1 سَمَٰعِيلَ 14 - أَتَّوْرَتْ دَ أَنَّبَاوَا

¹ وَتَرَانَ يُواْنَتَنْ طَنْ طَالُوتَ يَكِرَا سَوْرَيِ مَيْ رِڧٜىٰ مَسَ كَايَنْ يَاڧِ يَثٜىٰ ‏«‏ذُواْ مُهَيٜىٰ ذُوَا غٜىٰڢٜىٰنْ سَنْسَنِنْ ڢِلِسْتِيَاوَا؞»‏ عَمَّا بَيْ ڢَطَا وَبَابَنْسَ طَالُوتَ بَ؞

² طَالُوتَ كُوَ يَكَڢَ تٜىٰنْتِنْسَ عَڧَرْڧَشِنْ إِتَاثٜىٰنْ رُمَّنْ أَ مِغْرُوانْ، ڧَوْيٜىٰنْ غِبٜىٰيَ؞ سُواْجُواْجِ طَرِے شِدَ سُنَ تَرٜىٰ دَشِ،

³ دَ كُمَ أَهِيَ ڢِرِسْتِ نَ يَهْوٜىٰهْ يأَنَانً أَوُرِنْ، يَنَ رِڧٜىٰ دَ عٜىٰڢُوادْ نَنٜىٰمَنْ نُڢِنْ يَهْوٜىٰهْ؞ أَهِيَ طَنْ أَهِتُبْ نٜىٰ، طَنْعُوَنْ إِكَبُوادْ طَنْ ڢِنٜىٰهَسْ دَغَ غِدَنْ عٜىٰلِ، ڢِرِسْتِ نَ يَهْوٜىٰهْ أَ شِلُواْ؞ بَ كُوَ وَنْدَ يَسَنْ ثٜىٰوَ يُواْنَتَنْ يَبَرْسُ؞

⁴ أَ دَيْدَيْ عِنْدَ يُواْنَتَنْ ذَيْ وُثٜىٰ ذُوَا وُرِنْ ڢِلِسْتِيَاوَنْ، أَݣَويْ هَوَ عَكُواْوَنٜىٰ غٜىٰڢٜىٰ؞ طَيَنْ هَوَنْ أَنَثٜىٰدَشِ بُواْظٜىٰظْ، طَيَنْ كُمَ سٜىٰنٜىٰ؞

⁵ هَوَنْ دَيَكٜىٰ أَرٜىٰوَ يَنَ ڢُسْكَنْتَرْ مِكْمَشْ نٜىٰ، وَنْدَ يَكٜىٰ كُدُ كُمَ يَنَ ڢُسْكَنْتَرْ غٜىٰبَ نٜىٰ؞

⁶ سَيْ يُواْنَتَنْ يَثٜىٰ وَسَوْرَيِ مَيْ رِڧٜىٰ مَسَ كَايَنْ يَاڧِ ‏«‏كَذُواْ مُڧٜىٰتَرٜىٰ ذُوَا سَنْسَنِنْ يَاڧِنْ وَطَنَّنْ ڧَظَامَنْ أَرْنَ مَرَسَ كَاثِيَ؞ وَيَسَنِ كُواْ يَهْوٜىٰهْ ذَيْبَامُ نَصَرَا، غَمَا بَابُ أَبِنْدَ ذَيْ عِيَ حَنَ يَهْوٜىٰهْ كَٰوُاْ نَصَرَا، كُواْ تَوُرِنْ مُتَنٜىٰ مَاسُيَوَ، كُواْ تَوُرِنْ مُتَنٜىٰ كَطَنْ؞»‏

⁷ سَوْرَيِ مَيْ رِڧٜىٰ كَايَنْ يَاڧِنْ يَأَمْسَا وَ يُواْنَتَنْ يَثٜىٰ ‏«‏كَيِ أَبِنْدَ كَغَ يَدَاثٜىٰ مَكَ؞ غَاشِ كُوَ إِنَ غُواْيُوانْ بَايَنْكَ؞»‏

⁸ يُواْنَتَنْ يَثٜىٰ ‏«‏تُواْ، ذَامُ حَيٜىٰ ذُوَا وَجٜىٰنْ ڢِلِسْتِيَاوَنْ ثَنْ، كُمَ ذَامُيِ يَدَّ ذَاسُ غَنْمُ؞

⁹ عِدَنْ سُكَثٜىٰ مَنَ، ‏‹‏كُجِرَمُ حَرْ سَيْ مُنْ كَيْ وُرِنْكُ،›‏ تُواْ، سَيْ مُڟَيَ ثِكْ؞

¹⁰ عَمَّا عِدَنْ سُكَثٜىٰ، ‏‹‏كُهَوْرَ نَنْ،›‏ تُواْ، ذَامُ هَوْرَ ذُوَا وُرِنْسُ، غَمَا وَنَّنْ ذَيْ ذَمَ مَنَ عَلَمَ ثٜىٰوَ يَهْوٜىٰهْ يَابَادَسُو أَ حَنُّوَنْمُ؞»‏

¹¹ سَيْ سُكَ نُونَ كَنْسُ غَ سُواْجُواْجِنْ ڢِلِسْتِيَاوَا؞ ڢِلِسْتِيَاوَنْ سُكَثٜىٰ ‏«‏دُوبَ!‏ إِبْرَانِيَاوَا سُنَ ڢِڢِّتُواْوَ دَغَ رَامُكَ عِنْدَ سُكَ ٻُواْيٜىٰ كَنْسُ؞»‏

¹² سَيْ سُواْجُواْجِنْ سُكَثٜىٰ وَ يُواْنَتَنْ دَ مَيْ رِڧٜىٰ مَسَ كَايَنْ يَاڧِ ‏«‏كُهَوْرَ ذُوَا وَجٜىٰنْمُ، ذَامُ كُواْيَ مُكُ حَنْكَلِ!‏»‏ يُواْنَتَنْ كُوَ يَثٜىٰ وَ مَيْ رِڧٜىٰ مَسَ كَايَنْ يَاڧِ ‏«‏كَبِيُواْنِ، غَمَا يَهْوٜىٰهْ يَابَادَسُو أَ حَنُّنْ إِسْرَٰٓءِيلَ؞»‏

¹³ سُكَ هَوْرَ دَ رَرَّڢٜىٰ، يُواْنَتَنْ يَنَ غَبَ، مَيْ رِڧٜىٰ مَسَ كَايَنْ يَاڧِ يَنَ بِنْسَ؞ دَسُكَ كَيْ ثَنْ، سَيْ يُواْنَتَنْ يَدِنْ‌غَ سَسَّارٜىٰ ڢِلِسْتِيَاوَا حَرْ سُنَ ڢَاطُوَ عَڧَسَا، مَيْ رِڧٜىٰ مَسَ كَايَنْ يَاڧِ يَنَ بِنْ بَايَنْسَ يَنَ كَشٜىٰسُ؞

¹⁴ عَكَرُواْ نَڢَرْكُواْ يُواْنَتَنْ دَ مَيْ رِڧٜىٰ مَسَ كَايَنْ يَاڧِ سُكَ كَشٜىٰ مُتَنٜىٰ عَشِرِنْ أَ ڢِيلِ مَيْ ڢَاطِنْدَ يَكَيْ كَمَرْ رَبِنْ غُواْنَرْ دَ شَانُنْ نُواْمَ ذَاسُ نُواْمٜىٰ رَانَ غُدَا؞

¹⁵ سَيْ ڟُواْرُواْ يَكَامَ دُكَنْ سُواْجُواْجِنْ ڢِلِسْتِيَاوَا دَ وَطَنْدَ سُكٜىٰ عَثِكِنْ سَنْسَنِنْ يَاڧِ دَ وَطَنْدَ سُكٜىٰ وَجٜىٰ، حَرْ مَا دَ وَطَنْدَ سُكٜىٰ أَ ڢِيلِ دَ كُمَ وَطَنْدَ سُكٜىٰ كَيْ هَرِ؞ دُكَنْسُ سُكَجِڟُواْرُواْ سُواْسَيْ حَرْ سُكَ ضِكِثِے؞ عَكَيِ ضَوَرْ ڧَسَا؞ اللَّهْ نٜىٰ كُوَ يَكَٰوُاْ وَنَّنْ ضِكِثِيوَرْ؞

إِسْرَٰٓءِيلَاوَا سُنْ كُواْرِ ڢِلِسْتِيَاوَا

¹⁶ سُواْجُواْجِنْ غَادِ نَ طَالُوتَ وَطَنْدَ سُكٜىٰ أَ غِبٜىٰيَ عَيَنْكِنْ ذُرِيَرْ بِلِيَامِنُ سُكَ دُوبَ، سَيْ سُكَغَ سُواْجُواْجِنْ ڢِلِسْتِيَاوَا سُنْ ضِكِثِے سُنَ غُدُ تَكُواْعِنَ؞

¹⁷ سَيْ طَالُوتَ يَثٜىٰ وَمُتَنٜىٰنْ دَسُكٜىٰ تَرٜىٰدَشِ ‏«‏كُڧِرْغَ سُواْجُواْجِنْ دُواْمِنْ أَغَ وَنْدَ بَايَ نَنْ؞»‏ دَ عَكَيِ ڧِرْغٜىٰ سَيْ عَكَ غَانٜىٰ يُواْنَتَنْ دَ مَيْ رِڧٜىٰ مَسَ كَايَنْ يَاڧِنٜىٰ بَاسَ نَنْ؞

¹⁸ طَالُوتَ يَسُواْ أَهِيَ ڢِرِسْتِ يَتَمْبَيِ اللَّهْ غَمٜىٰدَ يَاڧِنْ؞ سَيْ طَالُوتَ يَثٜىٰ وَ أَهِيَ يَكَٰوُاْ عَݣُوتِنْ يَرْجٜىٰجٜىٰنِيَ نَ اللَّهْ؞ أَ لُواْكَثِنْ كُوَ عَݣُوتِنْ يَرْجٜىٰجٜىٰنِيَ نَ اللَّهْ يَنَ تَرٜىٰدَ إِسْرَٰٓءِيلَاوَا؞

¹⁹ سَعَدَّ طَالُوتَ يَكٜىٰ مَغَنَ دَ ڢِرِسْتِ طِنْ، ضِكِثِيوَ أَ سَنْسَنِنْ يَاڧِنْ ڢِلِسْتِيَاوَا تَيِ تَڧَارُوَ؞ سَيْ طَالُوتَ يَثٜىٰ وَڢِرِسْتِ ‏«‏كَبَرِ دَيْ، مُتَڢِے كَوَيْ؞»‏

²⁰ سَيْ طَالُوتَ يَتَارَ سُواْجُواْجِنْسَ سُكَ شِغَ يَاڧِ؞ سُنْ تَرَرْ دَ ڢِلِسْتِيَاوَنْ أَ ضِكِثِے، سُنَ تَسَارَنْ جُونَنْسُ دَ تَكُبَ؞

²¹ إِبْرَنِيَاوَنْ كُوَ دَ دَا مَا سُكٜىٰ تَرٜىٰدَ ڢِلِسْتِيَاوَا سُكَ كُمَبِے ڢِلِسْتِيَاوَنْ ذُوَا سَنْسَنِنْ يَاڧِنْسُ، سُكَ جُويَا سُنَ غُواْيُوانْ بَايَنْ طَالُوتَ دَ يُواْنَتَنْ أَ لُواْكَثِنْ دَ يَاڧِنْ يَتَاسُواْ؞

²² دَ دُكَنْ إِسْرَٰٓءِيلَاوَنْ دَ سُكَ ٻُيَ عَتُدَّنْ يَنْكِنْ ذُرِيَرْ إِڢْرَيِمْ سُكَجِ ثٜىٰوَ سُواْجُواْجِنْ ڢِلِسْتِيَاوَا سُنَ غُدُ، سَيْ سُو مَا سُكَ شِغَ يَاڧِنْ دَ ذَاڢِ سُكَ كُواْرِ ڢِلِسْتِيَاوَنْ؞

²³ عَكَيِ يَاڧِنْ حَرْ غَبَ دَ بٜىٰتَوٜىٰنْ؞ يَهْوٜىٰهْ كُوَ يَثٜىٰثِ إِسْرَٰٓءِيلَاوَا أَ رَانَرْ نَنْ؞

طَالُوتَ يَا سَاكٜىٰ يِنْ كُسْكُرٜىٰ

²⁴ أَ رَانَرْ نَنْ سُواْجُواْجِنْ إِسْرَٰٓءِيلَ كُوَ سُنْ شَا وَهَلَ سُواْسَيْ، غَمَا طَالُوتَ يَيِ ضَنْڟُوَا ثٜىٰوَ ‏«‏لَعَنَنّٜىٰ نٜىٰ مُتُمِنْدَ يَثِ عَبِنْثِ كَاڢِنْ ڢَاطُوَرْ رَانَ، تُنْ بَنْ يِ رَامُوَا عَكَنْ أَبُواْكَنْ غَابَنَبَ؞»‏ سَبُواْدَ حَكَ بَابُ سُواْجَنْدَ يَثِ عَبِنْثِ؞

²⁵ دَدُكَنْسُ سُكَ شِغَ كُرْمِ، سَيْسُكَ سَامِ ظُمَ أَ ظُبٜىٰ عَڧَسَا؞

²⁶ دَ سُواْجُواْجِنْ سُكَ سَامِ ظُمَ أَ ظُبٜىٰ عَڧَسَا، بَاوَنْدَ يَسَا يَڟَ يَتَٻَ بَلّٜىٰ يَطَنْطَنَ، غَمَا كُواْوَ يَنَ ڟُواْرُوانْ لَعَنَرْ طَالُوتَ؞

²⁷ عَمَّا يُواْنَتَنْ بَيْ سَنْ ثٜىٰوَ بَابَنْسَ يَيِ ضَنْڟُوَابَ؞ سَبُواْدَ حَكَ سَيْ يَسَا سَنْدَنْ دَيَكٜىٰ أَ حَنُّنْسَ يَتَٻَ ظُمَنْ يَسَا عَبْكِنْسَ؞ بَايَنْ يَيِ حَكَ سَيْ يَجِ ڧَرْڢِنْ جِكِے يَذُواْ مَسَ؞

²⁸ سَيْ طَيَ دَغَ ثِكِنْ سُواْجُواْجِنْ يَثٜىٰ مَسَ ‏«‏أَيْ، بَابَنْكَ يَيِ ضَنْڟُوَا ثٜىٰوَ لَعَنَنّٜىٰ نٜىٰ دُكْ وَنْدَ يَثِ عَبِنْثِ يَوْ؞ شِيَسَا دُكْ سُواْجُواْجِنْ بَاسُ دَ ڧَرْڢِے؞»‏

²⁹ يُواْنَتَنْ يَأَمْسَ يَثٜىٰ ‏«‏بَابَنَ يَكَٰوُاْ دَامُوَ عَڧَسَرْ؞ أَيْ، كَيْ مَا كَغَ يَدَّ طَنْ ظُمَنْدَ نَتَٻَ يَسَا نَسَامِ ڧَرْڢِے؞

³⁰ دَا يَيَ ذَيْ كَسَنْثٜىٰ كٜىٰنَنْ دَا عَثٜىٰ أَنْبَرْ سُواْجُواْجِنْ سُكَثِ عَبِنْثِنْ دَ سُكَ ڨُوثٜىٰ دَغَ أَبُواْكَنْ غَابَنْسُ؟ أَيْ دَ غَوَوَّكِنْ ڢِلِسْتِيَاوَنْ دَ عَكَ كَشٜىٰ سُنْڢِے حَكَ!‏»‏

³¹ أَ رَانَرْ نَنْ إِسْرَٰٓءِيلَاوَا سُكَيِ تَكَشٜىٰ ڢِلِسْتِيَاوَا دَغَ مِكْمَشْ حَرْ ذُوَا أَيَلُوانْ؞ بَايَنْ حَكَ غَاجِيَ تَكَامَسُ سُواْسَيْ سَبُواْدَ يُنْوَ

³² حَرْ سَيْ سُكَ ڢَاطِ عَكَنْ كَايَنْ دَ سُكَ ڨُوثٜىٰ عَيَاڧِ، سُكَ طِبَ تُمَكِ دَ شَانُو دَ یَیَنْ شَانُو دَغَ ڢِلِسْتِيَاوَا؞ نَنْ دَ نَنْ سُكَ كَشٜىٰ دَبُّواْبِنْ سُكَ ثِنْيٜىٰ نَامَنْ تَرٜىٰدَ جِنِنْ؞

³³ سَيْ وَنِ يَثٜىٰ وَ طَالُوتَ ‏«‏كَغَا سُواْجُواْجِنْ سُنَيِ وَ يَهْوٜىٰهْ ذُنُوبِ؞ سُنَثِنْ نَامَ تَرٜىٰدَ جِنِ!‏»‏ طَالُوتَ يَثٜىٰ مُسُ ‏«‏غَسْكِيَانٜىٰ، وَنَّنْ يَذَمَ ثِنَمَنَ نٜىٰ أَغَبَنْ يَهْوٜىٰهْ؞ كُتُورَ ڧَتُوانْ دُوڟٜىٰ ذُوَا وُرِينَ يَنْذُ!‏»‏

³⁴ سَعَنً يَثٜىٰ ‏«‏كُتَڢِے كُڢَطَا وَسُواْجُواْجِنْ كُواْوَ يَكَٰوُاْ سَانِيَرْسَ دَ تُنْكِيَرْسَ يَيَنْكَ أَدُوڟٜىٰنَّنْ يَثِ؞ كَدَ كُيِ وَ يَهْوٜىٰهْ ذُنُوبِ تَوُرِنْ ثِنْ نَامَ تَرٜىٰدَ جِنِنْ؞»‏ أَ دَرٜىٰنَّنْ كُوَ كُواْوَ يَكَٰوُاْ دَبَّرْسَ يَيَنْكَ أَوُرِنْ؞

³⁵ سَيْ طَالُوتَ يَغِنَ بَغَدٜىٰ نَهَدَايَ غَ يَهْوٜىٰهْ، وَنَّنْ نٜىٰ بَغَدٜىٰ نَڢَرْكُوانْدَ يَغِنَ؞

³⁶ سَيْ طَالُوتَ يَثٜىٰ ‏«‏بَرِ مُغَنْ‌غَرَ مُڢَاطَوَ ڢِلِسْتِيَاوَا دَ يَاڧِ دَ دَرٜىٰنَّنْ، مُكَكَّشٜىٰسُ، مُيِ تَݣُوشِ كَايَنْسُ حَرْ وَايٜىٰوَرْ غَرِ؞ كَدَ مُبَرْ كُواْ طَيَ عَثِكِنْسُ دَ رَيْ!‏»‏ سُكَ أَمْسَ سُكَثٜىٰ ‏«‏كَيِ دُكْ أَبِنْدَ كَغَ يَدَاثٜىٰ؞»‏ عَمَّا ڢِرِسْتِ يَثٜىٰ ‏«‏بَرِ مُتَمْبَيِ اللَّهْ تُكُنَ؞»‏

³⁷ سَيْ طَالُوتَ يَتَمْبَيِ اللَّهْ يَثٜىٰ ‏«‏إِنْڢَاطَوَ ڢِلِسْتِيَاوَا دَ يَاڧِ؟ ذَاكَبَامُ نَصَرَا عَكَنْسُ؟»‏ عَمَّا اللَّهْ بَيْ أَمْسَوَ طَالُوتَ أَ لُواْكَثِنْبَ؞

³⁸ سَعَنً طَالُوتَ يَثٜىٰ وَدُكَنْ شُوغَبَنِّنْ سُواْجُواْجِنْسَ ‏«‏كُذُواْ نَنْ مُبِنْثِكَ مُسَنْ ذُنُوبِنْدَ يَكَٰوُاْ رَشِنْ أَمْسَ يَوْ نَنْ؞

³⁹ نَا ضَنْڟٜىٰ دَ سُونَنْ يَهْوٜىٰهْ مَيْ رَيْ وَنْدَ يَكٜىٰبَا إِسْرَٰٓءِيلَ نَصَرَا، كُواْ دَ طَانَ يُواْنَتَنْ نٜىٰ يَيِ لَيْڢِنْ ذَاعَ كَشٜىٰشِ!‏»‏ بَابُ سُواْجَنْدَ يَأَمْسَ مَسَ؞

⁴⁰ سَيْيَثٜىٰ مُسُ ‏«‏دُكَنْكُ كُڟَيَ أَغٜىٰڢٜىٰ طَيَ، نِے دَ طَانَ مُو مَا أَغٜىٰڢٜىٰ طَيَ؞»‏ سُواْجُواْجِنْ سُكَ أَمْسَ مَسَ سُكَثٜىٰ ‏«‏كَيِ دُكْ أَبِنْدَ يَدَاثٜىٰ مَكَ؞»‏

⁴¹ طَالُوتَ يَيِ أَدُّعَ يَثٜىٰ ‏«‏يَا يَهْوٜىٰهْ اللَّهْ نَ إِسْرَٰٓءِيلَ، مُنَ ضُواْڧُوانْكَ كَنُونَ مَنَ مَيْلَيْڢِے؞»‏ سَيْ عَكَ نُونَ طَالُوتَ دَ يُواْنَتَنْ تَوُرِنْ أَمْڢَانِ دَ عُرِمْ دَ تُمِّمْ، سَوْرَنْ بَعَسَامٜىٰسُ دَ وَنِ لَيْڢِے بَ؞

⁴² طَالُوتَ كُمَ يَثٜىٰ ‏«‏تُواْ، يَنْذُ أَ نُونَ ڟَكَانِينَ دَ يُواْنَتَنْ وَنٜىٰنٜىٰ يَكٜىٰدَ لَيْڢِے؞»‏ عَكَ نُونَ يُواْنَتَنْ؞

⁴³ طَالُوتَ يَتَمْبَيِ يُواْنَتَنْ يَثٜىٰ ‏«‏كَڢَطَا مِنِ مٜىٰنٜىٰنٜىٰ كَيِ؟»‏ يُواْنَتَنْ يَأَمْسَ ‏«‏نَتَٻَ ظُمَ دَ بَاكِنْ سَنْدَنْدَ نَرِڧٜىٰ، سَيْ نَطَنْ لَسَ؞ غَانِ، أَشِرْيٜىٰ نَكٜىٰ إِنْمُتُ؞»‏

⁴⁴ سَيْ طَالُوتَ يَثٜىٰ وَ يُواْنَتَنْ ‏«‏بَرِ اللَّهْ يَطَوْكِ رَيْنَ إِنْ بَعَكَشٜىٰكَبَ!‏»‏

⁴⁵ عَمَّا سُواْجُواْجِنْ سُكَثٜىٰ وَ طَالُوتَ ‏«‏دُوانْمٜىٰ يُواْنَتَنْ ذَيْ مُتُ بَايَنْدَ تَدَلِيلِنْسَ نٜىٰ مُكَثِ نَصَرَا؟ كُواْ كَطَنْ بَذَيْ يِوُبَ!‏ مُنْ ضَنْڟٜىٰ دَ سُونَنْ يَهْوٜىٰهْ مَيْ رَيْ، بَاوَنْدَ ذَيْ تَٻَ غَاشِنْ كَنْسَ غُدَا؞ غَمَا أَبِنْدَ يَيِ يَوْ دَ تَيْمَكُوانْ اللَّهْ نٜىٰ يَيِشِ؞»‏ دُواْمِنْ حَكَ سُواْجُواْجِنْ سُكَ ڢَنْشِ يُواْنَتَنْ دَغَ مُتُوَ؞

⁴⁶ بَايَنْ وَنَّنْ طَالُوتَ يَبَرْ بِنْ ڢِلِسْتِيَاوَا، سَيْ ڢِلِسْتِيَاوَنْ سُكَ كُواْمَ يَنْكِنْ ڧَسَرْسُ؞

مُلْكٍ طَالُوتَ

⁴⁷ دَ طَالُوتَ يَذَمَ سَرْكِنْ إِسْرَٰٓءِيلَ، يَيِ يَاڧِ دَ أَبُواْكَنْ غَابَنْ إِسْرَٰٓءِيلَ وَطَنْدَ سُكٜىٰ كٜىٰوَيٜىٰ دَشِ؞ يَيِ يَاڧِ دَ مُواْوَبْ دَ أَمُّوانْ دَ عٜىٰدُوامْ دَ سَرَاكُنَنْ ذُوابَ دَ ڢِلِسْتِيَاوَا؞ دُكْ عِنْدَ طَالُوتَ يَتَڢِے يَاڧِ، يَيِ نَصَرَا؞

⁴⁸ يَيِيَاڧِ دَ ڧَرْڢِنْ ذُوثِيَا سُواْسَيْ، يَثِ نَصَرَا عَكَنْ أَمَلٜىٰكَاوَا، تَهَكَ يَثٜىٰثِ إِسْرَٰٓءِيلَ دَغَ حَنُّنْ مَاسُ ڨُوثٜىٰ مُسُ كَايَ؞

عِيَلِنْ طَالُوتَ

⁴⁹ یَیَ مَظَا نَ طَالُوتَ كُوَ سُونٜىٰ يُواْنَتَنْ دَ يِشْوِ دَ مَلْكِشُوَ؞ يَنَ كُمَ دَ یَیَ مَتَ بِيُ، سُونٜىٰ مٜىٰرَبْ یَرْ ڢَرِ دَ مِكَلْ یَرْ ڧَرَمَرْ؞

⁵⁰ سُونَنْ مَاتَرْسَ شِينٜىٰ أَهِنُواْوَمْ یَرْ أَهِمَعَظْ؞ سُونَنْ شُوغَبَنْ سُواْجُواْجِنْسَ كُمَ أَبْنٜىٰرْ طَنْ نٜىٰرْ طَنْعُوَنْ بَابَنْ طَالُوتَ؞

⁵¹ بَابَنْ طَالُوتَ، وَتُواْ كِشْ دَ بَابَنْ أَبْنٜىٰرْ وَتُواْ، نٜىٰرْ، دُكْ یَیَنْ أَبِيٜىٰلْ نٜىٰ؞

⁵² طَالُوتَ يَيِ يَاڧِ مَيْ ذَاڢِ دَ ڢِلِسْتِيَاوَا دُكَنْ ݣُونَكِنْ رَنْسَ؞ دُكْ سَعَدَّ يَغَ مُتُمْ مَيْ ڧَرْڢِے كُواْ مَيْ ڧَرْڢِنْ ذُوثِيَا، سَيْ يَجَاشِ يَسَا عَثِكِنْ سُواْجُواْجِنْسَ؞