Zabura 150 - Littafi Mai Tsarki

Ku Yabi Ubangiji

¹ Yabo ya tabbata ga Ubangiji! Ku yabi Allah a cikin Haikalinsa! Ku yabi ƙarfinsa a sama!

² Ku yabe shi saboda manyan abubuwa Waɗanda ya aikata! Ku yabi mafificin girmansa!

³ Ku yabe shi da kakaki! Ku yabe shi da garayu da molaye!

⁴ Ku yabe shi da bandiri kuna taka rawa! Ku yabe shi da garayu da sarewa!

⁵ Ku yabe shi da kuge! Ku yabe shi da kuge masu amo!

⁶ Ku yabi Ubangiji dukanku rayayyun talikai. Yabo ya tabbata ga Ubangiji!