2 سَمَٰعِيلَ 13 - أَتَّوْرَتْ دَ أَنَّبَاوَا

أَمْنُوانْ يَݣُونَ دَ یَرْعُوَرْ أَبْسَلُوامْ

¹ أَبْسَلُوامْ طَنْ دَاوُدَ يَنَدَ یَرْعُوَ مَيْݣَوْ سُواْسَيْ مَيْ سُونَ تَمَرْ؞ أَنَانً سَيْ أَمْنُوانْ طَيَ دَغَ ثِكِنْ یَیَنْ دَاوُدَ يَڢَارَ سُوانْ تَمَرْ؞

² أَبِنْ يَڟَنَنْتَاوَ أَمْنُوانْ، حَرْ يَجَٰوُاْ وَكَنْسَ ثِيوُاْ سَبُواْدَ یَرْعُوَرْسَ تَمَرْ؞ يَغَانٜىٰ ذَيْ ذَمَ دَ وُيَ يَسَدُ دَ تَمَرْ عِتَ كَطَيْ، غَمَا عِتَ بُدُرْوَثٜىٰ؞

³ عَمَّا أَمْنُوانْ يَنَدَ أَبُواْكِ مَيْ سُونَ يُواْنَدَبْ طَنْ شِمٜىٰيَ طَنْعُوَنْ دَاوُدَ؞ يُواْنَدَبْ يَنَدَ وَيُواْ سُواْسَيْ؞

⁴ يَتَمْبَيِ أَمْنُوانْ يَثٜىٰ ‏«‏دُوانْمٜىٰنٜىٰ نٜىٰ كُواْوَثٜىٰ سَاڢِيَ ڢُسْكَرْكَ عَٻَثٜىٰ تَكٜىٰ؟ كَيْ بَا يَرُوانْ سَرْكِے بَنٜىٰ؟ ڢَطَا مِنِ، مٜىٰنٜىٰنٜىٰ يَكٜىٰ ڢَرُوَ؟»‏ أَمْنُوانْ يَأَمْسَ يَثٜىٰ ‏«‏إِنَ سُوانْ تَمَرْ یَرْعُوَرْ طَنْعُوَنَ أَبْسَلُوامْ؞»‏

⁵ يُواْنَدَبْ يَثٜىٰ مَسَ ‏«‏كَݣُونْتَ أَغَدُوانْكَ، كَيِ كَمَرْ كَنَ ثِيوُاْ؞ عِدَنْ بَابَنْكَ يَذُواْ غَنِنْكَ، سَيْ كَثٜىٰ مَسَ كَنَ ضُواْڧُوانْسَ يَبَرْ یَرْعُوَرْكَ تَمَرْ تَذُواْ تَبَاكَ عَبِنْثِ؞ كَثٜىٰ، ‏‹‏إِنَ سُواْ تَذُواْ نَنْ تَدَڢَ مِنِ عَبِنْثِنْ أَعِدُواْنَ، تَكُمَسَا مِنِ دَ حَنُّنْتَ إِنْثِ؞›‏ »‏

⁶ سَيْ أَمْنُوانْ يَݣُونْتَ كَمَرْ يَنَ ثِيوُاْ؞ دَ سَرْكِے دَاوُدَ يَذُواْ غَنِنْسَ، سَيْ أَمْنُوانْ يَثٜىٰ مَسَ ‏«‏إِنَ ضُواْڧُوانْكَ أَ عَيْكَ یَرْعُوَتَ تَمَرْ تَذُواْ نَنْ؞ إِنَ سُواْ تَيِمِنِ وَيْنَ أَعِدُواْنَ إِنْثِ دَغَ حَنُّنْتَ؞»‏

⁷ دَاوُدَ يَعَيْكَ ذُوَا وُرِنْ تَمَرْ عَثِكِنْ غِدَا يَثٜىٰ ‏«‏كِتَڢِے غِدَنْ طَنْعُوَنْكِ أَمْنُوانْ، كِشِرْيَ مَسَ عَبِنْثِ؞»‏

⁸ سَيْ تَمَرْ تَتَڢِے غِدَنْ طَنْعُوَنْتَ، أَ عِنْدَ يَكٜىٰ ݣُونْثٜىٰ؞ تَا طٜىٰبِے غَارِ، تَݣُوٻَ، تَيِوَيْنَ أَعِدُوانْسَ؞

⁹ سَيْ تَطَوْكِ ݣُونُواْ تَجُويٜىٰ مَسَ، عَمَّا يَڧِثِ؞ أَمْنُوانْ كُوَ يَثٜىٰ وَمَاسُ حِدِمَرْسَ سُڢِتَ دُكَنْسُ؞ سَيْ دُكَ سُكَ ڢِتَ؞

¹⁰ سَعَنً أَمْنُوانْ يَثٜىٰ وَ تَمَرْ ‏«‏كِكَٰوُاْ مِنِ عَبِنْثِنْ عَثِكِنْ طَاكِنْ ݣُونْثِيَتَ؞ كِسَا مِنِ دَ حَنُّنْكِ إِنْثِ؞»‏ سَيْ تَمَرْ تَطَوْكِ وَيْنَرْ دَ تَتُواْيَ تَكَٰوُاْوَ طَنْعُوَنْتَ أَمْنُوانْ ثِكِنْ طَاكِنْ ݣُونْثِيَرْسَ؞

¹¹ عَمَّا دَ تَجٜىٰ كُسَدَشِ دُواْمِنْ يَثِ، سَيْ يَثَڢْكٜىٰتَ يَثٜىٰمَتَ ‏«‏یَرْعُوَتَ، ذُواْ كِݣُونَ دَنِے؞»‏

¹² عَمَّا تَمَرْ تَثٜىٰمَسَ ‏«‏حَبَ طَنْعُوَنَ!‏ كَدَ كَتِلَسْتَنِ؞ غَمَا بَيْ كَمَاتَ عَيِ إِرِنْ وَنَّنْ أَبُ عَثِكِنْ إِسْرَٰٓءِيلَ بَ!‏ كَدَ كَعَيْكَتَ وَنَّنْ مُوغُنْ أَبِنْ كُنْيَا؞

¹³ نِے كُمَ، إِنَا ذَنْسَا كَيْنَ سَبُواْدَ كُنْيَا؟ سَعَنً كَيْ كُمَ ڢَا؟ أَيْ، ذَاعَ مَيْدَكَيْ كَمَرْ طَيَ دَغَ ثِكِنْ یَنْ إِسْكَ نَ إِسْرَٰٓءِيلَ!‏ يَنْذُ إِنَ ضُواْڧُوانْكَ كَيِ مَغَنَ دَ سَرْكِے، بَذَيْ هَنَكَ كَأَوْرٜىٰنِبَ؞»‏

¹⁴ عَمَّا أَمْنُوانْ يَڧِ يَسَوْرَرٜىٰتَ؞ تُنْدَيَكٜىٰ يَڢِيتَ ڧَرْڢِے، سَيْ يَدَنّٜىٰتَ يَݣُونَ دَ عِتَ؞

¹⁵ بَايَنْ حَكَ أَمْنُوانْ يَڧِتَ دَ مُومُّنَرْ ڧِيَيَّ، حَرْ مَا يَدَّ يَڧِتَ يَڢِ يَدَّ يَسُواْتَ دَڢَرْكُواْ؞ سَيْ يَثٜىٰ مَتَ ‏«‏كِتَاشِ كِڢِتَ؞»‏

¹⁶ تَمَرْ تَثٜىٰ ‏«‏أَعَ طَنْعُوَنَ!‏ أَيْ، وَنَّنْ لَيْڢِے نَكُواْرِنَ ذَيْ يِمُونِ ڢِيٜىٰدَ وَنْدَ كَارِغَا كَا عَيْكَتَ!‏»‏ عَمَّا أَمْنُوانْ يَڧِ يَسَوْرَرٜىٰتَ؞

¹⁷ يَكِرَا سَوْرَيِ مَيْ حِدِمَرْسَ يَثٜىٰ مَسَ ‏«‏ڢِتَرْ دَ مَثٜىٰنَّنْ وَجٜىٰ، كَكُلّٜىٰ ڧُواْڢَرْ!‏»‏

¹⁸ سَيْ مَيْيِ مَسَ حِدِمَرْ نَنْ يَڢِتَرْدَ عِتَ وَجٜىٰ، سَعَنً يَكُلّٜىٰ ڧُواْڢَرْ؞ تَمَرْ كُوَ تَنَ سَنْيٜىٰ دَ دُواْغُوَرْ رِغَا مَيْ دُواْغَيٜىٰنْ حَنُّ، غَمَا حَكَ بُدُرْوَيْ نَغِدَنْ سَرْكِے سُكٜىٰ أَدُواْ؞

¹⁹ سَيْ تَمَرْ تَظُبَ تُواْكَ عَكَنْتَ سَبُواْدَ كُنْيَا، تَكَامَ رِغَرْتَ تَيَاغٜىٰ؞ تَا سَا حَنُّوَنْتَ عَكَيْ تَنَ تَڢِيَ تَنَ كُوكَا تَنَ إِيهُ سُواْسَيْ؞

²⁰ دَ أَبْسَلُوامْ طَنْعُوَنْتَ يَغَنْتَ سَيْ يَتَمْبَيٜىٰتَ يَثٜىٰ ‏«‏أَمْنُوانْ نٜىٰ يَݣُونَ دَكٜىٰ؟ يَنْذُ سَيْ كِيِ شِضُ، یَرْعُوَتَ؞ أَيْ، شِے طَنْعُوَنْكِ نٜىٰ؞ كَدَ كِيَرْدَ وَنَّنْ يَٻَاتَ مِكِ ذُوثِيَا سُواْسَيْ؞»‏ تَمَرْ كُوَ تَذَوْنَ أَغِدَنْ طَنْعُوَنْتَ أَبْسَلُوامْ، تَنَ ڢِدَّ ذُوثِيَا غَمٜىٰدَ رَايُوَا؞

²¹ دَ سَرْكِے دَاوُدَ يَجِ أَبِنْدَ يَڢَرُ، سَيْ يَيِ ڢُشِے سُواْسَيْ؞

²² أَبْسَلُوامْ كُمَ بَيْثٜىٰ وَ أَمْنُوانْ كُواْمٜىٰبَ، غَمَا يَاڧِ أَمْنُوانْ سَبُواْدَ يَٻَاتَ یَرْعُوَرْسَ تَمَرْ؞

أَبْسَلُوامْ يَكَشٜىٰ أَمْنُوانْ

²³ بَايَنْ شٜىٰكَرَا بِيُ، سَيْ أَبْسَلُوامْ يَسَا عَ أَسْكٜىٰ غَاشِنْ تُمَكِنْسَ أَ بَعَلْ حَزُوارْ دَيَكٜىٰ كُسَدَ يَنْكِنْ ذُرِيَرْ إِڢْرَيِمْ؞ يَكُمَ غَيَّثِ دُكَنْ یَیَ مَظَا نَسَرْكِے؞

²⁴ أَبْسَلُوامْ يَجٜىٰ وُرِنْ سَرْكِے يَثٜىٰ مَسَ ‏«‏رَنْكَيَدَطٜىٰ!‏ مَاسُ أَسْكِنْ غَاشِنْ تُمَكِ سُنْ ذُواْ مِنِ عَيْكِ؞ كُواْ ذَاكَذُواْ دَ دَتَّاوَنْكَ مُيِ بِكٍ تَرٜىٰ؟»‏

²⁵ سَيْ سَرْكِے يَأَمْسَ مَسَ يَثٜىٰ ‏«‏أَعَ طَانَ، بَذَامُ تَڢِے دُكَ بَ دُواْمِنْ ذَامُيِ مَكَ يَوَ؞»‏ أَبْسَلُوامْ يَنَاثٜىٰ مَسَ، عَمَّا دَاوُدَ يَڧِ؞ سَيْ دَيْ يَسَا مَسَ أَلْبَرْكَ؞

²⁶ أَبْسَلُوامْ يَثٜىٰ ‏«‏تُواْ، عِدَنْ بَذَاكَ ذُوابَ، سَيْ كَسَا طَنْعُوَنَ أَمْنُوانْ يَذُواْ تَرٜىٰدَمُو؞»‏ دَاوُدَ يَتَمْبَيٜىٰشِ يَثٜىٰ ‏«‏دُوانْمٜىٰ أَمْنُوانْ ذَيْ تَڢِے تَرٜىٰدَكَيْ؟»‏

²⁷ عَمَّا أَبْسَلُوامْ يَنَاثٜىٰ مَسَ حَرْ دَاوُدَ يَيَرْدَ أَمْنُوانْ دَ سَوْرَنْ یَیَ مَذَنْ سَرْكِے سُتَڢِے تَرٜىٰ دَشِ؞

²⁸ سَيْ أَبْسَلُوامْ يَعُمَرْثِ مَاسُ يِمَسَ حِدِمَ يَثٜىٰ ‏«‏كُلُورَ، أَ لُواْكَثِنْ دَ أَمْنُوانْ يَكٜىٰ جِنْ دَاطِنْ ضُوً إِنَبِے، سَعَدَّ نَثٜىٰ مُكُ كُبُغِ أَمْنُوانْ، سَيْ كُكَشٜىٰشِ؞ كَدَ كُجِڟُواْرُواْ غَمَا نِنٜىٰ نَا عُمَرْثٜىٰكُ؞ كُيِ ڧَرْڢِنْ ذُوثِيَا بَابُوَسَ؞»‏

²⁹ سَيْ مَاسُيِ وَ أَبْسَلُوامْ حِدِمَ سُكَ كَشٜىٰ أَمْنُوانْ كَمَرْ يَدَّ أَبْسَلُوامْ يَعُمَرْثٜىٰسُ؞ سَوْرَنْ یَیَ مَذَنْ سَرْكِے كُوَ سُكَتَاشِ دَ غُدُ، كُواْوَ عَكَنْ جَاكِنْ دُواْكِنْسَ؞

³⁰ سَعَدَّ سُكٜىٰ كَنْ حَنْيَرْ كُواْمَاوَا، سَيْ لَابَرِ يَكَيْ كُنّٜىٰنْ دَاوُدَ ثٜىٰوَ أَبْسَلُوامْ يَكَشٜىٰ دُكَنْ یَیَ مَذَنْ سَرْكِے، كُواْ طَيَ بَيْ ڟِيرَبَ؞

³¹ سَرْكِے دَاوُدَ يَتَاشِ يَيَاغٜىٰ رِغَرْسَ يَݣُونْتَ عَڧَسَا سَبُواْدَ بَڧِنْ ثِكِ؞ حَكَ مَاسُ يِمَسَ حِدِمَ وَطَنْدَ سُكٜىٰ تَرٜىٰ دَشِ سُو مَا سُكَ يَيَّاغٜىٰ رِيغُنَنْسُ؞

³² عَمَّا يُواْنَدَبْ طَنْ شِمٜىٰيَ طَنْعُوَنْ دَاوُدَ يَثٜىٰ وَ دَاوُدَ ‏«‏رَنْكَيَدَطٜىٰ!‏ كَدَ كَطَوْكَ أَنْكَشٜىٰ دُكَنْ یَیَ مَذَنْكَ؞ أَمْنُوانْ نٜىٰ كَطَيْ عَكَ كَشٜىٰ؞ أَبْسَلُوامْ يَشِرْيَ حَكَ تُنْ رَانَرْ دَ أَمْنُوانْ يَتِلَسْتَ یَرْعُوَرْسَ تَمَرْ تَݣُونَ دَشِ؞

³³ سَبُواْدَ حَكَ، رَنْكَيَدَطٜىٰ، كَدَ كَيِ تُنَانِ ثٜىٰوَ دُكَنْ یَیَنْكَ نٜىٰ عَكَ كَشٜىٰ؞ أَمْنُوانْ نٜىٰ كَطَيْ يَمُتُ؞»‏

³⁴ أَنَ ثِكِنْ حَكَ سَيْ أَبْسَلُوامْ يَغُدُ؞ سَيْ سَوْرَيِنْ دَيَكٜىٰ غَادِنْ يَدُوبَ يَهَنْ‌غِ مُتَنٜىٰ دَيَوَ سُنَ ذُوَا عَكَنْ حَنْيَ عَبَايَنْسَ تَوَجٜىٰنْ غٜىٰڢٜىٰنْ تُدُنْ؞

³⁵ يُواْنَدَبْ يَثٜىٰ وَسَرْكِے ‏«‏رَنْكَيَدَطٜىٰ!‏ غَا یَیَنْكَ سُنْ ذُواْ كَمَرْ يَدَّ نَڢَطَا؞»‏

³⁶ يَنَ ڧَارٜىٰ مَغَنَ كٜىٰنَنْ، سَيْغَا یَیَنْ سَرْكِے سُكَ إِسُواْ، سُكَ ڢَشٜىٰ دَ كُوكَا؞ سَيْ دَاوُدَ دَ مَاسُ حِدِمَرْسَ سُو مَا سُكَيِ كُوكَا مَيْ ذَاڢِ؞

³⁷ أَبْسَلُوامْ يَغُدُ ذُوَا وُرِنْ تَلْمَيْ طَنْ أَمِّهُدْ، سَرْكِنْ غٜىٰشُرْ؞ سَرْكِے دَاوُدَ كُوَ يَيِ كُوكَنْ طَنْسَ أَمْنُوانْ ݣُونَ دَ ݣُونَكِے؞

³⁸ بَايَنْدَ أَبْسَلُوامْ يَغُدُ ذُوَا غٜىٰشُرْ يَذَوْنَ عَثَنْ حَرْ شٜىٰكَرَا عُكُ؞

³⁹ دَ سَرْكِے دَاوُدَ يَدَيْنَ دَامُوَ غَمٜىٰدَ مُتُوَرْ أَمْنُوانْ، سَيْ يَكُواْمَ يَنَ مَرْمَرِنْ غَنِنْ أَبْسَلُوامْ؞