1 سَمَٰعِيلَ 5 - أَتَّوْرَتْ دَ أَنَّبَاوَا

عَݣُوتِنْ يَرْجٜىٰجٜىٰنِيَ أَ حَنُّنْ ڢِلِسْتِيَاوَا

¹ بَايَنْدَ ڢِلِسْتِيَاوَا سُكَ ڨُوثٜىٰ عَݣُوتِنْ يَرْجٜىٰجٜىٰنِيَ نَ اللَّهْ أَ عٜىٰبٜىٰنٜىٰظٜىٰرْ، سَيْ سُكَ كَيْ شِ بِرْنِنْ أَشْدُوادْ؞

² سُكَ شِغَرْدَ عَݣُوتِ نَ اللَّهْ أَغِدَنْ غُنْكِنْسُ دَغُوانْ، سُكَ أَجِيٜىٰشِ كُسَدَ دَغُوانْ؞

³ وَشٜىٰغَرِ دَ سَسَّڢٜىٰ مُتَنٜىٰنْ أَشْدُوادْ سُكَتَاشِ سُكَ سَامِ دَغُوانْ يَڢَاطِ دَ ڢُسْكَ عَڧَسَا أَغَبَنْ عَݣُوتِ نَ يَهْوٜىٰهْ؞ سُكَ طَغَ دَغُوانْ سُكَ مَيَرْ دَشِ عِنْدَ يَكٜىٰ أَدَا؞

⁴ عَمَّا وَشٜىٰغَرِ دَ سَسَّڢٜىٰ، سُكَسَاكٜىٰ سَامُنْ غُنْكِنْسُ دَغُوانْ يَڢَاطِ عَڧَسَا أَغَبَنْ عَݣُوتِ نَ يَهْوٜىٰهْ؞ أَوَنَّنْ لُواْكَثِ، كَنْسَ دَ حَنُّوَنْسَ دُكْ سُنْ كَكَّرْيٜىٰ سُنَ ظُبٜىٰ عَبَاكِنْ ڧُواْڢَ، غَنْ‌غَرْ جِكِنْ ثٜىٰ كَطَيْ تأَنَانً؞

⁵ شِيَسَا هَرْوَيَوْ بَابُ ڢِرِسْتِ نَ دَغُوانْ كُواْ وَنِ وَنْدَ ذَيْ شِغَ هَيْكَلِنْ دَغُوانْ دَ ذَيْ تَاكَ بَاكِنْ ڧُواْڢَرْ دَغُوانْ؞

⁶ يَهْوٜىٰهْ يَا حُكُنْتَ مُتَنٜىٰنْ أَشْدُوادْ دَ نَكٜىٰوَيٜىٰ دَسُو؞ يَكَٰوُاْ مُسُ عَذَابَ سُواْسَيْ تَوُرِنْ ظُبَ مُسُ مَرُورَيْ؞

⁷ دَ مُتَنٜىٰنْ أَشْدُوادْ سُكَغَ حَكَ، سَيْ سُكَثٜىٰ ‏«‏كَدَ عَبَرْ عَݣُوتِ نَ اللَّهْ‌نْ إِسْرَٰٓءِيلَ يَكَسَنْثٜىٰ تَرٜىٰدَمُو، غَمَا حُكُنْثِنْسَ يَيِ ڟَنَنِ عَكَنْمُ دَ كُمَ عَكَنْ اللَّهْ‌نْمُ دَغُوانْ؞»‏

⁸ سَيْ سُكَ كِرَا دُكَنْ سَرَاكُنَنْ ڢِلِسْتِيَاوَا سُكَ تَمْبَيٜىٰسُ سُكَثٜىٰ ‏«‏مٜىٰنٜىٰنٜىٰ ذَامُيِ دَ عَݣُوتِ نَ اللَّهْ‌نْ إِسْرَٰٓءِيلَ؟»‏ سَرَاكُنَنْ سُكَ أَمْسَ مُسُ سُكَثٜىٰ ‏«‏كُوُثٜىٰ دَ عَݣُوتِ نَ اللَّهْ‌نْ إِسْرَٰٓءِيلَ ذُوَا بِرْنِنْ غَتْ»‏؞ سَيْ سُكَ طَوْكٜىٰشِ ذُوَا غَتْ، وَنِ بِرْنِنْ ڢِلِسْتِيَاوَا؞

⁹ عَمَّا بَايَنْدَ سُكَ كَيْشِ ثَنْ، سَيْ حُكُنْثِنْ يَهْوٜىٰهْ يَڢَاطُواْ عَكَنْ بِرْنِنْ، سَيْ ڟُواْرُواْ يَكَامَسُ سُواْسَيْ؞ يَعَيْكُواْ دَ بَلَعِ عَكَنْ مُتَنٜىٰنْ غَرِنْ؞ بَبَّ دَ ڧَرَمِ سُكَ كَمُ دَ مَرُورَيْ؞

¹⁰ سَبُواْدَ حَكَ سُكَ عَيْكَ دَ عَݣُوتِنْ يَرْجٜىٰجٜىٰنِيَ ذُوَا عٜىٰكْرُوانْ، وَنِ بِرْنِنْ ڢِلِسْتِيَاوَا؞ سَعَدَّ عَݣُوتِنْ يَرْجٜىٰجٜىٰنِيَ يَ إِسُواْ عٜىٰكْرُوانْ سَيْ مُتَنٜىٰنْ سُكَ ڢَشٜىٰ دَ كُوكَا سُنَ ثٜىٰوَ ‏«‏أَنْ كَٰوُاْ عَݣُوتِ نَ اللَّهْ‌نْ إِسْرَٰٓءِيلَ دُواْمِنْ يَكَشٜىٰمُ دَ عِيَلَنْمُ؞»‏

¹¹ سَبُواْدَ حَكَ سُكَسَاكٜىٰ تَتَّارَ دُكَنْ سَرَاكُنَنْ ڢِلِسْتِيَاوَا سُكَثٜىٰ ‏«‏كُعَيْكَ دَ عَݣُوتِ نَ اللَّهْ‌نْ إِسْرَٰٓءِيلَ يَكُواْمَ عِنْدَ يَڢِتُواْ، دُواْمِنْ كَدَ يَكَشٜىٰمُ دَ عِيَلَنْمُ؞»‏ غَمَا بَبَّنْ ڟُواْرُواْ يَرِكِتَرْدَ بِرْنِنْ سُواْسَيْ، غَمَا حُكُنْثِنْ اللَّهْ يَسَوْكُواْ دَ ڟَنَنِ عَكَنْسَ؞

¹² مُتَنٜىٰنْدَ بَسُ مُتُبَ سُنْ كَمُ دَ مَرُورَيْ؞ كُوكَنْ مُتَنٜىٰنْ عٜىٰكْرُوانْ يَكَيْ حَرْ سَمَ؞