2 سَرَاكُنَ 4 - أَتَّوْرَتْ دَ أَنَّبَاوَا

أَلْيَسَعَ يَتَيْمَكِ مَتَنْ دَ مِجِنْتَ يَمُتُ

¹ وَتَرَانَ مَاتَرْ وَنِ دَغَ ثِكِنْ ڧُنْ‌غِيَرْ أَنَّبَاوَا تَتَڢِے وُرِنْ أَلْيَسَعَ، تَكَيْ مَسَ كُوكَا تَثٜىٰ ‏«‏مِجِنَ مَيْيِ مَكَ حِدِمَ يَمُتُ؞ كَكُمَ سَنِ ثٜىٰوَ شِے مَيْ ڟُواْرُوانْ يَهْوٜىٰهْ نٜىٰ؞ عَمَّا غَاشِ، وَنِ مَيْبِنْسَ بَاشِ يَذُواْ دُواْمِنْ يَݣُوشِ یَیَنَ بِيُ سُذَمَ بَايِنْسَ؞»‏

² أَلْيَسَعَ يَثٜىٰ مَتَ ‏«‏مٜىٰ ذَنْيِ مِكِ؟ كِڢَطَا مِنِ، مٜىٰنٜىٰنٜىٰ كِكٜىٰ دَشِ أَغِدَا؟»‏ تَا ثٜىٰ ‏«‏يَا مَيْغِرْمَ، بَابُوَنِ أَبُ أَغِدَنْ سَيْدَيْ ڧَرَمِنْ تُلُنْ مَنْ ظَيْتُنْ؞»‏

³ أَلْيَسَعَ يَثٜىٰ مَتَ ‏«‏تُواْ، كِتَڢِے وُرِنْ مَڨُوبْتَنْكِ، كِيِ أَرُوانْ تُلُنَ دَغَ غَرٜىٰسُ وَطَنْدَ بَاسُ دَكُواْمٜىٰ عَثِكِ؞ كِتَبَّتَا سُنَدَ يَوَ؞

⁴ سَعَنً سَيْ كِشِغَ ثِكِنْ طَاكِ، كٜىٰ دَ یَیَنْكِ مَظَا، كُكُلّٜىٰ ڧُواْڢَرْ؞ سَيْ كِڢَارَ جُويٜىٰ مَنْ عَثِكِنْ تُلُنَنْ؞ تُلُنْدَ يَثِكَ، سَيْ عَ أَجِيٜىٰ أَغٜىٰڢٜىٰ، عَثِيغَبَدَ جُويٜىٰوَ بِيدَبِے؞»‏

⁵ مَثٜىٰنْ كُوَ تَتَڢِے؞ سَيْ تَشِغَ طَاكِ تَرٜىٰدَ یَیَنْتَ مَظَا، سُكَ كُلّٜىٰ ڧُواْڢَرْ؞ سَيْ تَڢَارَ جُويٜىٰ مَنْ ظَيْتُنْ طِنْ، یَیَنْتَ سُنَ تَكَٰوُاْ مَتَ تُلُنَ، عِتَ تَنَ تَجُويٜىٰ مَيْ عَثِكِ؞

⁶ دَ تُلُنَنَّنْ سُكَ ثِكَ دُكَ، سَيْتَثٜىٰ وَطَنْتَ ‏«‏كَكَٰوُاْ وَنِ تُلُ كُمَ؞»‏ سَيْ يَثٜىٰ مَتَ ‏«‏أَيْ بَابُوَنِ كُمَ!‏»‏ سَيْ مَنْ يَدَيْنَ ظُبَ؞

⁷ تَا تَڢِے تَڢَطَا وَ أَلْيَسَعَ مُتُمِنْ اللَّهْ، سَيْيَثٜىٰ مَتَ ‏«‏كِتَڢِے كِسَيَرْ دَ مَنْ، كِبِيَ بَاشِنْكِ، سَعَنً كٜىٰ دَ یَیَنْكِ ذَاكُ عِيَ رَايُ عَكَنْ أَبِنْدَ يَرَغُ؞»‏

أَلْيَسَعَ يَتَادَ طَنْ مَثٜىٰ دَغَ شُنٜىٰمْ

⁸ وَتَرَانَ أَلْيَسَعَ يَتَڢِے غَرِنْ شُنٜىٰمْ، عِنْدَ أَݣَويْ وَتَ مَثٜىٰ مَيْ أَرْزِڧِ؞ مَثٜىٰنْ تَنَاثٜىٰ مَسَ يَذُواْ يَثِ عَبِنْثِ أَغِدَنْتَ؞ تُنْدَغَ لُواْكَثِنْ، دُكْ سَعَدَّ يَكٜىٰ وُثٜىٰوَ تَوُرِنْ، سَيْ يَڟَيَ يَثِ عَبِنْثِ؞

⁹ سَيْتَثٜىٰ وَمِجِنْتَ ‏«‏نَا تَبَّتَا مُتُمِنْ دَيَكٜىٰ ذُوَا غِدَنْمُ أَ لُواْكَثِ لُواْكَثِ مُتُمْنٜىٰ مَيْ ڟَرْكِے نَ اللَّهْ؞

¹⁰ مُشِرْيَ مَسَ طَنْ ڧَرَمِنْ طَاكِ عَكَنْ سَمَنْ غِدَنْمُ، مُكُمَ ڠَرَ مَسَ؞ مُسَا غَدُواْ دَ تٜىٰبُرْ دَ كُجٜىٰرَ دَ ڢِتِلَ؞ تَهَكَ ذَيْسَامِ طَاكِنْ سَوْكَ دُكْ سَعَدَّ يَذُواْ؞»‏

¹¹ وَتَرَانَ سَعَدَّ أَلْيَسَعَ يَذُواْ غَرِنْ شُنٜىٰمْ، سَيْ يَهَوْرَ ذُوَا طَاكِنْسَ دُواْمِنْ يَهُوتَ؞

¹² يَثٜىٰ وَ غٜىٰهَظِ مَيْ مَسَ حِدِمَ يَتَڢِے يَكِرَا مَاتَرْ؞ سَيْ تَشِغَ تَڟَيَ أَغَبَنْسَ؞

¹³ أَلْيَسَعَ يَغَيَ وَ غٜىٰهَظِ يَڢَطَا مَتَ ثٜىٰوَ ‏«‏دَيَكٜىٰ كِنْدَامُ دَمُو حَرْ كِنْيِ مَنَ دُكَنْ أَلْحٜىٰرَنَّنْ، مٜىٰ كِكٜىٰسُواْ عَيِمِكِ؟ كِنَ سُواْ عَيِ وَسَرْكِے مَغَنَ كُواْ كُوَ عَيِ وَشُوغَبَنْ سُواْجُواْجِ مَغَنَ؟»‏ تَا أَمْسَ تَثٜىٰ ‏«‏أَعَ، إِنَ تَرٜىٰدَ مُتَنٜىٰنَ، بَانَ بُڧَاتَرْ كُواْمٜىٰ؞»‏

¹⁴ أَلْيَسَعَ يَثٜىٰ وَ غٜىٰهَظِ ‏«‏تُواْ، مٜىٰنٜىٰنٜىٰ ذَنْيِ مَتَ؟»‏ غٜىٰهَظِ يَثٜىٰ ‏«‏أَيْ، بَاتَدَ طَا، كُمَ مِجِنْتَ يَڟُوڢَ؞»‏

¹⁵ أَلْيَسَعَ يَثٜىٰ ‏«‏عَكِرَتَ تَذُواْ نَنْ؞»‏ سَيْ تَذُواْ تَڟَيَ عَبَاكِنْ ڧُواْڢَرْ؞

¹⁶ أَلْيَسَعَ يَثٜىٰ مَتَ ‏«‏وَرْهَكَ شٜىٰكَرَا مَيْ ذُوَا ذَاكِ رِڧٜىٰ طَنْكِ دَ حَنُّوَنْكِ؞»‏ تَا ثٜىٰ ‏«‏أَعَ، رَنْكَيَدَطٜىٰ، مُتُمِنْ اللَّهْ، كَدَ كَرُوطٜىٰنِ؞»‏

¹⁷ مَاتَرْ كُوَ تَايِ ثِكِ؞ دَ شٜىٰكَرَا تَكٜىٰوَيُواْ تَحَيْڢِ طَا نَمِجِ أَدَيْدَيْ لُواْكَثِنْ دَ أَلْيَسَعَ يَڢَطَا مَتَ؞

¹⁸ أَنَانً بَايَنْ وَطَنْسُ شٜىٰكَرُ، وَتَرَانَ يَرُوانْ يَبِے بَابَنْسَ ذُوَا وُرِنْ مَاسُ غِرْبِے؞

¹⁹ بَا ظَتُواْ سَيْيَثٜىٰ وَبَابَنْسَ ‏«‏وَيُّواْ!‏ كَيْنَ يَنَ مِنِ ثِيوُاْ!‏ كَيْنَ يَنَ مِنِ ثِيوُاْ!‏»‏ بَابَنْ يَثٜىٰ وَمَيْ مَسَ حِدِمَ ‏«‏كَطَوْكٜىٰشِ كَكَيْ وَمَامَرْسَ؞»‏

²⁰ دَ يَكَيْشِ وُرِنْ مَامَرْ، سَيْ تَرِڧٜىٰشِ عَڧَڢَاڢُنْتَ حَرْ رَانَ أَڟَكَ، سَيْيَمُتُ؞

²¹ سَيْ تَهَوْرَ طَاكِنْ مُتُمِنْ اللَّهْ نَّنْ، تَݣُونْتَرْدَ يَرُواْ أَغَدُوانْسَ، تَكُلّٜىٰ ڧُواْڢَرْ تَڢِتَ؞

²² تَا عَيْكَ وَمِجِنْتَ يَعَيْكُواْ دَ مَيْ حِدِمَ تَرٜىٰدَ جَاكِ دُواْمِنْ تَنَسُواْ تَرُوغَ ذُوَا وُرِنْ مُتُمِنْ اللَّهْ تَدَاوُاْ؞

²³ مِجِنْتَ يَثٜىٰ ‏«‏دُوانْمٜىٰ كِكٜىٰسُواْ كِتَڢِے يَنْذُ؟ بَ بِكٍ سَابُوانْ وَتَ بَ، بَ رَانَرْ هُوتُ تَمَكُواْ عَكٜىٰ ثِكِيبَ؞»‏ تَا أَمْسَ ‏«‏بَا كُواْمٜىٰ؞»‏

²⁴ عَكَ شِرْيَ مَتَ أَبِنْ ذَمَ عَكَنْ جَاكِنْ؞ تَاثٜىٰ وَمَيْ حِدِمَرْتَ ‏«‏كَسَا جَاكِنْ يَيِ سَوْرِ، كَدَ كَسَ يَضَغٜىٰ سَوْرِنْسَ سَيْ نَڢَطِ حَكَ؞»‏

²⁵ سَيْ تَكَامَ حَنْيَ، تَتَڢِے وُرِنْ مُتُمِنْ اللَّهْ عَبَبَّنْ تُدُنْ كَرْمٜىٰلْ؞ سَعَدَّ مُتُمِنْ اللَّهْ يَهَنْ‌غُواْتَ تَنَ ذُوَا، سَيْيَثٜىٰ وَ غٜىٰهَظِ ‏«‏غَا یَرْ غَرِنْ شُنٜىٰمْ ذُوَا؞

²⁶ يِغُدُ كَسَامٜىٰتَ، كَتَمْبَيٜىٰتَ كَثٜىٰ، ‏‹‏كِنْذُواْ لَاڢِيَ؟ مِجِنْكِ لَاڢِيَ يَكٜىٰ؟ طَنْكِ ڢَا؟›‏ »‏ سَيْتَأَمْسَ تَثٜىٰ ‏«‏بَا كُواْمٜىٰ؞»‏

²⁷ عَمَّا دَ تَكَيْ وُرِنْ مُتُمِنْ اللَّهْ عَكَنْ بَبَّنْ تُدُنْ، سَيْ تَكَامَ ڧَڢَاڢُنْسَ؞ سَيْ غٜىٰهَظِ يَذُواْ يَتُرٜىٰتَ، عَمَّا مُتُمِنْ اللَّهْ يَثٜىٰ ‏«‏أَعَ، كَبَرْتَ، دُواْمِنْ تَنَ ثِكِنْ بَڧِنْ ثِكِ مَيْ ڟَنَنِ؞ يَهْوٜىٰهْ كُوَ يَٻُواْيٜىٰ مِنِ أَبِنْ، بَيْ ڢَطَا مِنِبَ؞»‏

²⁸ سَعَنً تَثٜىٰمَسَ ‏«‏مَيْغِرْمَ، نَا ضُواْڧٜىٰكَ يَرُواْ نٜىٰ؟ بَنْڢَطَا مَكَ كَدَ كَرُوطٜىٰنِبَ؟»‏

²⁹ سَيْ أَلْيَسَعَ يَثٜىٰ وَ غٜىٰهَظِ ‏«‏يِمَظَا!‏ طَوْكِ سَنْدَنَ أَ حَنُّنْكَ، كَتَڢِے غِدَنْ مَثٜىٰنَّنْ؞ عِدَنْ كَغَمُ دَ وَنِ أَ حَنْيَ، كَدَ كَغَيْشٜىٰشِ؞ كُواْ وَنِ يَغَيْشٜىٰكَ، كَدَ كَأَمْسَ؞ كَݣُونْتَرْ دَ سَنْدَنَّنْ أَ ڢُسْكَرْ يَرُوانْ؞»‏

³⁰ مَثٜىٰنْ تَثٜىٰ وَ أَلْيَسَعَ ‏«‏نَا ضَنْڟٜىٰ دَ سُونَنْ يَهْوٜىٰهْ مَيْ رَيْ دَ كُمَ رَنْكَ، بَذَنْبَرْ كَبَ؞»‏ دُواْمِنْ حَكَ سَيْ يَتَاشِ يَتَڢِے تَرٜىٰدَ عِتَ؞

³¹ غٜىٰهَظِ يَا رِغَا يَايِ غَبَ يَݣُونْتَرْدَ سَنْدَنْ عَكَنْ ڢُسْكَرْ يَرُوانْ، عَمَّا بَابُ مُواْڟِ كُواْ عَلَمَرْ رَيْ؞ سَبُواْدَ حَكَ يَدَاوُاْ يَسَدُ دَ أَلْيَسَعَ يَثٜىٰ مَسَ ‏«‏يَرُوانْ بَيْ تَاشِبَ؞»‏

³² دَ أَلْيَسَعَ يَشِغَ طَاكِنْ، يَتَرَرْ أَنْݣُونْتَرْدَ يَرُوانْ غَاوَا أَغَدُوانْسَ؞

³³ سَيْ أَلْيَسَعَ يَشِغَ يَكُلّٜىٰ ڧُواْڢَرْ دَغَ شِے سَيْ يَرُوانْ، يَيِ أَدُّعَ غَ يَهْوٜىٰهْ؞

³⁴ سَعَنً يَݣُونْتَ عَكَنْ جِكِنْ يَرُوانْ؞ يَسَا بَاكِنْسَ عَكَنْ بَاكِنْ يَرُوانْ، حَكَمَا عِدَنُونْسَ أَعِدَانُنْ يَرُوانْ دَ كُمَ حَنُّوَنْسَ عَكَنْ حَنُّوَنْ يَرُوانْ؞ دَيَمِيڧٜىٰ كَنْسَ عَكَنْ يَرُوانْ، سَيْ جِكِنْ يَرُوانْ يَيِ طُمِ؞

³⁵ أَلْيَسَعَ يَتَاشِ يَيِ تَڢِيَ يَنَ كَيْ دَ كَٰوُاْوَ عَثِكِنْ طَاكِنْ؞ يَسَاكٜىٰ ݣُونْتَ يَمِيڧٜىٰ عَكَنْ يَرُوانْ؞ سَيْ يَرُوانْ يَيِ أَتِشَوَ سَوْ بَݣَويْ، سَيْ يَبُوطٜىٰ عِدَنُونْسَ؞

³⁶ أَلْيَسَعَ يَكِرَا غٜىٰهَظِ يَسَا مَامَرْ يَرُوانْ تَذُواْ؞ غٜىٰهَظِ يَكِرَوُاْتَ تَذُواْ؞ دَتَشِغَ سَيْ أَلْيَسَعَ يَثٜىٰ ‏«‏كِطَوْكُواْ طَنْكِ؞»‏

³⁷ تَا ذُواْ تَدُرْڧُسَ تَڧَڢَاڢُنْسَ، تَرُسُنَ حَرْ ڧَسَا، سَعَنً تَطَوْكِ طَنْتَ تَڢِتَ؞

أَلْيَسَعَ يَثِرٜىٰ دَڢِ دَغَ ثِكِنْ عَبِنْثِ

³⁸ وَنِ لُواْكَثِ سَعَدَّ أَلْيَسَعَ يَكُواْمَ غِلْغَلْ، أَنَ يُنْوَ عَڧَسَرْ؞ سَعَدَّ ڧُنْ‌غِيَرْ أَنَّبَاوَا سُكٜىٰ ظَوْنٜىٰ كٜىٰوَيٜىٰ دَشِ، أَلْيَسَعَ يَثٜىٰ وَمَيْيِ مَسَ حِدِمَ ‏«‏كَسَا بَبَّرْ تُكُنْيَ أَوُتَا، كَدَڢَ وَڧُنْ‌غِيَرْ أَنَّبَاوَا عَبِنْثِ؞»‏

³⁹ طَيَ دَغَ ثِكِنْ مَاسُ حِدِمَرْ يَشِغَ دَاجِ دُواْمِنْ يَسَامُواْ غَنْيَيٜىٰ نَثِ؞ سَيْ يَسَامِ كَبٜىٰوَرْ دَاجِ، يَطٜىٰبُواْ یَیَنْتَ يَرِڧٜىٰ أَ رِغَرْسَ يَكَٰوُاْ غِدَا؞ يَيَيَّنْكَ يَظُبَ عَتُكُنْيَرْ عَبِنْثِنْ بَاتَرٜىٰدَ سَنِ كُواْ مٜىٰنٜىٰنٜىٰبَ؞

⁴⁰ عَكَ ظُبَ وَمُتَنٜىٰنْ سُثِ؞ عَمَّا سَعَدَّ سُكٜىٰ ثِكِنْ ثِنْ عَبِنْثِنْ، سَيْ سُكَيِ إِيهُ سُكَثٜىٰ ‏«‏يَا مُتُمِنْ اللَّهْ، أَݣَويْ دَڢِ عَثِكِنْ عَبِنْثِنَّنْ!‏»‏ سَيْ سُكَڧِ ثِنْ عَبِنْثِنْ؞

⁴¹ سَيْ أَلْيَسَعَ يَثٜىٰ ‏«‏عَكَٰوُاْ غَارِ؞»‏ دَ عَكَ كَٰوُاْ، سَيْ يَجُويٜىٰشِ عَثِكِنْ تُكُنْيَرْ عَبِنْثِنْ، يَثٜىٰ مُسُ ‏«‏كُرَبَ وَمُتَنٜىٰنْ دُواْمِنْ سُثِ؞»‏ يَكُمَ كَسَنْثٜىٰ بَابُوَنِ أَبِنْ دَامُوَ؞

أَلْيَسَعَ يَثِيَرْ دَ مُتَنٜىٰ طَرِے

⁴² وَنِ مُتُمْ دَغَ بَعَلْ سْحَلِشَ يَكَٰوُاْوَ مُتُمِنْ اللَّهْ دُنْڧُلٜىٰنْ غُرَاسَ عَشِرِنْ دَ عَكَيِ دَغَ نُونً ڢَارِ نَهَڟِنْ بَلٜىٰ؞ يَكُمَ كَٰوُاْ طَنْيٜىٰنْ كَوُنَنْ حَڟِ عَبُهُنْسَ؞ أَلْيَسَعَ يَثٜىٰ ‏«‏عَبَا مُتَنٜىٰ سُثِ؞»‏

⁴³ عَمَّا مَيْ حِدِمَرْسَ يَثٜىٰ ‏«‏كَنَ غَنِ وَنَّنْ ذَيْ إِشٜىٰ مُتُمْ طَرِے؟»‏ أَلْيَسَعَ يَثٜىٰ مَسَ ‏«‏كَبَاسُ سُثِ، غَمَا يَهْوٜىٰهْ نٜىٰ يَثٜىٰ ذَاسُثِ حَرْ مَا سُبَرْ سَوْرَ؞»‏

⁴⁴ مَيْ حِدِمَرْ يَبَاسُ عَبِنْثِنْ، سُكَثِ حَرْ مَا سُكَ بَرْ سَوْرَ، بِسَغَ مَغَنَرْ يَهْوٜىٰهْ؞