2 بِتْرُسْ 3 - أَتَّوْرَتْ دَ أَنَّبَاوَا

أَلْڧَوَرِنْ دَاوُاْوَرْ عِيسَىٰ

¹ یَنْعُوَ وَطَنْدَ نَكٜىٰ ڧَوْنَ، وَنَّنْ عِتَثٜىٰ وَسِيڧَاتَ تَبِيُ ذُوَا غَرٜىٰكُ؞ عَثِكِنْ دُكَنْسُ بِيُ كُوَ إِنَ تُنَ مُكُ دَ وَطَنَّنْ أَبُبُوَ دُواْمِنْ إِنْظُغَكُ كُيِ تُنَانِ مَيْ ڟَبْتَ أَ ذُوثِيَارْكُ؞

² إِنَ سُواْ كُمَ كُتُنَ دَ أَبُبُوَنْ دَ أَنَّبَاوَا مَاسُ ڟَرْكِے نَدَا سُكَ ڢَطِ دَ كُمَ عُمَرْنِنْ دَ عُبَنْ‌غِجِ مَيْ ثٜىٰتُواْ يَڢَطِ تَبَاكِنْ مَنْذَنِّےنْدَ يَعَيْكُواْ وُرِنْكُ؞

³ دَ ڢَرْكُواْ دَيْ، كُغَانٜىٰ دَ وَنَّنْ ثٜىٰوَ عَڧَرْشٜىٰنْ زَامَانِ مَاسُبَعَ ذَاسُ ڢِتُواْ سُنَا يِمُكُ بَعَ، سُنَ كُمَ بِنْ مُوغُوَرْ شَعَوَرْ جِكِنْسُ؞

⁴ ذَاسُثٜىٰ ‏«‏أَشٜىٰ، بَ عِيسَىٰ يَا يِمُكُ أَلْڧَوَرِ ثٜىٰوَ ذَيْسَاكٜىٰ دَاوُاْوَ بَ؟ تُواْ، إِنَا يَكٜىٰ؟ كَاكَنِّنْمُ سُنْ بَرْ دُونِيَا تُنْتُنِ، عَمَّا دُكَنْ كُواْمٜىٰ يَثِيغَبَ بَاسَكٜىٰوَ تُنْڢَرْكُوانْ حَلِتَّ؞»‏

⁵ مَاسُ ڢَطِنْ حَكَ دَيْ دَغَنْ‌غَنْ سُكٜىٰ ڧِنْ كُلَ دَ ثٜىٰوَ تَوُرِنْ كَلْمَرْ اللَّهْ نٜىٰ أَدَا سَمَ دَ ڧَسَا سُكَ كَسَنْثٜىٰ؞ دَغَ ضُوَ نٜىٰ عَكَ صِڢَّتَا ڧَسَا، ڧَسَا كُوَ تَكَسَنْثٜىٰ دَ ضُوَ كٜىٰوَيٜىٰ دَ عِتَ؞

⁶ تَوُرِنْ ضُوَ نٜىٰ كُوَ عَكَ هَلَّكَ دُونِيَا تَوَنْثَنْ زَامَانِ، لُواْكَثِنْ دَ بَبَّنْ ضُوَ يَذُواْ يَشَا كَنْتَ؞

⁷ تَوُرِنْ كَلْمَرْ نَنْ كُوَ، سَمَ دَ ڧَسَا وَطَنْدَ سُكٜىٰ أَنَنْ يَنْذُ، سُنَ جِرَا أَ هَلَكَاسُ دَ وُتَا؞ اللَّهْ يَا أَجِيٜىٰسُ حَرْ ذُوَا رَانَرْ دَ ذَاعَيِ وَمَرَسَ حَلِنْ اللَّهْ حُكُنْثِ، أَ هَلَكَاسُ؞

⁸ عَمَّا يَا كُو یَنْعُوَ وَطَنْدَ نَكٜىٰ ڧَوْنَ، أَبُ طَيَ وَنْدَ بَانَسُواْ كُمَنْتَادَشِ، شِينٜىٰ ݣُونَ طَيَ أَوُرِنْ عُبَنْ‌غِجِ كَمَرْ شٜىٰكَرَا دُبُو يَكٜىٰ، شٜىٰكَرُ دُبُو كُمَ كَمَرْ ݣُونَ طَيَ نٜىٰ؞

⁹ وَطَنْسُ سُنَ ثٜىٰوَ عُبَنْ‌غِجِ يَنَ جَنْ جِكِے غَمٜىٰدَ ثِكَ أَلْڧَوَرِنْسَ؞ أَيْ، بَهَكَ بَنٜىٰ؞ حَڧُرِ يَكٜىٰيِ دَكُو؞ بَايَسُواْ وَنِ يَهَلَّكَ، سَيْدَيْ كُواْوَ يَذُواْ يَتُوبَ؞

¹⁰ عَمَّا حَڧِيڧَ رَانَرْ عُبَنْ‌غِجِ ذَاتَذُواْ كَمَرْ ٻَرَوُاْ، بَا لَابَرِ؞ أَ لُواْكَثِنْ نٜىٰ سَرَرِنْ سَمَ ذَيْٻَثٜىٰ دَ ڧَارَ مَيْ ڧَرْڢِے؞ دُكَنْ أَبُبُوَنْ دَ عَكَ طَوْكَ عَكَيِ سَمَ دَ ڧَسَا دَسُو ذَاسُ ڧُواْنٜىٰ سُهَلَّكَ؞ دُونِيَا دَ دُكَنْ أَبِنْدَ يَكٜىٰ عَثِكِنْتَ ذَاسُ ٻَثٜىٰ؞

¹¹ تُنْدَيَكٜىٰ دُكَنْ أَبُبُوَنَّنْ ذَاعَ هَلَكَاسُ حَكَ، وَنٜىٰ إِرِنْ مُتَنٜىٰ يَا كَمَاتَ كُكَسَنْثٜىٰ؟ سَيْ كُيِ رَايُوَا مَيْ ڟَرْكِے، مَيْ حَلِ إِرِنَّ اللَّهْ،

¹² يَايِنْ دَ كُكٜىٰ مَرْمَرِنْ ذُوَانْ رَانَرْ اللَّهْ، حَرْ كُنَ ڧُواْڧَرِ كُسَا رَانَرْ نَنْ تَذُواْ دَ سَوْرِ؞ وَتُواْ رَانَرْ دَ ذَاعَ كُنَّ وَ سَمَّيْ وُتَا، كُمَ دُكَنْ أَبُبُوَنْ دَ عَكَ طَوْكَ عَكَيِ سَمَ دَ ڧَسَا دَسُو ذَاسُ نَرْكٜىٰ ثِكِنْ ذَاڢِنْ وُتَا؞

¹³ عَمَّا بِسَغَ أَلْڧَوَرِنْ اللَّهْ، مُو مُنَ مَرْمَرِنْ سَابُوانْ سَمَّيْ دَ سَابُوَرْ ڧَسَا، عِنْدَ أَدَلْثِے ذَيْ كَسَنْثٜىٰ كُلُّمْ؞

¹⁴ سَبُواْدَ حَكَ، یَنْعُوَ وَطَنْدَ نَكٜىٰ ڧَوْنَ دَيَكٜىٰ كُنَ مَرْمَرِنْ ذُوَانْ رَانَرْ، سَيْ كُيِ إِيَاكَثِنْ ڧُواْڧَرِنْكُ كُيِ ذَمَنْكُ أَغَبَنْ اللَّهْ بَاتَرٜىٰدَ وَنِ أَبِنْ زَرْغِ كُواْ تَبُواْبَ؞ كُيِ ذَمَ أَغَبَنْسَ دَ سَلَمَ؞

¹⁵ كُتُنَ ثٜىٰوَ دَلِيلِنْدَ يَسَا عُبَنْ‌غِجِنْمُ يَكٜىٰ حَڧُرِ شِينٜىٰ دُواْمِنْ مُتَنٜىٰ سُسَامِ ثٜىٰتُواْ؞ حَكَ مَا طَنْعُوَنْمُ بُلُسْ وَنْدَ مُكٜىٰ ڧَوْنَ يَارِغَا يَرُبُوتَ مُكُ بِسَغَ حِكِمَرْ دَ اللَّهْ يَبَاشِ؞

¹⁶ كُلُّمْ يَنَ مَغَنَ عَكَنْ إِرِنْ وَطَنَّنْ أَبُبُوَ عَثِكِنْ دُكَنْ وَسِيڧُنْسَ؞ عَثِكِنْ وَسِيڧُنْسَ كُوَ أَݣَويْ وَطَنْسُ أَبُبُوَنْ دَسُكٜىٰ دَ وُيَرْ غَانٜىٰوَ، وَطَنْدَ وَطَنْسُ مُتَنٜىٰ مَاسُ رَشِنْ غَانٜىٰوَ، مَرَسَ ڧَرْڢِے ثِكِنْ بَنْ‌غَسْكِيَ، سُكٜىٰ جُويَا مَعَنَرْسُ؞ حَكَ مَا سُكٜىٰيِ دَسَوْرَنْ رُبُوتَتُّنْ كَلْمُواْمِنْ اللَّهْ؞ أَيْ، سُنَ جَٰوُاْ وَكَنْسُ هَلَّكَنٜىٰ؞

¹⁷ سَبُواْدَ حَكَ، يَا كُو یَنْعُوَ وَطَنْدَ نَكٜىٰ ڧَوْنَ دَيَكٜىٰ كُنْ رِغَا كُنْ سَنْ دَ وَطَنَّنْ، سَيْ كُلُورَ دُواْمِنْ كَدَ كُواْيَرْوَرْ ڧَضْيَا تَمَاسُ مُغُنْتَا تَݣُوشِ حَنْكَلِنْكُ، حَرْ كُڢَاطِ دَغَ تَبَّتَاثِّيَرْ ڟَيَاوَرْكُ؞

¹⁸ أَ مَيْمَكُوانْ حَكَ، سَيْ كُيِتَيِنْ غِرْمَ ثِكِنْ أَلْحٜىٰرِنْ عُبَنْ‌غِجِنْمُ عِيسَىٰ أَلْمَسِيحُ مَيْ ثٜىٰتُوانْمُ، كُكُمَ ڧَارُ ثِكِنْ سَنِنْسَ كُواْوَنٜىٰ لُواْكَثِ؞ طَوْكَكَا تَا تَبَّتَا أَغَرٜىٰشِ عَيَنْظُ دَ كُمَ حَرْ أَبَدَا؞ أَمِينْ؞