Zabura 6 - Littafi Mai Tsarki

Addu'ar Neman Jinƙai a Lokacin Wahala

¹ Ya Ubangiji, kada ka yi fushi, ka kuma tsauta mini! Kada ka hukunta ni da fushinka!

² Ka ji tausayina, gama na gaji tiƙis, Ka wartsarkar da ni, gama na tafke sarai.

³ Duk na damu ƙwarai da gaske. Sai yaushe wannan zai ƙare, ya Ubangiji?

⁴ Ya Ubangiji, ka zo ka cece ni, Gama kana ƙaunata, ka kuɓutar da ni daga mutuwa.

⁵ Ba za a tuna da kai a lahira ba, Ba wanda zai yabe ka a can!

⁶ Na gaji tiƙis saboda baƙin ciki, Kowane dare gadona yakan jiƙe saboda kukana. Matashin kaina ya yi sharkaf da hawaye.

⁷ Idanuna sun yi kumburi saboda yawan kuka, Har da ƙyar nake iya gani, Duk kuwa saboda abokan gābana!

⁸ Ku tafi daga nan, ku masu aikin mugunta! Ubangiji yana jin kukana.

⁹ Yana kasa kunne ga kukana na neman taimako, Yana kuwa amsa addu'o'ina.

¹⁰ Abokan gābana duka za su sha kunyar fāɗuwarsu, Suna cikin matsanancin ruɗami, Za a kwashe su farat ɗaya.