1 تَارِيحِ 20 - أَتَّوْرَتْ دَ أَنَّبَاوَا

دَاوُدَ يَثِ رَبَّهْ دَ يَاڧِ

¹ دَ شٜىٰكَرَا تَسَاكٜىٰ كٜىٰوَيُواْوَ، لُواْكَثِنْ دَ سَرَاكُنَ سُكَنْ ڢِتَ يَاڧِ، سَيْ يُواْوَبْ يَڢِتَ دَ سُواْجُواْجِنْ إِسْرَٰٓءِيلَ سُكَ رُشٜىٰ ڧَسَرْ أَمُّوانْ؞ عَمَّا دَاوُدَ يَذَوْنَ عَ إِسْرَٰٓءِيلَ؞ يُواْوَبْ دَ سُواْجُواْجِنْسَ سُكَ ڢَاطَوَ رَبَّهْ دَ يَاڧِ سُكَثِ نَصَرَا؞

² دَاوُدَ يَسَا عَكَ ثِرٜىٰ هُولَرْ مُلْكِ دَغَ كَنْ سَرْكِنْسُ، عَكَسَا مَسَ عَكَيْ؞ نَوْيِنْ ظِينَارِيَ تَهُولَرْ سَرْكِنْ كُوَ يَكَيْ وَجٜىٰنْ كِلُواْ تَلَاتِنْ دَ حُطُ؞ هُولَرْ مُلْكِ كُمَ يَنَدَ أَدُوانْ دُوَڟُو مَاسُ دَرَجَ أَجِكِنْسَ؞ سَعَنً دَاوُدَ يَݣُوسُواْ كَايَنْدَ يَڨُوثٜىٰ عَيَاڧِ دَيَوَ دَغَ ثِكِنْ بِرْنِنْ؞

³ دَاوُدَ يَكُمَ ڢِتَرْدَ مُتَنٜىٰنْ بِرْنِنْ يَتِلَسْتَاسُ سُيِ عَيْكِ دَ زَرْتُواْ دَ دِغَ دَ غَاتَرِنْ بَڧِنْ ڧَرْڢٜىٰ؞ يَكُمَ سَاسُ سُيِ بُلُواكْ نَلَاكَ؞ دَاوُدَ يَيِ حَكَ غَ دُكَنْ غَرُضُوً أَمُّواْنَاوَا؞ سَعَنً دَاوُدَ دَ دُكَنْ سُواْجُواْجِنْسَ سُكَ كُواْمَ عُرُوشَلِيمَ؞

يَاڧِ دَ ڧَتِّ نَ ڢِلِسْتِيَاوَا

⁴ بَايَنْ وَنَّنْ سَيْ يَاڧِ يَٻَرْكٜىٰ أَ غٜىٰظٜىٰرْ ڟَكَانِنْ إِسْرَٰٓءِيلَ دَ ڢِلِسْتِيَاوَا؞ سَيْ سِبّٜىٰكَيْ مُتُمِنْ هُشَ يَكَشٜىٰ صِڢَّيْ وَنْدَ يَكٜىٰ طَيَ دَغَ ثِكِنْ ذُرِيَرْ ڧَتِّنْ مُتَنٜىٰنَّنْ؞ تَهَكَ عَكَشَا كَنْ ڢِلِسْتِيَاوَنْ؞

⁵ عَكَ سَاكٜىٰيِنْ يَاڧِ دَ ڢِلِسْتِيَاوَا، سَيْ عٜىٰلْهَنَنْ طَنْ يَايِرْ يَكَشٜىٰ لَمِ طَنْعُوَنْ جَالُوتَ وَنْدَ يَڢِتُواْ دَغَ غَتْ، كُمَ غِرْمَنْ سَنْدَنْ مَاشِنْسَ يَيِ كَمَ دَ تَٻَرْيَ؞

⁶ عَكَ سَاكٜىٰيِنْ وَنِ يَاڧِ أَ غَتْ؞ أَݣَويْ وَنِ ڧَتُوانْ مُتُمْ مَيْ يَڟُ شِدَ عَكُواْوَثٜىٰ حَنُّنْسَ دَ ڧَڢَرْسَ، وَتُواْ يَڟُ عَشِرِنْ دَ حُطُ دُكَ؞ مُتُمِنَّنْ شِے مَا دَغَ ذُرِيَرْ ڧَتِّنْ مُتَنٜىٰنَّنْ نٜىٰ؞

⁷ لُواْكَثِنْ دَ يَيِ مَغَنَرْ غُواْرِ غَ مُتَنٜىٰنْ إِسْرَٰٓءِيلَ، سَيْ يُواْنَتَنْ طَنْ شِمٜىٰيَ طَنْعُوَنْ دَاوُدَ يَكَشٜىٰشِ

⁸ وَطَنَّنْ نٜىٰ ذُرِيَرْ ڧَتِّ وَطَنْدَ دَاوُدَ دَ سُواْجُواْجِنْسَ سُكَ كَشٜىٰ؞