1 سَمَٰعِيلَ 31 - أَتَّوْرَتْ دَ أَنَّبَاوَا

مُتُوَرْ طَالُوتَ دَ یَیَنْسَ

¹ أَنَانً سَيْ ڢِلِسْتِيَاوَا سُكَيِ يَاڧِ دَ إِسْرَٰٓءِيلَاوَا حَرْ سَيْ دَ إِسْرَٰٓءِيلَاوَا سُكَ غُدُ؞ عَكَ كَكَّشٜىٰ إِسْرَٰٓءِيلَاوَا دَيَوَ عَبَبَّنْ تُدُنْ غِلْبُواْوَ؞

² ڢِلِسْتِيَاوَا سُكَ كٜىٰوَيٜىٰ طَالُوتَ دَ یَیَنْسَ مَظَا سُكَ كَشٜىٰ يُواْنَتَنْ دَ أَبِينَدَبْ دَ مَلْكِشُوَ؞

³ يَاڧِنْ يَيِ ذَاڢِ كٜىٰوَيٜىٰ دَ طَالُوتَ، حَرْ وَتَ كِبِيَ تَمَاسُ يَاڧِ دَ بَكَ تَسَامٜىٰشِ، يَكُمَجِ ثِيوُاْ سُواْسَيْ؞

⁴ يَثٜىٰ وَسُواْجَنْ دَيَكٜىٰ رِڧٜىٰ مَسَ كَايَنْ يَاڧِ ‏«‏كَظَارٜىٰ تَكُواْبِنْكَ كَسُواْكٜىٰنِ، كَدَ ڧَظَامَنْ أَرْنَ مَرَسَ كَاثِيَرْ نَنْ سُذُواْ سُيِ مِنِ بَعَ سُسُواْكٜىٰنِ؞»‏ عَمَّا سُواْجَنْ يَڧِ غَمَا يَاجِڟُواْرُواْ سُواْسَيْ؞ سَبُواْدَ حَكَ طَالُوتَ يَظَرُواْ تَكُواْبِنْسَ يَكَڢَشِ عَڧَسَا يَڢَاطِ عَكَيْ؞

⁵ دَ سُواْجَ مَيْ رِڧٜىٰ مَسَ كَايَنْ يَاڧِنْ يَغَ طَالُوتَ يَمُتُ سَيْ شِے مَا يَكَشٜىٰ كَنْسَ كَمَرْ يَدَّ طَالُوتَ يَيِ؞

⁶ تَهَكَ طَالُوتَ دَ یَیَنْسَ مَظَا عُكُ دَ سُواْجَ مَيْ رِڧٜىٰ مَسَ كَايَنْ يَاڧِنْ تَرٜىٰدَ مُتَنٜىٰنْسَ سُكَ مُتُ أَ رَانَ طَيَ؞

⁷ سَعَدَّ سَوْرَنْ إِسْرَٰٓءِيلَاوَنْ دَسُكٜىٰ عَڧٜىٰتَرٜىٰنْ ݣُورِنْ يٜىٰظِرٜىٰيٜىٰلْ دَ كُمَ وَطَنْدَ سُكٜىٰ عَڧٜىٰتَرٜىٰنْ كُواْغِنْ يُواْدَنْ سُكَجِ ثٜىٰوَ طَالُوتَ يَمُتُ تَرٜىٰدَ یَیَنْسَ مَظَا عُكُ، سُكَ كُمَجِ ثٜىٰوَ سُواْجُواْجِنْ إِسْرَٰٓءِيلَ سُنْ غُدُ، سَيْ سُو مَا سُكَ غُدُ سُكَ بَرْ غَرُرُوَنْسُ؞ ڢِلِسْتِيَاوَا سُكَذُواْ سُكَ ذَوْنَ أَوُرِنْ؞

⁸ وَشٜىٰغَرِ دَ ڢِلِسْتِيَاوَا سُكَذُواْ سُݣُوشِ كَايَ مَاسُ أَمْڢَانِ دَغَ غَوَوَّكِنْ سُواْجُواْجِ، سَيْ سُكَ سَامِ غَوَوَّكِنْ طَالُوتَ دَ یَیَنْسَ عَكَنْ بَبَّنْ تُدُنْ غِلْبُواْوَ؞

⁹ سُكَ يَنْكٜىٰ كَنْ طَالُوتَ سُكَ طَوْكِ كَايَنْ يَاڧِنْسَ سُكَ عَيْكَ دَ یَنْ عَيْكَ عَيِ شٜىٰلَ عَثِكِنْ دُكَنْ ڧَسَرْ ڢِلِسْتِيَاوَا، عَكُمَ بَادَ لَابَرِنَّنْ مَيْ دَاطِے أَغِدَاجٜىٰنْ غُمَكَنْسُ دَ كُمَ ثِكِنْ دُكَنْ مُتَنٜىٰنْسُ؞

¹⁰ سُكَسَا كَايَنْ يَاڧِنْ طَالُوتَ أَطَاكِنْ غُنْكِنْسُ نَنْ عَشْتُواْرٜىٰتْ، سُكَ غِثِّيٜىٰ غَنْ‌غَرْ جِكِنْسَ عَكَتَنْ‌غَرْ غَرِنْ بٜىٰتْ شَنْ؞

¹¹ دَ مَذَوْنَنْ يَبٜىٰشْ غِلٜىٰيَدْ سُكَجِ أَبِنْدَ ڢِلِسْتِيَاوَا سُكَيِ وَ طَالُوتَ،

¹² سَيْ دُكَنْ مَذَنْسُ مَاسُ ڧَرْڢِنْ ذُوثِيَا سُكَتَاشِ سُكَيِ تَڢِيَ دَ دَرٜىٰ سُكَ كَيْ بٜىٰتْ شَنْ؞ سُكَ طَوْكِ غَاوَرْ طَالُوتَ تَرٜىٰدَ نَیَیَنْسَ مَظَا دَغَ جِكِنْ كَتَنْ‌غَرْ غَرِنْ بٜىٰتْ شَنْ؞ سُكَ كَٰوُاْسُ يَبٜىٰشْ سُكَ ڧُواْنٜىٰسُ؞

¹³ سُكَ ݣُوشِ ڧَسُسُوَنْسُ سُكَ بِنّٜىٰ أَغِنْدِنْ ڧَرَمِنْ إِتَاثٜىٰ أَ يَبٜىٰشْ، سَعَنً سُكَيِ أَظُمِ ݣُونَ بَݣَويْ سَبُواْدَ بَڧِنْ ثِكِ؞