1 سَرَاكُنَ 20 - أَتَّوْرَتْ دَ أَنَّبَاوَا

يَهْوٜىٰهْ يَبَا إِسْرَٰٓءِيلَ نَصَرَا

¹ سَرْكِے بٜىٰنْهَدَدْ نَ سُورِيَ يَتَتَّارَ سُواْجُواْجِنْسَ دَ سَرَاكُنَ تَلَاتِنْ دَ بِيُ، تَرٜىٰدَ دَوَكِنْسُ دَ كُمَ كٜىٰكُنَنْ دُواْكِنْسُ؞ سُكَ تَڢِے سُكَ كٜىٰوَيٜىٰ سَمَرِيَ بَبَّنْ بِرْنِنْ ڧَسَرْ إِسْرَٰٓءِيلَ، دُواْمِنْ سُڢَاطَ مَتَ دَ يَاڧِ؞

² سَيْ بٜىٰنْهَدَدْ يَعَيْكَ دَ سَڧُواْ ذُوَا وُرِنْ سَرْكِے أَهَبْ نَ إِسْرَٰٓءِيلَ ثٜىٰوَ ‏«‏إِنْجِ بٜىٰنْهَدَدْ،

³ ‏‹‏أَظُرْڢَرْكَ دَ ظِينَارِيَرْكَ نَوَنٜىٰ، مَڢِے ݣَوْ ثِكِنْ مَاتَنْكَ دَ یَیَنْكَ كُمَ نَوَنٜىٰ؞›‏ »‏

⁴ سَرْكِے أَهَبْ نَ إِسْرَٰٓءِيلَ يَأَمْسَ يَثٜىٰ ‏«‏رَنْكَيَدَطٜىٰ، سَرْكِے!‏ كَمَرْ يَدَّ كَڢَطَا، نَيَرْدَ، نِے دَ دُكْ أَبِنْدَ نَكٜىٰ دَشِ مُنْ ذَمَ نَاكَ؞»‏

⁵ سَيْ یَنْ عَيْكَنْ سَرْكِے بٜىٰنْهَدَدْ سُكَسَاكٜىٰ دَاوُاْوَ سُكَثٜىٰ ‏«‏إِنْجِ بٜىٰنْهَدَدْ، ‏‹‏نَارِغَا نَا عَيْكَ ثٜىٰوَ كَبَانِ أَظُرْڢَرْكَ دَ ظِينَارِيَرْكَ دَ مَاتَنْكَ دَ یَیَنْكَ؞

⁶ بَنْدَ حَكَ، وَرْهَكَ غُواْبٜىٰ ذَنْعَيْكَ دَ مُتَنٜىٰنَ سُشِغَ سُبِنْثِكٜىٰ غِدَنْ سَرْكِے دَ غِدَاجٜىٰنْ دَتَّاوَنْكَ سُݣُوشِ دُكْ أَبِنْدَ سُكٜىٰسُواْ؞›‏ »‏

⁷ سَرْكِے أَهَبْ يَكِرَا دُكَنْ شُوغَبَنِّنْ ڧَسَرْ يَثٜىٰ مُسُ ‏«‏كُغَ يَدَّ وَنَّنْ مُتُمِنْ يَكٜىٰ ڟُواْكَنَرْمُ!‏ يَعَيْكَ مِنِ دَ سَڧُواْ إِنْ بَاشِ مَاتَانَ دَ یَیَنَدَ أَظُرْڢَاتَ دَ ظِينَارِيَاتَ، نِے كُوَ بَنْڧِ مَسَبَ؞»‏

⁸ دُكَنْ شُوغَبَنِّ دَ سَوْرَنْ مُتَنٜىٰ سُكَثٜىٰ وَ أَهَبْ ‏«‏كَدَ كَكُلَ دَشِ، كَدَ مَا كَيَرْدَ؞»‏

⁹ سَيْ أَهَبْ يَثٜىٰ وَ یَنْ عَيْكَ نَ بٜىٰنْهَدَدْ ‏«‏كُڢَطَا وَ مَيْغِرْمَ سَرْكِے ثٜىٰوَ نَيَرْدَ دَ سَڧُواْ نَڢَرْكُوانْ، عَمَّا بَذَنْ عِيَيِنْ نَبِيُنْبَ؞»‏ یَنْ عَيْكَ سُكَ تَڢِے سُكَسَاكٜىٰ دَاوُاْوَ دَ وَنِ سَڧُواْ

¹⁰ دَغَ وُرِنْ بٜىٰنْهَدَدْ مَيْ ثٜىٰوَ ‏«‏بَرِ أَلُّواْلِ سُيِ مِنِ حُكُنْثِ حَرْ مَا ڢِيٜىٰدَ حَكَ، عِدَنْ بَنْ كَٰوُاْ مُتَنٜىٰ مَاسُيَوَنْ دَ ذَاسُ رُشٜىٰ سَمَرِيَ بَ؞ ذَاسُ رُشٜىٰ بِرْنِنْ حَرْ ڧُورَرْ ڧَسَرْ ذَاتَ كَاسَ مُسُ سُطِبَ أَ حَنُّ؞»‏

¹¹ سَرْكِے أَهَبْ يَأَمْسَ يَثٜىٰ ‏«‏كَدَ سُواْجَنْ دَيَكٜىٰ كَنْ سَا كَايَنْ يَاڧِ، يَبُغَ ڧِرْجِ كَمَرْ سُواْجَنْ دَيَكٜىٰ كَنْ تُوٻٜىٰ كَايَنْ يَاڧِ سَبُواْدَ يَثِ نَصَرَا؞»‏

¹² بٜىٰنْهَدَدْ يَكَرْٻِ أَمْسَرْ وَنَّنْ سَڧُواْ سَعَدَّ شِے دَ سَوْرَنْ سَرَاكُنَنْ سُكٜىٰ شَيٜىٰ شَيٜىٰ عَثِكِنْ تٜىٰنْتِنْسُ؞ سَيْيَثٜىٰ وَسُواْجُواْجِنْسَ ‏«‏كُشِرْيَ كُڢَارَ يَاڧِ؞»‏ سَيْ سُكَ طَوْكِ مَتَاكَنْ شِغَ بِرْنِنْ دَ يَاڧِ؞

¹³ سَيْ وَنِ أَنَّبِے يَذُواْ وُرِنْ سَرْكِے أَهَبْ نَ إِسْرَٰٓءِيلَ يَثٜىٰ مَسَ ‏«‏إِنْجِ يَهْوٜىٰهْ، ‏‹‏كَغَا بَبَّنْ تَارُوانْ سُواْجُواْجِنَّنْ؟ لَلَّيْ ذَنْسَا كَيِ نَصَرَا عَكَنْسُ يَوْ!‏ سَعَنً ذَاكَ سَنِ ثٜىٰوَ نِنٜىٰ يَهْوٜىٰهْ؞›‏ »‏

¹⁴ أَهَبْ يَيِ تَمْبَيَ يَثٜىٰ ‏«‏تَهَنُّنْ وَنٜىٰنٜىٰ؟»‏ أَنَّبِنْ يَأَمْسَ يَثٜىٰ ‏«‏إِنْجِ يَهْوٜىٰهْ، ‏‹‏تَهَنُّنْ مَتَسَنْ دَسُكٜىٰ ڧَرْڧَشِنْ شُوغَبَنِّنْ يَنْكُنَ؞›‏ »‏ أَهَبْ يَسَاكٜىٰ تَمْبَيَ يَثٜىٰ ‏«‏وَ ذَيْ ڢَارَ يَاڧِنْ؟»‏ أَنَّبِنْ يَأَمْسَ ‏«‏كَيْنٜىٰ؞»‏

¹⁵ سَيْ سَرْكِے أَهَبْ يَتَتَّارَ مَتَسَ مَاسُ يَاڧِ طَرِے بِيُ دَ تَلَاتِنْ دَ بِيُ وَطَنْدَ سُكٜىٰ ڧَرْڧَشِنْ شُوغَبَنِّنْ يَنْكُنَ؞ سَعَنً يَتَارَ دُكَنْ سَوْرَنْ سُواْجُواْجِنْسَ دُبُو بَݣَويْ دَغَ مُتَنٜىٰنْ إِسْرَٰٓءِيلَ؞

¹⁶ دَ ڟَكَرْ رَانَ، مَتَسَ مَاسُ يَاڧِ سُكَ ڢِتَ دُواْمِنْ يَاڧِ لُواْكَثِنْ دَ بٜىٰنْهَدَدْ دَ سَرَاكُنَ تَلَاتِنْ دَ بِيُنَّنْ وَطَنْدَ سُكَ حَطَكَيْ دَشِ سُكٜىٰ ثِكِنْ تٜىٰنْتِنْسُ سُنَ شَا سُنَ بُغُوَ؞

¹⁷ سَيْ مَتَسَ مَاسُ يَاڧِ نَشُوغَبَنِّنْ يَنْكُنَ سُكَ ڢَارَ ڢِتَ ذُوَا يَاڧِ؞ بٜىٰنْهَدَدْ يَا رِغَا يَا عَيْكَ دَ یَنْ لٜىٰڧٜىٰنْ أَسِيرِ سُكَ دَاوُاْ سُكَثٜىٰ مَسَ ‏«‏غَا سُواْجُواْجِ سُنَ ڢِتُواْوَ دَغَ سَمَرِيَ؞»‏

¹⁸ سَرْكِے بٜىٰنْهَدَدْ يَثٜىٰ ‏«‏كُكَامَسُ دَ رَيْ كُكَٰوُاْ، كُواْ دَ سُنْ ڢِتُواْ دُواْمِنْ يَاڧِ نٜىٰ، كُواْ كُوَ سُنْ ڢِتُواْ دُواْمِنْ نٜىٰمَنْ سَلَمَ؞»‏

¹⁹ عَمَّا مَتَسَ مَاسُ يَاڧِ نَشُوغَبَنِّنْ يَنْكُنَ سُنْ رِغَا سُنْ ڢِتَ دَغَ بِرْنِنْ، سَوْرَنْ سُواْجُواْجِنْ أَهَبْ سُنَ بِيٜىٰ عَبَايَ؞

²⁰ كُواْوَنّٜىٰنْسُ كُوَ يَكَشٜىٰ أَبُواْكِنْ غَابَنْسَ، سَيْ سَوْرَنْ سُورِيَاوَنْ سُكَ غُدُ، إِسْرَٰٓءِيلَاوَا كُوَ سُكَبِيسُ؞ عَمَّا سَرْكِے بٜىٰنْهَدَدْ نَ سُورِيَ يَغُدُ عَكَنْ دُواْكِ تَرٜىٰدَ وَطَنْسُ مَاسُ هَوَنْ دَوَكِ؞

²¹ سَيْ سَرْكِنْ إِسْرَٰٓءِيلَ يَڢِتَ تَرٜىٰدَ سُواْجُواْجِنْسَ سُكَ ڨُوثٜىٰ دَوَكِنْ دَ كٜىٰكُنَنْ دُواْكِنْ؞ أَنْثِ سُرِيَاوَا دَ يَاڧِ، عَكَ كُوَ كَكَّشٜىٰسُ دَيَوَ؞

²² أَنَّبِنْ يَسَاكٜىٰ ذُوَا وُرِنْ سَرْكِے أَهَبْ يَثٜىٰ مَسَ ‏«‏جٜىٰكَ، كَشِرْيَ سُواْجُواْجِنْكَ، كَيِ شِرِ مَيْݣَوْ عَكَنْ أَبِنْدَ ذَاعَيِ، سَبُواْدَ سَرْكِنْ سُورِيَ ذَيْسَاكٜىٰ كَٰوُاْ مَكَ يَاڧِ وَرْهَكَ شٜىٰكَرَا مَيْ ذُوَا؞»‏

يَهْوٜىٰهْ يَسَاكٜىٰ بَا إِسْرَٰٓءِيلَ نَصَرَا

²³ دَتَّاوَنْ سَرْكِے بٜىٰنْهَدَدْ سُكَثٜىٰ مَسَ ‏«‏أَلُّواْلِنْ إِسْرَٰٓءِيلَ نَكَنْ تُدَّيْ نٜىٰ، شِے يَسَا سُكَيِ نَصَرَا عَكَنْمُ؞ عَمَّا لَلَّيْ مُنَ عِيَيِنْ نَصَرَا عَكَنْسُ عِدَنْ مُنْيِ يَاڧِ دَسُو أَوُرِنْ دَيَكٜىٰ ڢِيلِ؞

²⁴ غَا أَبِنْدَ ذَاكَيِ؞ كَثَنْجَ سَرَاكُنَنَّنْ تَلَاتِنْ دَ بِيُ دَغَ مَڟَيِنْسُ، كَسَا شُوغَبَنِّنْ سُواْجُواْجِ أَمَيْمَكُوانْسُ؞

²⁵ كَسَاكٜىٰ تَتَّارَ سُواْجُواْجِ دَ دَوَكِ دَ كٜىٰكُنَنْ دُواْكِ دَيْدَيْ يَوَنْ وَطَنْدَ دَا كَرَسَ عَيَاڧِ؞ سَعَنً ذَامُ يَاڧٜىٰسُ أَوُرِنْ دَيَكٜىٰ ڢِيلِ، لَلَّيْ ذَامُثِ نَصَرَا عَكَنْسُ؞»‏ بٜىٰنْهَدَدْ كُوَ يَيَرْدَ دَ شَوَرَرْ؞

²⁶ دَ شٜىٰكَرَرْ تَكٜىٰوَيُواْ، سَيْ سَرْكِے بٜىٰنْهَدَدْ يَتَاشِ دَ سُواْجُواْجِنْسَ ذُوَا بِرْنِنْ أَڢٜىٰكْ دُواْمِنْ سُكَيْوَ إِسْرَٰٓءِيلَاوَا يَاڧِ؞

²⁷ عَكَ تَتَّارَ إِسْرَٰٓءِيلَاوَا عَكَبَاسُ كَايَنْ يَاڧِ، سُكَ ڢِتَ سُكَ ڢُسْكَنْثِ سُورِيَاوَنْ؞ إِسْرَٰٓءِيلَاوَنْ سُكَ تَتَّارُ كَمَرْ یَنْ غَرْكُنَ بِيُ نَأَوَكِ، عَمَّا سُرِيَاوَا سُكَ بَظُو سُكَ ثِكَ كُواْعِنَ أَ ڢِيلِنْ؞

²⁸ سَيْ مُتُمِنْ اللَّهْ يَذُواْ وُرِنْ سَرْكِنْ إِسْرَٰٓءِيلَ يَثٜىٰ ‏«‏إِنْجِ يَهْوٜىٰهْ، ‏‹‏سَبُواْدَ سُرِيَاوَا سُنْثٜىٰ نِے يَهْوٜىٰهْ اللَّهْ نَكَنْ تُدَّيْ نٜىٰ، بَنَوُرِنْ دَيَكٜىٰ ڢِيلِ، تُواْ، ذَنْبَادَ يَوَنْ جَمَعَرْ نَنْ أَ حَنُّنْكَ، ذَاكَ كُوَ سَنِ ثٜىٰوَ نِنٜىٰ يَهْوٜىٰهْ؞›‏ »‏

²⁹ عَكَيِ ݣُونَكِے بَݣَويْ إِسْرَٰٓءِيلَاوَنْ دَ سُرِيَاوَنْ سُنَ ذَمَ أَ سَنْسَنِنْ يَاڧِنْسُ سُنَ ڢُسْكَنْتَرْ جُونَ؞ أَ رَانَ تَبَݣَويْ عَكَ شِغَ يَاڧِ، إِسْرَٰٓءِيلَاوَا سُكَ كَكَّشٜىٰ سُواْجُواْجِنْ سُورِيَ دُبُو طَرِے أَ رَانَ طَيَ؞

³⁰ سَوْرَنْ سُورِيَاوَنْ سُكَ غُدُ ذُوَا ثِكِنْ بِرْنِنْ أَڢٜىٰكْ، سَيْ كَتَنْ‌غَرْ بِرْنِنْ تَڢَاطِ عَكَنْ سُواْجُواْجِ دُبُو عَشِرِنْ دَ بَݣَويْ؞ بٜىٰنْهَدَدْ شِے مَا يَغُدُ يَشِغَ بِرْنِنْ يَٻُيَ عَثِكِنْ وَنِ غِدَا؞

³¹ شُوغَبَنِّنْ سُواْجُواْجِنْسَ سُكَذُواْ وُرِنْسَ سُكَثٜىٰ ‏«‏غَاشِ، مُنْجِ ثٜىٰوَ سَرَاكُنَنْ غِدَنْ إِسْرَٰٓءِيلَ سُنَدَ تَوْسَيِ سُواْسَيْ؞ يَرْدَ مَنَ مُتَڢِے وُرِنْ سَرْكِنْ إِسْرَٰٓءِيلَ سَنْيٜىٰ دَ رِيغُنَنْ نُونَ بَڧِنْ ثِكِ دَ إِغِيَ كٜىٰوَيٜىٰ دَ وُيَنْ كُواْوَ، وَتَڧِيلَ ذَيْ بَرْكَ دَ رَيْ؞»‏

³² سُكَسَا رِيغُنَنْ نُونَ بَڧِنْ ثِكِ، سُكَ طَطَّوْرَ إِغِيُواْيِ أَوُيَنْسُ، سُكَ تَڢِے وُرِنْ أَهَبْ سُكَثٜىٰ ‏«‏بَاوَنْكَ بٜىٰنْهَدَدْ يَنَ ضُواْڧُواْ كَبَرْ شِ دَ رَيْ؞»‏ سَيْ أَهَبْ يَثٜىٰ ‏«‏أَشٜىٰ، يَنَدَ رَيْ؟ أَيْ، شِے طَنْعُوَنَنٜىٰ؞»‏

³³ دَا مَا أَبِنْدَ شُوغَبَنِّنْ سُواْجُواْجِنْ بٜىٰنْهَدَدْ سُكٜىٰ نٜىٰمَ سُجِ كٜىٰنَنْ؞ نَنْ دَنَنْ سُكَ كَرْٻِ مَغَنَرْ عَبَاكِنْ أَهَبْ سُكَثٜىٰ ‏«‏عِ، طَنْعُوَنْكَ بٜىٰنْهَدَدْ؞»‏ سَرْكِے أَهَبْ يَثٜىٰ مُسُ ‏«‏كُجٜىٰ كُكَٰوُاْشِ؞»‏ دَ بٜىٰنْهَدَدْ يَ إِسُواْ أَهَبْ يَسَا شِ يَهَوْ كٜىٰكٜىٰنْ دُواْكِ تَرٜىٰدَشِ؞

³⁴ سَعَنً بٜىٰنْهَدَدْ يَثٜىٰ وَ أَهَبْ ‏«‏ذَنْ كُواْمَرْ مَكَ دَ غَرُضُوً دَ بَابَنَ يَڨُوثٜىٰ دَغَ حَنُّنْ بَابَنْكَ؞ كَنَ كُمَ عِيَ كَڢَ وَكَنْكَ وُرَارٜىٰنْ كَاسُوَنْثِ أَ دِمَشْڧُ، كَمَرْ يَدَّ بَابَنَ يَيِ أَ سَمَرِيَ؞»‏ سَيْ أَهَبْ يَثٜىٰ مَسَ ‏«‏ذَنْ بَرْكَ كَتَڢِے بِسَغَ يَدَّ مُكَ يَرْدَ؞»‏ سُكَيِ يَرْجٜىٰجٜىٰنِيَ سَيْ عَكَ سَكِ بٜىٰنْهَدَدْ يَتَڢِے؞

وَنِ أَنَّبِے يَڟَاوَتَاوَ أَهَبْ

³⁵ بِسَغَ مَغَنَرْ يَهْوٜىٰهْ طَيَ دَغَ ثِكِنْ ڧُنْ‌غِيَرْ أَنَّبَاوَا يَثٜىٰ وَوَنِنْسُ ‏«‏إِنَ ضُواْڧُوانْكَ كَبُغٜىٰنِ!‏»‏ عَمَّا سَيْ يَڧِ يَبُغٜىٰشِ؞

³⁶ سَيْ طَيَ يَثٜىٰ ‏«‏تُنْدَيَكٜىٰ كَاڧِ كَيِ بِيَيَّ دَ مُرْيَرْ يَهْوٜىٰهْ دَظَرَرْ كَبَرْنِ، ذَاكِ ذَيْ غَمُ دَكَيْ يَكَشٜىٰكَ؞»‏ دَ يَبَرْ أَنَّبِنْ، سَيْ ذَاكِ يَغَمُ دَشِ يَكَشٜىٰشِ؞

³⁷ وَنَّنْ أَنَّبِے يَسَاكٜىٰ غَمُوَ دَ وَنِ يَثٜىٰ ‏«‏إِنَ ضُواْڧُوانْكَ كَبُغٜىٰنِ؞»‏ سَيْ وَنَّنْ مُتُمِنْ يَبُغٜىٰ شِ حَرْ يَيِ مَسَ رَوْنِ؞

³⁸ سَيْ أَنَّبِنَّنْ يَطَوْرٜىٰ ڢُسْكَرْسَ دَ ڟُمَّ دُواْمِنْ كَدَ أَغَانٜىٰ شِ؞ يَتَڢِے يَڟَيَ أَ حَنْيَ يَنَ جِضَانْ وُثٜىٰوَرْ سَرْكِے أَ حَنْيَرْ؞

³⁹ سَعَدَّ سَرْكِے يَذُواْ وُثٜىٰوَ سَيْ أَنَّبِنْ يَيِ كِرَا يَثٜىٰ ‏«‏مَيْغِرْمَ، إِنَ ثِكِنْ يَاڧِنْ، سَيْ وَنِ سُواْجَ يَكَٰوُاْ وَنِ مُتُمِنْ دَ عَكَ كَامَ عَيَاڧِنْ يَثٜىٰ إِنْ لُورَ دَشِ؞ يَكُمَ ثٜىٰ عِدَنْ مُتُمِنْ يَغُدُ ذَاعَ سَا إِنْ بِيَ دَ رَيْنَ، كُواْ كُوَ ذَاعَ سَا إِنْبِيَ أَظُرْڢَا دُبُو عُكُ؞

⁴⁰ عَمَّا يَايِنْ دَ وَطَنْسُ أَبُبُوَ سُكَ طَوْكِ حَنْكَلِنَ، سَيْ مُتُمِنْ يَغُدُ؞»‏ سَرْكِے أَهَبْ يَأَمْسَ يَثٜىٰ ‏«‏دَ بَاكِنْكَ كَشَيْدَ لَيْڢِنْكَ، دُواْمِنْ حَكَ ذَاكَ كَرْٻِ حُكُنْثِنْ؞»‏

⁴¹ سَيْ أَنَّبِنْ يَيَاغَ ڟُمَّنْدَ يَطَوْرٜىٰ ڢُسْكَرْسَ دَشِ، سَيْ نَنْ دَنَنْ سَرْكِے يَغَانٜىٰ شِے طَيَنٜىٰ دَغَ ثِكِنْ یَنْ أَنَّبَاوَا؞

⁴² سَيْ أَنَّبِنْ يَثٜىٰ وَسَرْكِے ‏«‏إِنْجِ يَهْوٜىٰهْ، ‏‹‏تُنْدَيَكٜىٰ كَا بَرْ مُتُمِنْ دَ نَارِغَا نَا كٜىٰٻٜىٰ دُواْمِنْ هَلَّكَرْوَ، تُنْدَ كَبَرْشِ دَ رَيْ، تُواْ دَ رَنْكَ ذَاعَ بِيَ أَمَيْمَكُوانْ رَنْسَ دَ رَنْ مُتَنٜىٰنْكَ ذَاعَ بِيَ أَمَيْمَكُوانْ رَنْ مُتَنٜىٰنْسَ؞›‏ »‏

⁴³ سَرْكِنْ إِسْرَٰٓءِيلَ يَكُواْمَ غِدَنْسَ أَ سَمَرِيَ دَ ٻَثِنْ رَيْ دَ بَڧِنْ ثِكِ؞