2 سَمَٰعِيلَ 16 - أَتَّوْرَتْ دَ أَنَّبَاوَا

دَاوُدَ دَ ظِبَ

¹ سَعَدَّ دَاوُدَ يَوُثٜىٰ سَمَنْ تُدُنْ كَطَنْ، سَيْ ظِبَ، مَيْ حِدِمَرْ مٜىٰڢِبُواْشٜىٰتْ، يَسَدُ دَشِ؞ ظِبَ يَذُواْ دَ جَاكُنَ بِيُ طَوْكٜىٰ دَ دُنْڧُلٜىٰنْ غُرَاسَ طَرِے بِيُ دَ دُنْڧُلٜىٰنْ بُوسَشّٜىٰنْ إِنَبِے غُدَا طَرِے دَ سَابَبِّنْ یَیَنْ إِتَاثٜىٰ غُدَا طَرِے دَ سَلْكَرْ ضُوً إِنَبِے؞

² سَرْكِے كُوَ يَثٜىٰ وَ ظِبَ ‏«‏مٜىٰيَسَا كَكَٰوُاْ أَبُبُوَنَّنْ؟»‏ ظِبَ يَأَمْسَ يَثٜىٰ ‏«‏نَا كَٰوُاْ جَاكُنَنْ دُواْمِنْ عِيَلِنْ سَرْكِے سُهَوْ؞ غُرَاسَ دَ یَیَنْ إِتَاثٜىٰ كُمَ سَبُواْدَ مَاسُ يِمَكَ حِدِمَ سُثِ؞ سَعَنً ضُوً إِنَبِنْ كُوَ سَبُواْدَ دُكْ وَطَنْدَ سُكَ غَجِ أَدَاجِ سُشَا؞»‏

³ سَيْ سَرْكِے يَتَمْبَيٜىٰشِ يَثٜىٰ ‏«‏إِنَا مٜىٰڢِبُواْشٜىٰتْ جِيكَنْ مَيْغِدَنْكَ طَالُوتَ يَكٜىٰ؟»‏ ظِبَ يَأَمْسَ وَ سَرْكِے يَثٜىٰ ‏«‏يَنَ عَثِكِنْ عُرُوشَلِيمَ، غَمَا يَنَ ڟَمَّنِ ثٜىٰوَ يَنْذُ مُتَنٜىٰنْ غِدَنْ إِسْرَٰٓءِيلَ ذَاسُ مَيَرْ مَسَ دَ مُلْكٍ بَابَنْسَ طَالُوتَ؞»‏

⁴ سَرْكِے دَاوُدَ يَثٜىٰ مَسَ ‏«‏دَغَ يَوْ دُكْ أَبِنْدَ يَكٜىٰ نَ مٜىٰڢِبُواْشٜىٰتْ يَذَمَ نَاكَ!‏»‏ ظِبَ يَثٜىٰ ‏«‏رَنْكَيَدَطٜىٰ، سَرْكِے!‏ نَا رُسُنَ مَكَ؞ بَرِ إِنْ دِنْ‌غَ سَامُنْ ڢَضٍ جِنِ أَغَبَنْكَ حَكَ؞»‏

دَاوُدَ دَ شِمٜىٰيِ

⁵ سَعَدَّ سَرْكِے دَاوُدَ دَ مُتَنٜىٰنْسَ سُكَذُواْ كُسَدَ غَرِنْ بَهُرِمْ، سَيْ وَنِ مُتُمْ يَڢِتُواْ يَنَ تَذَاغِنْسَ؞ سُونَنْ وَنَّنْ مُتُمِنْ شِمٜىٰيِ نٜىٰ، طَنْ غٜىٰرَ، شِ دَنْ‌غِنْ طَالُوتَ نٜىٰ؞

⁶ شِمٜىٰيِ يَيِ تَجِڢَرْ دَاوُدَ دَ مَاسُ يِمَسَ حِدِمَ دَ دُوَڟُو، كُواْدَيَكٜىٰ دُكَنْ مُتَنٜىٰنْسَ دَ سُواْجُواْجِنْ سُنْ كٜىٰوَيٜىٰ سَرْكِے دَاوُدَ؞

⁷ شِمٜىٰيِ يَيِ تَذَاغِنْ دَاوُدَ يَنَ ثٜىٰوَ ‏«‏تَڢِے!‏ تَڢِے!‏ كَيْ مَيْ ظُبْدَ جِنِ!‏ مُتُمِنْ بَنْظَ!‏

⁸ يَهْوٜىٰهْ يَنَ رَامُوَا أَلْحَكِنْ جِنِنْ غِدَنْ طَالُوتَ عَكَنْكَ!‏ كَا ڨُوثٜىٰ مُلْكِ دَغَ حَنُّنْ طَالُوتَ؞ غَاشِ، يَوْ يَهْوٜىٰهْ يَابَادَ مُلْكِنْكَ غَ حَنُّنْ طَنْكَ أَبْسَلُوامْ؞ يَنْذُ تَاكَ تَا ڧَارٜىٰ دُواْمِنْ كَيْ مَيْ ظُبْدَ جِنِنٜىٰ!‏»‏

⁹ أَبِشَيْ طَنْ ظٜىٰرُوِيَ يَثٜىٰ وَسَرْكِے ‏«‏رَنْكَيَدَطٜىٰ!‏ دُوانْمٜىٰ كَبَرْ مَتَثّٜىٰنْ كَرٜىٰنَّنْ يَنَ ذَاغِنْكَ؟ بَرِ إِنْجٜىٰ إِنْيَنْكٜىٰ كَنْسَ؞»‏

¹⁰ سَرْكِے يَأَمْسَ يَثٜىٰ ‏«‏كُو یَیَنْ ظٜىٰرُوِيَ، إِنَا ضُوَنَ دَكُو؟ عِدَنْ يَنَ ذَاغِنَ نٜىٰ سَبُواْدَ يَهْوٜىٰهْ يَثٜىٰ مَسَ يَذَاغِ دَاوُدَ، تُواْ، وَنٜىٰنٜىٰ يَ إِسَ عَثٜىٰ، ‏‹‏دُوانْمٜىٰ كَيِ وَنَّنْ؟›‏ »‏

¹¹ دَاوُدَ يَكُمَثٜىٰ وَ أَبِشَيْ دَ مَاسُ يِمَسَ حِدِمَ ‏«‏عِدَنْ حَرْ طَانَ نَثِكِنَ يَنَ نٜىٰمَ يَكَشٜىٰنِ، بَلّٜىٰ وَنَّنْ مُتُمِنْ بِلِيَامِنُ!‏ كُبَرْشِ يَيِ تَذَاغِ، غَمَا يَهْوٜىٰهْ نٜىٰ يَثٜىٰمَسَ يَيِ؞

¹² وَتَڧِيلَ يَهْوٜىٰهْ ذَيْ دُوبَ وَنَّنْ وُلَڧَنْثِنَ يَكُمَ سَاكَ مِنِ دَ أَلْحٜىٰرِ سَبُواْدَ ذَاغٜىٰ ذَاغٜىٰنْ دَ شِمٜىٰيِ يَيِ مِنِ يَوْ؞»‏

¹³ سَيْ دَاوُدَ دَ مُتَنٜىٰنْسَ سُكَ ثِيغَبَدَ تَڢِيَ عَكَنْ حَنْيَ؞ شِمٜىٰيِ كُوَ يَنَ تَڢِيَ تَغٜىٰڢٜىٰنْ تُدُنْ يَنَ بِنْسُ يَنَ تَذَاغِنْ دَاوُدَ يَنَ جِڢَرْسَ دَ دُوَڟُو يَنَ كُمَ تَيَرْ مَسَ دَ ڧَسَا؞

¹⁴ دَ سَرْكِے دَ مُتَنٜىٰنْسَ سُكَ إِسَ عِنْدَ ذَاسُ، سُنْ كُوَ غَجِ سُواْسَيْ؞ سُكَ هُوتَ أَوُرِنْ؞

هُشَيْ يَا سَدُ دَ أَبْسَلُوامْ

¹⁵ أَنَ ثِكِنْ وَنَّنْ سَيْ أَبْسَلُوامْ دَ دُكَنْ مُتَنٜىٰنْ إِسْرَٰٓءِيلَ وَطَنْدَ سُكٜىٰ تَرٜىٰ دَشِ سُكَ شِغَ عُرُوشَلِيمَ؞ أَهِتُواْڢٜىٰلْ كُمَ يَنَ تَرٜىٰدَشِ؞

¹⁶ سَعَدَّ هُشَيْ مُتُمِنْ أَرْكِ أَبُواْكِنْ دَاوُدَ يَ إِسُواْ وُرِنْ أَبْسَلُوامْ، سَيْيَيِ مَغَنَ يَثٜىٰ ‏«‏رَنْكَيَدَطٜىٰ، سَرْكِے!‏ رَنْ سَرْكِے يَدَطٜىٰ!‏»‏

¹⁷ عَمَّا أَبْسَلُوامْ يَتَمْبَيٜىٰشِ يَثٜىٰ ‏«‏ڧَوْنَرْ دَ كَكٜىٰيِ وَ أَبُواْكِنْكَ كٜىٰنَنْ؟ دُوانْمٜىٰ بَكَبِے أَبُواْكِنْكَبَ؟»‏

¹⁸ هُشَيْ يَأَمْسَ يَثٜىٰ ‏«‏أَعَ، نِے إِنَ غُواْيُوانْ بَايَنْ وَنْدَ يَهْوٜىٰهْ دَ مُتَنٜىٰنَّنْ دَ كُمَ دُكَنْ مُتَنٜىٰنْ إِسْرَٰٓءِيلَ سُكَ ذَاٻَا؞ شِينٜىٰ ذَنْ كَسَنْثٜىٰ دَشِ؞

¹⁹ بَنْدَ حَكَمَا، وَ يَا كَمَاتَ إِنْيِمَسَ حِدِمَ إِنْ بَطَنْ دَاوُدَ بَ؟ كَمَرْ يَدَّ نَيِ وَبَابَنْكَ حِدِمَ، حَكَ ذَنْيِ مَكَ؞»‏

شَوَرَرْ أَهِتُواْڢٜىٰلْ

²⁰ أَبْسَلُوامْ يَجُويَ يَثٜىٰ وَ أَهِتُواْڢٜىٰلْ ‏«‏تُواْ، سَيْ كَبَامُ شَوَرَرْكَ؞ مٜىٰ ذَامُيِ؟»‏

²¹ أَهِتُواْڢٜىٰلْ يَثٜىٰ مَسَ ‏«‏كَتَڢِے كَݣُونَ دَ مَاتَانْدَ بَابَنْكَ يَبَرِ دُواْمِنْ سُلُورَ دَ غِدَنْ سَرْكِے؞ تَهَكَ دُكَنْ مُتَنٜىٰنْ إِسْرَٰٓءِيلَ ذَاسُجِ ثٜىٰوَ كَثِ مُتُنْثِنْ بَابَنْكَ؞ وَنَّنْ ذَيْ ڧَارَ ڧَرْڢَڢَ دُكَنْ مَاسُ غُواْيُوانْ بَايَنْكَ؞»‏

²² دُواْمِنْ حَكَ عَكَ شِرْيَ وَ أَبْسَلُوامْ طَنْ رُمْڢَ عَبِسَ غِدَنْ سَرْكِے؞ سَيْ أَبْسَلُوامْ يَشِغَ، أَعِدُوانْ دُكَنْ مُتَنٜىٰنْ إِسْرَٰٓءِيلَ يَݣُونَ دَ وَطَنَّنْ مَتَنْ دَ بَابَنْسَ يَ أَجِيٜىٰ؞

²³ أَ لُواْكَثِنَّنْ كُوَ شَوَرَرْ دَ أَهِتُواْڢٜىٰلْ يَكَنْ بَايَرْ عَكَنْ كَرْٻٜىٰتَ كَمَرْ مَغَنَرْ اللَّهْ ثٜىٰ؞ حَكَنَنْ نٜىٰ مُهِمَّنْثِنْ شَوَرَرْ أَهِتُواْڢٜىٰلْ يَكٜىٰ غَ دَاوُدَ دَ أَبْسَلُوامْ؞