TITAS 2 - Laibaibal Thiang (BSI)

¹ Nang tu cu cawnpiaknâk dik he â tlâkmi bia kha chim:

² putar kha lungfim te le hmaizah awktlâk, â uk khomi, a dikmi zumhnâk le dawtnâk, toidornâk he um dingin cawnpiak hna;

³ pitar zong cubantuk hmaizah awktlâk in nung hna sehlaw, mi kong ceih a hmang lomi, misurhang rit a hmang lomi, ṭhatnâk cawnpiaktu si hna seh,

⁴ nutung no deuh kha an va le an fale a daw i

⁵ biachim â ralringmi, a thiangmi, chungkhar kilkhawitu le ṭha te i um ding le an va le nawl ngai dingin, cawnpiak hna, cucu Pathian bia hi thangchiat i a um sual nâkhnga lo caah a si.

⁶ Cubangin tlangval zong ruahnâk felfai ngei dingin tha pe hna,

⁷ thilṭha tuahnâk ah a lamkip in mi zohchunh awkin um law, cawnpiaknâk ah nâ biataknâk, hmaizahmi sinâk le hrawhkhawh lomi na sinâk kha langhter,

⁸ a kan dohtu hna nih thangchiatnâk ding zeihmanh an hmuhlo ruang i an ning a zah nâkhnga sawi awk umlo bia dawh kha hman i zuam.

⁹ Ṭemmi-sal hna nih anpu le nawl ngai hna sehlaw, zeithil pauh ah anmah lawmhter ding le, an pule bia let lo ding le,

¹⁰ kutkem ngei loin, zumhtlâk ansinâk tu langh terin, a lamkip in a kan Khamhtu Pathian cawnpiaknâk hi an dawhter khawh lai.

¹¹ Zeitintiah khamhnâk phâkpitu Pathian zângfahnâk cu mi vialte sinah a lang cang,

¹² cu nih cun vawlei-lei duhnâk, Pathian-zeirellonâk hi hlawt in atu lio cân ah nunning thiam in felfai tele Pathian-ṭihzah in kan nun nâkhnga a kan cawnpiak.

¹³ Ruahchannâk duhnung, a lianngan mi kan Pathian le kan Khamhtu Jesuh Krih sunparnâk he â langhnâk kha kan cuan.

¹⁴ Amah nih nawlbuarnâk vialte chungin a kan tlanh khawh nâkhnga, Amah caah thiantermi, a hlei khun in Amah mi si in, rianṭha ṭuan i â zuammi kan si khawh nâkhnga Amah hrimhrim kha kan caah â pe.

¹⁵ Nawlngeihnâk vialte he cu thil hna cu chim hna, tha pe hna law si hna. Ahohmanhnih in zomhtaih hna hlah seh.