1 سَمَٰعِيلَ 9 - أَتَّوْرَتْ دَ أَنَّبَاوَا

أَنْ ذَاٻِ طَالُوتَ يَذَمَ سَرْكِے

¹ أَݣَويْ وَنِ مُتُمْ مَيْ أَرْزِڧِ دَغَ ذُرِيَرْ بِلِيَامِنُ، مَيْ سُونَ كِشْ طَنْ أَبِيٜىٰلْ دَغَ غِدَنْ ظٜىٰرُوارْ طَنْ بٜىٰكُواْرَ طَنْ أَڢِيَ مُتُمِنْ ذُرِيَرْ بِلِيَامِنُ؞

² كِشْ يَنَدَ وَنِ طَا مَيْ سُونَ طَالُوتَ، سَوْرَيِ نٜىٰ مَيْ ݣَنْ غَنِ كُمَ بَابُوَنِ عَثِكِنْ مُتَنٜىٰنْ إِسْرَٰٓءِيلَ دَ يَڢِيشِ حَكَ؞ يَنَ دَ ڟَيِ كُمَ حَرْ يَڢِ كُواْوَ؞

³ أَنَانً وَتَرَانَ جَاكُنَنْ كِشْ بَابَنْ طَالُوتَ سُكَ ٻَثٜىٰ؞ سَيْيَثٜىٰ وَ طَنْسَ طَالُوتَ ‏«‏كَطَوْكِ طَيَ دَغَ ثِكِنْ مَعَيْكَتَ، كُجٜىٰ كُنٜىٰمِ جَاكُنَنْ دَ سُكَ ٻَتَ؞»‏

⁴ طَالُوتَ يَتَاشِ يَكَامَ حَنْيَ، سُكَبِے دُكَنْ تُدَّنْ يَنْكِنْ إِڢْرَيِمْ دَ يَنْكِنْ سْحَلِشَ، عَمَّا بَسُسَامِ جَاكُنَنَبَ؞ سُكَ رَڟٜىٰ تَيَنْكِنْ شَعَلِمْ، عَمَّا بَاسَ أَوُرِنْ؞ سُكَ شِشِغَ كُواْعِنَ عَيَنْكِنْ بِلِيَامِنُ، عَمَّا دُكْ بَسُ سَامٜىٰسُبَ؞

⁵ دَسُكَ كَيْ يَنْكِنْ ظُڢْ سَيْ طَالُوتَ يَثٜىٰ وَمَعَيْكَتَنْ دَسُكٜىٰ تَرٜىٰ ‏«‏مُكُواْمَ غِدَا ڢَا!‏ إِنْ بَهَكَبَ بَابَنَ ذَيْ بَرْ دَامُوَ عَكَنْ جَاكُنَنَّنْ يَڢَارَ دَامُوَ عَكَنْمُ؞»‏

⁶ عَمَّا سَيْ مَعَيْكَثِنْ يَأَمْسَ مَسَ يَثٜىٰ ‏«‏أَيْ، أَݣَويْ وَنِ مُتُمِنْ اللَّهْ أَغَرِنَّنْ وَنْدَ عَكٜىٰ بَاشِ غِرْمَ سُواْسَيْ، غَمَا دُكْ أَبِنْدَ يَڢَطَا يَكَنْ ثِكَ؞ مُتَڢِے وُرِنْسَ، وَتَڧِيلَ ذَيْ عِيَ ڢَطَا مَنَ عِنْدَ ذَامُبِے؞»‏

⁷ طَالُوتَ يَتَمْبَيِ مَعَيْكَثِنْسَ يَثٜىٰ ‏«‏تُواْ، عِدَنْ مُكَ تَڢِے وُرِنْ مُتُمِنْ اللَّهْ، مٜىٰ ذَامُ بَاشِ؟ عَبِنْثِنْ دَيَكٜىٰ أَ جَكَرْمُ يَڧَارٜىٰ، كُمَ بَامُ دَ وَنِ أَبِنْدَ ذَامُ بَاشِ؞ كُواْ أَݣَويْ وَنِ أَبُ؟»‏

⁸ سَيْ مَعَيْكَثِنْ يَسَاكٜىٰ أَمْسَوَ يَثٜىٰ ‏«‏غَاشِ، إِنَدَ یَرْ ڟَابَرْ أَظُرْڢَا، ذَنْبَا مُتُمِنْ اللَّهْ دُواْمِنْ يَڢَطَا مَنَ عِنْدَ ذَامُبِے؞»‏

⁹ أَ دَا ثَنْ عَڧَسَرْ إِسْرَٰٓءِيلَ عِدَنْ مُتُمْ ذَيْ نٜىٰمِ نُڢِنْ اللَّهْ، يَكَنْثٜىٰ ‏«‏ذُواْ مُجٜىٰ وُرِنْ مَيْ غَنِ؞»‏ غَمَا وَنْدَ عَكٜىٰثٜىٰدَشِ أَنَّبِے يَنْذُ أَدَا أَنَثٜىٰدَشِ مَيْ غَنِ؞

¹⁰ سَيْ طَالُوتَ يَثٜىٰ وَمَعَيْكَثِنْسَ ‏«‏حَكَ يَيِݣَوْ، ذُواْ مُتَڢِے»‏؞ سَيْ سُكَ كَامَ حَنْيَ ذُوَا غَرِنْ دَ مُتُمِنْ اللَّهْ يَكٜىٰ؞

¹¹ سَعَدَّ سُكٜىٰ هَوْرَاوَا ذُوَا غَرِنْ، سَيْ سُكَ غَمُ دَ وَطَنْسُ یَنْ مَاتَا سُنَ ڢِتُواْوَ ذَاسُ طِبَ ضُوَ، سُكَ تَمْبَيٜىٰسُ سُكَثٜىٰ ‏«‏مَيْ غَنِ يأَنَانً؟»‏

¹² سُكَ أَمْسَ سُكَثٜىٰ ‏«‏عِ، يأَنَانً، غَاشِ يَشَا غَبَنْكُ؞ كُيِ سَوْرِ!‏ أَيْ، يَنْذُ يَنْذُ نٜىٰ يَشِغَ غَرِنْ، سَبُواْدَ يَوْ مُتَنٜىٰنْ سُنَدَ هَدَايَ أَوُرِنْ سُجَّدَ عَكَنْ تُدُ؞

¹³ دَ شِغَرْكُ أَغَرِنْ، ذَاكُ سَامٜىٰشِ كَاڢِنْ يَهَوْرُواْ وُرِنْ سُجَّدَ عَكَنْ تُدُ دُواْمِنْ ثِنْ عَبِنْثِ؞ غَمَا مُتَنٜىٰنْ بَذَاسُثِبَ سَيْ يَ إِسُواْ يَسَا أَلْبَرْكَ عَكَنْ هَدَايَرْ؞ بَايَنْ وَنَّنْ سَيْ مُتَنٜىٰنْ دَ عَكَ غَيَّتَ سُثِ؞ كُيِ سَوْرِ!‏ ذَاكُ سَامٜىٰشِ؞»‏

¹⁴ سَيْ سُكَ هَوْرَ ذُوَا غَرِنْ؞ دَيْدَيْ سَعَدَّ سُكٜىٰ شِغَ غَرِنْ، سَيْغَا سَمَٰعِيلَ يَڢِتُواْ يَنَ ذُوَا تَوُرِنْسُ، يَنَ كَنْ حَنْيَرْسَ ذُوَا وُرِنْ سُجَّدَ عَكَنْ تُدُ؞

¹⁵ ݣُونَ غُدَا كَاڢِنْ ذُوَانْ طَالُوتَ، سَيْ يَهْوٜىٰهْ يَيِ مَغَنَ دَ سَمَٰعِيلَ يَثٜىٰ،

¹⁶ ‏«‏وَرْ حَكَ غُواْبٜىٰ، ذَنْعَيْكَ دَ وَنِ مُتُمْ دَغَ يَنْكِنْ بِلِيَامِنُ ذُوَا وُرِنْكَ، كَظُبَ مَسَ مَيْ نَكٜىٰٻٜىٰوَ يَذَمَ مَيْ مُلْكٍ مُتَنٜىٰنَ إِسْرَٰٓءِيلَ؞ شِينٜىٰ ذَيْثٜىٰثِ مُتَنٜىٰنَ دَغَ حَنُّنْ ڢِلِسْتِيَاوَا، غَمَا نَارِغَا نَاغَ وَهَلَرْ مُتَنٜىٰنَ، نَا كُمَجِ كُوكَنْسُ؞»‏

¹⁷ دَ سَمَٰعِيلَ يَهَنْ‌غِ طَالُوتَ سَيْ يَهْوٜىٰهْ يَثٜىٰ مَسَ ‏«‏وَنَّنْ شِينٜىٰ مُتُمِنْدَ نَثٜىٰ ذَيْ يِمُلْكٍ مُتَنٜىٰنَ؞»‏

¹⁸ سَيْ طَالُوتَ يَجٜىٰ وَجٜىٰنْ سَمَٰعِيلَ أَوُرِنْ تَارُوَ عَڧُواْڢَرْ غَرِنْ يَتَمْبَيٜىٰشِ يَثٜىٰ ‏«‏سَلَمَ دَيْ!‏ إِنَ ضُواْڧُوانْكَ كَڢَطَا مِنِ عِنْدَ غِدَنْ مَيْ غَنِ يَكٜىٰ؞»‏

¹⁹ سَمَٰعِيلَ يَأَمْسَ مَسَ يَثٜىٰ ‏«‏نِنٜىٰ مَيْ غَنِنْ؞ كَشَا غَبَنَ ذُوَا وُرِنْ سُجَّدَ عَكَنْ تُدُ، غَمَا يَوْ ذَاكُثِ عَبِنْثِ تَرٜىٰدَنِ؞ ذَاكُ كُمَ ݣُونَ؞ غُواْبٜىٰ دَ سَڢٜىٰ ذَنْ ڢَطَا مَكَ أَمْسُواْشِنْ تَمْبَيُواْيِنْكَ سَعَنً إِنْ سَلَّمٜىٰكَ؞

²⁰ غَمٜىٰ دَ جَاكُنَنْكُ كُمَ دَ سُكَ ٻَثٜىٰ ݣُونَكِے عُكُ دَ سُكَ وُثٜىٰ، كَدَ كُدَامُ غَمَا أَنْسَامٜىٰسُ كُواْ؞ بَنْدَ وَنَّنْ مَا، أَيْ، كُواْمٜىٰ نَ إِسْرَٰٓءِيلَ نَاكَ نٜىٰ دَ دَنْ‌غِنْكَ؞»‏

²¹ طَالُوتَ يَأَمْسَ يَثٜىٰ ‏«‏أَيْ، نِے مُتُمِنْ بِلِيَامِنُ نٜىٰ كَوَيْ، وَدَّ تَكٜىٰ ذُرِيَ مَڢِے ڧَنْڧَنْتَ عَ إِسْرَٰٓءِيلَ دُكَ دَنْ‌غِنَ نٜىٰ كُمَ مَڢِے ڧَنْڧَنْتَ ثِكِنْ دُكَنْ عِيَلَنْ بِلِيَامِنُ؞ رَنْكَيَدَطٜىٰ!‏ مٜىٰيَسَا كَيِ مِنِ مَغَنَ حَكَ؟»‏

²² سَيْ سَمَٰعِيلَ يَشِغَرْدَ طَالُوتَ دَ مَعَيْكَثِنْسَ أَوُرِنْ ثِنْ عَبِنْثِ، يَسَاسُ سُذَوْنَ أَغَبَنْ دُكَنْ بَڧِنْ دَ عَكَ غَيَّتَ، يَوَنْسُ كُوَ يَكَيْ وَجٜىٰنْ تَلَاتِنْ؞

²³ سَعَنً سَمَٰعِيلَ يَثٜىٰ وَمَيْ دَڢَ عَبِنْثِ ‏«‏كَكَٰوُاْ نَامَنْدَ نَبَاكَ، وَنَّنْ سَاشٜىٰنْدَ نَثٜىٰ كَأَجِيٜىٰ دَبَمْ؞»‏

²⁴ سَيْ مَيْ دَڢَ عَبِنْثِ يَكَٰوُاْ سَاشٜىٰ مَڢِے ݣَوْ نَڧَڢَ يَأَجِيٜىٰوَ طَالُوتَ؞ سَيْ سَمَٰعِيلَ يَثٜىٰ مَسَ ‏«‏وَنَّنْ نٜىٰ نَامَنْ دَ عَكَ أَجِيٜىٰ دُواْمِنْكَ؞ كَثِ، دُواْمِنْ نَكٜىٰٻٜىٰ مَكَ شِ دُواْمِنْ كَثِ أَوَنَّنْ لُواْكَثِ تَرٜىٰدَ بَڧِنْدَ نَغَيَّتَ؞»‏ أَ رَانَرْ نَنْ كُوَ طَالُوتَ يَثِ تَرٜىٰدَ سَمَٰعِيلَ؞

²⁵ بَايَنْدَ سُكَ غَنْ‌غَرَ دَغَ وُرِنْ سُجَّدَ عَكَنْ تُدُ ذُوَا ثِكِنْ غَرِ، سَيْ سَمَٰعِيلَ يَتَتَّوْنَ دَ طَالُوتَ عَكَنْ رُڢِنْ غِدَنْسَ؞ بَايَنْ حَكَ، سَيْ سَمَٰعِيلَ يَكُواْمَ يَݣُونْتَ؞

سَمَٰعِيلَ يَا نَطَ طَالُوتَ سَرْكِے

²⁶ وَشٜىٰغَرِ دَ سَسَّڢٜىٰ، سَيْ سَمَٰعِيلَ يَكِرَا طَالُوتَ عِنْدَ يَكٜىٰ ݣُونْثِيَ عَكَنْ رُڢِنْ غِدَنْ؞ يَثٜىٰ مَسَ ‏«‏تَاشِ، ذَنْ سَلَّمٜىٰكَ؞»‏ طَالُوتَ يَتَاشِ، سَيْ سُو بِيُنْ سُكَ ڢِتَ وَجٜىٰ؞

²⁷ سَعَدَّ سُكٜىٰ غَنْ‌غَرُواْوَ ذُوَا ڧَرْشٜىٰنْ غَرِنْ، سَيْ سَمَٰعِيلَ يَثٜىٰ وَ طَالُوتَ ‏«‏كَثٜىٰ وَمَعَيْكَثِ يَيِ غَبَ كَطَنْ يَبَرْمُ؞»‏ دَمَعَيْكَثِنْ يَوُثٜىٰ غَبَ، سَيْ سَمَٰعِيلَ يَثٜىٰ مَسَ ‏«‏كَاطَنْ دَكَتَ أَنَنْ إِنْبَيَّنَ مَكَ سَڧُوانْ اللَّهْ؞»‏