2 سَرَاكُنَ 5 - أَتَّوْرَتْ دَ أَنَّبَاوَا

أَنْ وَرْكَرْ دَ نَعَمَنْ

¹ نَعَمَنْ كُوَ شُوغَبَنْ سُواْجُواْجِنْ سَرْكِنْ سُورِيَ؞ سَرْكِنْ سُورِيَ يَنَ غِرْمَمَ شِ يَنَ كُمَ جِنْ دَاطِنْسَ ڨُورَيْ، دُواْمِنْ تَهَنُّنْسَ نٜىٰ يَهْوٜىٰهْ يَبَا سُرِيَاوَا نَصَرَا؞ شِ سُواْجَ مَيْ عِيَ يَاڧِ نٜىٰ، عَمَّا يَنَدَ ثُوتَرْ ڢَتَرْ جِكِے؞

² دَا ثَنْ سُرِيَاوَا سُنْ كَيْ هَرِ عَڧَسَرْ إِسْرَٰٓءِيلَ، سُكَ ڨُوثٜىٰ وَتَ ڧَرَمَرْ يَارِنْيَ دَغَ وُرِنْ، تَذَمَ مَيْيِ وَمَاتَرْ نَعَمَنْ حِدِمَ؞

³ وَتَرَانَ يَارِنْيَرْ تَثٜىٰ وَمَاتَرْ نَعَمَنْ ‏«‏دَاعَثٜىٰ مَيْغِدَا ذَيْ تَڢِے وُرِنْ أَنَّبِنْدَ يَكٜىٰ عَبِرْنِنْ سَمَرِيَ دَ ذَيْ وَرْكٜىٰ دَغَ ثُوتَرْ ڢَتَرْ جِكِنْسَ؞»‏

⁴ نَعَمَنْ يَتَڢِے وُرِنْ سَرْكِے يَڢَطَا مَسَ أَبِنْدَ يَارِنْيَرْ نَنْ دَغَ ڧَسَرْ إِسْرَٰٓءِيلَ تَڢَطَا مَسَ؞

⁵ سَرْكِنْ سُورِيَ يَثٜىٰ ‏«‏كَتَڢِے؞ ذَنْ رُبُوتَ وَسِيڧَ غَمٜىٰدَ كَيْ، كَكَيْ وَسَرْكِنْ إِسْرَٰٓءِيلَ؞»‏ سَيْ نَعَمَنْ يَتَاشِ يَطَوْكِ أَظُرْڢَا دُبُو تَلَاتِنْ دَ ظِينَارِيَ دُبُو شِدَ دَ رِيغُنَ كَشِ غُواْمَ؞

⁶ يَكَيْ وَسَرْكِنْ إِسْرَٰٓءِيلَ وَسِيڧَ وَدَّ تَكٜىٰثٜىٰوَ ‏«‏دَ وَنَّنْ وَسِيڧَ نَكٜىٰ غَبَاتَرْ مَكَ دَ مَيْ حِدِمَتَ نَعَمَنْ؞ إِنَ سُواْ كَوَرْكَرْ دَشِ دَغَ ثُوتَرْ ڢَتَرْ جِكِنْسَ؞»‏

⁷ سَعَدَّ سَرْكِنْ إِسْرَٰٓءِيلَ يَكَرَنْتَ وَسِيڧَرْ، سَيْ يَيَيَّاغٜىٰ رِيغُنَنْسَ دُوانْ بَڧِنْ ثِكِ يَثٜىٰ ‏«‏نِے اللَّهْ نٜىٰ، مَيْ عِيَ كَشٜىٰ كُواْ مَيْ عِيَ بَادَ رَيْ؟ دُوانْمٜىٰ سَرْكِنْ سُورِيَ ذَيْ عَيْكُواْ دَ سَڧُواْ ثٜىٰوَ إِنْ وَرْكَرْدَ مُتُمْ دَغَ ثُوتَرْ ڢَتَرْ جِكِنْسَ؟ دُوبِے يَدَّ مُتُمِنَّنْ يَكٜىٰ نٜىٰمَنَ دَ ڢَطَ!‏»‏

⁸ عَمَّا دَ أَلْيَسَعَ مُتُمِنْ اللَّهْ يَجِ ثٜىٰوَ سَرْكِنْ إِسْرَٰٓءِيلَ يَيَيَّاغٜىٰ رِيغُنَنْسَ، سَيْ يَعَيْكَ مَسَ دَ سَڧُواْ يَثٜىٰ ‏«‏دُوانْمٜىٰ كَا يَيَّاغٜىٰ رِيغُنَنْكَ؟ تُرُواْ شِ وُرِينَ، ذَيْ كُوَ سَنِ ثٜىٰوَ أَݣَويْ أَنَّبِے عَ إِسْرَٰٓءِيلَ؞»‏

⁹ سَيْ نَعَمَنْ يَتَڢِے دَ دَوَكِنْسَ دَ كٜىٰكُنَنْ دُواْكِنْسَ، يَڟَيَ أَغَبَنْ غِدَنْ أَلْيَسَعَ؞

¹⁰ أَلْيَسَعَ يَعَيْكَرْ دَ طَنْ عَيْكَ يَثٜىٰ وَ نَعَمَنْ يَجٜىٰ كُواْغِنْ يُواْدَنْ يَنُڟٜىٰ سَوْ بَݣَويْ ثِكِنْ ضُوً، ڢَتَرْ جِكِنْسَ ذَيْ كُوَ وَرْكٜىٰ يَذَمَ لَاڢِيَيّٜىٰ؞

¹¹ عَمَّا نَعَمَنْ يَيِ ڢُشِے يَكَامَ حَنْيَ يَنَ ثٜىٰوَ ‏«‏نَاثٜىٰ كُواْ أَنَّبِنْ ذَيْڢِتَ ذُوَا وُرِينَ، يَڟَيَ أَغَبَنَ، يَيِ أَدُّعَ غَ يَهْوٜىٰهْ اللَّهْ نْسَ، سَعَنً يَسَا حَنُّنْسَ يَتَٻَ وُرِنْ دُواْمِنْ إِنْ وَرْكٜىٰ؞

¹² كُواْغِنْ دِمَشْڧُ نَنْ بِيُ، أَبَنَ دَ ڢَرْڢَرْ، بَسُڢِ دُكَنْ ضُوَيٜىٰنْ إِسْرَٰٓءِيلَ بَ؟ أَيْ دَ نَيِ وَنْكَ عَثِكِنْسُ دَ نَسَامِ لَاڢِيَ؞»‏ سَيْ يَجُويَ دَ ڢُشِے يَتَڢِے؞

¹³ عَمَّا مَاسُ يِمَسَ حِدِمَ سُكَذُواْ وُرِنْسَ سُكَثٜىٰ مَسَ ‏«‏بَابَ، دَاعَثٜىٰ أَنَّبِنْ يَعُمَرْثٜىٰكَ كَيِ وَنِ بَبَّنْ أَبُ دَ بَذَاكَيِبَ؟ بَلّٜىٰ ڢَا يَثٜىٰ مَكَ كَوَيْ كَتَڢِے كَيِ وَنْكَ ذَاكَ وَرْكٜىٰ؟»‏

¹⁴ سَبُواْدَ حَكَ نَعَمَنْ يَغَنْ‌غَرَ ذُوَا كُواْغِنْ يُواْدَنْ يَنُڟَ كَنْسَ سَوْ بَݣَويْ بِسَغَ كَلْمَرْ مُتُمِنْ اللَّهْ؞ سَيْ ڢَتَرْ جِكِنْسَ يَكُواْمَ كَمَرْ نَطَنْ يَرُواْ، يَكُوَ وَرْكٜىٰ؞

¹⁵ يَكُواْمَ وُرِنْ مُتُمِنْ اللَّهْ تَرٜىٰدَ دُكَنْ مُتَنٜىٰنْسَ؞ يَذُواْ غَبَنْ أَلْيَسَعَ سَيْيَثٜىٰ مَسَ ‏«‏يَنْذُ نَسَنِ ثٜىٰوَ بَابُ اللَّهْ كُواْعِنَ عَدُونِيَا سَيْ عَ إِسْرَٰٓءِيلَ؞ إِنَ ضُواْڧُوانْكَ، يَا مَيْغِرْمَ، كَكَرْٻِ ݣَوْتَادَغَ غَرٜىٰنِ؞»‏

¹⁶ أَلْيَسَعَ يَأَمْسَ يَثٜىٰ ‏«‏نَا ضَنْڟٜىٰ دَ سُونَنْ يَهْوٜىٰهْ مَيْ رَيْ، وَنْدَ نَكٜىٰ بَوْتَا مَسَ، بَذَنْ كَرْٻِ كُواْمٜىٰبَ؞»‏ نَعَمَنْ يَمَاڟَ مَسَ يَكَرْٻَ، عَمَّا يَڧِ؞

¹⁷ سَيْ نَعَمَنْ يَثٜىٰ ‏«‏عِدَنْ بَذَاكَ كَرْٻَبَ، تُواْ، كَبَرْنِ إِنْ طِبَ غَارِنْ ڧَسَرْكُ وَنْدَ جَاكُنَنْ دُواْكِ بِيُ ذَاسُ عِيَ طَوْكَ عَكَيْ مِنِ غِدَا؞ غَمَا دَغَ يَنْذُ بَذَنْسَاكٜىٰ مِيڧَ هَدَايَ تَڧُواْنَاوَا كُواْ وَطَنْسُ هَدَايُ غَ وَنِ اللَّهْ بَ، سَيْدَيْ يَهْوٜىٰهْ؞

¹⁸ عَمَّا إِنَ ڢَاتَا يَهْوٜىٰهْ ذَيْ غَاڢَرْتَا مِنِ أَبُ طَيَ؞ بَرِ يَغَاڢَرْتَا مِنِ سَعَدَّ نَرِڧٜىٰ سَرْكِينَ دَ حَنُّ ذُوَا طَاكِنْ غُنْكِ رِمُّوانْ دُواْمِنْ سُجَّدَ دَ كُمَ سَعَدَّ نَرُسُنَ عَثِكِنْ طَاكِنْ وَنَّنْ اللَّهْ‌نْ سُورِيَ؞»‏

¹⁹ أَلْيَسَعَ يَثٜىٰ مَسَ ‏«‏كَسَوْكَ لَاڢِيَ؞»‏ سَيْ نَعَمَنْ يَتَڢِے؞ عَمَّا تُنْ نَعَمَنْ بَيْيِ نٜىٰسَ سُواْسَيْبَ،

ݣُوطَيِنْ غٜىٰهَظِ

²⁰ سَيْ غٜىٰهَظِ مَيْ حِدِمَرْ أَلْيَسَعَ، مُتُمِنْ اللَّهْ، يَثٜىٰ وَرَنْسَ ‏«‏غَاشِ ڢَا، مَيْغِدَانَ يَبَرْ نَعَمَنْ مُتُمِنْ سُورِيَنَّنْ يَتَڢِے حَكَنَنْ؞ بَيْ كَرْٻِ كُواْمٜىٰ أَ حَنُّنْسَبَ؞ نَا ضَنْڟٜىٰ دَ سُونَنْ يَهْوٜىٰهْ مَيْ رَيْ، ذَنْبِيشِ إِنْ كَرْٻِ وَنِ أَبُ دَغَ حَنُّنْسَ؞»‏

²¹ سَيْ غٜىٰهَظِ يَبِے نَعَمَنْ أَغُجٜىٰ؞ سَعَدَّ نَعَمَنْ يَغَ وَنِ يَنَ بِنْسُ دَ غُدُ، سَيْ يَسَوْكَ دَغَ كٜىٰكٜىٰنْ دُواْكِنْ يَتَرْيٜىٰشِ يَثٜىٰ ‏«‏لَاڢِيَ كُوَ؟»‏

²² غٜىٰهَظِ يَأَمْسَ يَثٜىٰ ‏«‏كُواْمٜىٰ لَاڢِيَ لَوْ؞ شُوغَبَنَ نٜىٰ يَعَيْكٜىٰنِ وُرِنْكَ ثٜىٰوَ يَنْذُ مُتَنٜىٰ بِيُ دَغَ ڧُنْ‌غِيَرْ أَنَّبَاوَا سُنْ شِغُواْ دَغَ يَنْكِنْ تُدَّنْ إِڢْرَيِمْ؞ يَنَ ضُواْڧُواْ كَبَاسُ أَظُرْڢَا دُبُو عُكُ دَ رِيغُنَ كَشِ بِيُ؞»‏

²³ نَعَمَنْ يَأَمْسَ يَثٜىٰ ‏«‏كَكَرْٻِ أَظُرْڢَا دُبُو شِدَ؞»‏ نَعَمَنْ كُوَ يَمَاڟَ مَسَ يَكَرْٻِ أَظُرْڢَا دُبُو شِدَ، يَڧُنْسَ مَسَ عَثِكِنْ جَكَ بِيُ، تَرٜىٰدَ رِيغُنَ كَشِ بِيُ؞ يَ عُمَرْثِ بِيُ دَغَ یَنْ حِدِمَرْسَ سُكَ رِڧٜىٰوَ غٜىٰهَظِ؞

²⁴ دَ سُكَ كَيْ كَنْ تُدُ كُسَدَ غِدَنْ أَلْيَسَعَ، سَيْ غٜىٰهَظِ يَكَرْٻَ، يَشِغَرْ دَسُو ثِكِنْ غِدَا؞ سَعَنً يَسَلَّمٜىٰسُ سُكَ كُواْمَ؞

²⁵ غٜىٰهَظِ يَكُواْمَ ثِكِنْ غِدَا وُرِنْ شُوغَبَنْسَ؞ سَيْ أَلْيَسَعَ يَثٜىٰمَسَ ‏«‏إِنَا كَتَڢِے، غٜىٰهَظِ؟»‏ سَيْ يَأَمْسَ ‏«‏رَنْكَيَدَطٜىٰ، بَنْ تَڢِے وَنِ وُرِيبَ؞»‏

²⁶ عَمَّا أَلْيَسَعَ يَأَمْسَ يَثٜىٰمَسَ ‏«‏أَيْ، إِنَ أَوُرِنْ ثِكِنْ رُوحُ سَعَدَّ مُتُمِنْ يَسَوْكَ دَغَ كٜىٰكٜىٰنْ دُواْكِنْسَ دُواْمِنْ يَسَدُ دَكَيْ؞ كَنَ غَنِ وَنَّنْ لُواْكَثِ نٜىٰ دَ ذَاعَ كَرْٻِ كُطِ دَ رِيغُنَ دَ غُواْنَرْ إِنَبِے دَ تُمَكِ دَ بِجِمَيْ دَ بَايِ مَظَا دَ مَاتَا؟

²⁷ دُواْمِنْ حَكَ ثُوتَرْ ڢَتَرْ جِكِنْ نَعَمَنْ ذَاتَ مَنّٜىٰ مَكَ دَ ذُرِيَرْكَ حَرْ أَبَدَا؞»‏ غٜىٰهَظِ يَڢِتَ دَغَ غَبَنْ أَلْيَسَعَ دَ ثُوتَرْ ڢَتَرْ جِكِے، يَذَمَ ڢَرِ ڢَتْ كَمَرْ أَوْدُغَ؞