Zabura 11 - Littafi Mai Tsarki

Mafakar Adalai

¹ Na dogara ga Ubangiji domin zaman lafiya, Wauta ce idan kun ce mini, “Ka yi firiya kamar tsuntsu zuwa duwatsu,

² Domin mugaye sun ja bakkunansu, Sun kuma ɗana kibansu Domin su harbi mutanen kirki a duhu.

³ Ba abin da mutumin kirki zai iya yi Sa'ad da kome ya lalace.”

⁴ Ubangiji yana cikin tsattsarkan Haikalinsa, Yana da kursiyinsa a Sama. Yana kallon dukan mutane Yana sane da abin da suke yi.

⁵ Yana auna masu kirki da mugaye dukka, Yana ƙin marar bin doka gaba ɗaya.

⁶ Yakan aukar da garwashin wuta Da kibritu mai cin wuta a kan mugaye, Yakan hukunta su da harshen wuta mai ƙuna.

⁷ Ubangiji mai adalci ne, yana ƙaunar kyawawan ayyuka, Masu yi masa biyayya za su zauna a gabansa.