1 سَمَٰعِيلَ 26 - أَتَّوْرَتْ دَ أَنَّبَاوَا

دَاوُدَ يَا سَاكٜىٰ بَرِنْ طَالُوتَ دَ رَيْ

¹ مُتَنٜىٰنْ ظِڢْ سُكَ تَڢِے وُرِنْ طَالُوتَ أَ غِبٜىٰيَ سُكَثٜىٰ مَسَ ‏«‏دَاوُدَ يَنَ ٻُيَ عَتُدُنْ هَكِلَ وَنْدَ يَكٜىٰ ڢُسْكَنْتَرْ يٜىٰشِمُوانْ؞»‏

² سَيْ طَالُوتَ يَتَاشِ يَغَنْ‌غَرَ ذُوَا دَاجِنْ ظِڢْ تَرٜىٰدَ سُواْجُواْجِ دُبُو عُكُ مَڢِيَ عِيَ يَاڧِ دَغَ ثِكِنْ إِسْرَٰٓءِيلَ؞ سُكَ ڢِتَ نٜىٰمَنْ دَاوُدَ عَثَنْ؞

³ طَالُوتَ كُوَ يَكَڢَ سَنْسَنِنْ يَاڧِنْسَ كُسَدَ حَنْيَ عَتُدُنْ هَكِلَ وَنْدَ يَكٜىٰ ڢُسْكَنْتَرْ يٜىٰشِمُوانْ؞ عَمَّا دَاوُدَ يَذَوْنَ أَدَاجِنْ؞ دَ يَجِ ثٜىٰوَ طَالُوتَ يَشِغُواْ دَاجِنْ نٜىٰمَنْسَ،

⁴ سَيْ يَعَيْكَ مَاسُ لٜىٰڧٜىٰنْ أَسِيرِ؞ سُكَجٜىٰ سُكَ تَبَّتَا لَلَّيْ طَالُوتَ يأَنَانً تَرٜىٰدَ سُواْجُواْجِنْ عَتُدُنْ هَكِلَ؞

⁵ نَنْ دَ نَنْ دَاوُدَ يَتَڢِے عِنْدَ طَالُوتَ يَكَڢَ سَنْسَنِ؞ يَغَ عِنْدَ طَالُوتَ دَ أَبْنٜىٰرْ طَنْ نٜىٰرْ شُوغَبَنْ سُواْجُواْجِنْسَ سُكَ ݣُونْتَ؞ طَالُوتَ يَݣُونْتَ أَڟَكِيَ، سُواْجُواْجِنْ كُمَ سُكَ ݣُونْتَ كٜىٰوَيٜىٰ دَشِ سُنَ بَرْثِ؞

⁶ سَيْ دَاوُدَ يَتَمْبَيِ أَهِمٜىٰلٜىٰكْ مُتُمِنْ هِتِّ دَ أَبِشَيْ طَنْعُوَنْ يُواْوَبْ، وَطَنْدَ مَامَرْسُ ظٜىٰرُوِيَ ثٜىٰ، يَثٜىٰ مُسُ ‏«‏وَنٜىٰنٜىٰ عَثِكِنْكُ بِيُ ذَيْبِينِ ذُوَا سَنْسَنِنْ طَالُوتَ؟»‏ أَبِشَيْ يَأَمْسَ يَثٜىٰ ‏«‏ذَنْ بِيكَ!‏»‏

⁷ سَيْ دَاوُدَ دَ أَبِشَيْ سُكَ شِغَ سَنْسَنِنْ طَالُوتَ دَ دَرٜىٰ، سُكَ سَامٜىٰشِ يَنَ ݣُونْثِيَ أَڟَكِيَرْ سُواْجُواْجِ دَ مَاشِنْسَ عَكَڢٜىٰ عَڧَسَا كُسَدَ كَنْسَ؞ أَبْنٜىٰرْ دَ سَوْرَنْ سُواْجُواْجِنْ سُنَ بَرْثِ كٜىٰوَيٜىٰ دَشِ؞

⁸ أَبِشَيْ يَثٜىٰ وَ دَاوُدَ ‏«‏يَوْ اللَّهْ يَبَادَ أَبُواْكِنْ غَابَنْكَ أَ حَنُّنْكَ؞ بَرِ إِنْ كَڢٜىٰشِ عَڧَسَا دَ مَاشِنَ، ذَنْ سُواْكٜىٰشِ دَ مَاشِ سَوْ طَيَ تَكْ، بَانَ بُڧَاتَ إِنْ سُواْكٜىٰشِ سَوْ بِيُ!‏»‏

⁹ عَمَّا دَاوُدَ يَأَمْسَ يَثٜىٰ ‏«‏كَدَ كَكَشٜىٰشِ!‏ غَمَا بَابُوَنْدَ ذَيْسَا حَنُّ عَكَنْ وَنْدَ يَهْوٜىٰهْ يَكٜىٰٻٜىٰ، حَرْ يَكُٻُتَ؞

¹⁰ نَا ضَنْڟٜىٰ دَ سُونَنْ يَهْوٜىٰهْ مَيْ رَيْ، يَهْوٜىٰهْ دَ كَنْسَ ذَيْ هَلَّكَ طَالُوتَ، كُواْ يَمُتُ سَبُواْدَ ݣُونَكِنْسَ سُنْثِكَ، كُواْ كُوَ عَكَشٜىٰشِ عَيَاڧِ؞

¹¹ يَهْوٜىٰهْ يَسَوَّڧٜىٰ إِنْمِيڧَ هَنُّونَ إِنْتَٻَ وَنْدَ يَهْوٜىٰهْ يَكٜىٰٻٜىٰ سَرْكِے!‏ مُطَوْكِ مَاشِ دَ غُواْرَنْ ضُوً دَسُكٜىٰ كُسَدَ كَنْ سَرْكِے، سَعَنً مُتَڢِے؞»‏

¹² سَبُواْدَ حَكَ دَاوُدَ يَطَوْكِ مَاشِ دَ غُواْرَنْ ضُوً دَسُكٜىٰ كُسَدَ كَنْ سَرْكِے، سَيْ سُكَ كُواْمَ؞ بَاوَنْدَ يَغَنْسُ، بَاوَنْدَ يَسَنْ أَبِنْدَ يَڢَرُ، بَا كُوَ وَنْدَ يَڢَرْكَ؞ دُكَنْسُ بَرْثِ مَيْ نَوْيِ دَغَ يَهْوٜىٰهْ يَكَامَسُ؞

¹³ سَعَنً دَاوُدَ يَهَيٜىٰ ذُوَا وَنْثَنْ غٜىٰڢٜىٰنْ ݣُورِنْ، يَهَوْ كَنْ وَنِ تُدُ مَيْ طَنْ نِيسَ عِنْدَ طَالُوتَ تَرٜىٰدَ مُتَنٜىٰنْسَ سُكٜىٰ؞ أَݣَويْ بَبَّنْ ڢِيلِ ڟَكَانِنْسُ؞

¹⁴ سَيْ دَاوُدَ يَكِرَا سُواْجُواْجِنْ طَالُوتَ تَرٜىٰدَ أَبْنٜىٰرْ طَنْ نٜىٰرْ دَ بَبَّرْ مُرْيَ يَثٜىٰ ‏«‏أَبْنٜىٰرْ، كَنَ جِنَ؟»‏ أَبْنٜىٰرْ يَأَمْسَ يَثٜىٰ ‏«‏وَنٜىٰنٜىٰ يَكٜىٰ كِرَا يَنَ دَامُنْ سَرْكِے حَكَ؟»‏

¹⁵ سَيْ دَاوُدَ يَثٜىٰ ‏«‏أَبْنٜىٰرْ، وَنٜىٰ إِرِنْ مُتُمْنٜىٰ كَيْ؟ بَكَيْنٜىٰ سُواْجَ مَڢِيَ عِيَ يَاڧِ عَ إِسْرَٰٓءِيلَ بَ؟ دُوانْمٜىٰ بَكَيِ غَادِنْ مَيْغِدَنْكَ سَرْكِے دَ ݣَوْبَ؟ طَظُ وَنِ يَشِغَ ڟَكِيَرْكُ دُواْمِنْ يَكَشٜىٰ مَيْغِدَنْكَ سَرْكِے!‏

¹⁶ أَبْنٜىٰرْ، بَكَثِكَ عَيْكِنْكَبَ؞ نَا ضَنْڟٜىٰ دَ سُونَنْ يَهْوٜىٰهْ مَيْ رَيْ، كَيْ دَ مُتَنٜىٰنْكَ كُنْ إِسَ مُتُوَ سَبُواْدَ كُنْ كَاسَ غَادِنْ مَيْغِدَنْكُ دَݣَوْ، وَنْدَ يَهْوٜىٰهْ يَكٜىٰٻٜىٰ سَرْكِے؞ كُدُوبَ!‏ إِنَا نٜىٰ مَاشِنْ سَرْكِے دَ غُواْرَنْ ضُوَنْسَ وَطَنْدَ عَكَ أَجِيٜىٰ كُسَدَ كَنْسَ؟»‏

¹⁷ طَالُوتَ كُوَ يَغَانٜىٰ مُرْيَرْ دَاوُدَ سَيْيَثٜىٰ ‏«‏وَنَّنْ مُرْيَرْكَثٜىٰ، طَانَ دَاوُدَ؟»‏ دَاوُدَ يَأَمْسَ ‏«‏عِ، مُرْيَتَثٜىٰ، يَا مَيْغِرْمَ سَرْكِے؞»‏

¹⁸ دَاوُدَ يَثِيغَبَ يَثٜىٰ ‏«‏دُوانْمٜىٰ كَكٜىٰبِنَ، يَا مَيْغِرْمَ؟ مٜىٰنٜىٰنٜىٰ لَيْڢِينَ؟ وَثٜىٰ مُغُنْتَا تَكٜىٰ أَ هَنُّونَ؟

¹⁹ تُواْ، بَرِ مَيْغِرْمَ سَرْكِينَ يَكَسَ كُنّٜىٰ يَجِ أَبِنْدَ ذَنْ ڢَطَا؞ عِدَنْ يَهْوٜىٰهْ نٜىٰ يَسَاكَ كَيِ ڢُشِے دَنِے، بَرِ يَكَرْٻِ هَدَايَ تَهَڟِ؞ عَمَّا عِدَنْ مُتَنٜىٰنٜىٰ سُكَسَاكَ، بَرِ أَ لَعَنْتَسُ، يَهْوٜىٰهْ كُوَ شِينٜىٰ شَيْدَتَ؞ غَمَا سُنْ كُواْرٜىٰنِ دُواْمِنْ كَدَ إِنْسَامِ رَبُواْ ثِكِنْ غَادُوانْ يَهْوٜىٰهْ سُنَ ثٜىٰوَ ‏‹‏كَجٜىٰ كَبَوْتَوَ وَطَنْسُ أَلُّواْلِ؞›‏

²⁰ يَنْذُ كَدَ كَيَرْدَ عَكَشٜىٰنِ عَڧَسَرْدَ تَكٜىٰ نٜىٰسَ دَ وُرِنْ كَسَنْثٜىٰوَرْ يَهْوٜىٰهْ؞ دُوانْمٜىٰ سَرْكِنْ إِسْرَٰٓءِيلَ ذَيْ نٜىٰمِ يَكَشٜىٰ ڧُدَنْ ثِذُواْ كَمَرْ نِے؟ دُوانْمٜىٰ ذَاكَ ڢَرَوْثٜىٰنِ كَمَرْ وَنِ ڟُنْڟُنْ تُدَّيْ؟»‏

²¹ طَالُوتَ يَثٜىٰ ‏«‏نَا يِلَيْڢِے؞ كَدَاوُاْ، طَانَ دَاوُدَ!‏ بَذَنْيِ مَكَ كُواْمٜىٰبَ، دُواْمِنْ كَدَرَجَرْتَ رَيْنَ يَوْ؞ لَلَّيْ نَايِ وَوَنْثِ!‏ نَايِ مُومُّنَنْ أَبُ سُواْسَيْ!‏»‏

²² دَاوُدَ يَأَمْسَ يَثٜىٰ ‏«‏تُواْ، غَا مَاشِنْكَ، يَا سَرْكِے؞ كَعَيْكِ وَنِ سَوْرَيِ يَذُواْ يَكَرْٻَ؞

²³ يَهْوٜىٰهْ دَيْ يَكَنْ سَاكَ وَكُواْوَ بِسَغَ أَدَلْثِنْسَ دَ أَمِنْثِنْسَ؞ يَوْ يَسَاكَ أَ هَنُّونَ، عَمَّا بَنْ سُواْ إِنْيِ مَكَ كُواْمٜىٰبَ، دُواْمِنْ كَيْنٜىٰ يَهْوٜىٰهْ يَكٜىٰٻٜىٰ سَرْكِے؞

²⁴ كَمَرْ يَدَّ نَدَرَجَرْتَ رَنْكَ يَوْ، حَكَمَا بَرِ يَهْوٜىٰهْ يَدَرَجَرْتَ نَوَ، يَكُمَ كُٻُتَرْ دَنِے دَغَ دُكَنْ وَهَلُواْلِ!‏»‏

²⁵ طَالُوتَ يَأَمْسَ وَ دَاوُدَ يَثٜىٰ ‏«‏بَرِ أَلْبَرْكَ تَكَسَنْثٜىٰ عَكَنْكَ، طَانَ دَاوُدَ!‏ ذَاكَيِ مَنْيَنْ أَبُبُوَ كُمَ ذَاكَيِ نَصَرَا عَكُواْوَنّٜىٰنْسُ؞»‏ سَيْ دَاوُدَ يَكَامَ حَنْيَرْسَ، طَالُوتَ كُمَ يَكُواْمَ غِدَا؞