2 سَرَاكُنَ 12 - أَتَّوْرَتْ دَ أَنَّبَاوَاسَرْكِے يُواْوَشْ نَ يَهُودَ ﴿ 2 تَارْ 24.1-27 ﴾ ﴿شٜىٰكَرَا 835-796 كَاڢِنْ حَيْڢُوَرْ عِيسَىٰ ﴾ 1 أَ شٜىٰكَرَا تَبَݣَويْ تَمُلْكٍ سَرْكِے يٜىٰهُو نَ إِسْرَٰٓءِيلَ، يُواْوَشْ يَڢَارَ مُلْكٍ ڧَسَرْ يَهُودَ؞ يَيِ مُلْكِ شٜىٰكَرَا أَرْبَعِنْ أَ عُرُوشَلِيمَ؞ سُونَنْ مَامَرْسَ ظِبِيَ نٜىٰ دَغَ غَرِنْ بٜىٰيٜىٰرْشٜىٰبَ؞ 2 دُكَنْ ݣُونَكِنْ يُواْوَشْ يَعَيْكَتَ أَبِنْدَ يَيِ دَيْدَيْ أَعِدُوانْ يَهْوٜىٰهْ، سَبُواْدَ يٜىٰهُواْيِدَ ڢِرِسْتِ يَنَ كُواْيَ مَسَ؞ 3 عَمَّا دُكْدَهَكَ، بَعَرُشٜىٰ وُرَارٜىٰنْ سُجَّدَ دَ بَسُ دَاثٜىٰبَ، مُتَنٜىٰ سُكَيِ تَمِيڧَ هَدَايُ سُكَ كُمَ ڧُواْنَ تُرَارٜىٰ أَوُرَارٜىٰنْ؞ 4 يُواْوَشْ يَثٜىٰ وَڢِرِسْتُواْثِے «كُتَارَ دُكَنْ كُطِنْ بَيٜىٰ بَيٜىٰ مَاسُ ڟَرْكِے وَطَنْدَ عَكٜىٰ كَٰوُاْ أَ غِدَنْ يَهْوٜىٰهْ، وَتُواْ كُطِنْ دَ عَكَ ڟَارَا وَكُواْوَنٜىٰ مُتُمْ دَ كُمَ كُطِنْ بَايَرْوَ تَيَرْدَرْ رَيْ؞ 5 دُكَنْ كُطِنْ دَ ڢِرِسْتُواْثِے سُكَ كَرْٻَ دَغَ مُتَنٜىٰ، يَا كَمَاتَ سُطِبَ دَغَ ثِكِ سُيِ أَمْڢَانِ دَشِ دُواْمِنْ ڠَرَ غِدَنْ يَهْوٜىٰهْ دُكْ عِنْدَ بُڧَاتَ تَتَاشِ؞» 6 عَمَّا حَرْ ذُوَا شٜىٰكَرَا تَعَشِرِنْ دَ عُكُ تَمُلْكٍ سَرْكِے يُواْوَشْ، ڢِرِسْتُواْثِنْ بَسُيِ ڠَرَنْ غِدَنْ يَهْوٜىٰهْ بَ؞ 7 سَبُواْدَ حَكَ سَرْكِے يُواْوَشْ يَكِرَا يٜىٰهُواْيِدَ ڢِرِسْتِ دَ سَوْرَنْ ڢِرِسْتُواْثِے يَثٜىٰ مُسُ «دُوانْمٜىٰ بَكُ ڠَرَ غِدَنْ يَهْوٜىٰهْ بَ حَرْ يَنْذُ؟ تُواْ دَغَ يَنْذُ كَدَ كُڧَارَ كَرْٻَرْ كُطِ دُواْمِنْ كَنْكُ؞ أَ مَيْمَكُوانْ حَكَ، ذَاكُ مِيڧَ دُكَنْ كُطِنْ دُواْمِنْ ڠَرَنْ غِدَنْ يَهْوٜىٰهْ نٜىٰ كَطَيْ؞» 8 سَيْ ڢِرِسْتُواْثِنْ سُكَ يَرْدَ بَذَاسُ سَاكٜىٰ كَرْٻَرْ كُطِ دُواْمِنْ كَنْسُ دَغَ وُرِنْ مُتَنٜىٰ بَ، كُمَ بَذَاسُيِ ڠَرَنْ غِدَنْ دَ كَنْسُبَ؞ 9 سَعَنً يٜىٰهُواْيِدَ يَطَوْكِ عَݣُوتِ، يَسَا رَامِ أَ مُرْڢِنْ يَأَجِيٜىٰ عَݣُوتِنْ كُسَدَ بَغَدٜىٰنْ، أَ حَنُّنْ دَامَ عِدَنْ مُتُمْ يَنَ شِغَ غِدَنْ يَهْوٜىٰهْ؞ ڢِرِسْتُواْثِے مَاسُ غَادِنْ ڧُواْڢَرْ غِدَنْ، سُكَسَا دُكَنْ كُطَطٜىٰنْ دَ عَكَ كَٰوُاْ ثِكِنْ عَݣُوتِنْ؞ 10 دُكْ لُواْكَثِنْ دَ سُكَغَ أَݣَويْ كُطِ دَيَوَ عَثِكِنْ عَݣُوتِنْ، مَرُبُوثِنْ سَرْكِے دَ بَبَّنْ ڢِرِسْتِ سُكَنْ تَارُ سُڧِرْغَ كُطِنْ سُطَطَّوْرَشِ سُسَا ثِكِنْ جَكَ؞ 11 سَعَنً سُبَادَ كُطِنْ دَ عَكَ ڧِرْغَ غَ مَاسُ لُورَ دَ عَيْكِنْ غِدَنْ يَهْوٜىٰهْ؞ سَيْ مَاسُ لُورَ دَ عَيْكِنْ ذَاسُ طَوْكِ كُطِنْ سُبِيَ وَكَاڢِنْتُواْثِ دَ مَاسُ غِنِ، 12 دَ مَاسُ عَيْكِنْ بُلُواكْ دَ مَاسُ سَسَّڧَ دُوَڟُو؞ سُنَ أَمْڢَانِ دَ كُطِنْ دُواْمِنْ سُسَيِ كَتَكَيْ دَ دُووَڟُنْ دَ عَكَ سَسَّڧَ، دُواْمِنْ كُمَ سُبِيَ سَوْرَنْ عَيْكَثٜىٰ عَيْكَثٜىٰنْ ڠَرَنْ غِدَنْ يَهْوٜىٰهْ؞ 13 عَمَّا بَعَيِ أَمْڢَانِ دَ كُطِنْ دُواْمِنْ يِنْ مَنْيَنْ ݣُونُواْنِ نَأَظُرْڢَا، كُواْ أَبُبُوَنْ كَشٜىٰ ڢِتِلُ، كُواْ ݣُونُواْنِنْ أَظُرْڢَا، كُواْ كَكَكِ، كُواْ كَايَ نَظِينَارِيَ دَ نَأَظُرْڢَا دُواْمِنْ غِدَنْ يَهْوٜىٰهْ بَ؞ 14 أَنْيِ أَمْڢَانِ دَ كُطِنْ دُواْمِنْ عَبِيَ مَاسُ عَيْكِنْ ڠَرَنْ غِدَنْ يَهْوٜىٰهْ؞ 15 بَعَنٜىٰمِ مَاسُ لُورَ دَ عَيْكِنْ ڠَرَنْ غِدَنْ يَهْوٜىٰهْ سُبَادَ لِسَّڢِ بَ، سَبُواْدَ سُنْيِ كُواْمٜىٰ ثِكِنْ أَمِنْثِ دَ غَسْكِيَ؞ 16 كُطَطٜىٰنْ دَ عَكَ بَايَرْ نَهَدَايُ نَشَاڢٜىٰ لَيْڢِے دَ نَهَدَايُ نَوَنْكٜىٰ ذُنُوبِ بَعَسَا عَثِكِنْ عَݣُوتِ أَ غِدَنْ يَهْوٜىٰهْ بَ؞ وَطَنَّنْ نَڢِرِسْتُواْثِے نٜىٰ؞ 17 أَ لُواْكَثِنَّنْ، سَرْكِے هَظَيٜىٰلْ نَ سُورِيَ يَهَوْرَ يَڢَاطَوَ بِرْنِنْ غَتْ دَ يَاڧِ، يَيِ نَصَرَا؞ سَعَنً يَنُڢَ يَكَيْ وَ عُرُوشَلِيمَ يَاڧِ؞ 18 سَيْ سَرْكِے يُواْوَشْ نَ يَهُودَ يَݣُوشِ دُكَنْ ݣَوْتَنْ دَ كَاكَنِّنْسَ يٜىٰهُواْشَڢَتْ دَ يٜىٰهُواْرَمْ دَ أَهَظِيَ، سَرَاكُنَنْ يَهُودَ، سُكَ كٜىٰٻٜىٰ غَ يَهْوٜىٰهْ؞ يَكُمَ حَطَ دَ ݣَوْتَرْ دَ شِے مَا يَكٜىٰٻٜىٰ غَ يَهْوٜىٰهْ، سَيْ يَعَيْكَ دَسُو دُكَ ذُوَاغَ هَظَيٜىٰلْ، تَرٜىٰدَ دُكَنْ ظِينَارِيَرْ دَتَكٜىٰ أَطَكُنَنْ أَجِيَ نَغِدَنْ يَهْوٜىٰهْ دَ نَغِدَنْ سَرْكِے؞ سَيْ سَرْكِے هَظَيٜىٰلْ نَ سُورِيَ يَجَنْيٜىٰ يَبَرْ عُرُوشَلِيمَ؞ 19 سَوْرَنْ أَيُّكَنْ يُواْوَشْ دَ دُكَنْ أَبِنْدَ يَيِ سُونَ أَرُبُوثٜىٰ عَثِكِنْ لِتَّڢِنْ تَارِيحِنْ سَرَاكُنَنْ يَهُودَ؞ 20 وَطَنْسُ دَغَ ثِكِنْ دَتَّاوَنْسَ سُكَ حَطَ بَاكِ سُكَ كَشٜىٰشِ أَوَنِ غِدَا أَ مِلُّواْ أَ حَنْيَرْ دَ تَغَنْغَرَ ذُوَا سِلَّ؞ 21 دَتَّاوَنْسَ وَطَنْدَ سُكَ كَشٜىٰشِ سُونٜىٰ، يُواْظَكَرْ طَنْ شِمٜىٰيَتْ دَ يٜىٰهُواْظَبَدْ طَنْ شُواْمٜىٰرْ؞ عَكَ بِنّٜىٰشِ تَرٜىٰدَ كَاكَنِّنْسَ عَبِرْنِنْ دَاوُدَ؞ سَيْ أَمَظِيَ طَنْسَ يَغَاجٜىٰشِ يَذَمَ سَرْكِے؞ |
Hausa Common Language Ajami Bible © The Bible Society of Nigeria, 2020
Bible Society of Nigeria