2 سَرَاكُنَ 16 - أَتَّوْرَتْ دَ أَنَّبَاوَاسَرْكِے أَهَظْ نَ يَهُودَ ﴿ 2 تَارْ 28.1-27 ﴾ ﴿شٜىٰكَرَا 736-716 كَاڢِنْ حَيْڢُوَرْ عِيسَىٰ ﴾ 1 أَ شٜىٰكَرَا تَغُواْمَشَا بَݣَويْ تَمُلْكٍ سَرْكِے ڢٜىٰكَ طَنْ رٜىٰمَلِيَ نَ إِسْرَٰٓءِيلَ، سَيْ أَهَظْ طَنْ سَرْكِے يُواْتَمْ نَ يَهُودَ يَڢَارَ مُلْكِ؞ 2 أَهَظْ يَنَدَ شٜىٰكَرَا عَشِرِنْ سَعَدَّ يَذَمَ سَرْكِے، يَكُمَيِ مُلْكِ شٜىٰكَرَا غُواْمَشَا شِدَ أَ عُرُوشَلِيمَ؞ بَيْ عَيْكَتَ أَبِنْدَ يَكٜىٰ دَيْدَيْ أَعِدُوانْ يَهْوٜىٰهْ اللَّهْ نْسَ بَ، وَتُواْ بَيْيِ كَمَرْ يَدَّ كَكَنْسَ دَاوُدَ يَيِبَ؞ 3 عَمَّا يَيِ تَڢِيَ أَ حَنْيَرْ سَرَاكُنَنْ إِسْرَٰٓءِيلَ؞ بَنْدَ حَكَمَا يَمِيڧَ طَنْسَ هَدَايَ تَڧُواْنَاوَا، يَنَ بِنْ هَلَيٜىٰ مَاسُ بَنْ ڨَمَ نَڧَبِيلُنْ دَ يَهْوٜىٰهْ يَكُواْرَ دَغَ ڧَسَرْ دُواْمِنْ مُتَنٜىٰنْ إِسْرَٰٓءِيلَ سُذَوْنَ أَوُرِنْ؞ 4 أَهَظْ يَمِيڧَ هَدَايُ دَ هَدَايُنْ ڧُواْنَ تُرَارٜىٰ عَكَنْ وُرَارٜىٰنْ سُجَّدَ دَ بَسُ دَاثٜىٰبَ دَ كَنْ مَنْيَنْ دُوَڟُو دَ كُمَ ڧَرْڧَشِنْ كُواْوَنٜىٰ إِتَاثٜىٰ مَيْ بَادَ إِنُوَ؞ 5 سَرْكِے رٜىٰظِنْ نَ سُورِيَ دَ سَرْكِے ڢٜىٰكَ طَنْ رٜىٰمَلِيَ نَ إِسْرَٰٓءِيلَ سُكَ كَٰوُاْ يَاڧِ عَكَنْ عُرُوشَلِيمَ؞ سُكَ كٜىٰوَيٜىٰتَ، عَمَّا بَسُ عِيَ ثِنْ سَرْكِے أَهَظْ دَ يَاڧِبَ؞ 6 أَ لُواْكَثِنَّنْ سَرْكِے رٜىٰظِنْ نَ سُورِيَ يَڨُوثٜىٰ غَرِنْ عٜىٰلَتْ، يَكُواْرِ مُتَنٜىٰنْ يَهُودَ دَغَ وُرِنْ؞ سَيْ مُتَنٜىٰنْ عٜىٰدُوامْ سُكَ تَڢِے سُكَ ذَوْنَ أَوُرِنْ؞ هَرْوَيَوْ كُوَ سُنَانَنْ؞ 7 سَرْكِے أَهَظْ يَعَيْكَ دَ یَنْ عَيْكَ ذُوَاغَ سَرْكِے تِغْلَتْ ڢِلٜىٰسٜىٰرْ نَڧَسَرْ أَسُّرِيَ؞ يَثٜىٰ «نِے بَاوَنْكَ نٜىٰ، طَنْكَ كُمَ؞ بَرِ كَهَوْرُواْ نَنْ كَكُٻُتَرْ دَنِے دَغَ حَنُّنْ سَرْكِنْ سُورِيَ دَ نَ إِسْرَٰٓءِيلَ وَطَنْدَ سُكٜىٰ كَٰوُاْ مِنِ يَاڧِ؞» 8 أَهَظْ يَݣُوشِ أَظُرْڢَا دَ ظِينَارِيَ دَغَ غِدَنْ يَهْوٜىٰهْ دَغَ كُمَ طَاكِنْ أَجِيَ نَغِدَنْ سَرْكِے، يَبَادَشِ ݣَوْتَا غَ سَرْكِنْ أَسُّرِيَ؞ 9 سَيْ سَرْكِنْ أَسُّرِيَ يَجِ ضُواْڧُوانْسَ؞ يَتَاشِ يَڢَاطَوَ دِمَشْڧُ دَ يَاڧِ، يَكُوَ ثِتَ؞ يَكَشٜىٰ سَرْكِے رٜىٰظِنْ يَكُمَ ݣُوشِ مُتَنٜىٰنْ دِمَشْڧُ ذُوَا بَوْتَا عَڧَسَرْ كِرْ؞ 10 سَعَدَّ سَرْكِے أَهَظْ يَتَڢِے دِمَشْڧُ دُواْمِنْ يَسَدُ دَ سَرْكِے تِغْلَتْ ڢِلٜىٰسٜىٰرْ نَ أَسُّرِيَ، سَيْ يَغَ إِرِنْ بَغَدٜىٰنْ دَيَكٜىٰ أَوُرِنْ؞ سَرْكِے أَهَظْ يَعَيْكَ وَ عُرِيَ ڢِرِسْتِ دَ صِڢَّرْ بَغَدٜىٰنْ دَ يَدَّ عَكَ ڟَارَا شِ دَ ثِكَكّٜىٰنْ بَيَانِنْسَ؞ 11 عُرِيَ ڢِرِسْتِ يَغِنَ بَغَدٜىٰنْ دَيْدَيْ بِسَغَ عُمَرْنِنْ سَرْكِے أَهَظْ؞ عَكَ كُوَ غَمَ غِنِنْ كَاڢِنْ سَرْكِے أَهَظْ يَدَاوُاْ دَغَ دِمَشْڧُ؞ 12 دَ سَرْكِے يَدَاوُاْ دَغَ دِمَشْڧُ، سَيْ يَدُوبِے بَغَدٜىٰنْ، يَجَا كُسَ، يَهَوْ بِسَنْسَ؞ 13 سَرْكِے يَمِيڧَ هَدَايَ تَڧُواْنَاوَا عَكَنْ بَغَدٜىٰنْ دَ هَدَايَ تَهَڟِ دَ تَأَبِنْ شَا؞ يَكُمَ يَيَّڢَا جِنِنْ هَدَايَ تَڠَرَنْ زُمُنْثِ عَكَنْسَ؞ 14 غَمٜىٰ دَ بَغَدٜىٰ نَڧَرْڢٜىٰنْ تَغُلَّ وَنْدَ يَكٜىٰ أَغَبَنْ يَهْوٜىٰهْ، سَرْكِے أَهَظْ يَثِرٜىٰشِ دَغَ وُرِنْ ذَمَنْسَ، وَتُواْ ڟَكَانِنْ ڧُواْڢَرْ شِغَ غِدَنْ يَهْوٜىٰهْ دَ سَابُوانْ بَغَدٜىٰنْ؞ يَأَجِيٜىٰشِ أَغٜىٰڢٜىٰنْ أَرٜىٰوَ نَسَابُوانْ بَغَدٜىٰنْ؞ 15 سَيْ سَرْكِے أَهَظْ يَعُمَرْثِ عُرِيَ ڢِرِسْتِ ثٜىٰوَ «يِ أَمْڢَانِ دَ سَابُوانْ بَغَدٜىٰنْ دُواْمِنْ هَدَايَ تَڧُواْنَاوَا تَسَاڢِيَ دَ هَدَايَ تَهَڟِ تَيَمَّ دَ كُمَ هَدَايَ تَڧُواْنَاوَا تَسَرْكِے دَ هَدَايَ تَهَڟِنْسَ دَ هَدَايَ تَڧُواْنَاوَا تَدُكَنْ مُتَنٜىٰنْ ڧَسَرْدَ هَدَايَ تَهَڟِ نَاسُ دَ تَأَبِنْ شَا نَاسُ؞ عَكُمَ يَيَّڢَا دُكَنْ جِنِ نَهَدَايَ تَڧُواْنَاوَا دَ دُكَنْ جِنِ نَسَوْرَنْ هَدَايُ عَكَنْ سَابُوانْ بَغَدٜىٰنْ؞ ڟُواْهُوانْ بَغَدٜىٰ نَڧَرْڢٜىٰنْ تَغُلَّ كُوَ ذَاعَ كٜىٰٻٜىٰ مِنِ شِ دُواْمِنْ نٜىٰمَنْ سَنِنْ أَبِنْدَ ذَيْ ڢَرُ؞» 16 سَيْ عُرِيَ يَيِ دَيْدَيْ أَبِنْدَ سَرْكِے يَثٜىٰ مَسَ يَيِ؞ 17 سَيْ سَرْكِے أَهَظْ يَيَنْكٜىٰ ڢَلّٜىٰنْ كُواْوَنٜىٰ غٜىٰڢٜىٰ نَأَمَلَنْكٜىٰنْ، سَيْ يَڢِتَرْدَ مَنْيَنْ ݣُونُواْنِنْ؞ سَيْ يَثِرٜىٰ ڧَتُوانْ ݣُونُواْ وَنْدَ عَكٜىٰكِرَنْسَ تٜىٰكُ وَنْدَ يَكٜىٰ ذَمَ عَكَنْ صِڢُّواْڢِنْ بِجِمَيْ نَڧَرْڢٜىٰنْ تَغُلَّ، يَأَجِيٜىٰشِ عَكَنْ دَٻٜىٰنْ دُوَڟُو؞ 18 سَرْكِے أَهَظْ يَثِرٜىٰ أَبِنْدَ عَكَ رُڢٜىٰ حَنْيَرْ دَ سَرْكِے يَكٜىٰبِے أَ رَانَرْ هُوتُ تَمَكُواْ، يَكُمَ ثِرٜىٰ كَايَنْ ڧُواْڢَرْ شِغَ غِدَنْ يَهْوٜىٰهْ تَسَرْكِے؞ دُكَنْ وَطَنَّنْ أَبُبُوَ أَهَظْ يَيِ دُواْمِنْ كَدَ سَرْكِنْ أَسُّرِيَ يَغَنِ؞ 19 سَوْرَنْ أَيُّكَنْ دَ سَرْكِے أَهَظْ يَيِ سُونَ أَرُبُوثٜىٰ عَثِكِنْ لِتَّڢِنْ تَارِيحِنْ سَرَاكُنَنْ يَهُودَ؞ 20 سَرْكِے أَهَظْ يَكُواْمَ غَ كَاكَنِّنْسَ، عَكَ بِنّٜىٰشِ تَرٜىٰدَسُو عَبِرْنِنْ دَاوُدَ؞ سَيْ هٜىٰزٜىٰكِيَ طَنْسَ يَغَاجٜىٰشِ يَذَمَ سَرْكِے؞ |
Hausa Common Language Ajami Bible © The Bible Society of Nigeria, 2020
Bible Society of Nigeria