1 تَسَلُواْنِكَاوَا 2 - أَتَّوْرَتْ دَ أَنَّبَاوَا

حِدِمَرْ بُلُسْ أَ تَسَلُواْنِكَ

¹ أَيْ، یَنْعُوَ، كُو مَا كُنْ سَنِ ثٜىٰوَ ذُوَانْمُ وُرِنْكُ بَيْ ذَمَ عَبَنْظَبَ؞

² عَمَّا كُواْدَيَكٜىٰ مُنْ رِغَا مُنْ شَا وَهَلَ دَ وُلَڧَنْثِ أَ ڢِلِبِے، كَمَرْ يَدَّ كُكَ سَنِ، اللَّهْ نْمُ يَڧَرْڢَڢَامُ دُواْمِنْ مُسَنَرْ مُكُ لَابَرِنْسَ مَيْ دَاطِے، دُكْ دَ ڟَنَنِنْ غَابَادَ عَكٜىٰيِ وَلَابَرِ مَيْ دَاطِنَّنْ؞

³ غَمَا وَعَظِنْ دَمُكٜىٰيِ مُكُ بَيْ ڢِتُواْ نٜىٰ دَغَ كُسْكُرٜىٰبَ، كُواْ مُوغُنْ نُڢِ، كُواْ عَثٜىٰ مُنَ ڧُواْڧَرِنْ رُوطِنْكُ؞

⁴ سَيْدَيْ كَمَرْ يَدَّ اللَّهْ يَيَرْدَ دَمُو يَدَنْڧَ مَنَ أَمَانَرْ وَعَظِنْ لَابَرِ مَيْ دَاطِے، حَكَ مُكٜىٰ سَنَرْ دَشِ، بَدُواْمِنْ مُڢَرَنْتَا وَمُتَنٜىٰ رَيْبَ، سَيْدَيْ دُواْمِنْ مُڢَرَنْتَا وَ اللَّهْ رَيْ، وَنْدَ يَكٜىٰ ڠُودَ ذُوثِيَارْمُ؞

⁵ كَمَرْ يَدَّ كُنْ سَنِ، مَغَنَرْمُ بَتَظَاڧِنْ بَاكِ بَنٜىٰ، كُمَ بَا وَيْ مُنَدَ حَلِنْ ݣُوطَيِنْ دَمُكٜىٰ ٻُواْيٜىٰوَبَ؞ اللَّهْ كُوَ شِينٜىٰ شَيْدَرْمُ؞

⁶ بَوَيْ كُمَ مُنَ نٜىٰمَنْ يَبُواْ دَغَ وُرِنْ مُتَنٜىٰ، كُواْ دَغَ وُرِنْكُ كُواْ وَطَنْسُ دَبَمْ بَ، كُواْدَيَكٜىٰ دَ مُنَ سُواْ دَ مُنْيِ أَمْڢَانِ دَ إِيكُواْ نَمَڟَيِنْمُ نَمَنْظَنِّنْ أَلْمَسِيحُ دُواْمِنْ مُنٜىٰمِ تَيْمَكُواْ؞

⁷ عَمَّا يَدَّ مَامَا تَكٜىٰ رٜىٰنُوانْ جَرِرِنْتَ تَكُمَ لُورَ دَشِ، حَكَ مُنْ لُورَ دَكُو ثِكِنْ سَوْڧِنْ كَيْ؞

⁸ سَبُواْدَ مُنَ ڧَوْنَرْكُ ڨُورَيْ، شِے يَسَا مُكَجِ دَاطِنْ يِمُكُ وَعَظِنْ لَابَرِ مَيْ دَاطِے نَ اللَّهْ، بَوَعَظِ كَطَيْبَ، عَمَّا مُنْجِ دَاطِنْ بَادَ رَايُكَنْمُ سَبُواْدَ كُنْ شِغَ رَنْمُ سُواْسَيْ؞

⁹ یَنْعُوَ، كُنْ تُنَ دَ عَيْكِ دَ ڢَامَرْ دَ مُكَ شَا!‏ مُنْيِ تَعَيْكِ دَرٜىٰ دَ رَانَ سَبُواْدَ كَدَ مُسَا وَكُواْوَنٜىٰ طَيَنْكُ نَوْيِ سَعَدَّ مُكٜىٰيِ مُكُ وَعَظِنْ لَابَرِ مَيْ دَاطِے نَ اللَّهْ؞

¹⁰ كُو شَيْدُ نٜىٰ، اللَّهْ مَا شَيْدَ نٜىٰ غَمٜىٰدَ إِرِنْ حَلِنْ دَ مُكَ نُونَ مُكُ، كُو مَاسُ بَادَ غَسْكِيَ، وَتُواْ حَلِنْ ڟَرْكِے دَ نَأَدَلْثِے دَ نَرَشِنْ لَيْڢِے؞

¹¹ كَمَرْ يَدَّ كُكَ سَنِ، مُنْ بِيدَ كُواْوَنٜىٰ طَيَنْكُ كَمَرْ يَدَّ بَابَ يَكٜىٰبِدَ یَیَنْسَ؞

¹² مُكَيِ مُكُ غَرْغَطِے، مُكَ ڧَرْڢَڢَاكُ، مُكَ ضُواْڧٜىٰكُ كُيِ تَڢِيَرْكُ يَدَّ يَثَنْثَنْتَ أَغَبَنْ اللَّهْ، شِے وَنْدَ يَكِرَاكُ ثِكِنْ مُلْكِنْسَ دَ طَوْكَكَرْسَ؞

¹³ سَبُواْدَ وَنَّنْ نٜىٰ كُمَ مُكٜىٰ غُواْدٜىٰ وَ اللَّهْ كُلُّمْ، غَمَا سَعَدَّ كُكَ كَرْٻِ كَلْمَرْ اللَّهْ دَ كُكَجِ دَغَ وُرِنْمُ، بَكُ كَرْٻٜىٰتَ كَمَرْ مَغَنَرْ مُتُمْ ثٜىٰ بَ، سَيْدَيْ عَيْنِحِنْ يَدَّ تَكٜىٰ، وَتُواْ كَلْمَرْ اللَّهْ، وَدَّ تَكٜىٰ عَيْكِ أَ ذُوثِيَارْكُ، كُو دَ كُكَ بَادَ غَسْكِيَ؞

¹⁴ غَمَا كُو یَنْعُوَ، كُنْ ذَمَ مَاسُ كُواْيِ دَ دُكَنْ جَمَعَرْ مَاسُبِنْ اللَّهْ ثِكِنْ أَلْمَسِيحُ عِيسَىٰ، وَطَنْدَ سُكٜىٰ عَيَنْكِنْ يَهُودِيَ، غَمَا كُنْ شَا وَهَلَ دَغَ مُتَنٜىٰنْ ڧَسَرْكُ، كَمَرْ يَدَّ سُكَشَا أَ حَنُّنْ يَهُودَاوَا؞

¹⁵ يَهُودَاوَا نٜىٰ سُكَ كَشٜىٰ عُبَنْ‌غِجِ عِيسَىٰ دَ أَنَّبَاوَا، سُكَ كُمَ كُواْرٜىٰمُ؞ سُنَ ٻَاتَ وَ اللَّهْ رَيْ سُواْسَيْ!‏ سُنَ غَابَادَ دُكَنْ مُتَنٜىٰ!‏

¹⁶ سُنَ حَنَ مُيِ وَ وَطَنْدَ بَا يَهُودَاوَا بَ وَعَظِ دُواْمِنْ كَدَ وَطَنَّنْ سُسَامِ ثٜىٰتُواْ؞ تَهَكَ كُلُّمْ سُكٜىٰ ڧَارَ ثِكَ مُودُنْ ذُنُبَنْسُ؞ عَمَّا ڢَا ڢُشِنْ اللَّهْ يَارِغَا يَسَوْكَ عَكَنْسُ؞

نِيَّرْ بُلُسْ يَسَاكٜىٰ ظِيَرْتَرْ تَسَلُواْنِكَاوَا

¹⁷ تُواْ، یَنْعُوَ، لُواْكَثِنْ دَ عَكَ رَبَمُ دَكُو نَطَنْ لُواْكَثِ، وَتُواْ أَ رَبُوَ تَجِكِے بَتَذُوثِيَابَ، مُنَ تَمَرْمَرِ، مُنَ تَڧُواْڧَرِ مُغَنْكُ ڢُسْكَ دَ ڢُسْكَ؞

¹⁸ مُنْيِ نِيَّرْ ذُوَا وُرِنْكُ بَاشَكَّ؞ نِے بُلُسْ، نَيِ ڧُواْڧَرِ إِنْذُواْ بَا سَوْ طَيَبَ، بَ سَوْ بِيُبَ، عَمَّا شَيْطَنْ يَهَنَمُ؞

¹⁹ غَمَا مٜىٰنٜىٰنٜىٰ أَبِنْ سَا ذُوثِيَارْمُ دَ أَبِنْ ڢَضٍ ثِكِنْمُ دَ كُمَ هُولَرْ لَادَنْ تَاڧَمَرْمُ أَغَبَنْ عُبَنْ‌غِجِ عِيسَىٰ أَ رَانَرْ دَاوُاْوَرْسَ، إِنْ بَكُوبَ؟

²⁰ أَيْ، كُونٜىٰ أَبِنْ تَاڧَمَرْمُ دَ أَبِنْ ڢَضٍ ثِكِنْمُ؞