1 تَسَلُواْنِكَاوَا 5 - أَتَّوْرَتْ دَ أَنَّبَاوَا

¹ تُواْ، یَنْعُوَ، غَمٜىٰدَ عَيْنِحِنْ لُواْكَثِ كُواْ رَانَرْ دَ وَطَنَّنْ أَبُبُوَ ذَاسُ ڢَرُ، بَ لَلَّيْ سَيْ أَنْرُبُوتَ مُكُبَ؞

² غَمَا كُو مَا كُنْ سَنِ سُواْسَيْ ثٜىٰوَ رَانَرْ عُبَنْ‌غِجِ ذَاتَ ذُواْ كَمَرْ ذُوَانْ ٻَرَوُاْ دَ دَرٜىٰ؞

³ لُواْكَثِنْ دَ مُتَنٜىٰ سُكٜىٰثٜىٰوَ ‏«‏مُنَ ذَمَنْ لَاڢِيَ دَ سَلَمَ»‏ سَيْ كَوَيْ هَلَّكَ ذَاتَ أَوْكُواْ مُسُ، كَمَرْ يَدَّ ذَاڢِنْ حَيْڢُوَ يَكَنْ كَامَ مَثٜىٰ مَيْ ثِكِ، بَ كُوَ حَنْيَرْ ڟِيرَا؞

⁴ عَمَّا، أَيْ، بَعَثِكِنْ دُهُ كُكٜىٰ بَ، یَنْعُوَ، حَرْ دَ رَانَرْ نَنْ ذَاتَ سَامٜىٰكُ كَمَرْ ذُوَانْ ٻَرَوُاْ؞

⁵ غَمَا دُكَنْكُ، كُو یَیَنْ حَصْكٜىٰ نٜىٰ، یَیَنْ رَانَ كُمَ؞ مُو بَ نَدَرٜىٰ كُواْ دُهُ بَنٜىٰ؞

⁶ سَبُواْدَ حَكَ كَدَ مُيِ بَرْثِ يَدَّ وَطَنْسُ سُكٜىٰيِ، سَيْدَيْ مُيِ ذَمَنْ ڟَرُواْ دَ شِرِ؞

⁷ غَمَا وَطَنْدَ سُكٜىٰيِنْ بَرْثِ دَ دَرٜىٰ سُكٜىٰيِ، وَطَنْدَ سُكٜىٰ بُغُوَ كُمَ دَ دَرٜىٰ سُكٜىٰيِ؞

⁸ عَمَّا تُنْدَ مُو نَرَانَنٜىٰ، سَيْ مُيِ ذَمَنْ ڟَرُواْ، مُسَا رِغَرْ ڧَرْڢٜىٰ تَبَنْ‌غَسْكِيَ دَ ڧَوْنَ دَ كُمَ هُولَرْ ݣُونُواْ تَسَا ذُوثِيَا غَ سَامُنْ ثٜىٰتُواْ؞

⁹ اللَّهْ بَيْ ڧَدَّرَمُ غَ ڢُشِنْسَبَ، سَيْدَيْ غَ سَامُنْ ثٜىٰتُواْ تَوُرِنْ عُبَنْ‌غِجِنْمُ عِيسَىٰ أَلْمَسِيحُ،

¹⁰ وَنْدَ يَمُتُ سَبُواْدَمُو، دُواْمِنْ كُواْ مُنَدَ رَيْ، كُواْ مُنْيِ بَرْثِ، مُذَمَ مُنَ تَرٜىٰ دَشِ؞

¹¹ سَبُواْدَ حَكَ، سَيْ كُڧَرْڢَڢَ جُونَ، كُيِ تَغِنَ جُونَ، كَمَرْ دَيْ يَدَّ كُكٜىٰيِ يَنْذُ؞

غَرْغَطِ دَ غَيْسُوَا

¹² عَمَّا مُنَ ضُواْڧُوانْكُ، یَنْعُوَ، كُبَا مَاسُ ڢَامَ دَ عَيْكِ عَثِكِنْكُ غِرْمَ، وَتُواْ، شُوغَبَنِّنْكُ ثِكِنْ عُبَنْ‌غِجِ، مَاسُ يِمُكُ غَرْغَطِے؞

¹³ كُرِڧٜىٰسُ دَ مُتُنْثِ سُواْسَيْ ثِكِنْ ڧَوْنَ سَبُواْدَ عَيْكِنْسُ؞ كُيِ ذَمَنْ لَاڢِيَ دَ جُونَ؞

¹⁴ مُنَ كُمَ ڧَرْڢَڢَاكُ، یَنْعُوَ، كُيِ وَمَاسُ ڧِوِيَنَّنْ ڢَطَ، كُڧَرْڢَڢَ وَطَنْدَ بَاسُدَ ڧَرْڢِنْ ذُوثِيَا، كُتَيْمَكِ مَرَسَ ڧَرْڢِے، كُيِ حَڧُرِ دَ كُواْوَ؞

¹⁵ كُكُلَ ڢَا كَدَ كُواْوَ يَرَامَ مُغُنْتَادَ مُغُنْتَا، سَيْدَيْ كُلُّمْ كُيِ ڧُواْڧَرِنْ يِنْ أَبِنْ يَكٜىٰ نَغَرِ وَ جُونَنْكُ دَ كُمَ سَوْرَنْ مُتَنٜىٰ؞

¹⁶ كُيِ تَڢَضٍ ثِكِ كُلُّمْ؞

¹⁷ كُيِتَيِنْ أَدُّعَ بَابُ ڢَاسَوَ؞

¹⁸ عَثِكِنْ كُواْوَنٜىٰ حَلِ كُغُواْدٜىٰ وَ اللَّهْ، غَمَا وَنَّنْ شِينٜىٰ نُڢِنْ اللَّهْ ذُوَا غَرٜىٰكُ عَثِكِنْ أَلْمَسِيحُ عِيسَىٰ؞

¹⁹ كَدَ كُدَنّٜىٰ مَغَنَرْ رُوحُ مَيْ ڟَرْكِے؞

²⁰ كَدَ كُرٜىٰنَ أَنَّبْثِ،

²¹ سَيْدَيْ كُڠُودَ كُواْمٜىٰ، كُرِڧٜىٰ أَبِنْدَ يَكٜىٰدَ ݣَوْ؞

²² كُغُجٜىٰ وَكُواْوَثٜىٰ إِرِنْ مُغُنْتَا؞

²³ بَرِ اللَّهْ دَ كَنْسَ، مَيْ سَلَمَ، يَڟَرْكَكٜىٰكُ غَبَاطَيَ، يَكُمَ كِيَايٜىٰ رُوحُنْكُ دَ رَنْكُ دَ جِكِنْكُ دُكَ مَرَرْ تَبُواْ حَرْ رَانَرْ دَاوُاْوَرْ عُبَنْ‌غِجِنْمُ عِيسَىٰ أَلْمَسِيحُ؞

²⁴ شِے وَنْدَ يَكِرَاكُ مَيْ أَمِنْثِ نٜىٰ، ذَيْ كُوَ عَيْكَتَ؞

²⁵ یَنْعُوَ، كُيِ مَنَ أَدُّعَ؞

²⁶ كُغَيْ دَ دُكَنْ یَنْعُوَ دَ سُمْبَرْ ڧَوْنَ مَيْ ڟَرْكِے؞

²⁷ نَا ضُواْڧٜىٰكُ ثِكِنْ سُونَنْ عُبَنْ‌غِجِ، كُكَرَنْتَ وَدُكَنْ یَنْعُوَ وَسِيڧَرْ نَنْ؞

²⁸ أَلْحٜىٰرِنْ عُبَنْ‌غِجِنْمُ عِيسَىٰ أَلْمَسِيحُ يَكَسَنْثٜىٰ تَرٜىٰدَكُو؞ أَمِينْ؞