1 تَارِيحِ 17 - أَتَّوْرَتْ دَ أَنَّبَاوَا

أَلْڧَوَرِنْ دَ يَهْوٜىٰهْ يَيِ وَ دَاوُدَ

¹ سَعَدَّ دَاوُدَ يَكَامَ ذَمَ أَغِدَنْسَ نَسَرْكِے، سَيْ يَكِرَا أَنَّبِے نَتَنْ، يَثٜىٰ مَسَ ‏«‏غَا نِے، إِنَ ذَمَ ثِكِنْ غِدَا نَكَتَكَنْ سٜىٰدَ، عَمَّا عَݣُوتِنْ يَرْجٜىٰجٜىٰنِيَرْ يَهْوٜىٰهْ يَنَ ثِكِنْ تٜىٰنْتِ؞»‏

² نَتَنْ يَأَمْسَ وَ دَاوُدَ يَثٜىٰ ‏«‏كَيِ دُكْ أَبِنْدَ يَكٜىٰ أَ ذُوثِيَارْكَ، غَمَا اللَّهْ يَنَ تَرٜىٰدَكَيْ؞»‏

³ عَمَّا أَدَرٜىٰنَّنْ يَهْوٜىٰهْ يَا يِمَغَنَ دَ نَتَنْ ثٜىٰوَ

⁴ يَتَڢِے يَبَا بَاوَنْسَ وَنَّنْ سَڧُواْ ثٜىٰوَ ‏«‏إِنْجِ يَهْوٜىٰهْ، ‏‹‏كَيْ نٜىٰ ذَاكَ غِنَا مِنِ غِدَا عِنْدَ ذَنْ ذَوْنَ؟

⁵ تُنْدَغَ رَانَرْدَ نَڢِتَرْدَ مُتَنٜىٰنْ إِسْرَٰٓءِيلَ دَغَ مَصَرْ حَرْ ذُوَا يَنْذُ، بَنْ تَٻَ ذَوْنَ عَثِكِنْ غِدَا بَ؞ إِنَ ذَمَ كُلُّمْ ثِكِنْ تٜىٰنْتِ دُكْ عِنْدَ نَتَڢِے دَ مُتَنٜىٰنَ دَغَ وَنَّنْ وُرِے ذُوَا وَنْثَنْ وُرِے؞

⁶ ثِكِنْ دُكَنْ وُرَارٜىٰنْدَ نَبِے دَ مُتَنٜىٰنْ إِسْرَٰٓءِيلَ، كُواْ كَجِ نَا نُونَ دَامُوَ غَ وَطَنْدَ نَسَاسُ شُوغَبَنْثِنْ مُتَنٜىٰنَ ثٜىٰوَ دُواْمِنْ مٜىٰ بَسُ غِنَا مِنِ غِدَا نَكَتَكَنْ سٜىٰدَبَ؟›‏

⁷ ‏«‏سَبُواْدَ حَكَ، سَيْ كَثٜىٰ وَبَاوَنَ دَاوُدَ، إِنْجِنِ يَهْوٜىٰهْ مَيْ إِيكُواْ دُكَ، ‏‹‏نَا طَوْكٜىٰكَ دَغَ كِيوُانْ تُمَكِ دُواْمِنْ كَذَمَ سَرْكِنْ مُتَنٜىٰنَ إِسْرَٰٓءِيلَ؞

⁸ دُكَ عِنْدَ كَتَڢِے إِنَ تَرٜىٰدَكَيْ، نَكُمَ كَوَرْدَ أَبُواْكَنْ غَابَنْكَ؞ ذَنْ كُوَسَا كَيِ سُونَ كَمَرْ وَطَنْدَ سُكَيِ سُونَ عَدُونِيَرْ نَنْ؞

⁹ ذَنْبَا مُتَنٜىٰنَ إِسْرَٰٓءِيلَ وُرِے سُذَوْنَ؞ ذَنْسَاسُ عِنْدَ ذَاسُيِ ذَمَنْ كَنْسُ بَاتَرٜىٰدَ أَنْدَمٜىٰسُبَ كُمَ؞ بَذَاعَ سَاكٜىٰ سَامِ مُوغَيٜىٰنْ مُتَنٜىٰ سُثُوثٜىٰسُ كَمَرْ دَا بَ،

¹⁰ وَتُواْ، تُنْدَغَ لُواْكَثِنْدَ نَنَطَ مَاسُ شَرِيعَ سُنَ عَيْكِ كَمَرْ سَرَاكُنَ؞ ذَنْكُمَ بَاكَ هُوتُ دَغَ حَنُّنْ أَبُواْكَنْ غَابَنْكَ؞ ‏«‏ ‏‹‏بَنْدَ حَكَمَا نِے يَهْوٜىٰهْ ذَنْكَڢَ ذُرِيَرْكَ تَذَمَ غِدَنْ مُلْكِ؞

¹¹ بَايَنْدَ ݣُونَكِنْكَ سُنْ ڧَارٜىٰ، كَمُتُ كَكُواْمَ غَ كَاكَنِّنْكَ، ذَنْطَغَ وَنِ دَغَ ذُرِيَرْكَ دَغَ ثِكِنْ یَیَ مَظَا نَاكَ يَغَاجٜىٰكَ، ذَنْكُمَ كَڢَ مُلْكِنْسَ يَيِ ڧَرْڢِے سُواْسَيْ؞

¹² شِ ذَيْ غِنَا مِنِ هَيْكَلِ كُمَ ذَنْ كَڢَ كُجٜىٰرَرْ مُلْكِنْسَ حَرْ أَبَدَا؞

¹³ ذَنْ ذَمَ بَابَ غَرٜىٰشِ، شِيكُمَ يَذَمَ طَا أَغَرٜىٰنِ؞ بَذَنْ دَيْنَ نُونَ مَسَ ڧَوْنَتَ مَرَرْ ثَنْجَاوَا كَمَرْ يَدَّ نَيِ وَ طَالُوتَ بَ؞

¹⁴ عَمَّا ذَنْ تَبَّتَرْ دَشِ أَغِدَانَ دَ مُلْكِنَ حَرْ أَبَدَا، كُمَ كُجٜىٰرَرْ مُلْكِنْسَ ذَاتَكَڢُ حَرْ أَبَدَا؞›‏ »‏

¹⁵ نَتَنْ يَيِ وَ دَاوُدَ مَغَنَ بِسَغَ دُكَنْ وَطَنَّنْ كَلْمُواْمِ دَ كُمَ رُعُيَرْ دَ اللَّهْ يَبَيَّنَ مَسَ؞

أَدُّعَرْ غُواْدِيَ تَ دَاوُدَ

¹⁶ سَيْ سَرْكِے دَاوُدَ يَشِغَ ثِكِنْ تٜىٰنْتِ عِنْدَ عَكَ أَجِيٜىٰ عَݣُوتِنْ يَرْجٜىٰجٜىٰنِيَ نَ يَهْوٜىٰهْ يَذَوْنَ أَغَبَنْ يَهْوٜىٰهْ يَيِ أَدُّعَ يَثٜىٰ، ‏«‏وَنٜىٰنٜىٰنِے، يَا يَهْوٜىٰهْ اللَّهْ، كُمَ مٜىٰنٜىٰنٜىٰ غِدَانَ حَرْ دَ كَطَغَمُ ذُوَا وَنَّنْ مَڟَيِ؟

¹⁷ كَمَرْ وَنَّنْ مَا بَيْ عِسَابَ، يَا اللَّهْ، غَاشِ كُمَ كَيِ ذَنْثٜىٰ غَمٜىٰدَ غِدَنْ بَاوَنْكَ ثٜىٰوَ ذَيْ كَيْ ݣُونَكِے مَاسُ ڟَوُاْ؞ حَكَ كَكَنْيِ دَ یَنْ أَدَمْ، يَا يَهْوٜىٰهْ اللَّهْ؟

¹⁸ مٜىٰنٜىٰنٜىٰ كُمَ ذَنْثٜىٰ مَكَ؟ غَمَا نِے بَاوَنْكَنٜىٰ كُمَ كَاسَنِّ،

¹⁹ يَا يَهْوٜىٰهْ؞ سَبُواْدَ نِے بَاوَنْكَنٜىٰ دَ كُمَ بِسَغَ نُڢِنْ رَنْكَ، كَعَيْكَتَ عَيْكِنْ بَنْ مَامَاكِنَّنْ، كَكُمَ بَيَّنَ مَنْيَنْ أَبُبُوَنَّنْ؞

²⁰ يَا يَهْوٜىٰهْ، بَابُوَنِ كَمَرْكَ؞ بِسَغَ أَبِنْدَ مُكَجِ دَ كُنُّوَنْمُ، بَابُوَنِ اللَّهْ سَيْ كَيْ كَطَيْ!‏

²¹ أَيْ، بَابُوَتَ أَلْعُمَّ كَمَرْ مُتَنٜىٰنْكَ إِسْرَٰٓءِيلَ؞ سُونٜىٰ كَطَيْ كَجٜىٰ كَڢَنْشٜىٰسُ دُواْمِنْ سُذَمَ نَاكَ؞ كَسَامُواْ وَكَنْكَ سُونَ تَوُرِنْ أَيُّكَنْ بَنْ مَامَاكِنْدَ كَيِ لُواْكَثِنْدَ كَڢَنْشِ مُتَنٜىٰنْكَ دَغَ مَصَرْ؞ كَشَا غَبَنْ مُتَنٜىٰنْكَ كَكُواْرِ أَلْعُمَّنْ دَسُكٜىٰ عَڧَسَرْ؞

²² كَذَاٻِ إِسْرَٰٓءِيلَاوَا سُذَمَ مُتَنٜىٰنْكَ حَرْ أَبَدَا، سَعَنً كَيْ، يَا يَهْوٜىٰهْ، كَذَمَ اللَّهْ نْسُ؞

²³ ‏«‏يَنْذُ، يَا يَهْوٜىٰهْ، بَرِ كَتَبَّتَرْ دَ أَلْڧَوَرِنْدَ كَيِ وَبَاوَنْكَ دَ غِدَنْسَ، كَكُمَ تَبَّتَرْ دَشِ حَرْ أَبَدَا؞ بَرِ كَعَيْكَتَ أَبِنْدَ كَڢَطَا؞

²⁴ تَهَكَ ذَاعَ طَوْكَكَ سُونَنْكَ حَرْ أَبَدَا، حَرْ سَيْ كُواْوَ يَثٜىٰ، ‏‹‏يَهْوٜىٰهْ مَيْ إِيكُواْ دُكَ شِينٜىٰ اللَّهْ نَ إِسْرَٰٓءِيلَ؞›‏ غَاشِ كُمَ كَسَا غِدَنْ بَاوَنْكَ دَاوُدَ يَكَڢُ أَغَبَنْكَ؞

²⁵ شِيَسَا إِنَدَ ڧَرْڢِنْ حَلِ نَيِنْ وَنَّنْ أَدُّعَ حَكَ دُواْمِنْ كَارِغَا كَاثٜىٰ ذَاكَسَا ظُرِيَاتَ تَذَمَ غِدَنْ مُلْكِ؞

²⁶ تُواْ، يَنْذُ، يَا يَهْوٜىٰهْ، كَيْنٜىٰ اللَّهْ، كُمَ كَيْ كَيِ أَلْڧَوَرِنْ وَطَنَّنْ أَبُبُوَ مَاسُ ݣَوْ أَغَرٜىٰنِ، بَاوَنْكَ؞

²⁷ سَبُواْدَ حَكَ بَرِ كَأَلْبَرْكَثِ ذُرِيَرْ بَاوَنْكَ دُواْمِنْ تَثِيغَبَدَ كَسَنْثٜىٰوَ حَرْ أَبَدَا أَغَبَنْكَ؞ غَمَا، يَا يَهْوٜىٰهْ، دُكْ أَبِنْدَ كَسَاوَ أَلْبَرْكَ، ذَيْ كَسَنْثٜىٰ دَ أَلْبَرْكَ حَرْ أَبَدَا؞»‏