَثِنْ دَ عَكَڢَارَ غِرْبِنْ حَڟِنْ بَلٜىٰ؞

¹⁰ سَيْ رِظْڢَ یَرْ أَيْيَ، مَثٜىٰنْ دَ طَالُوتَ يَأَجِيٜىٰ أَدَا، تَݣُوشِ ڟُمُّواْكِ تَشِرْيَ وَكَنْتَ وُرِنْ ذَمَ عَتُدُنْ دَ غَوَوَّكِنْ سُكٜىٰ؞ تَا ذَوْنَ أَوُرِنْ دَغَ لُواْكَثِنْ دَ عَكَ ڢَارَ غِرْبِے حَرْ لُواْكَثِنْ دَ ضُوً دَامِنَ يَڢَاطِ عَكَنْ غَوَوَّكِنْ؞ دَ رَانَ تَكَنْ كُواْرِ ڟُنْڟَيٜىٰ دَغَ غَوَوَّكِنْ دَدَرٜىٰ كُمَ تَكَنْ كُواْرِ نَمُواْمِنْ دَاجِ دَغَ كَنْسُ؞

¹¹ عَكَ ڢَطَا وَ دَاوُدَ أَبِنْدَ رِظْڢَ یَرْ أَيْيَ تَكٜىٰيِ؞

¹² سَيْ دَاوُدَ يَتَڢِے وُرِنْ مُتَنٜىٰنْ يَبٜىٰشْ أَ غِلٜىٰيَدْ، يَسَا سُبَاشِ ڧَسُسُوَنْ طَالُوتَ دَ نَطَنْسَ يُواْنَتَنْ؞ تُنْدَا ثَنْ مُتَنٜىٰنْ يَبٜىٰشْ أَ غِلٜىٰيَدْ سُنْ سَاثِ غَوَوَّكِنْ طَالُوتَ دَ يُواْنَتَنْ دَغَ عِنْدَ ڢِلِسْتِيَاوَا سُكَ كَكَّڢَسُ عَكَنْ إِتَاثٜىٰ أَ ڢِيلِ نَثِكِنْ غَرِنْ بٜىٰتْ شَنْ، بَايَنْدَ ڢِلِسْتِيَاوَا سُكَ كَشٜىٰسُ عَبَبَّنْ تُدُنْ غِلْبُواْوَ؞

¹³ دَاوُدَ يَݣُوشِ ڧَسُسُوَنْ طَالُوتَ دَ نَ يُواْنَتَنْ دَ نَمُتَنٜىٰ بَݣَويْ نَنْ وَطَنْدَ مُتَنٜىٰنْ غِبٜىٰيُوانْ سُكَ كَشٜىٰ؞

¹⁴ سُكَ بِنّٜىٰ ڧَسُسُوَنْ طَالُوتَ دَ نَ يُواْنَتَنْ عَكَبَرِنْ كِشْ، بَابَنْ طَالُوتَ، أَ ظٜىٰلَ ثِكِنْ يَنْكِنْ بِلِيَامِنُ؞ عَكَ كُوَ ثِكَ دُكَنْ عُمَرْنِنْ سَرْكِے؞ بَايَنْ حَكَ، اللَّهْ يَأَمْسَ أَدُّعَرْسُ سَبُواْدَ ڧَسَرْ؞

يَاڧِ دَ ڧَتِّنْ ڢِلِسْتِيَاوَا

¹⁵ أَنَانً سَيْ يَاڧِ يَسَاكٜىٰ ٻَرْكٜىٰ ڟَكَانِنْ مُتَنٜىٰنْ إِسْرَٰٓءِيلَ دَ نَ ڢِلِسْتِ؞ دَ دَاوُدَ دَ مُتَنٜىٰنْسَ سُكَ غَنْ‌غَرَ سُكَيِ يَاڧِ دَ ڢِلِسْتِيَاوَا، سَيْ غَاجِيَ تَكَامَشِ؞

¹⁶ سَيْ إِشْبِبٜىٰنُوابْ، وَنِ ڧَتُوانْ مُتُمْ يَيِ ڟَمَّنِ ذَيْ عِيَ كَشٜىٰ دَاوُدَ؞ إِشْبِبٜىٰنُوابْ كُوَ يَنَ رِڧٜىٰ دَ مَاشِنْدَ يَكَيْ وَجٜىٰنْ كِلُواْ عُكُ دَ رَبِے نَتَغُلَّ، يَنَ كُمَ رَاتَيٜىٰ دَ سَابُوانْ تَكُواْبِے؞

¹⁷ عَمَّا أَبِشَيْ طَنْ ظٜىٰرُوِيَ يَتَيْمَكِ دَاوُدَ؞ يَبُغَ مُتُمِنْ ڢِلِسْتِيَ، يَكَشٜىٰشِ؞ سَيْ سُواْجُواْجِنْ دَاوُدَ سُكَ ضَنْڟٜىٰ سُكَثٜىٰ مَسَ ‏«‏بَذَاكَسَاكٜىٰ بِنْمُ ذُوَا وُرِنْ يَاڧِ بَ، دُواْمِنْ كَدَ عَكَشٜىٰكَ، ڢِتِلَرْ مُلْكٍ إِسْرَٰٓءِيلَ كُمَ تَمُتُ؞»‏

¹⁸ بَايَنْ وَنَّنْ عَكَ سَاكٜىٰيِنْ يَاڧِ دَ ڢِلِسْتِيَاوَا أَ غُوابْ؞ عَثِكِنْ يَاڧِنْ نٜىٰ سِبّٜىٰكَيْ مُتُمِنْ هُشَ يَكَشٜىٰ وَنِ ڧَتُواْ مَيْ سُونَ سَڢْ؞

¹⁹ عَكَ سَاكٜىٰيِنْ يَاڧِ دَ ڢِلِسْتِيَاوَا أَ غُوابْ؞ سَيْ عٜىٰلْهَنَنْ طَنْ يَايِرْ مُتُمِنْ بَيْتَلَحْمِ يَكَشٜىٰ طَنْعُوَنْ جَالُوتَ نَ غَتْ، وَنْدَ غِرْمَنْ سَنْدَنْ مَاشِنْسَ يَيِ كَمَ دَ تَٻَرْيَ؞

²⁰ عَكَ سَاكٜىٰيِنْ يَاڧِ أَ غَتْ، عِنْدَ أَݣَويْ وَنِ ڧَتُوانْ مُتُمْ مَيْ يَڟُ شِدَ عَكُواْوَنٜىٰ حَنُّ دَ كُمَ يَڟُ شِدَ عَكُواْوَثٜىٰ ڧَڢَا، وَتُواْ دُكَنْ يَڟُنْسَ عَشِرِنْ دَ حُطُ؞ شِمَا دَغَ ذُرِيَرْ ڧَتِّنْ مُتَنٜىٰنٜىٰ؞

²¹ دَ يَرٜىٰنَ مُتَنٜىٰنْ إِسْرَٰٓءِيلَ، سَيْ يُواْنَتَنْ طَنْ شِمٜىٰيَ طَنْعُوَنْ دَاوُدَ يَكَشٜىٰشِ؞

²² وَطَنَّنْ مُتَنٜىٰ حُطُ دَغَ ذُرِيَرْ ڧَتِّنْ مُتَنٜىٰ نَ غَتْ نٜىٰ؞ أَنْ كَشٜىٰسُ كُمَ تَهَنُّنْ دَاوُدَ دَ مَاسُ يِمَسَ حِدِمَ؞