1 سَمَٰعِيلَ 24 - أَتَّوْرَتْ دَ أَنَّبَاوَا

دَاوُدَ يَا بَرْ طَالُوتَ دَ رَيْ

¹ بَايَنْدَ طَالُوتَ يَكُواْمُواْ دَغَ يَاڧِ دَ ڢِلِسْتِيَاوَا، سَيْ عَكَ ڢَطَا مَسَ ثٜىٰوَ دَاوُدَ يَنَ أَ دَاجِنْ عٜىٰنْ‌غٜىٰدِ؞

² سَيْ يَذَاٻِ سُواْجُواْجِ دُبُو عُكُ مَڢِيَ عِيَ يَاڧِ دَغَ ثِكِنْ دُكَنْ إِسْرَٰٓءِيلَ سُكَجٜىٰ نٜىٰمَنْ دَاوُدَ دَ مُتَنٜىٰنْسَ كُسَدَ دُووَڟُنْ أَوَكِنْ دَاجِ؞

³ دَ طَالُوتَ يَكَيْ وَنِ كُواْغُواْ أَغٜىٰڢٜىٰنْ حَنْيَ كُسَدَ عِنْدَ عَكٜىٰ أَجِيٜىٰ تُمَكِ، سَيْ يَرَڟٜىٰ يَشِغَ ثِكِ دُواْمِنْ يَيِ بَايَنْ غِدَا؞ ثَنْ ثِكِ ثِكِنْ كُواْغُوانْ كُوَ دَاوُدَ يأَنَانً عَٻُواْيٜىٰ دَ مُتَنٜىٰنْسَ؞

⁴ مُتَنٜىٰنْ دَاوُدَ سُكَثٜىٰ مَسَ ‏«‏يَوْ نٜىٰ رَانَرْ دَ يَهْوٜىٰهْ يَيِ ذَنْثٜىٰ عَكَيْ دَيَثٜىٰ مَكَ، ‏‹‏ذَنْ بَادَ أَبُواْكَنْ غَابَنْكَ أَ حَنُّنْكَ دُواْمِنْ كَيِ دَشِ يَدَّ كَاغَ دَامَ؞›‏ »‏ سَيْ دَاوُدَ يَيِ رَرَّڢٜىٰ يَجٜىٰ يَيَنْكُواْ بَاكِنْ رِغَرْ طَالُوتَ بَاتَرٜىٰدَ سَنِنْ طَالُوتَ بَ؞

⁵ دَغَ بَايَ دَاوُدَ يَدَامُ غَمٜىٰدَ يَدَّ يَيَنْكٜىٰ رِغَرْ سَرْكِے؞

⁶ يَثٜىٰ وَمُتَنٜىٰنْسَ ‏«‏يَهْوٜىٰهْ يَسَوَّڧٜىٰ إِنْيِ وَمَيْغِدَانَ وَنِ أَبُ حَكَ!‏ أَيْ، طَالُوتَ شِينٜىٰ سَرْكِنْ دَ يَهْوٜىٰهْ يَكٜىٰٻٜىٰ؞ بَيْ كَمَاتَ إِنْيِ مَسَ كُواْمٜىٰبَ دُواْمِنْ شِينٜىٰ سَرْكِنْ دَ يَهْوٜىٰهْ يَكٜىٰٻٜىٰ؞»‏

⁷ تَهَكَ دَاوُدَ يَڟَاوَتَا وَمُتَنٜىٰنْسَ، بَيْ يَرْدَ مُسُ سُڢَاطَوَ طَالُوتَ بَ؞ سَيْ طَالُوتَ يَتَاشِ يَڢِتَ دَغَ كُواْغُوانْ يَكَامَ حَنْيَرْسَ؞

⁸ سَعَنً دَاوُدَ يَڢِتَ دَغَ كُواْغُوانْ يَطَغَ مُرْيَ دَ ڧَرْڢِے يَكِرَا طَالُوتَ يَثٜىٰ ‏«‏يَا مَيْ غِرْمَ سَرْكِے!‏»‏ دَ طَالُوتَ يَجُويَ، سَيْ دَاوُدَ يَرُسُنَ دَ كَنْسَ حَرْ ڧَسَا؞

⁹ سَيْيَثٜىٰ وَ طَالُوتَ ‏«‏دُوانْمٜىٰ كَكٜىٰ جِنْ مَغَنْ‌غَنُنْ مُتَنٜىٰ مَاسُ ثٜىٰوَ وَيْ إِنَ سُواْ إِنْيِ مَكَ مُغُنْتَا؟

¹⁰ غَاشِ، يَوْ كَغَنِ ثٜىٰوَ يَهْوٜىٰهْ يَاسَاكَ أَ هَنُّونَ عَثِكِنْ كُواْغُواْنَّنْ حَرْ مُتَنٜىٰنَ سُكَثٜىٰ إِنْكَشٜىٰكَ، عَمَّا نَڧِ؞ نَثٜىٰ، ‏‹‏بَذَنْ مِيڧَ هَنُّونَ إِنْتَٻَ مَيْغِدَانَ بَ، دُواْمِنْ كَيْنٜىٰ يَهْوٜىٰهْ يَكٜىٰٻٜىٰ كَذَمَ سَرْكِے؞›‏

¹¹ بَابَنَ، دُوبِے بَاكِنْ رِغَرْكَ أَ هَنُّونَ؞ دَيَكٜىٰ نَيَنْكِ بَاكِنْ رِغَرْكَ بَنْ كُوَ كَشٜىٰكَ بَ، سَيْ كَسَنِ ثٜىٰوَ بَابُ مُوغُنْ شِرِ غَمٜىٰدَ كَيْ، بَابُ صَاٻُواْ كُواْ وَنِ ذُنُوبِ أَ هَنُّونَبَ؞ عَمَّا دُكْدَهَكَ كَنَ ڧُواْڧَرِ كَكَشٜىٰنِ؞

¹² بَرِ يَهْوٜىٰهْ يَيِ شَرِيعَ ڟَكَانِينَ دَكَيْ!‏ بَرِ يَهْوٜىٰهْ يَرَامَ مُغُنْتَارْ دَ كَكٜىٰيِ مِنِ، عَمَّا نِے كَمْ هَنُّونَ بَذَيْ تَٻَكَبَ؞

¹³ كَمَرْ يَدَّ كَرِنْ مَغَنَرْ نَنْ نَدَا يَثٜىٰ، ‏‹‏دَغَ مَاسُ مُغُنْتَا مُوغَيٜىٰنْ أَبُبُوَ سُكٜىٰ ڢِتُواْوَ؞›‏ سَبُواْدَ حَكَ، هَنُّونَ بَذَيْ تَٻَكَبَ؞

¹⁴ كَيْ دَ كَكٜىٰ سَرْكِنْ إِسْرَٰٓءِيلَ، وَنٜىٰنٜىٰ كَڢِتُواْ يَاڧِ دَشِ؟ وَكَكٜىٰ كُواْرَ؟ يَنَ دَݣَوْ كَٻَاتَ لُواْكَثِنْكَ كَنَ بِنْ مَتَثّٜىٰنْ كَرٜىٰ كُواْ ڧُدَنْ ثِذُواْ كَمَرْ نِے؟

¹⁵ بَرِ يَهْوٜىٰهْ يَذَمَ أَلْڧَلِ يَيِ شَرِيعَ ڟَكَانِينَ دَكَيْ عَكَنْ وَنٜىٰنٜىٰ مَيْ لَيْڢِے؞ بَرِ يَهْوٜىٰهْ يَدُوبَ، يَڟَيَ مِنِ يَنُونَ بَانِ دَ لَيْڢِے؞»‏

¹⁶ دَ دَاوُدَ يَغَمَيِ وَ طَالُوتَ مَغَنَ حَكَ، سَيْ طَالُوتَ يَتَمْبَيٜىٰشِ يَثٜىٰ ‏«‏وَنَّنْ مُرْيَرْكَثٜىٰ، طَانَ دَاوُدَ؟»‏ سَيْ طَالُوتَ يَڢَشٜىٰ دَ كُوكَا؞

¹⁷ يَثٜىٰ وَ دَاوُدَ ‏«‏كَاڢِينِ أَدَلْثِے؞ كَايِ مِنِ أَلْحٜىٰرِ، عَمَّا نَايِ مَكَ مُغُنْتَا؞

¹⁸ يَنْذُ كَاڢَطَا أَبُ مَيْݣَوْ وَنْدَ كَعَيْكَتَ مِنِ؞ يَهْوٜىٰهْ يَا بَادَنِ أَ حَنُّنْكَ، عَمَّا بَكَ كَشٜىٰنِبَ؞

¹⁹ أَيْ، عِدَنْ مُتُمْ يَسَدُ دَ أَبُواْكِنْ غَابَنْسَ بَايَ بَرِنْسَ يَتَڢِے لَاڢِيَ؞ بَرِ يَهْوٜىٰهْ يَسَاكَ مَكَ دُواْمِنْ أَلْحٜىٰرِنْدَ كَنُونَ مِنِ يَوْ؞

²⁰ نَا تَبَّتَا يَنْذُ لَلَّيْ ذَاكَ ذَمَ سَرْكِے، كُمَ مُلْكٍ إِسْرَٰٓءِيلَ ذَيْ ڧَارُ تَهَنُّنْكَ؞

²¹ عَمَّا كَرَنْڟٜىٰ مِنِ، يَهْوٜىٰهْ كُوَ يَذَمَ شَيْدَرْكَ ثٜىٰوَ ذَاكَبَرْ ظُرِيَاتَ دَ رَيْ، دُواْمِنْ كَدَ سُونَنَ دَ نَغِدَنْ بَابَنَ يَمُتُ غَبَاطَيَ؞»‏

²² دَاوُدَ كُوَ يَرَنْڟٜىٰوَ طَالُوتَ؞ طَالُوتَ كُوَ يَكُواْمَ غِدَا، عَمَّا دَاوُدَ دَ مُتَنٜىٰنْسَ سُكَ هَوْرَ ذُوَا وُرِنْ ٻُيَنْسُ؞