1 كُواْرِنْتِيَاوَا 1 - أَتَّوْرَتْ دَ أَنَّبَاوَاغَيْسُوَا 1 دَغَ بُلُسْ، وَنْدَ عَكَ كِرَا يَذَمَ مَنْذُواْ نَ عِيسَىٰ أَلْمَسِيحُ بِسَغَ نُڢِنْ اللَّهْ دَ كُمَ طَنْعُوَنْمُ سَسْتَنِسْ، 2 ذُوَاغَ جَمَعَرْ مَاسُبِنْ اللَّهْ وَدَّ تَكٜىٰ أَ كُواْرِنْتِ، ذُوَاغَ وَطَنْدَ عَكَ كٜىٰٻٜىٰسُ دَ ڟَرْكِے ثِكِنْ أَلْمَسِيحُ عِيسَىٰ، ذُوَا كُمَ غَ وَطَنْدَ عَكَ كِرَا سُذَمَ ڟَرْكَكَا ثِكِنْ عِيسَىٰ أَلْمَسِيحُ، تَرٜىٰدَ دُكَنْ وَطَنْدَ عَكُواْعِنَ سُكٜىٰ أَدُّعَ دَ سُونَنْ عِيسَىٰ أَلْمَسِيحُ عُبَنْغِجِنْمُ، عُبَنْغِجِنْسُ دَ نَامُ دُكَ؞ 3 أَلْحٜىٰرِ دَ سَلَمَ دَغَ اللَّهْ عُبَنْمُ دَ عُبَنْغِجِ عِيسَىٰ أَلْمَسِيحُ سُكَسَنْثٜىٰ تَرٜىٰدَكُو؞ بُلُسْ يَغُواْدٜىٰ وَ اللَّهْ 4 إِنَ غُواْدٜىٰ وَ اللَّهْ كُواْيَوْشٜىٰ دُواْمِنْكُ، سَبُواْدَ أَلْحٜىٰرِنْدَ يَبَاكُ تَوُرِنْ أَلْمَسِيحُ عِيسَىٰ؞ 5 غَمَا تَكُواْوَثٜىٰ حَنْيَ عَكَيِ مُكُ أَرْزِڧِ عَثِكِنْسَ، وَجٜىٰنْ يِنْ مَغَنَ دَ عِلِمِ دُكَ، 6 كَمَرْ يَدَّ عَكَ تَبَّتَرْ دَ شَيْدَرْمُ غَمٜىٰدَ أَلْمَسِيحُ عَثِكِنْكُ؞ 7 سَبُواْدَ حَكَ بَكُ كَاسَ سَامُنْ كُواْوَثٜىٰ إِرِنْ بَيْوَرْ رُوحَنِيَ بَ، يَايِنْ دَ كُكٜىٰ ظُبَ عِدُواْ كُنَ جِضَانْ دَاوُاْوَرْ عُبَنْغِجِنْمُ عِيسَىٰ أَلْمَسِيحُ؞ 8 عُبَنْغِجِنْمُ ذَيْ كُمَ ڧَرْڢَڢَاكُ حَرْ ذُوَا ڧَرْشٜىٰ، دُواْمِنْ كُكَسَنْثٜىٰ مَرَسَ لَيْڢِے أَ رَانَرْ دَ عُبَنْغِجِنْمُ عِيسَىٰ أَلْمَسِيحُ ذَيْ دَاوُاْ؞ 9 اللَّهْ مَيْ ثِكَ أَلْڧَوَرِ نٜىٰ، شِينٜىٰ كُمَ يَكِرَاكُ كُيِ زُمُنْثِ تَرٜىٰدَ طَنْسَ عِيسَىٰ أَلْمَسِيحُ عُبَنْغِجِنْمُ؞ رَبٜىٰ رَبٜىٰ عَثِكِنْ جَمَعَرْ مَاسُبِے 10 إِنَ ضُواْڧُوانْكُ، یَنْعُوَ، سَبُواْدَ سُونَنْ عُبَنْغِجِنْمُ عِيسَىٰ أَلْمَسِيحُ ثٜىٰوَ بَرِ بَاكِنْكُ يَذَمَ طَيَ؞ كَدَ كُذَوْنَ أَرَبٜىٰ، سَيْدَيْ كُهَطَكَيْ، كُذَوْنَ دَ نُڢِ طَيَ، تُنَانِنْكُ كُمَ طَيَ؞ 11 دُوانْ كُوَ، یَنْعُوَنَ، مُتَنٜىٰنْ غِدَنْ كُلُوِ سُنْ غَيَ مِنِ ثٜىٰوَ كُنَ ڢَطَ دَ جُونَنْكُ؞ 12 أَبِنْ دَ نَكٜىٰ نُڢِ شِينٜىٰ، كُواْوَنّٜىٰنْكُ يَنَ ڢَطِنْ أَبُ دَبَمْ، وَنِ يَنَ ثٜىٰوَ «نِے نَ بُلُسْ نٜىٰ،» وَنِ يَنَ ثٜىٰوَ «نِے نَ أَڢُواْلُّواسْ نٜىٰ،» وَنِ يَنَ ثٜىٰوَ «نِے نَ كٜىٰڢَسْ نٜىٰ،» وَنِ كُمَ يَنَ ثٜىٰوَ «نِے نَ أَلْمَسِيحُ نٜىٰ؞» 13 أَشٜىٰ، أَنْرَبَ أَلْمَسِيحُ كَشِ كَشِنٜىٰ؟ بُلُسْ نٜىٰ يَمُتُ أَغِثِّيٜىٰ دُواْمِنْكُ؟ كُواْ كُوَ أَنْيِ مُكُ بَڢْتِسْمَ دَ سُونَنْ بُلُسْ نٜىٰ؟ 14 نَاغُواْدٜىٰ وَ اللَّهْ بَنْيِ وَوَنِنْكُ بَڢْتِسْمَ بَ سَيْ كِرِسْبُسْ دَ غَايُسْ؞ 15 تَهَكَ بَاوَنْدَ ذَيْ عِيَ ثٜىٰوَ دَ سُونَنَ عَكَيِ مُكُ بَڢْتِسْمَ؞ 16 نَا كُمَ تُنَ نَايِ وَمُتَنٜىٰنْ غِدَنْ إِسْتِڢَنُسْ بَڢْتِسْمَ، عَمَّا بَنْدَ وَطَنَّنْ بَنْ سَنْ كُواْ نَيِ وَوَنِ بَڢْتِسْمَبَ؞ 17 أَيْ، عِيسَىٰ بَيْ عَيْكُواْنِ دُواْمِنْ إِنْيِ بَڢْتِسْمَبَ، سَيْدَيْ إِنْيِ عَيْكِنْ بَادَ لَابَرِ مَيْ دَاطِے، بَاتَرٜىٰدَ أَمْڢَانِ دَ حِكِمَرْ مُتُمْبَ، دُواْمِنْ كَدَ عَكَاسَ غَنِنْ دَرَجَرْ مُتُوَرْ عِيسَىٰ عَكَنْ غِثِّيٜىٰ؞ أَلْمَسِيحُ إِيكُوانْ اللَّهْ نٜىٰ دَ حِكِمَرْسَ 18 غَمَا سَڧُوانْ ثٜىٰتُواْ كَمَرْ مَغَنَرْ بَنْظَثٜىٰ غَ وَطَنْدَ سُكٜىٰ حَنْيَرْ هَلَّكَ، عَمَّا أَغَرٜىٰمُ، مُو دَ عَكٜىٰ ثٜىٰتُوانْمُ، كَلْمَرْ ثٜىٰتُواْ إِيكُوانْ اللَّهْ نٜىٰ؞ 19 دُواْمِنْ أَنْرُبُوتَ ثِكِنْ مَغَنَرْ اللَّهْ ثٜىٰوَ «ذَنْ وُاْڢِنْتَ حِكِمَرْ مَاسُ حِكِمَ؞ ذَنْ مَيْدَ وَيُوانْ مَاسُ وَيُواْ أَبِنْ بَنْظَ؞» 20 تُواْ، إِنَا مَاسُ حِكِمَ؟ إِنَا مَلَمً كُواْيَرْوَرْ مُوسَٰى؟ إِنَا وَطَنْدَ سُكٜىٰ ڟَمَّنِ سُنْ سَنْ كُواْمٜىٰ دَكُواْمٜىٰ؟ أَشٜىٰ، اللَّهْ بَيْ نُونَ ثٜىٰوَ حِكِمَرْ مَاسُ حِكِمَ تَوَنَّنْ دُونِيَا وَوَنْثِنٜىٰ بَ؟ 21 غَمَا بِسَغَ حِكِمَرْ اللَّهْ مُتَنٜىٰنْ دُونِيَا بَسُ سَنْ اللَّهْ تَوُرِنْ تَاسُ حِكِمَرْ بَ؞ أَ مَيْمَكُوانْ حَكَ، اللَّهْ يَذَاٻِ يَثٜىٰثٜىٰ وَطَنْدَ سُكَ بَادَ غَسْكِيَ غَرٜىٰشِ تَوُرِنْ لَابَرِ مَيْ دَاطِے وَنْدَ مُكٜىٰ شٜىٰلَرْسَ، وَنْدَ عَكٜىٰ كُمَ غَنِ كَمَرْ وَوَنْثِنٜىٰ؞ 22 يَهُودَاوَا سُنَ سُواْ سُغَ عَلَمَ، هٜىٰلٜىٰنَاوَا كُمَ سُنَ نٜىٰمَنْ حِكِمَ؞ 23 مُو كُوَ مُنَ وَعَظِنْ أَلْمَسِيحُ وَنْدَ يَمُتُ عَكَنْ غِثِّيٜىٰ نٜىٰ، أَبِنْدَ يَذَمَ دَلِيلِنْ تُنْتُٻٜىٰ غَ يَهُودَاوَا، أَبِنْ وَوَنْثِ كُمَ غَ وَطَنْدَ بَا يَهُودَاوَا بَ، 24 عَمَّا أَلْمَسِيحُ شِے إِيكُوانْ اللَّهْ دَ حِكِمَرْ اللَّهْ نٜىٰ غَ وَطَنْدَ عَكَ كِرَا، كُواْ سُو يَهُودَاوَا نٜىٰ، كُواْ وَطَنْدَ بَا يَهُودَاوَا بَ؞ 25 دُواْمِنْ أَبِنْدَ عَكٜىٰ غَنِ كَمَرْ اللَّهْ يَيِ وَوَنْثِنٜىٰ، يَڢِ حِكِمَرْ مُتُمْ، أَبِنْدَ كُمَ عَكٜىٰ ڟَمَّنِ كَاسَوَ ثٜىٰ تَ اللَّهْ، يَڢِ دُكْ ڧَرْڢِنْ مُتُمْ؞ 26 یَنْعُوَ، كُتُنَ يَدَّ كُكٜىٰ لُواْكَثِنْ دَ اللَّهْ يَكِرَاكُ؞ كَطَنْ دَغَ ثِكِنْكُ نٜىٰ سُكٜىٰ دَ حِكِمَ بِسَغَ غَنِنْ مُتُمْ، كَطَنْ كُمَ دَغَ ثِكِنْكُ نٜىٰ سُكٜىٰ رِڧٜىٰ دَ بَبَّنْ مَڟَيِ، كُمَ كَطَنْ نٜىٰ سُكٜىٰ یَیَنْ مَنْيَ؞ 27 عَمَّا اللَّهْ يَنَ ذَاٻَرْ أَبِنْدَ مُتَنٜىٰ سُكٜىٰ ڟَمَّنِ وَوَنْثِنٜىٰ، دُواْمِنْ يَبَا مَاسُ حِكِمَ إِرِنْ تَدُونِيَا كُنْيَا؞ اللَّهْ يَنَ ذَاٻَرْ أَبِنْدَ مُتَنٜىٰ سُكٜىٰ غَنِ كَمَرْ يَكَاسَ نٜىٰ، دُواْمِنْ يَبَا مَيْ ڧَرْڢِے كُنْيَا؞ 28 أَبِنْ دَ مُتَنٜىٰ سُكَ طَوْكَ بَاشِ دَدَرَجَ، كُواْ بَاشِ دَ أَمْڢَانِ، كُواْ كُمَ بَكُواْمٜىٰبَنٜىٰ، شِينٜىٰ أَبِنْدَ اللَّهْ يَكٜىٰ أَمْڢَانِ دَشِ يَرُشٜىٰ أَبِنْدَ مُتَنٜىٰ سُكٜىٰغَنِ كَمَرْ يَنَدَ مُهِمَّنْثِ؞ 29 اللَّهْ يَيِ دُكْ وَنَّنْ دُواْمِنْ كَدَ وَنِ طَنْ أَدَمْ يَيِ تَاڧَمَ أَغَبَنْ اللَّهْ؞ 30 اللَّهْ نٜىٰ يَسَا كُكَ كَسَنْثٜىٰ ثِكِنْ أَلْمَسِيحُ عِيسَىٰ، اللَّهْ نٜىٰ كُمَ يَسَا أَلْمَسِيحُ يَذَمَ مَنَ حِكِمَ؞ تَوُرِنْسَ نٜىٰ كُمَ مُكَ سَامِ أَدَلْثِنْ اللَّهْ دَ ڟَرْكَكٜىٰوَ دَ ڢَنْسَ؞ 31 سَبُواْدَ حَكَ، كَمَرْ يَدَّ يَكٜىٰ أَرُبُوثٜىٰ ثِكِنْ مَغَنَرْ اللَّهْ «دُكْ مَيْيِنْ تَاڧَمَ يَيِ تَاڧَمَ ثِكِنْ عُبَنْغِجِ؞» |
Hausa Common Language Ajami Bible © The Bible Society of Nigeria, 2020
Bible Society of Nigeria